Kaaro, Karekei Baika A Kainnanoaki Irouia Kaain Am Utu

“Ngkana e aki katauraoi baika riai te aomata i bukia ana koraki, . . . e buakaka riki nakon ae aki onimaki.”​—1 TIMOTEO 5:8.

1, 2. (a) Bukin tera bwa e kaunganano norakia utu ni kaai n iri bobotaki ni Kristian? (b) Baikara kaangabuaka tabeua aika a kaaitara ma ngaai utu, ibukin rokoia ni bobotaki i aon te tai?

NGKANA ko taraiia kaain te ekaretia ni Kristian imwain moanakin te botaki, ao ko kona n noriia ataei aika itiaki ubuia ao ni kunnikaiaki raoi, ma n tekateka i rarikiia aia karo. E aki kakukurei noran te tangira ae kaotaki irouia utu aikai, ae tangiran Iehova ao te itangitangiri i marenaia? Ma e kai mwanuokinaki te mwakuri korakora are e karaoaki ibukin karokoaia kaain te utu n te botaki.

² N angiin te tai, a rangi n tatabetabe kaaro n te bong koraki ao a rangi n tabetabe riki n taian tairiki ake e na karaoaki iai te botaki. E na katauraoaki te amwarake, iai tabeia ake a na karaoi, ao bwaai n reirei ake a na katiaaki. A taua riki angiin te tabe kaaro, n aroia n taraia raoi bwa a na itiaki ni kabane kaain te utu, a na nuai, ao a na tauraoi i aon te tai. Ni koauana, a kona n riki kangaanga irouia ataei n taai aika aki-kaantaningaki. E kona n raeuaaki ana kawaerake are te ikawai ngkana e tabe n takaakaro. Are te bina e bawarea nako kanana. A nang moanna ni kauntaeka ataei. (Taeka N Rabakau 22:15) Tera mwina? E ngae ngke a a tia ni karaoa raoi aia babaire kaaro ma e kona ni mangao n te itera aei. Ma e ngae n ane, e kuri ni katoa tai irouia utu bwa a na mena n te Tabo n Taromauri imwain moanakin te botaki. Ai kaunga nanora norakia n roko ni katoa te wiki koraki, ni katoa ririki, ngkai a tabe n ikawai rake natiia ao ni beku iroun Iehova!

3. Ti kanga n ataia bwa a kakawaki iroun Iehova utu nako?

³ E ngae ngke e kangaanga n tabetai am mwakuri ngkoe ae te karo ao ni kakua naba, ma ko kona ni kakoauaa raoi bwa e tabeakina raoi am kakorakora Iehova. Iehova boni ngaia te tia Karika te utu. E taku Ana Taeka bwa utu nako “a aranaki mai Rouna,” are nanona bwa a maiu mairoun Iehova. (I-Ebeto 3:14, 15) Mangaia are ngkami aika kaaro, ngkana kam ukoukora kakororaoan tabemi n utu n te aro ae eti, ao kam karinea iai ara Uea ae te tia Tautaeka i aon bwaai ni kabane. (1 I-Korinto 10:31) Tiaki te koaua bwa anne bon te kakabwaia ae korakora? E bon riai ngkanne bwa ti na iangoa te mwioko are e anga Iehova nakoia kaaro. N te kaongora aei, ao ti na iangoa te mwioko ni kaineti ma katauraoakin bwaai aika a kainnanoi kaain te utu. Ti na rinanon aanga aika tenua ike e kaantaningaiia iai kaaro te Atua bwa a na katauraoi.

Katauraoi Kainnanoia n Rabwata

4. Baikara babaire i nanon te utu ake e a tia ni karaoi Iehova ibukin katauraoan baika a kainnanoia naati?

⁴ E korea ae kangai te abotoro Bauro: “Ma ngkana e aki katauraoi baika riai te aomata i bukia ana koraki, ao ai moa ra riki i bukin oin ana utu, ao e kakewea te onimaki, ao e buakaka riki nakon ae aki onimaki.” (1 Timoteo 5:8) Ngke e taekina “te aomata” ikai Bauro, ao antai are e iangoia? Bon atun te utu, ae n angiin te tai, bon te karo. E angan te aine tabena ae rine naba te Atua, bwa te tia buoka kainnabana. (Karikani Bwaai 2:18) Aine ake a taekinaki n te Baibara, a aki toki ni buokiia buiia ni katauraoi baike a kainnanoi kaain aia utu. (Taeka N Rabakau 31:13, 14, 16) Ni boong aikai, ao a a moanna n taabangaki utu aika kaka tii temanna iai te karo.a A mwaiti kaaro aika Kristian aika akea buuia, aika a karaoa te mwakuri ae moan te raoiroi ni katauraoan baika a kainnanoia kaain aia utu. Te koaua bwa e raoiroi riki ibukia kaain te utu, ngkana iai tamaia ao iai tinaia naba ae mena ma ngaiia, ao te tama ngaia are e karaoa te kairiri iai.

5, 6. (a) Baikara tabeua kaangabuaka ake a kaaitara ma ngaai te koraki ake a kataia ni katauraoi kainnanoia kaain aia utu n te itera n rabwata? (b) Kateimatoan te kaantaninga raa ni kaineti ma te mwakuri ni kareke-tianti, ae e na buokiia Kristian aika katauraoi kainnanoia kaain aia utu, bwa a na nanomwaaka?

⁵ N te 1 Timoteo 5:8, ao te aeka ni katauraoi raa are e iangoia Bauro? E iangoaki n te rongorongo aei, bwa e taetae Bauro ibukin kainnanoia kaain te utu n te itera n rabwata. N te aonnaba ni boong aikai, a mwaiti aanga n tutuki ake e kaaitara ma ngaai atun te utu ni katauraoan baika a kainnanoaki n te aro anne. Te kangaanga ma te mwane e a taabangaki n taai aikai, n aron naba te aki-mwakuri n te tai ae maan teutana, rikiraken mwaitiia aika akea aia mwakuri, ao rikiraken bobuakan te maiu. Tera ae e kona ni buoka te tia katauraoi baika a kainnanoaki bwa e na nanomwaaka ni kaaitarai kaangabuaka akanne?

⁶ E riai te tia katauraoi kainnanoia kaain ana utu n uringnga bwa e a karaoa mwiokoana mairoun Iehova. A kaotaki n ana taeka Bauro aika kairaki koreaia bwa te aomata are e kona n ira nanon te tua aei, ma e rawa ni karaoia, ai aron te aomata are “e buakaka riki nakon ae aki onimaki.” E riai te Kristian ni karaoa ana kabanea ni konaa bwa e aonga n aki atongaki iroun te Atua n te aro anne. Ma e kananokawaki bwa a mwaiti aomata n te aonnaba ni boong aikai aika “taani bangaomata.” (2 Timoteo 3:1,3) Ni koauana, a mwaiti kaaro aika a kararoaia man tabeia, ni katikuia aia utu n akea boutokaaia. Buu-mwaane aika Kristian a aki boutokaa te kaantaninga ae akea te nanoanga iai n aron anne, ni kaineti ma katauraoan baika a kainnanoaki irouia kaain aia utu. Kristian aika a katauraoi kainnanoia kaain aia utu, a aki katotong aroia raoia ni mwakuri aika bati, ma a iangoa te mwakuri ae kaboturoro are e karako iai booia, bwa e raoiroi ao e kakawaki. E kukurei naba iai Iehova ae te Atua, kioina ngke e karekea angaia bwa a na katauraoi baika a kainnanoia aia koraki aika a tangiriia.

7. Bukin tera bwa e tau raoi ibukia kaaro bwa a na kakairi n ana katoto Iesu?

⁷ A kona naba ni kunea atun utu nako bwa e ibuobuoki te kakairi n ana katoto Iesu ae kororaoi. Uringnga bwa te Baibara e taetae ni burabetina Iesu bwa “Te Tama ae Akea-tokina.” (Itaia 9:6, 7) Ngkai Iesu bon “Atam are te kaitira” e a onea mwin “te moa n aomata are Atam” n riki bwa tamaia aomata ake a onimakinna. (1 I-Korinto 15:45) E bon tau ni karonaki Iesu, bwa e aki katotonga aron Atam ni bangaaomata, ae te karo ae e iaiangoia i bon irouna. E taekina aei te Baibara ibukina: “Ti ata te tangira n aei, ngke E anga maiuna i bukira: ao e riai ba ti na anga maiura i bukiia taari.” (1 Ioane 3:16) Eng e tatauraoi Iesu ni kan anga maiuna ibukia tabemwaang. Ma ni katoa bong, e karimoaa naba kainnanoia tabemwaang ni baika uarereke nakon oin nanona. Kam riai ngkami kaaro ni kakairi n te aeka n nano anne, are ko na anga iai boni ngkoe.

8, 9. (a) Tera reireiaia kaaro mairouia mannikiba ni kaineti ma katauraoan baika a kainnanoi natiia? (b) A na kanga kaaro aika Kristian ni kaota te nano ni kan anga boni ngaiia?

⁸ A kona kaaro ni karekea riki reireiaia ibukin te tangira ae aki-bangaaomata, man ana taeka Iesu nakoia ana aomata te Atua ake a iaiangoia i bon irouia: “Ai bati ra au kani bobotiia natim, n ai aron te moaaine ngkana e botiia i aani baina!” (Mataio 23:37) E kaota ikai te banna Iesu ibukin te moaaine ae te tina are e kamanoia natina aika uarereke i aani baina ni kiba. E koaua bwa a kona kaaro n reirei man ana mwakuri ni kamanomano te tina ni mannikiba are e kukurei n ruanikai maiuna ibukin kamanoaia natina aika uarereke man te kangaanga. Ma a rangi ni kakukurei noran bwaai aika a kaakaraoi aia karo mannikiba n te bong koraki. A kibanako man ngaoia ao ni manga oki ibukin kakaaean kanaia. E ngae naba ngkana a a kani kua, ma a bon kabwakaa te amwarake nako nanon wiia natiia, ake a kawikoaia n onga kanaia ao ni manga tangira riki. A mwaiti ana karikibwai Iehova aika uarereke aika a “bati ni wanawana” n aroia n tabeakin kainnanoia natiia.​—Taeka N Rabakau 30:24.

⁹ N aron naba anne, kaaro aika Kristian ni katobibia te aonnaba a kaota te nano ni kan anga ae moan te raoiroi. Ko na bae n tangira riki kammarakam nakon are ko na kariaia kammarakaia natim. Irarikina naba ko na tatauraoi n anga nanom ni katoa bong bwa ko aonga ni katauraoi baika a kainnanoi natim. A mwaiti i buakomi aika a utimwaaka nakon aia mwakuri aika kakua ke aika kabotu ma ni kabwaranano. Ko mwakuri korakora ibukin katauraoan amwarake aika baeranti ibukin am utu. Ko kakorakorako n taraia raoi bwa a na itiaki kunnikaia natim, e na reke katanaia ae tau ao aia reirei ae bon tau. Ao ko kaakaraoi mwakuri aikai ni katoa bong ao ni katoa ririki. Ni koauana te anganano n aron aei ao te nanomwaaka iai, e kakukureia Iehova! (Ebera 13:16) Ma n te tai naba anne ko uringnga bwa a mwaiti riki aanga aika kakawaki ake ko kona ni katauraoi iai baika a kainnanoi kaain am utu.

Katauraoi Baika A Kainnanoi Ibukin te Iraorao ma te Atua

10, 11. Tera te bwai ae kainnanoaki riki irouia aomata, ao tera ae a riai kaaro aika Kristian ni karaoia moa, bwa a aonga ni kakoroa bukin te bwai ae kainnanoaki aei irouia natiia?

¹⁰ Te bwai ae kakawaki riki nakon katauraoan baika a kainnanoaki n te itera n rabwata, bon katauraoan baika a kainnanoaki ibukin kateimatoan te iraorao ma te Atua. E taku Iesu: “E aki maiu te aomata n ti te berena, ma e maiu n taeka nako aika a oti nako mai win te Atua.” (Mataio 4:4; 5:3) Tera ae kam kona ni karaoia ngkami kaaro, ni katauraoi baika a kainnanoaki ibukin kateimatoan te iraorao ma te Atua?

¹¹ N te itera aei, tao akea riki te kibu teuana n te Baibara ae bati n okioki mwaneweana nakon Te Tua-Kaua 6:5-7. Taiaoka kauka am Baibara ao wareki kiibu akanne. Noria bwa a tuangaki iai moa kaaro bwa a na karikirakea oin aia onimaki i bon irouia, ni karikirakea tangiran Iehova, ao ni karina ana taeka i nanoia. Eng, ko riai n riki bwa te tia nenera Ana Taeka te Atua ae botumwaaka, ni wareka te Baibara ni katoa tai, ao ni kananoa am iango iai bwa ko aonga ni karikirakea raoi te ota ni koaua ma tangiran kawain Iehova, ana boto-n-reirei, ao ana tua nako. Ibukin anne, e na on nanom ni koaua man te Baibara ke a na kairiko bwa ko na namakina te kimwareirei, te karinerine, ao te tangira ibukin Iehova. A na bati bwaai aika raraoi aika ko na tibwaia nakoia natim.​—Ruka 6:45.

12. A na kanga kaaro ni kakairi n ana katoto Iesu ngkana e a boo aia tai ni karin koaua man te Baibara i nanoia natiia?

¹² Kaaro aika korakora n te onimaki, a tauraoi ni maiuakina te reirei are e kuneaki n Te Tua-Kaua 6:7, ibukin “reireiia raoi” natiia ana taeka Iehova n taai ake a reke angaia iai. “Reireiia raoi” e nanona ikai reiakinaia ao kaotan kakawakina nakoia, rinanon kaokiokan taekinana. E atai raoi Iehova arora ni kabane ao riki ataei, ae ti kainnanoa te okioki bwa ti aonga ni karekea reireiaia. Mangaia are e kaokioki taeka Iesu n ana mwakuri ni minita. N te katoto, ngke e reireia taan rimwina bwa a na nanorinano n onean mwin are a na kainikatonga ao ni kakaiangatoa, ao e kunei kawai aika kakaokoro nako ibukin kaokiokan te boto-n-reirei ae tii teuana. E reireinia rinanon kaotan bukina nakoia, rinanon te kabotau, ao riki, ai kateretereana nakoia. (Mataio 18:1-4; 20:25-​27; Ioane 13:12-​15) Ma e kamimi bwa e tuai ma ni kaota te nano n aki taotaonannano Iesu. N aron naba anne a riai kaaro ni kakaaei aanga ake a na reireinia iai natiia taekan moan reirei aika koaua, n taotaona nanoia ni kaokioki ana kaetieti Iehova ni karokoa ae a kona ataei ni karin raoi i nanoia ao ni maiuakin.

13, 14. Baikara taai tabeua aika a kona iai kaaro ni karin koaua man te Baibara i nanoia natiia, ao bwaai n ibuobuoki raa aika a kona ni kabonganai?

¹³ Te botaki n reirei n utu bon taai aika angaraoi ibukin aeka n reirei akanne. Ni koauana, te reirei ae kakukurei man te Baibara n te utu, ae katoatai, ae e kateimatoaia kaaina, bon ngaia raoi kakorakoraia kaain te utu n te onimaki. A kukurei utu ni Kristian ni katobibia te aonnaba n reirei aikai, ni kabonganakin raoi taiani boki ake a katauraoaki rinanon ana botaki Iehova ao ni kaboraoa te reirei ma baike a kainnanoi natiia. E a tia n riki te boki ae Learn From the Great Teacher bwa te bwai n tituaraoi ae rianako arona ni kaineti ma aei, n aron naba te boki ae Questions Young People Ask​—Answers That Work.b Ma te reirei n utu bon tiaki tii ngaia te tai are a na reiakinaki iai ataei.

¹⁴ N aron ae e kaotaki n Te Tua-Kaua 6:7, a mwaiti taai ake kam kona iai ngkami kaaro ni maroroakin bwaai aika irekereke ma te Atua ma natimi. Ngkana kam kaai ni mwananga, ni karaoi tabemi n te mwenga, ke ni kaakibotu, kam kona ni kunei taai aika angaraoi ibukin katauraoan baike a kainnanoi natimi ni kaineti ma aia iraorao ma te Atua. Ni koauana, kam aki riai ni bwabwarantiko nakoia natimi n taekan koaua man te Baibara, n akea tokina. Ma kataia karaoa te maroro n utu bwa e na kaunga ma ni kateimatoai nanoia nakon tangiran te Atua. N te katoto, iai n te maekatin ae te Awake! kaongora aika bati aika kakaokoro nako. Aeka ni kaongora aikai a kona ni kauka te kawai ibukin maroroakinan ana karikibwai Iehova aika taiani man, taabo aika tamaroa ni katobibia te aonnaba, ao ai kateia aomata aika kakaokoro nako ma ni kamimi ma aron maiuiia. Aeka ni maroro aikai a kona ni kairiia ataei bwa a na kani wareware riki ni booki aika katauraoaki irouia te koraki aika te toro ae kakaonimaki ae wanawana.​—Mataio 24:45-​47.

15. Tao a na kanga kaaro ni buokiia natiia bwa a na iangoa te mwakuri ni minita bwa e na kamaiu ma ni kakukurei?

¹⁵ Bwainan te mamaroro ae kateimatoaa te aba ma natim, e na buokiko ni kanuaa kainnanoia riki n te itera n taamnei. A riai natiia Kristian n reiakinaki tibwakin aia onimaki n te aro ae uaana ma tabemwaang. Ngkana a taekin bwaai aika kakawaki ake a anaaki nanoia iai n Te Taua-n-Tantani ke te Awake! ko kona ngkanne ni kakaaei taai aika angaraoi ibukin kairekerekean te rongorongo anne n te mwakuri ni minita. N te katoto, ko kona n titiraki ni kangai: “Tiaki te koaua bwa e kakukurei ngkana a ataa te rongorongo aei aomata ibukin Iehova? N am iango ti na kanga ni karekea temanna bwa e na kan ongora n te rongorongo aei?” A kona ni buokiia ataei maroro n aron aikai bwa a na karikirakea tangiran tibwakin te bwai are a reiakinna. Imwina, ngkana a iriko natim n te mwakuri ni minita, ao a nora raoi iai te katoto ae koaua ibukin kamanenakin maroro akanne. A kona naba n ataia bwa e kamaiu te mwakuri ni minita ao bon te mwakuri ae kakukurei, ae karika te raunnano ae bati ao te kimwareirei.​—Mwakuri 20:35.

16. Tera ae a kona n reiakinna ataei man te kakauongo n aia tataro aia karo?

¹⁶ Kaaro, a katauraoi naba kainnanoia natiia ni bwaai n taamnei ngkana a tataro. E reireinia taan rimwina Iesu aron te tataro, ao e tataro ma ngaiia n taai aika bati. (Ruka 11:1-​13) Iangoa aron mwaitin are a reiakinna man te kaai n tataro ma oin Natin Iehova are Iesu! N aron naba anne a kona am ataei ni karekei reireiaia aika bati man am tataro ma ngaiia. A kona n reireiaki ae e tangirira Iehova bwa ti na inaaomata n taetae mai nanora nakoina, ni kawaria ma tabeaiangara nako. Eng, a kona ni buokaki natim n am tataro bwa a na reiakinaki te koaua n taamnei ae kakawaki ae kangai: A kona ni karekea aia iraorao ma Tamaia are i karawa.​—1 Betero 5:7.

Katauraoan Buokan Aia Namakin

17, 18. (a) E a kanga te Baibara ni kaota kakawakin kaotan te tangira nakoia ataei? (b) A na kanga kaaro n riai ni katotonga Iehova ni kaotiota aia tangira nakoia natiia?

¹⁷ Ni koauana, a kainnanoa naba buokan aia namakin, ataei. Ana Taeka te Atua e tuangia kaaro aron kakawakin tabeakinan te itera aei. N te katoto, a kaungaki aine-n-umwa aika ataei riki bwa “a na tangiriia naba natiia.” E irekereke karaoan aei irouia ma kawanawanan te tina ae ataei riki. (Tito 2:4) Ni koauana, e riai kaotan te tangira nakoia ataei. E reireiaki iai te ataei bwa e na tatangira, ae te aro ae e na reke iai kakabwaiana aika teimaan. N te itera teuana, e bon aki riai, aki-kaotan te tangira nakoia ataei. E karika te maraki ae korakora ao e aki katotongaki iai Iehova are e kaota te tangira ae bati nakoira e ngae ngke ti aki kororaoi.​—Taian Areru 103:8-​14.

¹⁸ E biririmoa naba Iehova n tangiriia natiia aomata. N aron ae e taekinaki n te 1 Ioane 4:19, e oti iai bwa “E tangirira moa.” Ngkami aika kaaro, kam riai ni kakairi n ana katoto Iehova, ni biririmoa ni karekea te reitaki ae tatangira i marenami ma natimi. E kaumakiia kaaro te Baibara bwa a na aki kauniia natiia, “ba a kawa n toki nanoia.” (I-Korote 3:21) A kona ataei n rangi n un riki ni bwaai tabeua ni kabotauaki ma unia ngkana a noria bwa a aki tangiraki ke a kakeaaki bongaia irouia aia karo. Kaaro aika a rawa ni kaota aia namakin, a raoiroi riki n ururinga ana katoto Iehova. E taetae naba Iehova mai karawa ni kaota kukureina ao ana tangira ibukin Natina. (Mataio 3:17; 17:5) E boni bae ni kaungaaki iai nanon Iesu! N aron naba anne a karekea te korakora ataei ao te ninikoria man aroia aia karo ni kaotiota raoi aia tangira ao kukureia irouia.

19. Bukin tera bwa e kakawaki te reirei ni kaetietiia ataei, ao tera te bwai ae riai are a kakorakoraia iai kaaro n iangoa rekena?

¹⁹ Ni koauana, aia tangira kaaro e aki riai bwa e na kaotiotaki tii n te taetae. E kaotaki raoi te tangira n te mwakuri. Katauraoan baika a kainnanoi n te itera n rabwata ao n te itera n taamnei, e kona n riki bwa kaotan aia tangira kaaro ao riki ngkana a karaoa aei kaaro n te aro are e kaotaki iai bwa e aanaki aia mwakuri n te tangira. Irarikin anne, e kakawaki te reirei ni kaetieti ibukin kaotiotan aia tangira kaaro. Ni koauana “e kamarakiia n reireia” akana e tangiriia Iehova. (Ebera 12:6) N te itera teuana, te kabwaka n anga te reirei ni kaetieti nakoia ataei, boni kaotan ae a aki tatangira kaaro! (Taeka N Rabakau 13:24) E kateimatoaa te aroaro ae riai Iehova, n anga te kaetieti “n te motiki-taeka ae riai.” (Ieremia 46:28) Te aeka ni mwakuri ane riai anne e aki bebete n taai nako ibukia kaaro aika aki-kororaoi bwa a na karekea. Ma e manena am kakorakora ni karekea te aeka ni mwakuri anne. Te reirei ni kaetieti ae raoiroi matoana ma n tatangira, e buoka te ataei bwa e na rikirake ni kakukurei maiuna ao n uaana. (Taeka N Rabakau 22:6) Tiaki te koaua bwa anne ae a tangiria kaaro aika Kristian ibukia natiia?

20. A na kanga kaaro n anganiia natiia te tai ae te kabanea n angaraoi bwa a “na rinea te maiu,” iai?

²⁰ Ngkana ngkami kaaro kam karaoa te mwakuri ae kakawaki are e a tia Iehova ni mwiokoi ngkami iai, n aron katauraoan baika a kainnanoi natimi n te itera n rabwata, ibukin aia iraorao ma te Atua, ao n aia namakin, ao a na rangi ni bati kakabwaiami. Kam a angania iai natimi ngkanne te tai ae te kabanea n angaraoi bwa a “na rinea te maiu” bwa a “aonga ni maiu.” (Te Tua-Kaua 30:19) Ataei akanne akana a rinea te beku iroun Iehova ao n tiku ni kawain te maiu, ngkana a tabe n ikawairake, ao a karekea te kimwareirei ae bati nakoia aia karo. (Taian Areru 127:3-5) E na teimatoa n aki toki te aeka ni kimwareirei anne! Ma a na kanga ni kona ngkai ataei ni kamoamoaa Iehova? E na maroroakinaki kaekan anne n te kaongora are imwina.

[Kabwarabwara ae nano]

A mwaiti mannikiba aika mwakuri n aki kukua ibukin katauraoan baika a kainnanoi natiia

Ko na Kanga ni Kaeka?

Tera ae a kona kaaro ni karaoia bwa a aonga ni katauraoi baika a kainnanoi natiia​—

• n te itera n rabwata?

• ibukin aia iraorao ma te Atua?

• n aia namakin?

[Taamnei n iteraniba 10]

A riai moa kaaro ni karikirakea oin tangiran bwaai n taamnei irouia

[Taamnei n iteraniba 11]

A kona kaaro ni karekei taai ibukin reiakinaia natiia taekan te tia Karikiriki

[Taamnei n iteraniba 12]

A karekea te korakora ataei ao te ninikoria man kukureia aia karo