Aanga Aika Tenua Ibukini Katamaroaan Am Angareirei
1. Bukin tera bwa ti riai ni kakaaei aanga ibukini katamaroaan ara angareirei?
1 Bon taan angareirei taan uarongorongo ni kabane. Ti tataekina te rongorongo nakoia aomata e ngae ngkana ti moani kawariia, ti okiriia ibukini karababaan te kan ongora, ke ti reirei ma ngaiia n te Baibara. Bon te rongorongo ae kakawaki ae ti reiakinia iai. Ti kamataataa kanoan “te koroboki ae tabu” nakoia, ae kona ni ‘kawanawanaia ao ni kamaiuia.’ (2 Tim. 3:15) Ai kakawakira te mwioko aei! Aikai aanga aika tenua ibukini katamaroaan ara angareirei.
2. Ti na kanga n angareirei n te aro ae kai ota?
2 E Kai Ota: Ngkana ti ota raoi n te rongorongo ae ti maroroakinna ma te aomata, ti kona ni mwaninga are e kangaanga iai otana bwa e bon aki ataia mai mwaina. Mangaia are ni kairan te reirei n te Baibara, tai angareirei ni kabwarabwarai rongorongo aika bati n te aro ae na kangaanga iai te ota. N oneani mwin anne, katuruturui booto n reirei aika kakawaki. Bon tiaki te angareirei ae tamaroa kabatiaan te taetaenikawai. (TaeRab. 10:19) N angiin te tai, e tamaroa riki warekani kiibu aika e boto iai te maroro. Imwini warekan te kibu, tii kabwarabwaraa kanoana ae irekereke ma te maroro. E taekini koaua aika rangi n nano Iesu n ana Kabwarabwara i aon te Maunga ake a koreaki ni Mataio mwakoro 5 nakon 7, n te aro ae kai ota ao ni kabonganai tii taeka tabeua aika e rinei raoi.
3. Tera manenani kaikonaki, ao aeka ni kaikonaki raa aika tamaroa riki?
3 Kaikonaki: A kammwakura te iango kaikonaki, a rota te nano ao a kai uringaki. Tai iangoia ae aongkoa ko a riki bwa te tia karaki ngkana ko taekini kaikonaki aika kai ota. E aki toki Iesu ni kabonganai kaikonaki aika kimototo ao ni kai ota. (Mat. 7:3-5; 18:2-4) A kona naba n rangi n ibuobuoki korean taamnei aika kai ota. Ko na buokaki n iangoi kaikonaki aika uaana ngkana ko katauraoi raoi.
4. Ti na kanga ni kamanenai titiraki n te aro ae uaana?
4 Titiraki: E na buokaki n iango te aomata ae ko reirei ma ngaia, ngkana ko tabeki titiraki. Mangaia are bwaina te taotaonakinnano ngkana ko tia n titiraki. Ngkana ko waekoa n anga te kaeka, ko bae n aki ataia bwa e ota te aomata ae ko reirei ma ngaia ke e aki. N oneani mwin ae ko na tiriburea ana kaeka ae kairua, tao e raoiroi riki ngkana ko kabonganai titiraki tabeua bwa e aonga n ataa te kaeka ae eti. (Mat. 17:24-27) Ni koauana, bon taan angareirei ngaira aika ti aki kororaoi. Mangaia ae ti kaungaaki n te Baibara bwa ti na tarataraa raoi aron ara angareirei. Ni karaoan aei iroura, ti na karekei iai kakabwaia aika akea tokia ao te koraki naba ake a ongora iroura.—1 Tim. 4:16.