Te Taamnei Ae Raoiroi Bon te Mwaaka ae Ko Kainnanoia ni Maium
“TAI teweai nako mai matam; Ao tai kaira nako Tamneim are Raoiroi mai rou.” (Taian Areru 51:11) Aio ana tataro te Uea are Tawita imwini karaoan te kairua ae kakaiaki.
E maan Tawita n nonora mwamwakurini mwaakan te taamnei ae raoiroi ni maiuna. E a tia ni kakorakoraaki rinanon te taamnei ae raoiroi ngke e rorobuaka, bwa e na kataea ana kai te tautia ae kakamaaku ae Koria. (1 Tamuera 17:45-50) E anganaki naba te kona rinanon te taamnei ae raoiroi bwa e na korei tabeua areru aika mena i buakoia areru aika moanibaan te tikiraoi mangkoa ni karokoa ngkai. E kabwarabwaraa ni kangai Tawita: “E taetae tamnein te Atua i rou, Ao e mena ana taeka i aon neweu.”—2 Tamuera 23:2.
E kamatoaa naba Iesu Kristo bwa e koaua ana mwakuri te taamnei ae raoiroi ni maiun Tawita. N te tai teuana, e tuangia taan ongora irouna Iesu ni kangai: “E taku Tawita iroun te Tamnei are Raoiroi, E taku Iehova nakon au Uea, Ko na tekateka i angaataiu, Ni katiaai moa ba N na karaoiia taan ribaiko ba neni katokani waem.” (Mareko 12:36; Taian Areru 110:1) E ataia Iesu bwa e boni kairaki n te taamnei ae raoiroi Tawita ngke e korei ana areru. Anne naba te taamnei ae raoiroi ae tauraoi ni buokiko?
Teimatoa ni “Bubuti, ao Ane Kam na Anganaki”
E bae n ae ko na bon aki kona ni korea te areru. Ma ko na bae n aitara ma kangaanga aika ai aroni kakamaakun te aomata ae totoa are Koria. Iangoa ana katoto Isabel.a E kaakaki neiei irouni buuna irarikin te aine ae ataei riki. E kitanaki neiei ma ana taarau aika mwaitikurikuri, ao e aki naba anganna te mwane ibukini buokan tararuaaia natiia aine aika uoman. E taku neiei: “I namakinna bwa I a tia ni kamwaneaki ao n rangi ni kamangoraki. Ma I a tia n namakina naba kakorakoraakiu rinanon te taamnei ae raoiroi are mairoun te Atua mangke I moani kitanaki.”
E koaua bwa e kantaningaa reken te taamnei ae raoiroi Isabel n akea ana kakorakora? E bon aki, ma e butiia te Atua ni katoa bong bwa e na anganna taamneina. E ataia bwa e kainnanoa korakoran te Atua bwa e na buokia ni kaaitarai taai aika imwaina ma te ninikoria, n tararuaaia raoi natina ao ni manga kakorakoraa imwin uruakin nanona n namakinani kakeaani bonganana. E tou raoi mwin ana taeka Iesu ake a kangai: Teimatoa ni “bubuti, ao ane kam na anganaki; kam na ukeuke, ao ane e na reke i roumi; kam na karebwerebwe, ao ane e na kaukaki nakoimi.”—Mataio 7:7.
E namakina kainnanoan taamnein te Atua Roberto ibukini bwaai tabeua aika okoro. E tautoronaki n tangiran te baakee ma te drug teuana are e aki toki ni mokonna. E kaunrabwata ma tautoronakina anne i nanon uoua te ririki, ma e bon kakabwaka naba n taai tabetai. E kabwarabwaraa ni kangai Roberto: “E rotakibuaka nanom n te tabeaianga ngkana ko katoka kabonganaan taian drug bwa e teimatoa te rabwata n tangiroroa te drug ni katoa bong.”
E reitianako Roberto n taku: “Ma I rangi ni kakorakoraai ni bita maiu bwa e aonga ni butimwaeaki au beku iroun te Atua. I kataia n iaiangoi baika raraoi man te Baibara. I botumwaaka n tataro ni katoa bong ni butiia te Atua kakorakoraakiu ni kaitiaka maiu. I ataia bwa I aki kona n tokanikai i bon irou. Ao I nori aron Iehova ni kaekai au tataro, ai moarara riki ngkana e a bwara nanou imwini manga kabwakau iai. I kakoauaa ae e boni kabooua korakorau te taamnei ae raoiroi are mairoun te Atua. I bon aki kona n tokanikai i aon tautoronakiu aei ngke arona bwa akea taamneina irou.”—I-Biribi 4:6-8.
“Mwemwe Rake ni Baiia ni Kiba n ai Aroia Ikare”
Mirion ma mirion Ana Tia Kakoaua Iehova aika ai aroia Isabel ao Roberto, ake a a tia n nora naba mwamwakurin te taamnei ae raoiroi ni maiuia. E kona naba n tauraoi mwaakan Iehova ae mwamwakuri aei ni buokiko ngkana ko tangiria, ae te mwaaka are e kamanenaaki ni karikan te iuniweeti aei. E kukurei ao e ingainga nanon te Atua n anganiko taamneina ngkana ko bubutii ma nanom ni koaua. Ma ko riai n reiakina te koaua ibukina ao n ukera karaoan nanona ma nanom ni koaua, ao ngkanne ko a karekea iai taamneina.—Itaia 55:6; Ebera 11:6.
Ko na bae ni kakorakoraaki i aani mwaakan te taamnei ae raoiroi ae mwamwakuri bwa ko na totokanikai ni beku iroun te Atua ao ni kona ni kaaitarai kangaanga ake a na riki ni maium. Aio te bwai ae taekinaki n te Baibara ae karau nanora: “E angangania akana nimamate te kona [Iehova]; ao E kabatiai korakoraia akana aki konamaki. . . . . e na manga reke te korakora irouia akana kaantaninga Iehova; a na mwemwe rake ni baiia ni kiba n ai aroia ikare; a na biribiri, ao a na aki kua; a na nakonako, ao a na aki nimamate.”—Itaia 40:28-31.
[Kabwarabwara ae nano]
a A a tia ni bitaki aara tabeua.
[Kabwarabwaraan n iteraniba 8]
‘I botumwaaka n tataro ni katoa bong ni butiia te Atua kakorakoraakiu. I ataia bwa I aki kona n tokanikai i bon irou. Ao I nori arona ni kaekai au tataro’
[Te Bwaoki/Taamnei n iteraniba 7]
MWAMWAKURIN TE TAAMNEI AE RAOIROI
E kamanena te taamnei ae raoiroi te Atua ni karika iai te aonnaba ao bwain nako te iuniweeti. E taetae ma te mimi ni kangai te tia areru: “Iehova, ai bati ra am makuri! Ko kabane baikai ni karaoi n te rabakau: A on aonaba n am bwai nako. Ko kaotinakoa Tamneim, a karaoaki.”—Taian Areru 104:24, 30; Karikani Bwaai 1:2; Iobi 33:4.
A kairaki mwaane bwa a na korea te Baibara rinanon te taamnei ae raoiroi. E korea ae kangai te abotoro Bauro: “E anganaki te aba te Baibara ni kabanea iroun Tamnein te Atua, ao e manena.” (2 Timoteo 3:16) Te taeka ae rairaki n te taetae ni Kuriiti ae “iroun tamnein te Atua,” e nanonaki raoi iai bwa “e ukia nako nanoia te Atua.” A kairaki aia iango taani korea te Baibara n ikeiken Iehova ke n taamneina bwa a aonga n tibwatibwaa “ana taeka te Atua.”—1 I-Tetaronike 2:13.
A kakorakoraaki ana toro te Atua n taetae ni burabetin taai aika imwaia n te aro ae eti raoi rinanon te taamnei ae raoiroi. E kabwarabwaraa ni kangai te abotoro Betero: “Akea te taetae ni burabeti teuana i nanon te Baibara ae konaki ni kaetaki iroun te aomata n oin nanona. Ba e bon aki kanakomaiakaki te taetae ni burabeti n te tai teuana n nanon te aomata: ma a taetae aomata mairoun te Atua ngke a kairaki iroun te Tamnei are Raoiroi.”—2 Betero 1:20, 21; Ioera 2:28.
A buokaki Iesu ao mwaane riki tabeman aika kakaonimaki bwa a na tataekina euangkerion Uean te Atua ao ni karaoi kakai rinanon te taamnei ae raoiroi. E taku Iesu: “E mena Tamnein Iehova i aou, ba E kabirai ba N na tataekina te euangkerio nakoia akana aki kaubwai; E kanakomaiai ba N na tuatuangia taenikai te kanakoaki, ao akana mataki te manga noraba.”—Ruka 4:18; Mataio 12:28.
[Te Bwaoki/Taamnei n iteraniba 9]
AANGA AIKA E KONA NI BUOKIRA IAI TE TAAMNEI AE RAOIROI
E kona te taamnei ae raoiroi ni kakorakorako ni kaitaraa te kaririaki ao n tokanikai i aon aroaro aika karuanikai. E taku te abotoro Bauro: “E kakaonimaki te Atua, ae bon aki kitaningkami ba kam na kaririaki n te aro ae kam aki kona n teimatoa iai; ma E na karaoia ba raon te kaririaki kawaimi ni biri nako maiai, ba kam aonga ni kona n taon nanomi.”—1 I-Korinto 10:13.
E kona te taamnei ae raoiroi ni buokiko ni karikirakei aroaro aika kakukureia te Atua. “Uaan te Tamnei te tangira, te kimareirei, te rau, te taotaonaki n nano, te atataiaomata, te raoiroi, te kakaonimaki, te nimamanei, te tau-baang.”—I-Karatia 5:22, 23.
E kona te taamnei ae raoiroi ni kakorakorako n nanomwaaka i aani kataaki. “I boni konai bwaai ni kabane ni karaoi iroun Teuare kakorakoraai.”—I-Biribi 4:13.