Antai Ae E Na Karaureira Man Tangirara Iroun Te Atua?
“Ti tangiria, ba E tangirira moa.”—1 IOANE 4:19.
1, 2. (a) Bukin tera bwa moan te kakawaki iroura ataakin ae ti tangiraki? (b) Ti kainnanoa riki tangirara iroun antai?
E KANGA ngkoe iroum aron kakawakin ataakin ae ko bon tatangiraki? A nakoraoi maiuia aomata ngkana a tatangiraki man te tai are a merimeri iai ni karokoa ae a ikawai. Ko a tia n nora te merimeri ae bwabwakoaki iroun tinana ae e rangi n tatangira? N aki ongei bwaai ni kabane ake tao a riki i rarikina, ma te merimeri anne e rau ao e kukurei ni menana iroun tinana ae e mata n akoi nakoina ngkai e tangiria. Ko uringi ngkoa aron kangaanga ake ko namakin i nanon rikirakem? (1 I-Tetaronike 2:7) Tao n taai tabetai ko nanououa n aron bwaai ake ko tangiri ke ko namakini, ao ko aki naba ataia bwa tera raoi ae ko tangiria. Ma e rangi ni kakawaki iai ataakin ae ko bon tangiraki iroun tamam ma tinam! Tiaki te koaua bwa e rauaki nanom n ataakin ae ko kona ni kawariia, ni karekean buokam n am kangaanga ao n am titiraki ni kabane? E boni koaua bwa te bwai ae rangi ni kainnanoaki iroura ni maiura, bon tatangirara, bwa e kakoauaki iai bwa ti boni bongana.
2 Te tangira ae teimatoa mairouia ara karo e kanakoraoa rikiraken te aomata. Ma e kakawaki riki ataakin ae ti tangiraki iroun Tamara are i karawa ae Iehova, ibukin kanakoraoan maiura n taamnei ao nanora. Tao iai tabeman taani wareware n te maekatin aei, aika a aki mwannanoaki raoi irouia aia karo ngke a uarereke. E na aki bwara nanom ngkana ngaia anne arom. E ngae ngkana ko aki tangiraki irouia am karo, ma te Atua e onea mwin tangirakim irouia.
3. E a kanga Iehova ni kaota kakoauan tangiraia ana aomata irouna?
3 Rinanon te burabeti ae Itaia, Iehova e kaotia bwa e ngae ngke e kona ni “manuoka” natina ae mamma te tina, ma E bon aki kona ngaia ni mwanuokinia ana aomata. (Itaia 49:15) N aron anne, e aki nanououa Tawita ngke e taekina ae kangai: “Ba e kitanai tamau ma tinau, ma e na mwaneai rake n akoai Iehova.” (Taian Areru 27:10) Ai raoiroi ra ataakin anne! N aki ongeia bwa tera aroaroni maium, ma ngkana ko a tia n riki bwa te aomata ae katabuaki nakon Iehova ae te Atua, ko riai n ururinga ngkanne ae e korakora riki tangiram irouna, nakon tangiram irouia aomata tabemwaang!
Kawakiniko n Tangiram Iroun te Atua
4. E a kanga ni kakoauaki nakoia Kristian ake a maiu n te moan tienture bwa a tangiraki iroun te Atua?
4 N ningai ae ko moan ataa iai ana tangira Iehova? Tao e riki nakoim are e riki naba nakoia Kristian ake n te moan tienture. Moan te tamaroa te kabwarabwara n te ka 5 ni mwakoro n ana reta Bauro nakoia I-Rom, ae e kaota aron moan ataakin ana tangira Iehova irouia taani bure ake a ianena ma te Atua rimoa. Ti wareka iai ae kangai n te kibu 5 (BK): “A tia ni kaonaki nanora n ana tangira te Atua, iroun te Tamnei ae e Raoiroi ae ti a tia n anganaki.” E reitia ni kangai Bauro n te kibu 8: “Ma te Atua E kaota oin ana tangira nako ira n aei, ba ngke ti boni buakaka naba, ao E mate Kristo i bukira.”
5. E kanga n reke iroum ataakin korakoran ana tangira te Atua?
5 N aron naba anne, ngke ko moani kaotaaki n te koaua man ana Taeka te Atua ao ko a moanna n onimaki iai, ao e a moanna ni mwamwakuri i nanom te taamnei ae raoiroi mairoun Iehova. N te aro naba anne, ko a moanna n ota n aron raoiroin te mwakuri are e karaoia Iehova ngke e kanakomaia Natina bwa e na mate ibukim. E buokiko ikai Iehova bwa ko na ataa raoi korakoran tangiran te botannaomata irouna. E aki ringaki nanom ngkanne, n ataakin ae Iehova e a tia ni kauka te kawai nakoia aomata aika a a kona n atongaki bwa a raoiroi ma ni maiu n aki toki, e ngae ngke a bungiaki bwa taani bure aika ianena ma ngaia? Tiaki te koaua bwa ko a moanna n tangira Iehova iai?—I-Rom 5:10.
6. Bukin tera bwa n taai tabetai ti namakina ae ti aki rangi ni kaan ma Iehova?
6 Ibukina bwa e anaaki nanom n ana tangira te Atua, ko a bita aroarom nakon ae boraoi riki ma nanona, ao ko a katabua maium nakon Tamam are i karawa. Ko a raoi ngkai ma te Atua. Ma e ngae n anne, ko nanamakinna n taai tabetai bwa e a manga aki rangi n nakoraoi am iraorao ma Iehova? Ti bane ni kona n namakina anne. Ma tai mwaninga bwa e aki bibitaki aroaron te Atua. E teimatoa ni kaotiota ana tangira, n ai aron taai ae e teimatoa ni kakanakoa te riringa nakon te aonnaba. (Maraki 3:6; Iakobo 1:17) Ma a boni kona ni bitaki aroarora, e ngae ngkana tii i nanon tabeua te tai. I nanon minominon te buraneti aei, iterana e rabunaki n te ro. N aron anne, ngkana ti tannako teutana mairoun te Atua, ao ti kona n namakina te kerikaki n aron korakoran ara iraorao ma ngaia. Ti na kanga ni manga kaetiira iai?
7. E na kanga tuoan oin nanora, ni kateimatoaira n tangirara iroun te Atua?
7 Ngkana ti namakinna bwa ti a tia ni kararoaira teutana ma ana tangira te Atua, ao ti riai n titirakinira ni kangai: ‘I a tia ni kakeaa bongan ana tangira te Atua? I a tia n tannako teutana mairoun te Atua ae maiu ae tatangira, ao I a tia ni kaota mamaaran au onimaki n aroarou tabeua? I moanibwaia riki iaiangoan “ana bwai te rabata,” nakon “ana bwai te Tamnei”?’ (I-Rom 8:5-8; Ebera 3:12) Ngkana ti a tia ni kararoaira teutana mairoun Iehova, ao bon iai mwaneka aika a na touaki aika a na kaokira nakon te iraorao ae kaan ma ngaia. E kaungaira ni kangai Iakobo: “Kam na kaania te Atua, ao ane E na kaaningkami.” (Iakobo 4:8) Ira nanon ana taeka Iuta aikai: “Ma ngkami aika kam tangiraki, kam na kateimatoaingkami n ami onimaki ae moan te raoiroi, ao kam na tataro iroun te Tamnei are Raoiroi, ao kam na kawakiningkami n tangirami iroun te Atua.”—Iuta 20, 21.
E Aki Bitaki Ana Tangira te Atua E Ngae Ngkana A Bitaki Aroarora
8. Baikara bitaki aika a kona ni karina n riki nakoni maiura?
8 A bae ni bibitaki nako anuara n te maiu aei. Te Uea ae Toromon e noria bwa “[ti] bane ni bo ma te tekebuaka.” (Te Minita 9:11, BK) E kona naba ni karina ni bitaki maiura. Ti marurung ngkai, ma ti kona n rangi n aoraki n te bong are imwina. Tao e taraa n ae e teimatoa ara mwakuri ngkai, ma ti kona ni manga kakerikakaki ningabong. E kona naba ni karina n roko maten ara koraki ae tangiraki. Kristian n te aba teuana a kona n rau i nanon tabeua te tai, ma imwina, e kona ni karina n roko te bwainikirinaki ae tiritiri. Ti kona ni bukinaki n te kewe, ma ni karawawataki n te ribuaka. Eng, e aki kona n teimatoa aron te maiu aei, ao a kakarina n roko bwaai aika aki kaantaningaki.—Iakobo 4:13-15.
9. Bukin tera bwa e raoiroi rinanoakin kiibu tabeua man I-Rom mwakorona 8?
9 Ngkana ti ituaki ni bwaai aika kananokawaki, ti kona n taku bwa tao ti a kitanaki, ma n taku naba bwa e a tia ni kerikaki tangirara iroun te Atua. Kioina ngkai ti kona ni bane n namakina anne, ti riai n nenera raoi ana taeka ni kabebetenano te abotoro Bauro are e koreaki n I-Rom mwakorona 8. A kaineti taeka aikai nakoia Kristian aika kabiraki n te taamnei, ma a irekereke naba iai tiibu tabemwaang, ake a a tia n atongaki bwa a raoiroi ngkai a raona te Atua, n aron are e karaoaki naba nakon Aberaam imwain aia tai Kristian.—I-Rom 4:20-22; Iakobo 2:21-23.
10, 11. (a) Baikara bukibuki ake a tabekaki nakoia ana aomata te Atua n taai tabetai irouia kairiribai? (b) Bukin tera ngkai a aki tabe Kristian ni bukibuki aikai?
10 Wareka I-Rom 8:31-34. (BK) E titiraki ni kangai Bauro: “Ngkana e iri taangara te Atua, ao antai ae e na kauntabaira?” E koaua bwa Tatan ao te aonnaba ae buakaka aei, a kan ekinakoira. A kona ni bukinira ni bukibuki aika kewe ara kairiribai, ao a kona ni kateira n taiani kaboowi. Kaaro aika Kristian tabeman, a bukinaki bwa a ribaa natiia ibukina bwa a aki kariaia waakinan bwainnaoraki tabeua aika a urua ana tua te Atua nakoia, ao a aki kariaia naba bwa a na bukamarui aia toa beekan. (Mwakuri 15:28, 29; 2 I-Korinto 6:14-16) Kristian tabeman riki a bukinaki bwa a karitei nakon te tautaeka, ngke a rawa n ira kamateaia raoia n aomata n taiani buaka, ke n ibuobuoki ni waaki n tautaeka. (Ioane 17:16) Taani kairiribai tabeman a a tia n uaraoira n rongorongo ake a kabutii rinanon botaki ni kanakorongorongo, ao a atongia Ana Tia Kakoaua Iehova bwa te katei n Aro ae karuanikai.
11 Ma tai mwanuokina ae e taekinaki n aia bong abotoro ae kangai: “Ti ataia ba e riribaki te Aro anne n tabo nako.” (Mwakuri 28:22, BK) Akea bongan bukibuki aika kewe, bwa bon te Atua are e atongia Kristian bwa a raoiroi, ngkana a onimakina ana karea Kristo. Te koaua bwa Iehova e kona ni manga aki tangiria taan taromauriia, ngkai e a tia n anganiia te bwaintangira ae te kabanea ni kakawaki, ae Natina ae tatangiraki irouna? (1 Ioane 4:10) Ngke e a tia n uti Kristo man te mate, e a katekatekaki i angaatain te Atua, ao e a bon tei ngkai ibukia Kristian, n aron te rooia n tain te kaboowi. Antai ae e kona n ekaanako Kristo are te tia tei ibukia taan rimwina, ao antai ae e kona n rarawa nakon akoakiia aomata aika kakaonimaki iroun te Atua? Bon akea!—Itaia 50:8, 9; Ebera 4:15, 16.
12, 13. (a) Baikara bwaai aika riiriki aika a aki kona ni karaureira man tangirara iroun te Atua? (b) Tera ae e uaiakinna te Riaboro ngkai e kabatiai taiani kangaanga nakoira? (c) Bukin tera ngkai a tokabeti Kristian iai?
12 Wareka I-Rom 8:35-37. Iai te aomata ke te bwai, ae e kona ni karaureira man tangirara iroun Iehova ma Natina ae Iesu Kristo, ngkana ti aki kan raure ma ngaiia? Tatan e na bae ni kabonganaia ana aomata i aon te aba bwa a na kabatiaa aia kangaanga Kristian. I nanon te tienture are e a tibwa nako, tarira ao mwaanera ni Kristian a a tia n rinanon te bwainikirinaki ae tiritiri, n aaba aika mwaiti. A rawawata tarira ngkai n aaba tabeua, ibukin kangaanga n te kataumwane. A maraki tabeman ngkai a baki ke e aki tau aia kunnikai. Tera ae e uaiakinna te Riaboro ngkai e kariki kangaanga aikai? E taku n ana iango bwa e na kona iai ni kabwara nanoia aomata man taromaurian Iehova. E kataia ni kairira Tatan bwa ti na iangoa ae e a tia ni kerikaki tangirara iroun te Atua. Ma te koaua anne?
13 Ti a tia n reirei n ana Taeka te Atua, n aron naba Bauro are e mwanewea ae e taekinaki n Taian Areru 44:22. Ti ataia bwa a riiriki bwaai aikai nakoira ngaira aika ana “tiibu,” ibukin aran te Atua. E irekereke ma aron katabuan aran te Atua ao karaoiroan ana tautaeka i aon bwaai ni kabane. E taotaona nanona te Atua nakon rawawata aikai, ibukina bwa a na kaetaki moa bwaai aika kakawaki, ao tiaki ibukina bwa e a aki tangirira. N aki ongeia bwa taian rawawata raa aika riiriki, ma e kakoauaki nakoira bwa e aki kona ni bitaki tangiraia aomata n tatabemania nako iroun te Atua, ma e bon teimatoa. Kangaanga aika aongkoa ti konaaki iai, a na riki bwa ara tokabeti ngkana ti teimatoa ni kakaonimaki iai. Ti a kakorakoraki ma ni kateimatoaki n ataakin ae e aki kona ni mauna ana tangira te Atua.
14. Bukin tera bwa e boni kakoauaa raoi tangirana Bauro iroun te Atua, e ngae ngke a bati ni karawawataki Kristian?
14 Wareka I-Rom 8:38, 39. E aera Bauro ngke e kakoauaa bwa bon akea te bwai teuana ae e kona ni karaureia Kristian man tangiraia iroun te Atua? Bwaai aika riiriki nakon Bauro ngke e wawaakina ana mwakuri ni minita, a kakorakora nanona ni kakoauan ae e aki mauna tangirara iroun te Atua ngkana ti rinanon taiani kangaanga. (2 I-Korinto 11:23-27; I-Biribo 4:13) Iai naba ana atatai Bauro i aon ana kaantaninga Iehova ae e na waakinaki n aki toki, ao aroarona ni mwamwakuri nakoia Ana aomata rimoa. E kona te mate n tokanikai i aon tangiraia aomata aika kakaonimaki iroun te Atua? E aki! Aomata aika kakaonimaki aika mate, a na bon teimatoa ni maiu n ana ururing te Atua ae kororaoi, ao E na manga kautiia n te tai ae riai.—Ruka 20:37, 38; 1 I-Korinoto 15:22-26.
15, 16. Taekini bwaai tabeua aika a aki kona n tuka tangiraia ana toro te Atua aika kakaonimaki, irouna.
15 Kangaanga ni kabane aika a riiriki n te maiu aei, n ai aron te ikoaki ae e kona n urua te marurung, te aoraki ae kamamate, buan te kaubwai, ke te kabuanibwai teuana, a aki kona ni kamauna tangiraia ana aomata te Atua irouna. Anera aika mwaaka, n aron te anera are aki-ongeaba are e a riki ngkai bwa Tatan, a aki kona ni kaira Iehova bwa e na aki tangiria ana toro ake a tangiria. (Iobi 2:3) Taian tautaeka a kona ni katoka aia mwakuri ana toro te Atua, ma ni karabutiniia, ao ni karawawataiia ke n atongia bwa aomata aika aki tau. (1 I-Korinto 4:13) Te kairiribai ae aki-riai ae a waakinna, e kona ni kairia aomata bwa a na ribaira naba. Ma a aikoa kona ngkanne ni kaira Teuare tautaeka i aon bwaai ni kabane bwa e na kitanira.
16 Akea bukina ae ngaira aika Kristian ti na maakui bwaai aika aranaki iroun Bauro bwa “bwai nabangkai,” aika bwaai ao aroaro aika riiriki ngkai, ke “baika na roko” n taai aika i bon imwaira naba, aika a kona ni kamauna tangiraia ana aomata te Atua irouna. E ngae ngkai ti buakanaki irouia aomata ao anera aika buakaka, ma ana tangira te Atua ae kakaonimaki, e na teimatoa ni buokira. N aron are e taekinna Bauro, e aki tukaki ana tangira te Atua n “te rietata,” ke “te rinano.” Eng, akea te bwai ae e na kabwara nanora ke n taua aron nanora ae e na kona ni karaureira ma tangirara iroun te Atua; akea naba te bwai teuana ae karikaki ae e kona n urua ana iraorao te tia Karikiriki ma ana toro aika kakaonimaki. E aki kona ni bwaka ana tangira te Atua; e teimatoa n aki toki.—1 I-Korinto 13:8.
Kateimatoako i Nanon Ana Tangira ma Ana Akoi te Atua n Aki Toki
17. (a) Bukin tera bwa e raoiroi riki tangirara i roun te Atua, nakon tangiran “te maiu” aei? (b) Tera arora ni kaota ae e rangi ni kakawaki iroura tangirara iroun te Atua?
17 Kakawaki raa ana tangira te Atua iroum? Titeboo am iango ma Tawita ae kangai: “E raoiroi riki am tangira nakon te maiu, ma ngaia ae N na kamoamoako. N na karaoiroiko n au tai ni maiu, N na tabeki baiu n neboiko,” ke e kaokoro? (Taian Areru 63:3, 4, BK) Te koaua bwa iai riki te bwai teuana ae e kona n reke n te aonnaba aei, ae raoiroi riki nakon namakinan ana tangira te Atua ma reken te iraorao ma ngaia? N te katoto, te koaua bwa e raoiroi riki uaiakinan te mwakuri ae e bubura te karekemwane iai, nakon karekean te raunnano ao te kukurei ae e reke n te iraorao ae kaan ma te Atua? (Ruka 12:15) Kristian tabeman a a tia ni kaaitara ma te rinerine ae a na kakeaa Iehova, ke a na kataua kamateaia ngkana a rawa ni karaoa anne. E riki anne irouia Ana Tia Kakoaua Iehova aika mwaiti ake a mena n aia kaembwa taian Nazi i Tiaman ngkoa, ike a bwainikirinaki aomata iai, i nanon tain te Kauoua ni Buaka are Kabuta te Aonnaba. A kuri ni bane tarira ni Kristian n rineia bwa a na teimatoa i nanon tangiraia iroun te Atua, ao a kukurei ni kataua naba te mate ngkana ngaia bwa e na karaoaki nakoia. Aomata aika teimatoa ni mena i nanon tangiraia iroun te Atua, a kona n onimakina karekean te maiu are aki toki mairouna, ae te bwai ae e aki kona n reke irouia kaain te aonnaba aei. (Mareko 8:34-36) Ao e na rangi n raoiroi aron te maiu are ti na anganaki iai.
18. Bukin tera bwa moan te tangiraki te maiu are aki toki?
18 Bon tii Iehova ae e kona ni karekea te maiu are aki toki nakoia aomata, ma kataia n iangoia bwa e na tera aron te maiu are abwabwaki ngkana ai bon akea te reitaki iai ma ara tia Karikiriki. E nang aki ngkanne kakukurei, ao e na bon aki naba manena. Iehova e angania ana aomata te mwakuri ae manena ae a na karaoia i nanon boong aika kaitira aikai. Ngaia are ti kona n onimakinna bwa n te maiu are aki toki, are e nang anganira Teuare Kakannato are e kakoroi bukin ana kaantaninga nako ae Iehova, a nang bati bwaai iai aika kamimi ma ni manena, ake ti nang kona ni karaoi ke n reiakin. (Te Minita 3:11) E ngae ngkana ti na bon reita nako ara reirei i nanon ririki aika ngaa ma ngaa mwaitiia, ma ti na bon aki kona naba ni ataa raoi “kaubwain te Atua ma rabakauna ma atataina.”—I-Rom 11:33.
E Tangiringkami te Tama
19. Tera te reirei ni karaunano are e angania taan rimwina Iesu Kristo ngke e nangi nako?
19 N ana kabanea n tairiki Iesu ma ana abotoro ake a kakaonimaki ake 11, n Nitian 14 33 C.E., a bati ana taeka Iesu nakoia, ake a na kakorakoraki iai, ni kaaitarai bwaai ake a mena imwaia. A a tia n raona Iesu ni kataakina, ao a a tia naba n namakina tangiraia irouna. (Ruka 22:28, 30; Ioane 1:16; 13:1) Ao imwina, e a manga kamatoa Iesu ni kangai nakoia: “E bon tangiringkami te Tama.” (Ioane 16:27) Ai raoiroi ra taeka aikai, bwa a buokia taan rimwin Iesu n ataia ae a bon tangiraki iroun Tamaia are i karawa!
20. Tera ae ko kamatoa nanom bwa ko na karaoia, ao tera ae ko onimakinna ngkai?
20 A mwaiti aomata aika a a tia ngkai ni kakaonimaki ni beku iroun Iehova i nanon ririki aika mwaiti. Bon akea te nanououa bwa imwain tokin te waaki ae buakaka ae ngkai, ao ti na bae ni kaaitarai kataaki aika mwaiti riki. Tai kariaia te kataaki ke rawawata aikai bwa a na kananououako n aron teimatoan tangiram iroun te Atua. E aki riai n toki taekinan te koaua ae, E bon tangiriko Iehova. (Iakobo 5:11) Ti bia bane n uotii uotara, ni kaineti ma te kakaonimaki n ira nanon ana tua te Atua. (Ioane 15:8-10) Ti bia kabanea ara anga ni karaoiroa arana. Ti riai ni kamatoai nanora bwa ti na kaania riki Iehova rinanon te tataro ao te ukeuke n reirei n ana Taeka. N aki ongeia bwa tera ae e na riki rimwi, ma a na rau nanora ao ti na aki nanououa n aron teimatoan ana tangira Iehova, ngkana ti karaoa ara kabanea n raoiroi ni kakukureia nanona.—2 Betero 3:14.
Ko na Kanga ni Kaeka?
• Ti kainnanoa tangirara mairoun antai, ngkana ti na kateimatoa marurungin nanora ao tangiran bwaai n taamnei?
• Baikara bwaai aika a aki kona n tuka Iehova nakon tangiraia ana toro irouna?
• Bukin tera bwa e raoiroi riki tangirara iroun Iehova nakon tangiran “te maiu” aei?
[Taamnei n iteraniba 19]
Ngkana ti namakina ae ti a raroanako man ana tangira te Atua, ti kona ni mwakuri ni kaetii bwaai
[Taamnei n iteraniba 21]
E ataa bukin bwainikirinana Bauro