Kakairii Iroun Te Tia Reirei Ae Kakannato

“Kam na nako ni kakiritiania botanaomata ni kabaneia . . .  n reireiia ba a na kabane baike I tuangngkami n tauu.”​—MATAIO 28:​19, 20.

1, 2. (a) Ti a kanga ngaira ni bane n riki bwa taan angareirei? (b) Ni kaineti ma te angareirei, tera te mwioko ae kaokoro ae e a tia n reke irouia Kristian ni koaua?

TE TIA angareirei ngkoe? Bon taan angareirei ngaira ni kabane. Ni katoa tai are ko anga iai te kaetieti nakon te aomata ae bua kawaina, ko reireina raom ni mwakuri aron karaoan te mwakuri teuana, ke tao ko reireina te ataei aron kabaean ana kauniwae, ao ko bon angareirei iai. E anganira te namakin ae kakukurei, buokaia aomata n aaro aikai, ke e aki?

² Bon iai mwiokoaia Kristian ni koaua ae okoro ni kaineti ma te angareirei. Ti mwiokoaki bwa ti na “kakiritiania botanaomata ni kabaneia . . .  n reireiia.” (Mataio 28:19, 20) Iai naba taai ake ti riai n angareirei iai i nanon te ekaretia. A rineaki mwaane aika tau bwa a na beku n aroia “taani kawakin ekaretia, ao taan reirei,” ibukin karikirakean te ekaretia. (I-Ebeto 4:11-13) N aia waaki ni Kristian, a riai n riki aine aika a ikawai bwa ‘taan reireinia ateiaine baika raraoi.’ (Tito 2:3-5) Ti bane ni kaumakaki bwa ti na kaungai nanoia raora n onimaki, ao ti kona ni karaoa anne ngkana ti kabonganaa te Baibara ni kateimatoai nanoia aomata iai. (1 I-Tetaronike 5:11) Ai kabwaia ra ngaira ngkai ti kona n anga reirei i aon ana Taeka te Atua, ma n tibwai reirei i aon bwaai n taamnei aika kona n rangi ni buokia aomata!

3. Ti na kanga ni kona ni katamaroa riki arora n angareirei?

³ Ma, ti na kanga ni kanakoraoa riki ara angareirei? Ngkana ti kakairii iroun te tia Reirei ae Kakannato ae Iesu. A kona n titiraki tabeman: ‘Ma ti na kanga ni kakairii iroun Iesu ae e kororaoi?’ Te koaua bwa ti aki kona ni kororaoi n aron ara angareirei. Ma n aki ongeia bwa tera ara konabwai iai, ti kona ni kabanea korakorara n anga reirei n aron are e karaoia Iesu. Ti na maroroakin ngkai arora ni kabonganai aanga aika aua, ake e kabonganai Iesu n anga reirei iai, n aron reirei ake a kai ota aomata iai, titiraki aika uaana, kaotan riain ana koaua, ao kaikonaki aika kaineti raoi ma te bwai ae maroroakinaki.

Kamataataa n te Aro ae E na Kai Ota

4, 5. (a) Bukin tera bwa kamanenaan taeka aika e kai ota te aba iai, bon te bwai ae rangi ni kakawaki ibukin reiakinan koaua man te Baibara? (b) Bukin tera ngkai ti riai n tuoi raoi taeka aika ti na kamanenai ngkana ti kan angareirei n te aro ae e kai ota?

⁴ A aki kaminomino booto n reirei aika taekinaki n ana Taeka te Atua. E tataro ni kangai Iesu: “I karaoiroiko, Tamau, . . . ba Ko karaba baikai nakoia akana rabakau ma akana wanawana, ao Ko kaotioti nakoia merimeri.” (Mataio 11:25) E kaota ana kaantaninga Iehova nakoia aomata aika nanorinano ao a raoiroi nanoia. (1 I-Korinto 1:26-​28) Mangaia are, kamatataan te bwai teuana n te aro ae e na kai ota, boni ngaia te bwai ae rangi ni kakawaki n te angareirei i aoni koaua man te Baibara.

⁵ Ngkana ko kaira te reirei n te Baibara ke tao ko okiriia aomata ake a kan ongora, ko na kanga n angareirei n te aro ae kai ota? Tera ngkoa are ti a tia n reiakinna mairoun te tia Reirei ae Kakannato? E kamanenai taeka aika bebete Iesu, n te aro are a na kai ota raoi iai aomata ake a ongoraa irouna, are angiia mai buakoia, bon aomata aika “aki reireiaki aika aki ataibwai.” (Mwakuri 4:13) Te moani bwai ae kainnanoaki n te angareirei ae kai ota, bon tuoan raoi taeka aika ti na riai ni kamanenai. Ti riai ni kamanenai taeka aika a kakabonganaki n te bong ae koraki, bwa a aonga ni kai riingaki riki iai nanoia aomata n ana Taeka te Atua ae koaua. Kamanenakin ‘taetae aika a raba’ nanoia, e kona n riki bwa kakamaakaia aomata ake a uarereke aia reirei ke e karako aia konabwai. (1 I-Korinto 2:1, 2) E kaotaki n ana katoto Iesu bwa taeka aika bebete, a mwaaka riki ni karina te koaua i nanoia aomata.

6. Ti na kanga n totokoa mangaongaon ana iango te aomata n rongorongo aika mwaiti, ngkana ti reirei ma ngaia n te Baibara?

⁶ Ngkana ti na angareirei n te aro ae e kai ota, ti bon riai ni kataia n aki kaminoa ke ni kamangaoa ana iango te aomata are ti reiakinna n te Baibara, n rongorongo aika mwaiti. E mutiakina aron aia aki konabwai taan rimwina Iesu. (Ioane 16:12) Mangaia are ti riai naba ngaira ni mutiakina aron ana aki-konabwai te aomata are ti reiakinna. N aron anne, ngkana ti kaira te reirei n te boki ae te Knowledge That Leads to Everlasting Life, tiaki nanona bwa ti na kabwarabwarai rongorongo ni kabane.a Ti na aki ienikuria kabanean mwakoron te boki ae katauaki bwa e na rinanoaki n tain te reirei, bwa e aki rangi ni kakawaki anne. Ma, e raoiroi riki ngkana ti bairea abwakin te reirei, ni kaineti ma aron ana konabwai te aomata are reiakinaki, ke kainnanona. Ti riai n uaiakina tiara, ae buokan te aomata ae ti reirei ma ngaia bwa e na riki bwa te tia rimwin Kristo, ao te tia taromauriia Iehova. E raoiroi bwa ti na anganna te tai ae tau, bwa ti aonga ni buokia bwa e na mataata raoi n te bwai are ti reiakinna ma ngaia. Ao n te aro aei, e na kona n rootaki nanona n te koaua ma ni kairia bwa e na karaoi bitaki i nanoni maiuna.​​—I-Rom 12:2.

7. Kaotii reirei aika a kona ni buokiira n angareirei n te aro ae kai ota, n ara tai ni kabwarabwara n te ekaretia?

⁷ Ti na kanga n atong taeka aika “kai ataki,” n ara tai ni kabwarabwara n te ekaretia, ao e moamoa riki ngkana a roko aomata aika boou? (1 I-Korinto 14:9) Iangoi reirei aika tenua aika a kona n ibuobuoki n aei. Te moan, kabwarabwarai taeka akana a aki rangi n ataaki, aika ko na kamanenai. A reke ara taeka aika okoro, man ara atatai n ana Taeka te Atua. Ngkana ti kamanenai taeka n aron, “te toro ae kakaonimaki ae wanawana,” “tiibu tabemaang,” ao “Baburon ae Kakannato,” tao ti riai ni kabwarabwarai raoi nanon taeka aikai bwa e aonga n ota iai te aba. Te kauoua, tai rangi ni kabwararia. Ngkana e rangi n reeanau te kabwarabwara ao e kona ni botu te tia ongora iai. E mataata riki te aba, ngkana a katukaki taeka aika a aki rangi ni kainnanoaki. Te katenua, tai kataia ni maroroakin bwaai aika bati. Tao a na kona n reke rongorongo aika kakannongora aika mwaiti man ara kakaae. Ma e raoiroi riki ngkana ti rinei mai iai ara reirei aika kakawaki aika tii tabeua, ma ni kabonganai rongorongo aika boutokai reirei aika kakawaki aikai, aika kona ni kabwarabwaraki raoi n te tai ae katauaki ibukin te reirei.

Kamanenan Titiraki Aika Uaana

8, 9. Ti na kanga n tabeka te titiraki ae kaineti raoi ma te bwai ae a na kan ongoraaia kaain te auti? Taekin katoto tabeua.

⁸ Uringnga bwa e rangi ni mwaatai Iesu n kamanenai titiraki ibukin kammwakuran ao kataneian aia iango taan rimwina, ao kairaia bwa a na kaotii bwaai ake i nanoia. E roota nanoia ana titiraki Iesu. (Mataio 16:13, 15; Ioane 11:26) Ti na kanga ngkanne ngaira, ni katotonga Iesu ni kamanenai naba titiraki n te aro ae uaana?

⁹ N tataekinan te rongorongo man te auti teuana nakon te auti teuana, ti kona ni kamanenai titiraki aika karikirakea te kan ongora, aika a na kona naba ni kauka kawaira ni maroroakina ana Tautaeka n Uea te Atua ma aomata. Ti na kanga n tabeka te titiraki ae na kaineti raoi ma te bwai ae a na kan ongoraaia kaain te auti? Kamatairikiko n taratara nako ngkana ko a uakaan ma te auti. Iai bwaai n takaakaro iai, ae kaotia bwa iai ataei n te auti anne? Ngkana ngaia anne, ao ti kona n titiraki ni kangai, ‘Ko a tia n iangoia bwa e na tera aron taraan te aonnaba ngkana a ikawai natim?’ (Taian Areru 37:10, 11) E rokanaki te mataroa ane mai moa, ke e ooaki te auti anne n te uaea? Ti kona ngkanne n titiraki ni kangai, ‘Tera am iango, e na kona n reke te tai teuana are ti na kona iai ni maeka ma te rau n akea ae e na manga iowawa nakoira ni mwengara ao n nakonakora i nanon te kawai?’ (Mika 4:3, 4) Iai te bwai ae ko noria ae e kaira am iango bwa iai te aomata ae mwauku n te auti anne? Ti kona ngkanne n titiraki n aron aei, ‘Iai te tai teuana ae a nang akea iai aomata aika aoraki?’ (Itaia 33:24) A mwaiti riki reirei aika a kona n reke n te boki ae te Reasoning From the Scriptures.b

10. Ti na kanga ni kamanenai titiraki aika a na kairiia aomata ni bunrii aia iango ao nanoia, ma tera ae ti riai naba n ururingnga?

¹⁰ Ti na kanga ni kamanenai titiraki n te aro ae uaana ngkana ti kairi reirei n te Baibara ma aomata? Ti bon aki kona ni katotonga Iesu ae e kona n nori nanoia aomata. Ma e ngae n anne, titiraki aika e aki maneang te aomata iai, aika a kaineti raoi ma te bwai are e na maroroakinaki, a na buokiira ni kairiia aomata bwa a na bunrii aia iango ao nanoia. (Taeka N Rabakau 20:5) N aron anne, iangoia bwa aongkoa ti reirei i aon te mwakoro ae “Why Living a Godly Life Brings Happiness,” n te boki ae te Knowledge. E maroroakinaki iai ana kaantaninga te Atua ibukin te babakanikawai, te wene ni bure, ao aaro riki tabeua. Tao e kona n eti ana kaeka te aomata ae ko reirei ma ngaia i aon titiraki akana a koreaki n te mwakoro anne, ma e kakoauaa te bwai ae e reiakinna? Ti kona n titirakinna ni kangai: ‘Iai riain ana kaantaninga Iehova ni kaineti ma aaro aikai iroum?’ ‘Ko na kanga ni kamanenai ana reirei te Baibara aikai i nanoni maium?’ Uringnga bwa e kakawaki kaotan te karinerine nakon te aomata ae ko reirei ma ngaia. Ti na bon aki tabeki titiraki aika a kamatauningaa ke a kamaamaaea te aomata ae reirei n te Baibara.​​—Taeka N Rabakau 12:18.

11. Tera te anga ae a na kona iai ni kamanenai titiraki n te aro ae uaana, taani kaira te kabwarabwara ibukiia aomata nako?

¹¹ A kona ni kamanenai titiraki n te aro ae uaana, aomata aika a kaira te kabwarabwara ibukiia aomata nako. A kona naba ni buokiia taan ongora, titiraki aika e aki kainnanoaki kaekaaia, n te aro are a na kammwakura aia iango iai. E kakamanenai titiraki aika aron aikai Iesu n taai tabetai. (Mataio 11:7-9) Irarikin anne, imwin ana moan taeka te tia kabwarabwara, e kona ni kamanenai titiraki aika a na buoka aron kamatataan bwaai ake a na maroroakinaki. E kona ni kangai, “N ara maroro n te bong aei, ao ti na iangoi ara kaeka nakon titiraki aikai . . . ” Ao ni kabanean ana kabwarabwara, e kona ni manga taekin titiraki akekei ibukin kauringaan booto n reirei.

12. Taekina te katoto teuana n aroia unimwaane ni Kristian ni kona ni kamanenai titiraki ni kabebetei nanoia raoia n onimaki.

¹² N aia mwakuri unimwaane ni Kristian ni kawaria kaain te ekaretia, a kona naba ni kamanenai titiraki ibukin buokaia aomata aika “a barannano” bwa a na karauaki nanoia man ana Taeka Iehova. (1 I-Tetaronike 5:14, BK) Nora te katoto. Ngkana te unimwaane e na buoka te aomata ae e uruaki nanona, e kona ni kaira ana iango te aomata anne nakon are e taekinaki n Taian Areru 34:18, ae kangai: “E a kaan Iehova ma akana a uruaki nanoia, ao E kamaiuia akana a raraoma tamneiia.” Ibukin kakoauaan ae te aomata ane e uruaki nanona anne e mataata n nanon te kibu aei, ao e kona ngkanne n titiraki te unimwaane ni kangai: ‘E kaan Iehova ma antai? Iai n taai tabetai ae ko namakinna iai bwa e “uruaki nanom” ao e “raraoma taamneim”? N aron ae e taekinna te Baibara bwa e kaan Iehova ma aomata aikai, e aki ngkanne nanonaki iai bwa e kaan naba ma ngkoe?’ Te taeka ni karaunano ae irianaki n te tangira ae korakora, e kona ni manga kabebetea nanon ane e rawawata.​​—Itaia 57:15.

Kaotan Riain Ara Koaua

13, 14. (a) Ti na kanga ni maroro ma te aomata ae e taku bwa e aki kakoauaa te Atua ae e aki kona n noria? (b) Bukin tera bwa ti na aki kaantaningaia ae a na bane n anaaki nanoia aomata ni kabane?

¹³ N ara mwakuri ni minita, ti kan riing nanoia aomata rinanon kabonganan reirei aika riai ma n anainano. (Mwakuri 19:8; 28:23,24) E nanonaki n anne bwa ti riai n reireinira aron kabonganan te rabakau n iango ae rangi ni kangaanga arona, bwa ti aonga ni kairiia aomata bwa a na kakoauaa ana Taeka te Atua? Tiaki ngaia anne. E aki riai ni kamino iango kaotan riain ara koaua. A uaana riki iango aika riai ma ni kai ota nanoia. Iangoa te katoto teuana.

¹⁴ Tera ae ti na taekinna nakon te aomata are e taku bwa e aki kakoauaa te Atua ae e aki kona n noria? Ti kona ni maroroakina aron te koaua ae ataaki irouia aomata ae iai bukin rikin bwaai ni kabane. Ngkana e riki te bwai teuana, ao ti kakoauaa bwa bon iai bukin rikin te bwai anne. Ti kona ngkanne ni kangai: ‘Ngkana arona bwa ko roko n te atimwakoro teuana ao ko nora te auti ae tamaroa karaoana ae e on ruuna teuana ae uarereke n te amwarake (te bwai ae riki), ko na boni bae ni kakoauaa bwa iai temanna ae katea te auti ao e kaona ruuna anne n te amwarake (bukin rikin anne). Ao n aron naba anne, ngkana ti nori bwaai aika raoiroi karaoaia ao te amwarake ae taonako n te aonnaba (te bwai ae riki), e aki riai ngkanne bwa ti na kakoauaa ae iai Temanna (bukin rikin anne) ae e karikii bwaai aikai?’ E rangi n raoiroi ana taeka te Baibara ae kai ota: “Ba a bane baata ni kateaki irouia aomata; ao ane katei bwaai ni kabane bon te Atua.” (Ebera 3:4) Ma, e ngae ngkana ti kaota raoi bukin ara koaua, e aki nanonaki bwa a na anaaki nanoia aomata ni kabane iai. E kauringira te Baibara bwa a na kakoauaa te rongorongo, tii “ake a rineaki nakon te maiu are aki toki.”​​—Mwakuri 13:48; 2 I-Tetaronike 3:2.

15. Baikara iango aika ti kona ni kaotii ibukin katuruturuan aroaron ao kawain Iehova, ao baikara katoto aika uoua aika a kaotii nakoira aaro aika ti na kona iai ni kamanenai aeka n iango aikai?

¹⁵ N ara tai n angareirei, tao n tataekinan te rongorongo ke n te botaki n te ekaretia, ti kona ni kaota riain ara koaua, ni katuruturua iai aroaron Iehova ao arona ni karaoi bwaai nako. Ao ae rangi ni manena riki, bon te aro ni kaotaota ae e kabonganaa Iesu n taai tabetai, ae boto i aon taeka aika ‘ai bati ra riki.’ (Ruka 11:13; 12:24) E kona ni korakora aron riingakin nanoia aomata n te maroro aei ae boto i aon kabotauan bwaai. Ni kaotaraean aki-riain te reirei i aon te ai ni moone, ti kona ni kangai: ‘Akea te tama ae taatangira ae e kona ni katuuaea natina n taua baina i aon te ai. Ai mwaiti ra riki ribaakin te koaua ae te ai ni moone iroun Tamara ae taatangira are i karawa!’ (Ieremia 7:31) Ngkana ti angareirei i aon aron Iehova ni kawakiniia ana toro n tatabemania nako, ti kona ni kangai: ‘Ngkana e atai araia itoi aika birion mwaitiia Iehova, a na mwaiti ra riki ngkanne aron kawakinaia aomata aika a tangiria ake a kabooaki n raraan Natina ae rangi ni kakawaki!’ (Itaia 40:28; Mwakuri 20:28) Kaotan iango aika anainano aikai e na buokira n riing nanoia aomata.

Kaikonaki Aika Rokoraoi

16. Bukin tera ngkai e rangi ni kakawaki kamanenaan kaikonaki n tain te angareirei?

¹⁶ Kaikonaki aika rokoraoi, bon titeboo ma bwain renganan te amwarake, ake a na kona ni kakorakoraa riki bwaruuan ara angareirei irouia aomata. Bukin tera ngkai e rangi ni kakawaki kamanenaan kaikonaki n tain te angareirei? E taekina ae kangai te tia reirei temanna: “Te konabwai n iango n akea rabwatan te bwai ke taamneina ae kona n noraki, bon te bwai ae rangi ni kangaanga karaoana irouia aomata.” Ti buokaki ni kaikonaki aikai bwa a kona ni katei taamnein bwaai aika a taekinaki n ara iango, ake a na buoka kamatataan riki iango aika boou. E kamanenai kaikonaki Iesu n te aro ae moanibaan te raoiroi. (Mareko 4:33, 34) Ao ngkai ti nang noria bwa ti na kanga ni kamanenaa te aeka n angareirei aei.

17. Baikara bwaai aika aua aika a kauaaea te kaikonaki?

¹⁷ E kanga n uaana te kaikonaki? Te moanibwai, e na riai ni kainetiia taan ongoraa, n aron kamanenaan bwaai aika a kai ota iai. Ti uringnga bwa Iesu, e anai ana kaikonaki man aroaroni maiuiia taan ongoraa ni katoa bong. Te kauoua, e riai n nakoraoi ara kaikonaki ma te bwai are e maroroakinaki, bwa ngkana e aki, ao te kaikonaki anne e na kakerikaaka kan ongoraaia taan ongora. Te katenua, e na aki rangi n reeanau te kaikonaki. Uringnga bwa Iesu e rinorinoi rongorongo ake e taekin, n aki taekin ake a aki kainnanoaki ibukin te karaki. Te kaaua, ngkana ti kabonganaa te kaikonaki, ti riai n taraia raoi bwa e mataata te bwai are ti kaikonakia. Ngkana e aki karaoaki anne, tao tabeman a na bon aki ota n aron kamanenaan te bwai are e maroroakinaki.

18. Ti na kanga ni kona n iangoi kaikonaki aika rokoraoi?

¹⁸ Ti na kanga ni kona n iangoi kaikonaki aika raraoi? Ti aki riai n otoi karaki aika ananau aika rangi ni kangaanga taekaia. A kona n nakoraoi riki kaikonaki aika kimototo. Kataia n iangoi raoi katoto aika kaineti ma te bwai ane e maroroakinaki. N aron aei, iangoia bwa aongkoa ti maroroakina tauraoin te Atua ni kabwarai buure, ao ti kani kaikonaka te bwai are e taekinaki ni Mwakuri 3:19, are e taku bwa Iehova e ‘kamaunai,’ ara bure. Bon te kabotau anne, ma tera ngkanne te katoto n aron te bwai ni koaua ae kona n noraki ae ti kona ni kamanenaa ibukin kaotan te iango aei? Tao te bwai-ni-kamauna? ke tao te onga-n-tari? Ti kona ngkanne ni kangai: ‘Ngke E kabwarai ara bure Iehova, titeboo ngke e anaa te onga-n-tari (ke te bwai-ni-kamauna) ao e kaoi ni kanakoi iai.’ E bon rangi ni kai ota te aba n te kaikonaki ae bebete aei.

19, 20. (a) Ti na kona ni kunei iia kaikonaki aika raraoi? (b) Baikara katoto tabeua i aoni kaikonaki aika uaana, ake a a tia ni boretiaki n ara boki tabeua? (Nora te bwaoki.)

¹⁹ Ko na kunei iia kaikonaki aika rokoraoi, ao katoton bwaai aika a bon riiriki i nanoni maiura? Tuoa moa ni maium ke ni maiuiia ao n aia namakin raao n onimaki aika kakaokoro nako. A kona n anaaki kaikonaki man bwaai aika mwaiti riki, n ikotaki naba ma bwaai aika maiu ao bwaai aika akea te maiu i nanoia, bwain nanon te auti, ke te bwai ae e a tibwa tia n riki n am kaawa ae e rangi n ataaki rongorongona. Te anga teuana ibukin kakaaean kaikonaki aika rokoraoi bon te kamarurung riki n “taratarai bwaai” aika otabwaninira aika irekereke ma maiura n te bong ae koraki. (Mwakuri 17:22, 23) E taekina ae kangai te boki n reirei ae kaineti ma te kabwarabwara ibukiia aomata nako: “Te tia kabwarabwara are e taratarai aroaron maiuiia aomata ma mwakuri aika kakaokoro, e tataetae ma aomata aika kakaokoro nako aroia, e karaua n tirotiroi raoi bwaai ao e titiraki ni karokoa ae e a bon ota raoi nakoina, ao e kaikoikoi kaikonaki ni karawatai, aika e kona ni kabonganai n te tai ae riai.”

²⁰ Iai riki booki aika a rawata iai kabotau aika raraoi, n aron Te Taua-n-Tantani, te Awake!, ao booki ake tabeua riki aika boretiaki irouia Ana Tia Kakoaua Iehova. Ko kona ni karekea am atatai ae mwaiti ngkana ko karauko ni wareki ao n iaiangoi raoi aron kamanenakin kaikonaki i nanon booki aikai.c Iangoa te katoto i aon te kaikonaki are e kaotaki ni barakirabe 11 n te mwakoro 17 n te boki ae te Knowledge. E kabotauaki iai aeka n aroaro nako i nanon te ekaretia ma kaa ke rebwerebwe aika kakaokoro aika a aki toki ni buti n te kawai. Bukin tera bwa e uaana te kaikonaki aei? Taraia bwa e kabotoaki i aoni bwaai aika reitaki ma maiura ni katoa bong, e kaineti raoi ma te reirei ae maroroakinaki, ao e mataata raoi nanona. Ti kona ni kamanenai kaikonaki aika a a tia ni boretiaki ngkana ti angareirei, tao ni kainetia ma are e kainnanoia te aomata ae ti reirei n te Baibara ma ngaia, ke ni bitii n ara angareirei n te ekaretia.

21. Baikara kaniwanga aika a na reke iroura ngkana ti mwaatai n angareirei n ana Taeka te Atua?

²¹ A a mwaiti kaniwangara aika a kona n reke ngkana ti riki bwa taan angareirei aika mwaatai. Ngkana ti angareirei, e nanonaki iai ae ti ibuokanibwai ma aomata; ti anga naba iai oin nanora ni buokiia. Te nano ni kan anganga aei e karekei kakukurei, bwa e taku te Baibara: “E kakabaia riki te anga nakon te anganaki.” (Mwakuri 20:35) Te kimwareirei anne bon kukureira ngaira aika taan angareirei n ana Taeka te Atua, kioina ngkai ti ataia bwa ti anganga nako te bwai ae koaua raoi are a na kakabwaiaki iai aomata ngkai ao n aki toki, ae bon te koaua ibukin Iehova. Ti kona ni karekea te namakin ae kakukurei naba, man ataakin ae ti bon toua mwin mwanekan te tia Reirei ae Kakannato ae Iesu Kristo.

[Kabwarabwara ae nano]

Ko Uringnga?

• Ti na kanga n angareirei n te aro ae kai ota, ngkana ti reirei n te Baibara ma aomata? Ao ngkana ti anga ara kabwarabwara nakoia kaain te ekaretia?

• Ti na kanga ni kona ni kamanenai raoi titiraki n te aro ae uaana ngkana ti tataekina te rongorongo n auti nako?

• Ti na kanga ni kamanenaa kaotan riain ara koaua ibukin katuruturuan aroaron Iehova ao kawaina nako?

• Ti na kona ni kunei iia kaikonaki aika rokoraoi?

[Te bwaoki/Taamnei n iteraniba 17]

Ko Uringi Kaikonaki Aikai?

Aikai boni kaikonaki tabeua aika a nakoraoi. Bukin tera bwa ko aki tarai rongorongo aika a kaotaki i nano aikai, ao n noria bwa e kanga te kaikonaki n ibuobuoki ni kanakoraoa te rongorongo are e maroroakinaki iai?

• N aron te tia katangitang ma te tia anene ke taan tabe kaako, ao ai aroia naba te koraki ake a ukoukora nakoraoin aia mare bwa e boto i aon karekean toaia ae raoiroi.​—Te Taua-n-Tantani, Turai 1 2001, iteraniba 23.

• Reiakinan kaotan te tangira, bon ai aron reiakinan te taetae ae boou.​—Te Taua-n-Tantani, Maati 1 1999, iteraniba 23-24.

• Te bure ae ituia aomata e kona ni kabotauaki ma te uruaki ae riki ngkana e rin te virus nako nanon te kombiuta.​—Is There a Creator Who Cares About You?, iteraniba 156.

• Aron Iesu ni kamaiuia ana kariki Atam e kona ni kabotauaki ma te kaubwai are e kaitiaka ana taarau te kambwana teuana, ao e a manga kamaiua te tabo ni karaobwai anne n te aro are e a manga reke kakabwaiaia taani mwakuri iai aika a rangi ni bati.​—Te Taua-n-Tantani, Beberuare 1 1999, iteraniba 21.

• E kabonganaki te tabunea irouia taimonio, n aron kabonganan te abea irouia taani kaeei man. A mwane konaia iai.​—Knowledge That Leads to Everlasting Life, iteraniba 111.

• Aomata aika tangiri taamnei aika karaoaki n te koro banna ngkoa, a na kakorakoraia ni manga katamaroa te taamnei ae uruaki. Iehova e aki tii nora aki-kororaoira, ma e nori naba aroarora aika raraoi. N te taina, e na manga bon anganira te kororaoi, n aron kororaoin Atam rimoa.​—Te Taua-n-Tantani n te taetae n Ingiriti ae bwain Beberuare 15 1990, iteraniba 22.

[Taamnei n iteraniba 14]

Bon taan angareirei Kristian ni Koaua n ana Taeka te Atua

[Taamnei n iteraniba 15]

A kona ni kamanenai titiraki unimwaane ibukin buokaia raao n onimaki ni karekei raunnanoia man ana Taeka te Atua