E Maiu Ana Taeka Iehova
Reirei Aika Kakawaki Man te Kanimaua n Itera n te Boki ae Taian Areru
TAO e kona ni kangai te aomata ae kaubwai: “Ke a riki natira mane ba kaanga aroka aika a rikirake man aia tai n ataei, ao natira aine ba kaanga boua aika katamaroaani maninganingan aia auti uea. Ke a kebo ma n taonako, . . . ara tibu i nanon tawana ba nga.” Irarikin anne, tao e kona ni kangai te aomata ae kaubwai: “E kabaia te botanaomata ae arona anne!” Ni kaaitaran anne, e taku te tia areru: “E kabaia te botanaomata ae Atuana Iawe!” (Taian Areru 144:12-15, BK) A boni bae ni kukurei aomata aika Atuana Iehova. Iehova bon te Atua ae kukukurei mangaia are tibwangaia te koraki ake a taromauriia te kukurei. (1 Timoteo 1:11) E noraki koauan aei ni kabanean boota n anene aika kairaki koreaia iroun te Atua ae kanoana Areru 107 nakon 150.
E kaotaki aroaron Iehova aika moani baan te tamaroa n te Kanimaua n Itera n te Boki ae Taian Areru, n aron ana atataiaomata, koauana ao raoiroina. Ngkana ti kananoi riki ara atatai n aroaron te Atua, e na korakora riki iai tangirana ma maakana. Aio are e a karekea iai nakoira te kakukurei. Ai kakawakira te rongorongo ae ti warekia n te Kanimaua n Itera n te boki ae Taian Areru!—Ebera 4:12.
TI KUKUREI BWA E ATATAIAOMATA IEHOVA
A anene ni kangai I-Iutaia n okia n taenikai mai Baburon: “A bia kamoamoa Iehova aomata i bukin ana atataiaomata, ma ana makuri aika kamimi nakoia natiia aomata!” (Taian Areru 107:8, 15, 21, 31) E kamoamoaa te Atua Tawita n te anene ae kangai: “Am koaua e roti naang.” (Taian Areru 108:4) E tataro ni kangai, n te areru are imwina: “Buokai, Iehova ae Atuau; kamaiuai n ai aron am atataiaomata.” (Taian Areru 109:18, 19, 26) Bon te taetae ni burabeti ibukin ana Tautaeka te Mesia te Areru 110. E taku Taian Areru 111:10 (BK): “E karika te wanawana makakini Iawe.”—E taekinaki ae kangai n te areru are imwin aei, “e a kabaia te aomata ae maaka Iehova.”—Taian Areru 112:1.
A atongaki Areru aika 113 nakon 118 bwa areru n nebonebo ibukina bwa e rangi n okioki iai te taeka ae “Areruia” ke “neboa Iaa!” E taekinaki n te boki ae te Mishnah are e koreaki iai taekan katei nikawai n te ka-3 n tienture, a aneneaki anene aikai n tain te Toa are te Riao ao n aia toa Iutaia ake tenua aika karaoaki ni katoa ririki. E abwabwaki riki te Areru 119 nakon Areru ni kabane, ao e kamoamoaki iai ana taeka ke ana rongorongo Iehova ake e a tia ni kaotii.
A Kaekaaki Titiraki Aika Boto i Aon te Baibara:
109:23—Tera ae e nanonna Tawita ngke e kangai: “Akea ba I a mauna n ai aron te nuu ngkana e riki n ananau”? E taekina ana namakin Tawita bwa ai aron ae e a kaan matena.—Taian Areru 102:11.
110:1, 2—Tera ae e na karaoia ana “Uea” Tawita ae Iesu Kristo ngkana e tekateka i angatain te Atua? E rierake nako karawa imwin utina ao e tataninga i angatain te Atua ni karokoa 1914, ike e na moana iai ana tautaeka n Uea. I nanon te tai ane maan anne, e tautaeka Iesu i aoia taan rimwina ake a kabiraki ma ni kairi aia mwakuri n uarongorongo ao ni kakiritiania aomata. E katauraoiia naba bwa a na tautaeka ma ngaia n ana Tautaeka n Uea.—Mataio 24:14; 28:18-20; Ruka 22:28-30.
110:4—Tera are e beritanna Iehova bwa “E na aki bita nanona” iai? Aio bon te berita ae e karaoia Iehova ma Iesu Kristo are e motikia bwa e na riki bwa te Uea ao te Ibonga ae Rietata.—Ruka 22:29.
113:3—N te aro raa ae e na kamoamoaki iai aran Iehova “man otin taai ni karokoa bungina”? E aki tii nanonaki iai taromaurian te Atua ni katoa bong irouia aomata tabeman. E kaotaa te aonnaba ni kabutaa otan taai n otina i mainiku ao ni bungina i maeao. N aron anne, e na kabutaa naba aonnaba kamoamoan Iehova. E aki kona ni karaoaki aei n akea te mwakuri ae baireaki raoi. Ti a kakabwaiaki ngaira aika Ana Tia Kakoaua Iehova ngkai ti kona ni kamoamoaa Iehova ma ni buoka tataekinan rongorongon te Tautaeka n Uea ma te ingaingannano.
116:15—N te aro raa ae “E kakawaki i matan Iehova mateia ana aomata aika itiaki”? A rangi n kakawaki irouna taan taromauria n te aro are e aki kariaia bwa a na bane ni kamateaki. E na taraa n ae a korakora riki ana kairiribai nakoina ngkana arona bwa e kariaia anne. Ao irarikin anne, akea aomata aika a na kamaiuaki bwa a na kaaina te waaki ae boou i aon te aba.
119:71—Iai raoiroin te karawawataki? Te karawawataki e kona n reireinira n te aro ae ti na onimakina riki iai Iehova, ti na kakorakoraira riki n tataro nakoina, ao ti na kakaonimaki riki n ukeuke n te Baibara ma n ira nanona. Irarikin anne, arora ngkana ti karawawataki e kona ni kaotii kabwakara aika ti kona ni manga kaetii. Ti aki kona n nanobuaka ni karawawatakira ngkana ti kariaia kataakira bwa e na karaoiroa riki aroarora.
119:96—Tera ae nanonna n “tiani bwaai aika moa n raoiroi ni kabane”? E taekina te aro ae moa n raoiroi ke te kororaoi te tia areru, ni kaineti ma aia taratara aomata. E bae n ataia ae iai tian aia konabwai aomata n iangoan te kororaoi. Ma ni kaitaraan anne, akea tian ana tua te Atua. A manena ana kaetieti nakon iteran nako maiura.
119:164—Tera ae kakawaki ni kamoamoaan te Atua ‘itiua te tai n te bongina’? Te ware ae itiua e kona n nanona te bwai ae tabwanin raoi. Mangaia are, e taekinna te tia areru bwa e riai ni kabatiaaki kamoamoan Iehova.
Reireiara:
107:27-31. E na ‘bua wanawanan’ te aonnaba aei ngkana e roko Aremaketon. (Te Kaotioti 16:14, 16) E aki kona ni kamaiua temanna man te kamaunanakoaki. Ma tii te koraki aika kawara Iehova ibukin kamaiuaia aika a na ‘karaoiroa Iehova i bukin ana akoi ae boto i aon te tangira.’
109:30, 31; 110:5. Bain te tautia ae angataina ae taua te kabaang e aki kamanoaki n te otanga ae mena ni baina ae angamaingina. N te aro ni kaikonaki, e mena Iehova ‘i angaataia’ ana toro bwa e na tei ni buaka ibukiia. Mangaia are e angania kamanoaia ao buokaia. Anne bukina ngkai e raoiroi ae ti na “kabatia katituaraoan Iehova”!
113:4-9. E rangi n rietata Iehova n te aro are e riai ni “kananorinanoa bwa E na tarai baini karawa.” Ma e ngae n anne, e nanoangaia akana a mamaara, akana a kai nanoia, ao te aine ae kanoabo. E nanorinano te Uea ae Moan te Rietata ae Iehova ao e tangiriia taan taromauria bwa a na karaoa naba anne.—Iakobo 4:6.
114:3-7. E riai ni korakora rotakira n reiakinan te mwakuri ae tamaroa are e karaoia Iehova ibukia ana aomata n Taari ae Uraura, n te Karaanga ae Ioretan, ao n te Maunga are Tinai. E riai ni mimi te botannaomata are e kaikonakaki n “aonaba,” ao n “ruru” ibukin aroaron te Uea.
119:97-101. E kamanoira man mamaaran ara onimaki karekean te wanawana, te atatai, ao te ota n ana Taeka te Atua.
119:105. E kona ni buokira n tokanikai i aoni kangaanga aika ti kaitaraa ma ngaai tauran waera ae ana Taeka te Atua. E kaikonaka naba kaotaan kawaira kioina ngkai e taetae ni burabetina ana kaantaninga te Atua nakon taai aika a na roko.
KUKUREI N AKI ONGEI KANGAANGA
Ti kanga n kaaitara ma kataaki aika kakaiaki ao ti na kanga ni kamaiuaki ma iai? E anga te kaeka ae mataata nakon te titiraki anne Areru aika 120 nakon 134. Ti kona ni kamaiuaki mani kangaanga ao ni kateimatoaa kimwareireira, ngkana ti butiia Iehova ana ibuobuoki. A aranaki areru aikai bwa Anene n Ararake are a aneneia tibun Iteraera ngke a mwananga nako Ierutarem ibukin kanuringan aia toa aika karaoaki ni katoa ririki.
A kaotaki n Areru 135 ao 136 bwa Iehova bon te tia Karaoa ae e kani karaoia, ao e korakora kaokorona ma bouannanti aika akea maneia. Tein te Areru 136, boni kabanean mwakoron kibuna nako ake aneneaki bwa kaanga kaekan te iango ae tabekaki ni moan mwakoron kibuna nako. E reitaki te areru are imwina ma uruakin nanoia I-Iutaia ake i Baburon, ake a tangiria n taromauria Iehova i Tion. Areru aika 138 nakon 145 bon mairoun Tawita. E tangiria ni ‘katituaraoa Iehova ma nanona ni kabanea.’ Bukin tera? E taku: “Bwa e kakamaku karaoau i roum ao e kamimi.” (Taian Areru 138:1; 139:14) N areru aika nimaua ake imwina, e tataro Tawita ni bubutii iai kamanoana mairouia aomata aika buakaka, boakina aika raraoi, kamaiuana mairouia taani bwainikirinna, ao ai kaetan aroarona. E katereterea aroni kukureia ana aomata Iehova. (Taian Areru 144:15) E taku Tawita imwin rinanoan kakannaton ma raoiroin Iehova: “E na atoatonga kamoamoan Iehova wiu; ao ke a bane aomata ni karaoiroa arana ae tabu n aki toki.”—Taian Areru 145:21.
A Kaekaaki Titiraki Aika Boto i Aon te Baibara:
122:3—E kanga ni “kateaki raoi ni botaki” te kaawa ae Ierutarem? N aron ae kaakaraoaki rimoa ni kaawa nako, a rangi n itenatena auti ake a kateaki i Ierutarem. Mangaia are e a bebete riki kamanoan te kaawa. Irarikin anne, ibukin itenatenan auti, a a kona kaain te kaawa n onimakinia kaain rarikia ibukin buokaia ao kamanoaia. E tei aei ibukin katiteuanakiia barongan Iteraera ake 12 ngkana a botaki n taromauri.
123:2—Tera te reirei ae aana te kaikonaki ibukin mataia tooro? Iai bukina aika uoua are tooro mwaane ao aine a taraa bain aia toka te mwaane ke te aine: bwa a aonga n ataa ae tangiraki irouia aia toka, ao ibukin kamanoaia ao reken baika a kainnanoi ibukin maiuia. N aron anne, ti taraa Iehova bwa ti aonga n ataa nanona ao ni karekea akoara mairouna.
131:1-3—E kanga Tawita n ‘taotaona nanon taamneina ao ni karaua n aron te teei ae toki n mamma are mena iroun tinana’? N aron te tei ae kakoriraki ae e kabebeteaki nanona ngkana e tobwaki iroun tinana, e kona naba Tawita ni kabebetea nanona “n ai aron te tei ae toki ni mamma, ae mena iroun tinana.” N te aro raa? N arona n rawa ni kamoamoa ma ni kainikatonga, ao rawana n ukeri baika riaon ana konaa. N onean mwin are e na ukoukora te kakannato, e ataia raoi Tawita ae iai tian ana konabwai ao e na kaotiota te nanorinano. Ti wanawana ngkana ti katotonga aroaron Tawita, ao e a moamoa riki ngkana iai nanora ni kani mwiokoaki n te ekaretia.
Reireiara:
120:1, 2, 6, 7. E korakora karawawatan te aomata ae riki man te taetae ni kananomaraki ao te uarao. Ngkana ti taratarai raoi baika ti taekin, ti a kaotia iai bwa ti “kan raoi.”
120:3, 4. Ngkana ti taotaon nanora nakon ‘te newe ae uarao’ mairouia tabeman, ti kona ni karekei iai kabebeteara ngkai ti ataia bwa e na kaetia Iehova ngkana e boo ana tai. A na boni kaaitara ma te kangaanga taani bobokewe ni bain “te aomata ae korakora.” A na bon reke nako n ana motikitaeka Iehova ae ai aron “mwakoron te kai ae te tuniba.”
127:1, 2. Ti riai n onimakina Iehova ibukin kairara ni bwaai ni kabane ake ti karaoi.
133:1-3. E karaunano, e raoiroi ao e kabebetenano, bonnanoia ana aomata Iehova. Ti aki riai n urua rinanon kabanean ara tai ni kakabuakaka, ni kakauntaeka, ke n ngungurengure.
137:1, 5, 6. A rangi n tangira Tion are e tei ngkoa ibukin ana botaki te Atua taan taromauria Iehova ake taenikai. Tera arora iai? Ti a tia ni kakaonimaki ao n tangira te botaki are kabonganaki iroun Iehova ni boong aikai?
138:2. E ‘karietata ana taeka Iehova i aon arana ni kabane’ n te aro are kakoroan bukin bwaai ni kabane ake e a tia ni berita n arana, e na kamimi riki nakon ae ti kona ni kaantaningaia. Moanibaan te raoiroi baika mena imwaira.
139:1-6, 15, 16. E atai ara mwakuri, ara iango, ao ara taeka aika ti tuai taekin Iehova. E ataira man te tai are ti a tibwa riki iai i nanon biroton tinara, imwain rikin nako bwain rabwatara. E “kamimi” ana ataibwai te Atua ibukira, ao ti aki kona n ataia. Ai raura nanora ngkai ti ataia bwa Iehova e aki tii nora te kangaanga ae ti kaitaraa ma ngaia, ma e ataa naba aron rotakira iai.
139:7-12. E ngae ngkana e raroa nako te tabo ae ti mena iai, ma e kona naba te Atua ni kakorakoraira.
139:17, 18. E a tia ataakin Iehova iroura n riki bwa te bwai ni kakukurei? (Taeka N Rabakau 2:10) Ngkana ngaia bwa e karekea kukureira, e a riki ngkanne bwa koburaken te kukurei ae akea tiana. “A maiti riki nakon tanon aonaba” ana iango Iehova. Akea tian reiakinan taekana.
139:23, 24. Ti riai n tangira Iehova bwa e na tuoi nanora n noria bwa iai aaro aika buakaka, n aron iango aika aki riai ao tangiran bwaai aika bubuaka. Ao ngkana iai, ti tangira buokara mairouna bwa ti na kamaunai.
143:4-7. Ti na kanga n nanomwaaka i aani kangaanga aika rangi ni korakora? E anganira kaekaana ae kakawaki te tia areru: Kananoan iangoan ana mwakuri Iehova, e kona ni katabetabeira iaiangoakiia ao ni kairira bwa ti na butiia buokara n te tataro.
“Kam na Kamoamoa Iehova!”
A bane ni motikaki iteran te boki ae Taian Areru teuana nakon aua n te kibuntaeka ae kamoamoa Iehova. (Taian Areru 41:13; 72:19, 20; 89:52; 106:48) Bon anne naba aron motikan te kabanea n itera. E taekina ae kangai Taian Areru 150:6: “Ke a bane ni kamoamoa Iehova akana iai ikeikeia. Kam na kamoamoa Iehova”! E na kakoroaki bukin anne n ana waaki ae boou te Atua i aon te aba.
Ngkai ti kariariaa te tai ae kakukurei, iai ngkanne bukina ae riai bwa ti na neboa te Atua ae koaua ao ni kamoamoaa arana. Ngkana ti iangoa te kakukurei are ti a tia rinanona ngkai ti a kinaa Iehova ao reken te iraorao ae raoiroi ma ngaia, tiaki ti a kairaki iai bwa ti na kamoamoaa ma nanora ni kakaitau?
[Taamnei n iteraniba 31]
A kamimi ana mwakuri Iehova aika raraoi
[Taamnei n iteraniba 32]
“A maiti riki nakon tanon aonaba” ana iango Iehova