Kakabwaia Aika Reke Man Te Rongorongo Ae Raoiroi
“E kabirai Iehova, ba N na tataekina te rongorongo ae raoiroi nakoia akana nanorinano; E kanakomaiai ba N na bautia akana a uruaki nanoia ni kamaiuia, . . . ma ni kabebetei nanoia akana tang ni kabaneia.”—ITAIA 61:1, 2.
1, 2. (a) Tera ae e kaotia Iesu i bon ibukina, ao e a kanga ni karaoa anne? (b) Baikara kakabwaia aika a reke man te rongorongo ae raoiroi are e katanoataa Iesu?
E MENA Iesu n te maneaba i Natareta, n te Taabati teuana tii teutana te tai imwin moanakin ana mwakuri ni minita. E taku te rongorongo bwa “e anganaki te boki are Itaia are te burabeti. Ao ngke E kabara te boki, ao E kunea te tabo are e koreaki iai ae kangai, E mena Tamnein Iehova i aou, ba E kabirai ba N na tataekina te euangkerio.” E waakinako Iesu ni wareka riki rongorongon te taetae ni burabeti aei. Imwina, e tekateka ao e taku: “N te bong aei e a kakoroaki bukin ana taeka te Baibara aei.”—Ruka 4:16-21.
2 N te aro aei, Iesu e kaotia bwa boni ngaia te tia tataekina te euangkerio are e burabetinaki taekana, ae te tia tataekina te euangkerio ao te tia kabebetei naano. (Mataio 4:23) Ao ai raoiroi ra ana rongorongo Iesu! E kaongoia taan ongora ni kangai: “Ootan te aba Ngai: ane irai ao e na bon aki nakonako n te ro, ma e na karekea te oota ni kamaiu.” (Ioane 8:12) E a manga taku riki: “Ngkana kam botumaka n taua au taeka, ao bon au reirei ni koaua ngkami iai; ao ane kam na ata te koaua, ao e na kainaomataingkami te koaua.” (Ioane 8:31, 32) Eng, bon iai iroun Iesu “taekan te maiu are aki toki.” (Ioane 6:68, 69) Te oota, te maiu, ao te inaaomata, bon bwaai aika a rangi ni kakawaki!
3. Tera te rongorongo ae raoiroi are a tataekinna taan rimwin Iesu?
3 Imwin Bentekota 33 C.E., taan rimwin Iesu a reita nako ana mwakuri n uarongorongo. A tataekina “euangkerion uean te Atua” nakoia tibun Iteraera ao kaain baronga ake tabeua. (Mataio 24:14; Mwakuri 15:7; I-Rom 1:16) A riki ni kinaa Iehova ae te Atua, te koraki ake a butimwaeia. A kainaaomataki naba man tautoronaia i aan Aaro tabeua ao a riki bwa kaain te natanaomata n taamnei ae boou ae “ana Iteraera te Atua,” ake kaaina ake a na tautaeka n aki toki i karawa ma aia Uea, ae Iesu Kristo. (I-Karatia 5:1; 6:16; I-Ebeto 3:5-7; I-Korote 1:4, 5; Te Kaotioti 22:5) Boni kakabwaia aika rangi ni kakawaki baikanne!
Tataekinan te Euangkerio ni Boong Aikai
4. E a kakoroaki n te aro ra nanon te mwioko ibukin tataekinan te rongorongo ae raoiroi ni boong aikai?
4 Ni boong aikai, Kristian aika kabiraki, a tabe ni waakina kakoroan bukin mwiokoaia are e a kaman burabetinaki taekana are e moan anganaki Iesu, ao a boutokaki irouia “te koraki ae uanao” aika “tiibu tabemang,” ake e a tabe n rikirake ngkai mwaitiia. (Te Kaotioti 7:9; Ioane 10:16) Ibukin anne, e a rangi ni korakora tataekinan te rongorongo ae raoiroi n te aro ae tuai man noraki mai mwaina. N aaba aika 235 mwaitiia, Ana Tia Kakoaua Iehova a a tia n ‘tataekina te rongorongo ae raoiroi nakoia aika nanorinano; . . . bwa a na bautiia aika a uruaki nanoia ni kamaiuia, ma n tuatuangia taenikai te kanakoaki, ao aika kabaeaki kaukan te ne ni kabaebae; ma n tua bongin akoan te aba iroun Iehova, ma ana bong Atuara ni kareke kai; ma ni kabebetei nanoia aika tang ni kabaneia.’ (Itaia 61:1, 2) Mangaia are, aia mwakuri Kristian n tataekina te euangkerio e teimatoa ni karekei kakabwaia nakoia aomata aika mwaiti, ma ni kabebeteia “akana rawawata n rawawata nako.”—2 I-Korinto 1:3, 4.
5. Ni kaineti ma tataekinan te rongorongo ae raoiroi, a kanga Ana Tia Kakoaua Iehova ni kaokoro ma Aaro ni Krititentom?
5 E boni koaua bwa Aaro ni Krititentom a bairei waaki tabeua ibukin tataekinan te euangkerio. A mwaiti aika a kanakoia aia mitinare nakon aaba tabeua bwa a na rairia aomata man aia Aro. N te katoto, te nuutibeeba ae The Orthodox Christian Mission Center Magazine, e ribootina aron aia mwakuri mitinaren Aaro n Orthodox i Aberika maiaki, Madagascar, Tanzania, ao Zimbabwe. Ma angiia kaain Aaro n Orthodox, n ikotaki naba ma kaain Aaro riki tabeua ni Krititentom, a bon aki tataekina te rongorongo. Ma Ana Tia Kakoaua Iehova ni kabane aika a a tia ni katabui maiuia, a botumwaaka n tataekina te euangkerio. A ataia bwa tataekinan te rongorongo ae raoiroi boni kaotiotan ae iai irouia te onimaki ni koaua. E taku Bauro: “E onimaki te aba n te nano ao e karaoiroaki iai; ao e kaotaki tauani bukin Iesu n te wi ao e maiu te aba iai.” Bon akea uaan ana onimaki te aomata ngkana e aki kairia bwa e na mwamwakuri.—I-Rom 10:10; Iakobo 2:17.
Te Rongorongo ae Raoiroi ae Karekei Kakabwaia n Aki Toki
6. Tera te rongorongo ae raoiroi ae e tataekinaki ni boong aikai?
6 Ana Tia Kakoaua Iehova a tataekina te rongorongo ae te kabanea n raoiroi. A kauka aia Baibara ao a kaotia nakoia ake a butimwaea te rongorongo, bwa e kareana maiuna Iesu bwa a aonga aomata ni kawara te Atua, ni karekea kabwaran aia bure, ao te kaantaninga ibukin te maiu are aki toki. (Ioane 3:16; 2 I-Korinto 5:18, 19) A katanoataa bwa e a tia n tei Ana Tautaeka te Atua i karawa i aan ana kairiri te Uea ae kabiraki ae Iesu Kristo, ao n te tai ae kaan ngkai, e na kamauna te buakaka ni kabane mai aon te aba, ma ni mataniwina manga kaokan te Baretaiti. (Te Kaotioti 11:15; 21:3, 4) Ni kakoroan bukin ana taetae ni burabeti Itaia, a kaongoia aomata nako bwa ti mena ngkai i nanon “bongin akoan te aba iroun Iehova,” are aomata a kona iai ni butimwaea te rongorongo ae raoiroi. A kauringia naba bwa e na waekoa n roko “ana bong Atuara ni kareke kai,” are Iehova e na karokoa tokiia te koraki ake taani bure aika a aki raraoma.—Taian Areru 37:9-11.
7. Tera te rongorongo ae e kaotiota aron katiteuanakiia Ana Tia Kakoaua Iehova, ao bukin tera bwa a katiteuanaki n aron anne?
7 N te aonnaba ae e a taotira iai te rawawata ma taiani kabuanibwai, bon tii aio te rongorongo ae raoiroi ae kona ni karekei kakabwaia aika akea tokiia. Te koraki ake a butimwaeia, a na riki bwa kaain te botaki n itaritari ni Kristian ae katiteuanaki ni katobibia te aonnaba, ake a aki kariaia kakaokoron abaia, aia baronga, ke aroaroia, bwa e na karekea te iraraure irouia. A a tia ni ‘karina te tangira are te bwai ni kabaebae are kororaoi.’ (I-Korote 3:14; Ioane 15:12) E bon noraki aio n te ririki are nako n aban Aberika teuana. N te ingabong teuana a uti kaain kautun te aba arei n rebwen taiani katii, bwa e kataaki ni kabwakaki te tautaeka iai. E a riki iai te kairiribai i aon kaokoron te baronga, ao te utu teuana aika taani Kakoaua a tiribureaki ngke a butimwaea te utu teuana nakon aia auti, ae e kaokoro aia baronga ma ngaiia. A taku kaain te utu aei: “Akea aika maeka ma ngaira ma tii kaain Ana Tia Kakoaua Iehova.” A aki tabe ngaiia ma kakaokoron te reeti, bwa e kakawaki riki irouia te tangira ni Kristian ao kabebetean nanoia raoia ake a kainnanoa buokaia. E taekina aei temanna ana koraki te utu aei ae tiaki te tia Kakoaua: “Kaain Aaro nako a manga boni kamwaneia tariia n aia onimaki. Ma bon tii Ana Tia Kakoaua Iehova aika a aki.” A mwaiti rongorongo aika ai aron aikai aika a roko man aaba ake a aki rau ibukin te itabarara i bon irouia kaaina, aika a kaotia bwa bon iai irouia Ana Tia Kakoaua Iehova, ‘tangiraia taria.’—1 Betero 2:17.
E Bita Maiuia Aomata te Rongorongo ae Raoiroi
8, 9. (a) Baikara bitaki ake a reke irouia te koraki ake a butimwaea te rongorongo ae raoiroi? (b) Baikara rongorongo aika kaotiota mwaakan te rongorongo ae raoiroi?
8 Iai irekereken te rongorongo ae raoiroi ma “te maiu aei, ao te maiu are e na roko,” are taekinaki iroun Bauro. (1 Timoteo 4:8) E aki tii anga te kaantaninga ae kamimi ao ae koaua ibukin taai aika na roko, ma e karaoiroa naba “te maiu aei.” Ana Tia Kakoaua Iehova n tatabemania nako, a kairaki n Ana Taeka te Atua ae te Baibara, bwa a na kaboraoa maiuia ma ana kaantaninga te Atua. (Taian Areru 119:101) Maikanne are e a bitaki iai aroaron maiuia ngkai a tabe ni karikirakei aroaro n aron te raoiroi ao te kakaonimaki.—I-Ebeto 4:24.
9 Iangoa ana katoto Franco. Iai ana kangaanga teuaei ma te un. E bon rangi n unun ao e urubwai naba ngkana a nakobuaka ana waaki. E reirei n te Baibara buuna ma Ana Tia Kakoaua Iehova, ao ibukin te baana ni katoto ni Kristian ake a karaoi, e a buokaki Franco n noria bwa e riai ni bita aroarona. E reirei n te Baibara ma ngaiia, ao n tokina e a tokanikai ni kaotiota uaan te taamnei ae raoiroi, n aron te rau ao te taotaonakinnano. (I-Karatia 5:22, 23) E mena ibuakoia aomata aika 492 mwaitiia ake a babetitoaki i Belgium i nanon te ririki ni mwakuri ae 2001. Iangoa naba Alejandro. Te rorobuaka ni mwaane aei e tautoronaki ni bwaai ni kamanging, ao e a kerikaki maiuna ni karokoa ae e a maekana te tabo ni kabwaro maange. E reke ana mwane ibukin kabooan ana bwai ni kamanging ngke e kabooi nako bwaai ake e kunei ibuakon taiani maange. Ngke ai 22 ana ririki, kaain Ana Tia Kakoaua Iehova a kaungaa Alejandro bwa e na reirei n te Baibara, ao e kukurei iai. E katoa bong ni wareware n te Baibara ao e iriri bobotaki ni Kristian. E waekoa ni kaitiaka maiuna, ao e a aki koro onoua te namwakaina ao e a tau naba n ira tataekinan te rongorongo. Teuaei bon temanna mai buakoia aomata aika 10,115 mwaitiia ake a karaoa anne n te ririki are nako i Panama.
Te Rongorongo ae Raoiroi bon te Kakabwaia Nakoia Aomata Aika Nimamannei
10. Antai aika a butimwaea te rongorongo ae raoiroi, ao tera aron bitakin aia kaantaninga iai?
10 Itaia e burabetinna bwa e na tataekinaki te rongorongo ae raoiroi nakoia aomata aika nimamannei. Antai aomata aika nimamannei aikai? Bon te koraki ake a kabwarabwaraki taekaia n te boki ae Mwakuri bwa a “rineaki nakon te maiu are aki toki.” (Mwakuri 13:48) Bon aomata aika a nanorinano aika a kakaokoro nako aroaroia ake a butimwaea rongorongon te koaua. Aomata aikai a reireiaki bwa karaoan nanon te Atua e karekei riki kakabwaia aika a rangi ni bati nakon ae kona n reke n te aonnaba ae ngkai. (1 Ioane 2:15-17) A kanga ngkanne Ana Tia Kakoaua Iehova n rota nanoia aomata n aia mwakuri n tataekina te euangkerio?
11. Tera aron tataekinan te rongorongo ae raoiroi ni kaineti ma are taku Bauro?
11 Iangoa ana katoto te abotoro Bauro, are e korea ae kangai nakoia I-Korinto: “Taari, ngke I roko i roumi, ao I aki roko ma te rabakau n taetae ao te ataibwai, ni katanoata nako imi ana taeka te Atua ae raba. Ba e reke nanou ba N na aki ata te bwai teuana i buakomi, ma ti ae Iesu Kristo ma matena n te kaibangaki.” (1 I-Korinto 2:1, 2) E aki kataia n anaa nanoia taan ongora Bauro n rabakauna ae bati. Akea te bwai ae e reirei taekana ma bon tii koaua aika boutokoaki iroun te Atua ao a koreaki ngkai i nanon te Baibara. Nora naba ana kaunganano Bauro nakon raona ni mwakuri ae Timoteo: “Ko na tataekina ana taeka te Atua; ko na kakorakorako.” (2 Timoteo 4:2) E na tataekina “te taeka” Timoteo, are bon ana rongorongo te Atua. E a manga koroboki riki Bauro nakon Timoteo ni kangai: “Kekeiaki ni kaotiko i matan te Atua ba te aomata ae e a tia ni kakoauaki raoiroina, ao te tia makuri ae e aki mama n ana makuri, ae e tataekina te koaua n te aro ae e eti.”—2 Timoteo 2:15, BK.
12. A kanga Ana Tia Kakoaua Iehova ni boong aikai ni kakairi n ana taeka Bauro ma ana katoto?
12 Ana Tia Kakoaua Iehova a kakairi n ana katoto Bauro, ao n ana taeka naba nakon Timoteo. A ataa mwaakan ana Taeka te Atua ao a kakabongana ngkai a kaotii taeka aika karekea te kaantaninga ae raoiroi ao te raunnano, nakoia aomata nako. (Taian Areru 119:52; 2 Timoteo 3:16, 17; Ebera 4:12) E koaua bwa a boni kabonganai naba booki ake a aanaki man te Baibara bwa a aonga aomata aika kan ongora, ni kabatiaa riki aia atatai i aon te Baibara n te tai ae anga raoi irouia. Ma n taai nako a tangiria naba ni kaotii taeka man te Baibara nakoia aomata. A ataia bwa ana Taeka te Atua e na bon ringi nanoia aomata aika a nanorinano. Ao kabonganana n te aro aei irouia, e boni kakorakoraa naba aia onimaki.
“Kabebetei Nanoia Akana Tang ni Kabaneia”
13. Baikara bwaai aika riki i nanon 2001 are e a rikirake iai kainnanoakin taeka ni karaunano irouia ake a rawawata?
13 Iai naba taiani kabuanibwai aika a riki i nanon 2001, ao ibukin aei, a a mwaiti aomata aika a kainnanoa kabebetean nanoia. E noraki raoi anne i Amerika n Tebetembwa n te ririki are nako, ni kaineti ma te mwakuri n iowawa ae karaoaki n te World Trade Center are i New York, ao n te Pentagon ae uakaan ma Washington, D.C. Ai kakuba nako ra mwakuri n iowawa aikai ibukia kaain Amerika! N rikin te kangaanga aei, Ana Tia Kakoaua Iehova a kekeiaki ni kakoroa bukin mwiokoaia are a na “kabebetei nanoia akana a tang ni kabaneia.” Iai rongorongo tabeua ake a na kabwarabwaraa aroia ni kakaraoa anne.
14, 15. A kanga Taani Kakoaua ni kona ni kabonganai kiibu man te Baibara n taai aika uoua ibukin kabebetean nanoia aomata aika rawawata?
14 Te tia Kakoaua temanna ae kabwanina ana tai n tataekina te rongorongo, e kawara te aine temanna irarikin te kawai, ao e titirakinna bwa tera ana iango ibukin mwakuri n iowawa ake a a tibwa riki akekei. E tang te aine aei, ma n taku bwa e nanokawaki iai, ao e iangoia bwa tera ngke e kona n anga ana ibuobuoki iai. E tuangnga te tia Kakoaua aei bwa e bon rangi n tabeakinia aomata te Atua, ao e wareka Itaia 61:1, 2 nakoina. Taeka mairoun te Atua aikai a tangi raoi iroun te aine aei, are e taku bwa a bane n rawawata nanoia aomata nako. E butimwaea te turaeki teuana ao e butiia te tia Kakoaua bwa e na okiraki n ana auti.
15 Uoman taani Kakoaua ake a tabe n tataekina te euangkerio, a kaitiboo ma te mwaane temanna ae e tabe ni mwakuri n ana auti ni mwakuri. A kaotia bwa a kukurei ni wareka nakoina taeka ni karaunano man te Baibara, ni kaineti ma te kabuanibwai are e a tibwa riki n te World Trade Center. E kariaia teuaei, ao a wareka te 2 I-Korinto 1:3-7, are a oti iai taeka aikai: “Kabebetean te nano . . . e a manga kabatiaki naba irouni Kristo.” E rangi ni kukurei te mwaane aei irouia Taani Kakoaua aikai n aroia n tibwaa te rongorongo ae karaunano nakoia aomata tabemwaang, ao e taku: “E bia kakabwaiaa ami mwakuri ae moan te raoiroi ae kam karaoia te Atua.”
16, 17. Baikara rongorongo aika uoua, aika a kaota mwaakan te Baibara ni buokiia aomata aika rawawata ao a aki rauaki ni kabuanibwai aika riki?
16 Te tia Kakoaua temanna ae e a manga okiriia aomata ake a a tia n ongora rimoa e kaitiboo ma natin te aine are e kan ongora ngkoa. Te tia Kakoaua aei e kabwarabwaraa bwa e tabetabe nanona n aia kaantaninga aomata imwin te kabuanibwai are e a tibwa riki. E rangi ni mimi te aomata aei n aron kabanebuakan ana tai te tia Kakoaua aei ni kawaria aomata ao n ongora bwa a uara. E taekinna bwa e mwakuri n uakaan ma te World Trade Center ngke e niniaki te tabo anne, ao e nori bwaai ni kabane ake a riki iai. Ngke e titiraki bwa bukin tera bwa te Atua e taona nanona nakon te buakaka, te tia Kakoaua aei e wareki nakoina kiibu tabeua man te Baibara, n ikotaki naba ma Taian Areru 37:39 are kangai taekana: “Mairoun Iehova maiuia akana raoiroi: bon aia tabo ni kamaiu ae korakora Ngaia ni boongi ni kananoanga.” Te aomata aei e titiraki ma te akoi bwa e uara te tia Kakoaua ma ana utu, ao e kaoa naba bwa e na manga okiria, ma ni kaota kukurein nanona ibukin kawarana.
17 Ibuakoia aomata aika rawawata aika ngaa ma ngaa mwaitiia ake a kabebeteaki nanoia irouia Ana Tia Kakoaua Iehova imwin mwakuri n iowawa akekei, bon te aine temanna ae a kaitiboo ma ngaia Taani Kakoaua ngke a kawariia aomata. E bon rangi n nanokawaki neiei n te bwai are riki ao e kakauongo ngke taani Kakoaua a wareka nakoina Taian Areru 72:12-14: “E na kamaiua ane e kai nanona ngkana e bubuti; ma ane akea ana bwai, ane akea te tia buokia. Ane E na nanoangaiia akana mamara ma akana a kai nanoia, ao E na kamaiu tamneiia akana a kai nanoia. E na kamaiu tamneiia man te babakanikawai ma te tiritiri; ao a na kakaawaki raraaia i matana.” Ai nano ra taeka akanne! E titirakinia Taani Kakoaua te aine aei bwa a na wareki riki kiibu akekei ao e butimwaeia nako nanon ana auti bwa a na reita nako aia maroro. Imwain tokin aia maroro, ao e a moanaki te reirei n te Baibara ma neiei.
18. E a kanga te tia Kakoaua ni buokia aomata tabeman ngke e butiaki bwa e na tataro ibukiia?
18 Temanna te tia Kakoaua e mwakuri n te kirabu n amwarake n te tabo ae a maeka iai bwakuaku ake a tuai ni bati ni kan ongora euangkerion te Tautaeka n Uea. A aki rauaki kaain te tabo aei imwin mwakuri n iowawa akekei. N tairikin te Kanimabong imwin mwakuri n iowawa aika karaoaki, te manatia n te kirabu aei, e kaoia aomata nako bwa a na bane n tei i tinaniku n tau nenea ma ni kainababu i nanon tabeua te miniti ibukin rainanoangaaia te koraki ake a mate n te kabuanibwai. Ibukin karinean aia namakin aomata aikai, te tia Kakoaua aei e otinako naba n tei i tinaniku n aki kakarongoa. E ataia te manatia bwa teuaei boni kaain Ana Tia Kakoaua Iehova, ai ngaia are imwin te rainanoanga ao e a tuangnga bwa e na tataro ibukiia ni kabane. E kariaia te tia Kakoaua aei, ao ngke e tataro e mwanewea iai taabangakin te rawawata, ma e taekinna naba bwa a aki riai ni bwara nanoia aomata aika rawawata aikai n aki kakaantaninga reken ae raoiroi riki. E tataroakina taekan te tai are e nang aki manga riki iai te kabuanibwai ae iowawa n aron are riki, ao n taku bwa aomata ni kabane a na kona ni kaania riki te Atua ae te tia kabebetei naano, ngkana a karekea te atatai ae eti man te Baibara. Imwin atongan “Amen,” te manatia aei n ikotaki ma aomata aika a raka mwaitiia i aon 60 ake a tei i tinanikun te kirabu, a kawara te tia Kakoaua aei, ao a karabwaa, a irabwati ma ngaia, ao a taekinna bwa ai tibwa arei aia moan tai n ongo te tataro ae moan te raoiroi.
Te Kakabwaia Nakon te Botannaomata
19. Tera te rongorongo ae kaotia bwa tabeman a bon ataa raoiroiia Ana Tia Kakoaua Iehova?
19 I nanoni boong aikai, a kakabwaiaki riki aomata ake a maeka n taabo ake a mwamwakuri iai Ana Tia Kakoaua Iehova, n aron ae a a tia n taekinna aomata aika mwaiti. Bwa aomata aika a karikirakea te rau, te kakaonimaki ni kakaraoa ae raoiroi, ao te aroaro ni maiu ae itiaki, a bae ni kanakoraoa riki maiuiia aomata. N aban Atia teuana, taani Kakoaua a kaitiboo ma te aobitia ae e a tia n ritaea man te botaki ni bureitiman. E taku teuaei bwa tabena ngkoa boni kakaaean rongorongoia botaki n Aro aika kakaokoro nako. Ngke e a karaoa ana kakae i aoia Ana Tia Kakoaua Iehova, e anaaki nanona n aroaroia ni kakaonimaki ao n anuani maiuia aika raraoi. E kamoamoaa nenen aia onimaki, ao aroia n aana aia reirei i aon te Baibara. Teuaei e a kariaia te reirei n te Baibara.
20. (a) Tera ae oti mani mwin aia mwakuri Ana Tia Kakoaua Iehova n te ririki are nako? (b) Tera ae kaotia bwa e bati riki te mwakuri ae riai ni katiaaki, ao tera ara kaantaninga ibukin mwiokoara n tataekinan te euangkerio?
20 Man rongorongo tabeua aika taekinaki n te kaongora aei aika rineaki mai buakon rongorongo aika ngaa ma ngaa mwaitiia, e teretere bwa a rangi n tabetabe Ana Tia Kakoaua Iehova n te ririki ni mwakuri ae 2001.a A taetae ma aomata aika mirion ma mirion mwaitiia, a kabebetei nanoia ake a rawawata, ao e kakabwaiaki aia mwakuri n tataekina te euangkerio. Bon iai mwaitiia aomata ae 263,431 ake a kaota tian katabuani maiuia nakon te Atua rinanon te babetito. E a rikirake mwaitiia taan tataekina te euangkerio n te mwaiti ae 1.7 te katebubua ni katobibia te aonnaba. E oti man mwaitiia aomata aika 15,374,986 ake a kaea te Kauring ibukin maten Iesu ae kakaraoaki ni katoa ririki, bwa e bati riki te mwakuri ae riai ni katiaaki. (1 I-Korinto 11:23-26) Ti bia teimatoa n ukoukoriia aomata aika nimamannei ake a na butimwaea te rongorongo ae raoiroi. Ti bia teimatoa ni kabebetei nanoia aomata ake a “uruaki nanoia,” ngkai e boni waaki nako naba ana bong n akoi Iehova. Ai raoiroi ra te mwioko ae reke iroura aei! Ti boni kona ni bane n uringa ana taeka Itaia ae kangai: “N na bati ni kimareirei iroun Iehova, e na kakatonga tamneiu iroun Atuau.” (Itaia 61:10) E bia teimatoa te Atua ni kabonganaira ngkai e a tabe ni kakoroi bukin taeka ni burabeti aikai: “Te Uea ae Iehova . . . E na karikirakea te raoiroi ma te kamoamoaki i mataia botanaomata ni kabaneia.”—Itaia 61:11.
[Kabwarabwara ae nano]
a Te taibora ni ware ane n te iteraniba 17 nakon 20 e kaota mwin aia mwakuri Ana Tia Kakoaua Iehova n te ririki ni mwakuri ae 2001.
Ko Uringnga?
• A kanga aomata aika nimamannei ni kakabwaiaki man te rongorongo ae raoiroi are e tataekinna Iesu?
• Baikara kakabwaia ake a reke irouia te koraki ake a butimwaea aia mwakuri n tataekina te euangkerio taan rimwin Iesu n te moan tienture?
• A kanga ni kakabwaiaki aomata aika butimwaea te rongorongo ae raoiroi ni boong aikai?
• Tera ara kaantaninga ni kaineti ma mwiokoara ae tataekinan te euangkerio?
[Taibora n iteraniba 17]
2001 SERVICE YEAR REPORT OF JEHOVAH’S WITNESSES WORLDWIDE
(Nori booki)
[Taamnei n iteraniba 15]
A aki kona ni mwanuokina mwiokoaia Ana Tia Kakoaua Iehova ae tataekinan te euangkerio