Butimwaeani Mwaakan Iehova N Tautaekanira

“Bon tangiran te Atua te baei, ae tauan ana tua i roura: ao a aki rawawata ana tua.”​—1 IOANE 5:3.

1, 2. (a) E aera bwa e rangi ni kaun iangoan te aantaeka i aani mwaakan temanna irouia aomata aika mwaiti n taai aikai? (b) Te koaua bwa a bon inaomata raoi te koraki ake a rawa n tauaki aroia? Kabwarabwaraa.

E AKI bati n tatangiraki te taeka ae “te mwaaka n tautaeka” irouia angiia aomata ni boong aikai. A mwaiti ake a iangoia bwa e rangi ni kamaraki nano te aantaeka i aan temanna. A kaotiotaki aroaroia aeka n aomata aika rawa n tauaki aroia n aei: “Akea temanna ae e kona ni kaetai.” Ma te koaua bwa a bon inaomata raoi aomata aikai? A bon aki! Angiina a katotongiia aomata aika bati ake a “katotonga aron aon te aba.” (I-Rom 12:2) N onean mwin are a na inaomata, a riki bwa “ana toro te buakaka,” n aron are e taekinna te Kristian are te abotoro Betero. (2 Betero 2:19) A nakonako ‘n ai aron aon te aba aei, n ai aron aia uea are e korakora are n te ang,’ are Tatan te Riaboro.​—I-Ebeto 2:2.

² E taetae ma te kainikatonga temanna te tia koro rongorongo ni kangai: “I bon aki naba kariaia au karo ke mataniwin te aro, ke te tia reirei n te aro n Hindu, ke tao mwaakan te Baibara, bwa e na bairei baika I iangoi bwa a riai ke a aki.” Ma ni koauana, a a kona tabeman ni kabonganai mwaakaia n tautaekanira n te aro ae rangi n riao, ae ti aki riai n ongeaba nakoia. Ma te koaua bwa ibukin anne, ao ti nang kakoauaa iai ae ti bon aki kainnanoa te kairiri? Taraa atuun te nuutibeeba, ao ane ko na nori iai kaeka aika aki karaunano. E kananokawaki bwa a mwaiti aomata n taai aikai aika riai n tangira te kairiri, ma a rawa naba ni butimwaeia.

Ara Iango ni Kaineti ma te Mwaaka n Tautaeka

3. A kanga Kristian ake n te moan tienture, ni kaotia bwa tiaki nanona bwa a bon ongeaba naba nakoia taan tautaeka, n aki titiraki bwa bukin tera ngkai a na karaoa te bwai teuana?

³ Ngaira aika Kristian, e kaokoro ara iango ma kaain te aonnaba aei ni kaineti ma te mwaaka n tautaeka. E aki nanonaki n aei bwa ti a boni kakakoauai nako naba bwaai ni kabane, n aki titiraki moa bwa bukin tera bwa ti riai ni karaoi. Ma ni kaitaraan anne, bon iai naba taai ake ti riai iai n rawa n riaan aia kairiri tabemwaang, e ngae ngkana iai irouia te mwaaka n tautaeka. A karaoa naba anne Kristian ake n te moan tienture. N te katoto, a aki maaku abotoro irouia ibonga ake a rietata ao tabeman riki aika iai mwaakaia n tautaeka aika kaain te Tanirim, ngke a tuangaki bwa a na katoka te mwakuri n uarongorongo. A aki kaaki aroaroia aika raoiroi bwa a aonga n aantaeka i aani mwaakaia taan tautaeka.​—Wareka Mwakuri 5:27-29.

4. Baikara katoto man te Baibara n Ebera, ake a kaotaki iai bwa a mwaiti ana toro te Atua ake a kakaraoi mwakuri aika a aki rangi n tatangiraki irouia aomata?

⁴ A mwaiti ana toro te Atua ake imwain rokon Iesu, aika nanomwaaka naba n aron anne. N te katoto, e rawa Mote “n atongaki ba natin natini Barao te aine; ma e tangira riki [“te bainikirinaki i buakoia,” BK] ana aomata te Atua,” e ngae ngke e ataia bwa e na karika “unin te uea.” (Ebera 11:24, 25, 27) E kananomatoaa n rawa Ioteba nakoni buun Botiba, ngke e kairoroa bwa e na wene ni bure ma ngaia, e ngae ngke e ataia ae iai iroun neiei te mwaaka ni kona ni kaboomwi ao ni karekea te kangaanga nakoina. (Karikani Bwaai 39:7-9) ‘E kakorakoraa Taniera bwa e na aki kamwaraea n ana amarake te uea ake a raraoi,’ e ngae ngke e ataia bwa e na kangaanga kariaiakan ana bubutii anne irouni mataniwiia iunaki are i Baburon. (Taniera 1:8-14) Aikai katoto tabeua ake a kaota rongorongoia ana aomata te Atua rimoa, ake a nanomatoa ni karaoan ae riai, n aki ongei kangaanga ake a na riki nakoia rimwi riki. A aki iri nanoia aomata ibukin iangoan rekeni kabwaiaia ao ngaira naba ti aki riai ni karaoa anne.

5. Tera kaokoron ara iango ma kaain te aonnaba aio ni kaineti ma te mwaaka n tautaeka?

⁵ E riai ni kaokoro ninikoriara ma te kakanneti; ke ti riai naba ni kaokoro ma aomata aika karitei n rawa ni butimwaea ana kairiri te tautaeka. Ma ti riai ni kamatoai nanora bwa ti na butimwaea riki mwaakan Iehova n tautaekanira ao tiaki mwaakaia aomata. Ngkana e a kauntaba aia tua aomata ma ana tua te Atua, ngkanne e na rangi ni bebete karaoan ara motinnano ae ti na karaoia. Ti riai n ira nanon te Atua nakon iran nanoia aomata n aron are a karaoia abotoro ake n te moan tienture.

6. Bukin tera ngkai boni kabwaiara ongeabara nakon ana kaetieti Iehova?

⁶ Ma tera ae e na buokira n ongeaba nakoni mwaakan te Atua n tautaekanira? Ti boraoi n iango ma are e taekinaki n Taeka N Rabakau 3:5, 6 are kangai: “Ko na onimakina Iehova n nanom ni kabanea, Ao tai mwiokoa oin am ataibwai: Ko na ataia n nakonakom ni kabanea, ao E na kaeti kawaim.” Ti kakoauaa bwa boni kabwaiara bwaai ni kabane ake e tangiri mairoura te Atua. (Wareka Te Tua-Kaua 10:12, 13.) Eng, e kabwarabwaraa arona Iehova nakoia tibun Iteraera ni kangai: “I reireiko arom ae ko na kabaia iai, ae I kaiririko i nanon te kawai ae riai ba ko na nakonako iai.” Ao e manga reitia riki n taku: “Ko bia kaman iri nanon au tua nako! ao ai aron te karanga raun nanom iai, ao ai aron naoni marawa am raoiroi.” (Itaia 48:17, 18) Ti onimakin taeka aikai. Ao ti bon ataia raoi bwa boni kabwaiara n taai nako ongeabara nakon ana kaetieti te Atua.

7. Tera ae ti riai ni karaoia ngkana ti aki ota raoi n te tua are e taekinaki n Ana Taeka te Atua?

⁷ Ti onimakina mwaakan Iehova n tautaekanira ao n ongeaba nakoina, e ngae ngke ti aki raoi mataata n tuua tabeua ake a taekinaki n ana Taeka. Tiaki aio te onimaki ae kanga onimakinani bwaai n akea bukiia; ma bon te onimaki raoi. E kaotaki iai onimakinan Iehova ma te aki nanououa iroura, bwa e bon atai baika a raraoi ibukira. Ongeabara boni kaotiotan naba ara tangira, n aron are e koreia te abotoro Ioane ni kangai: “Bon tangiran te Atua te baei, ae tauan ana tua i roura.” (1 Ioane 5:3) Ma iai riki iteran ara ongeaba ae kakawaki ae ti riai n aki tarariaoia.

Kataneian Wanawanara

8. Tera irekerekeni ‘kataneiakini wanawanara’ ma butimwaeani mwaakan Iehova n tautaekanira?

⁸ E tuangira te Baibara bwa ti riai ni “kataneiaki ni wanawana n ata te raoiroi ma te buakaka.” (Ebera 5:14) Ngaia are tiara, ti na aki tii ongeaba nakon ana tua te Atua n aki iaiangoi raoi. Ma n onean mwin anne, ti tangiria n rabakau n “ata te raoiroi ma te buakaka” ae boto raoi i aon ana kaetieti Iehova. Ti kan ataa raoi wanawanan Iehova bwa ti aonga ni kona naba n taekina are e taku te tia areru ni kangai: “E mena naba am tua i nanou.”​—Taian Areru 40:8.

9. Ti na kanga ni kona ni kaboraoa mataniwin nanora ma ana kaetieti Iehova, ao bukin tera ngkai e kakawaki karaoan anne?

⁹ Ti riai ni kananoi ara iango i aoni baike ti wareki man te Baibara n ai aron te tia areru, bwa ti aonga ni kona n nora raoi manenan ana tua te Atua. N te katoto, ngke ti moan reiakina te bwai teuana ae e tangiria Iehova bwa ti na karaoia, ti bae n titiraki ni kangai: ‘E aera bwa e riai te tua ke te kaetieti aei? Bukin tera ngkai boni kabwaiau ongeabau iai? Baikara kangaanga ake a bwakariia te koraki ake a aki ongeaba n ana kaetieti te Atua i aon aei?’ Ngkana a boraoi mataniwin nanora ma ana iango Iehova, ngkanne ti na bae ni karaoi motinnano aika boraoi ma are e kaantaningaia. Ti kona n “ata ae tangiraki iroun [“Iehova,” NW] bwa e na karaoaki” ao n tou mwiia ma te ongeaba. (I-Ebeto 5:17) Ma e bon aki bebete n taai nako karaoan aei.

E Kataia Tatan n Urua Mwaakan te Atua n Tautaekanira

10. Tera te anga teuana are e a tia n ukoukoria Tatan n uruana iai mwaakan te Atua n tautaekanira?

¹⁰ E a maan Tatan n ukoukora uruani mwaakan te Atua n tautaekanira. E a kaotiotaki ana kan inaomata n aanga aika mwaiti. N te katoto, e a tabe ni kerikaki karinean te bwai ae tabu, ae ana babaire te Atua ni kaineti ma te mare. Tabeman taanga a rineia bwa a na tekateka n aki mare, ao ake tabeman a ukeri aanga aika a na kona n raure iai. Tabeman mai buakoia aomata akanne a bae ni boraoi n iango ma te aekita n aine ae rangi ni kinaaki, are e kangai: “E boni kangaanga iroun te aine ao te mwaane bwa a na tekateka ma buuia ae tii temanna.” E a manga reitia riki ma n taku: “Akea temanna ae I ataia ae e kakaonimaki nakoni buuna, ke temanna ae kani kakaonimaki n aron anne.” Ma e taekina ae aekan naba anne temanna te aekita ni mwaane ae rangi ni kinaaki naba, imwin noran nakobuakan ana iraorao ngke e kangai: “I a aki kona ni kakoauaa ae ngaia boni katauara bwa ti na tekateka ma raora ae tii temanna n uaa tokini maiura.” Ti riai n titirakinira i bon iroura ni kangai, ‘Te koaua bwa I butimwaea mwaakan Iehova n tautaeka ni kaineti ma te mare, ke tao e a rotakibuaka au konabwai n iangoraoi n ana koaua te aonnaba aio ae e aki riai n teimaan te mare?’

11, 12. (a) E aera bwa e kuri kangaanga irouia kairake butimwaeani mwaakan Iehova n tautaekania? (b) Taekina te rongorongo teuana are e kaota kananokawakin aki mutiakinan ana tua ao ana kaetieti Iehova.

¹¹ Te roro n rikirake ngkoe n ana botaki Iehova? Ngkana ngkoe, ao ane e na boni mamaataniko nako naba Tatan, ni kataia ni kairiko nakon iangoan ae e aki raoiroi ibukim bwa e na tautaekaniko Iehova. “Aia kaibabaru kairake” n ikotaki ma aia karirii tabonrorom, a a kona ni kairiko nakon iangoan ae a rawawata ana tua te Atua. (2 Timoteo 2:22, BK) Tai iangoia bwa e na riki anne. Kakorakorako n nora raoiroin ana kaetieti te Atua. N te katoto, e tuangira te Baibara bwa ti na “biri nako man te wene ni bure.” (1 I-Korinto 6:18) Ngkanne, manga titirakiniko riki titiraki aikai: ‘E aera bwa e riai te tua aei? N na kanga ni kakabwaiaki man ongeabau iai?’ Tao ko bae n ataia tabeman ake a boo ma kangaanga mai mwin aki kubaran ana tua te Atua irouia. A kukurei ngkai? Te koaua bwa e a nakoraoi riki maiuia ae ngkai nakon are mai mwaina ngke a mena n ana botaki Iehova? Te koaua bwa a a tia ni karekea kingin te kakukurei ae e tuai man reke irouia ana toro te Atua ake tabeman?​—Wareka Itaia 65:14.

¹² Iangoi taeka tabeua ake e taekini ngkoa te Kristian temanna ae arana Sharon, ngke e kangai: “Ibukin aki ongeabau n ana tua Iehova, I a ituaki iai n te aoraki ae kamamate ae te AIDS. I aki toki n tanrikaaki n tarai ririki ake I beku iai iroun Iehova ma te kukurei.” E a kakoauaa raoi neiei bwa bon te nanobaba uruan ana tua Iehova, ao e riai n ataia bwa a rangi ni kakawaki. Boni kamanoara ana tua nako Iehova. E toki maiun Sharon itiua te wiki imwini korean taeka akanne irouna. E teretere ngkanne man te bwai ae riki nakon neiei ae kananokawaki, bwa bon akea te bwai ae raoiroi ae e kona ni karekea Tatan nakoia ake a irekereke ma te waaki ae buakaka aei. Ngkai “taman te kewe” ngaia, ngkanne e bon aki kona ni kakoroi nanon ana berita aika bati, n aron are e karaoia naba ngkoa nakon Ewa. (Ioane 8:44) Ni koauana, e raoiroi n taai nako butimwaeani mwaakan Iehova n tautaekanira.

Tarataraiko Man te Nano ni Kan Inaomata

13. Tera te aro teuana ae ti riai iai n tarataraira man te nano ni kan inaomata?

¹³ Ngkai ti butimwaea mwaakan Iehova n tautaekanira, ti riai ngkanne n tarataraira man te nano ni kan inaomata. Te nano ae kainikatonga e kona ni kairira nakon namakinan ae ti aki kainnanoa ana kairiri temanna. N te katoto, tao ti kona n rawa n ongo n aia kairiri ake a mwiokoaki bwa a na tararuaia ana aomata te Atua. E a tia te Atua ni bairea te koraki ae te toro ae kakaonimaki ae wanawana bwa e na kakatauraoa te amwarake n taamnei n taina ae riai. (Mataio 24:45-47) Ti riai ni bwaina te nanorinano ma n ataia bwa bon aio aron Iehova n tabeakinia ana aomata ni boong aikai. Kakairi irouia abotoro aika kakaonimaki. Ngke a un nanoia ma ni katoka rimwiakin Iesu taan rimwina tabeman, ao e titirakinia abotoro Iesu ni kangai: “Ngkami kam kan nako naba?” E kaeka Betero: “Te Uea, ti na nako n antai? E mena i Roum taekan te maiu are aki toki.”​—Ioane 6:66-68.

14, 15. Bukin tera ngkai ti riai n nanorinano n aantaeka nakon ana kaetieti te Baibara?

¹⁴ Butimwaeani mwaakan Iehova n tautaekanira, e kainnanoaki naba iai kakaraoani baike a taekinaki n ana Taeka. N te katoto, e kaumakira te koraki ae te toro ae kakaonimaki ae wanawana bwa ti na “kamarurungira, ao ti na tauu baangira.” (1 I-Tetaronike 5:6) E roko n taina ae riai te reirei aei, i nanoni kabaneani boong aikai, ike a bati iai “taan tangiriia i bon i rouia, n taani kani manemane.” (2 Timoteo 3:1, 2) Te koaua bwa ti boni kona n rotakibuaka n aekan aroaro aika taabangaki aikai? Eng. Uaiakinan tiia aika aki kakukureia te Atua, a kona ni kairira nakon nimatutun ara onimaki, ke tao ti kona ni manga rotakibuaka n te nano ni kanibwaibwai. (Ruka 12:16-21) Ngaia are, ai riaira ngkanne butimwaean ana kaetieti te Baibara ao te rawa nakon te aeka ni maiu ae taabangaki n ana aonnaba Tatan, are a tii tabe ma oin nanoia!​—1 Ioane 2:16.

¹⁵ A tibwatibwaaki amwarake n taamnei ake mairoun te toro ae kakaonimaki ae wanawana nakoia ekaretia nako, rinanoia unimwaane ake a rineaki. E kaumakira te Baibara ni kangai: “Kam na iri nanoia ami tia kairiri, ao kam na ri aan aia taeka: ba a tantani ni kani kawakin tamneimi, ngkai a nang karakin aroia ni makuri; ba a aonga n tantani ma te kimareirei, ao a na aki ngirangira iai: ba kam aki kabaia iai.” (Ebera 13:17) Ma te koaua bwa e nanonaki n aei bwa a aikoa kona ni kairua unimwaane n te ekaretia? Tiaki ngaia anne! Bwa te Atua e nori riki aki kororaoia nakon are a kona n noria aomata. Ma e ngae n anne, e bon kaantaningaira naba bwa ti na aantaeka irouia. Te uaia n ibuobuoki ma unimwaane, e ngae ngke a aki kororaoi, ti kaotia iai ngkanne bwa ti butimwaea mwaakan Iehova n tautaekanira.

Kakawakin te Nanorinano

16. Ti na kanga ni kaotiota karinean Iesu ngkai ngaia Atun te ekaretia ni Kristian?

¹⁶ Ti riai n ururingnga n taai nako are Iesu boni ngaia Atun te ekaretia. (I-Korote 1:18) Ngaia anne bukina teuana ae ti riai iai n nanorinano n aantaeka nakon aia kaetieti unimwaane ake a rineaki, ao ni “kabatiai karineaia.” (1 I-Tetaronike 5:12, 13) Ni koauana, a kaotiota naba aia aantaeka unimwaanen te ekaretia, n aroia n taratara raoi n tii taekin ana rongorongo te Atua nakon te ekaretia, ao tiaki oin aia iango. A ‘aki riaoni baike a koreaki’ ibukini boutokaan aia iango.​—1 I-Korinto 4:6.

17. Bukin tera ngkai e karuanikai te nano ni kani kakannato?

¹⁷ A riai kaain te ekaretia ni kabane ni kawakinia bwa a na aki ukera kamoamoaia i bon irouia. (Taeka N Rabakau 25:27) Ma anne ngkoa te bwai ni kabwakabwaka nakon te tia rimwin Iesu temanna are e kaitiboo ma te abotoro Ioane. E korea ae kangai: “Rioterebe are kani kakanato i buakoia, e rawa ni kakoaua nakoau. Ma ngaia aei, ngkana tao I roko i roumi, ao I a kauring ana makuri ake e karaoi ni wibuakaira n taeka aika bubuaka.” (3 Ioane 9, 10) Bon iai naba te reirei man anne ibukira ni boong aikai. Iai bukina aika riai ae ti riai iai ni kaaki tangiran te nano ni kani kakannato mairoura. E tuangira te Baibara ni kangai: “E rimoan te kamateaki te kainikatonga, ao e ri moan te bwaka te nanorieta.” Ngaia are a riai te koraki ake a butimwaea mwaakan te Atua n tautaekania, n rawa nakon te kan rarabakau ni karaoi baika tiaki tabeia, bwa bon te kamaamaeaki mwini karaoan anne. ​—Taeka N Rabakau 11:2; 16:18.

18. Tera ae e na boni buokira ni butimwaea mwaakan Iehova n tautaekanira?

¹⁸ Eng, kateia bwa tiam ae ko rawa nakon nanon te aonnaba aei, ae te kan inaomata, ma ko na butimwaea mwaakan Iehova n tautaekaniko. Tai toki n iaiangoa kakawakin am beku iroun Iehova. Ngkai ko a mena i buakoia ana aomata te Atua, e kaotaki iai ngkanne bwa e a tia ni burimauniko n taamneina. (Ioane 6:44) Tai kakeaa bongan am iraorao ma te Atua. Kakorakorako ni kaotiotia ni maium ni kabane bwa ko rawa nakon te nano ni kan inaomata ma ko butimwaea mwaakan Iehova n tautaekaniko.

Ko Uringnga?

• Tera ae irekereke ma butimwaeani mwaakan Iehova n tautaekanira?

• Tera irekerekeni kataneiani wanawanara ma butimwaeani mwaakan Iehova n tautaekanira?

• Baikara anga tabeua aika e ukoukori Tatan n uruana iai mwaakan te Atua n tautaekanira?

• E aera ngkai e kakawaki te nanorinano ni butimwaeani mwaakan Iehova n tautaekanira?

[Taamnei n iteraniba 20]

“E riai riki iran nanon te Atua nakon iran nanoia aomata”

[Taamnei n iteraniba 22]

E bon riai n taai nako touani mwin ana kaetieti te Atua