Ara Tia Kairiri Ae Mwakuri Korakora Ni Boong Aikai

“E mwananga bwa e na bon tokanikai.”​—TE KAOTIOTI 6:2.

1, 2. (a) E kanga ni kaotaki n te Baibara ana mwakuri Kristo ngkai te uea ngaia man 1914? (b) Baikara ana mwakuri Kristo ake e a tia ni karaoi man te tai are e kaueaaki iai?

E KAUEAAKI Kristo bwa te Uea n Ana Tautaeka n Uea Iehova iroun te Mesia n 1914. Tera arora ni katea taamnein aron Iesu n ara iango? E koaua bwa e tarai aroia ana ekaretia mai karawa n taai tabetai ngkai te uea ngaia ae iangomwaaka ae e tekateka n ana kaintokanuea? Ngkana ngaia anne, ti riai ni bitii ara iango. E kaotaki taekana n te boki ae Taian Areru ao Te Kaotioti bwa bon te uea ae rangi ni korakora ae toka i aon te aoti ni mwanangana “bwa e na bon tokanikai,” ao e teimatoa ni “buti raoi” karaoan aei irouna ni karokoa tiana.​—Te Kaotioti 6:2; Taian Areru 2:6-9; 45:1-4, BG.

² Ana moani mwakuri n uea Kristo imwini kaueaakina bon arona n tokanikai i aon “te rakon ma ana anera.” Ngkai Mikaere te anera ae mataniwia anera are e kairiia, e a karenakoa Tatan ma ana taimonio mai karawa ao ni katikuia i rarikin te aonnaba. (Te Kaotioti 12:7-9) Ni mwiokoana ngkanne ae “manin te berita” iroun Iehova, e a roko Iesu ma Tamana n tuoa te tembora n taamnei. (Maraki 3:1, BG) E motiki taekaia Aaro ake aongkoa Kristian ngaiia, are mwakoroni “Baburon ae Kakannato” ae kabuakakaaki riki, ni kuneana ni bure ibukin te katuturaraa ao te wene ni kimoa n te aro n taamnei ma te botaki n tautaeka n te aonnaba.​—Te Kaotioti 18:2, 3, 24.

E Kaitiakiia Ana Toro i Aon te Aba

3, 4. (a) Tera te mwakuri are e kakororaoia Kristo ngkai ngaia ana ‘man’ Iehova? (b) Tera ae kaotaki n tuoan te tembora, ao tera te mwioko are e anga Iesu ngkai ngaia Atun te ekaretia?

³ E kaotaki naba n ana tutuo Iehova ao ana ‘man’ bwa iai te botaki ni Kristian ni koaua n oon te tembora n taamnei i aon te aba, ake tiaki kaain Aaro ake Aongkoa Kristian Ngaiia. Ma e ngae n anne a boni kainnanoa kaitiakaia Kristian aika kabiraki aikai ke “tibun Rewi.” E a kaman taekina aei te burabeti are Maraki: “E na tekateka [Iehova] n ai aron te tia kaburoa te tirewa ma ni kaitiakia, ao E na kaitiakiia tibun Rewi, ma ni kaburoia n ai aron te koora ma te tirewa ni kaitiakiia; ao a na anganga karea nakon Iehova n te raoiroi.” (Maraki 3:3, BG) E kamanenaaki iroun Iehova “manin te berita” are Kristo Iesu ni kaitiaka te Iteraera n taamnei.

⁴ Ma e noriia Kristian ake a kakaonimaki aika kabiraki naba aikai Kristo, bwa a kabanei korakoraia ni katauraoi amwarake n taamnei n te tai ae riai ibukia aika onimaki. A a tia ni boreeti koaua man te Baibara ibukin Ana Tautaeka n Uea te Atua i nanon te maekatin aei ni moa man 1879 ni karokoa ngkai, n aki ongeia bwa e angaraoi ke e aki. E a tia Iesu n taetae ni burabetinna bwa n ‘rokona’ n tuoia ana tabonibai n “tokin te waaki ae ngkai,” e na kunea iai te toro ae katauraoi “kanaia n te tai ae riai.” E na katanoataa kukurein te toro anne ao e na “mwiokoia i aon ana bwai ni kabane” i aon te aba. (Mataio 24:3, 45-47) E a tia Kristo ni kabongana te “te toro ae kakaonimaki ma ni wanawana” bwa e na kaeti bwaai ni kabane ake e na tautaekan i aon te aba, ngkai ngaia Atun te ekaretia ni Kristian. E a tia ni katauraoa te kairiri ibukia “tabonibai” aika kabiraki ao raoia aika “tiibu tabemwaang” rinanon te Rabwata n Tautaeka.​—Ioane 10:16.

Taiakin Uaan Aon te Aba

5. Tera te mwakuri n uea are e noria te abotoro Ioane n te miitara?

⁵ E nora te miitara te abotoro Ioane ibukin te bwai teuana are e na karaoia te Uea ae te Mesia n “ana bong te Uea,” imwin are E kaueaaki n 1914. E korea ae kangai Ioane: “Akea bwa I a nora te nang ae mainaina, ao iai ae tekateka i aon te nang, ae kaanga natin te aomata, ao iai te baunuea ae koora i aon atuna ao te biti ae kakang i baina ibukin taiakin te uaa.” (Te Kaotioti 1:10; 14:14) E ongo Ioane bwanaan ana anera Iehova nakon te tia Tai aei bwa e na arora baina ma ana biti ibukina bwa “e a roko tain taiakin uaan te aonnaba, bwa a a tawaa raoi.”​—Te Kaotioti 14:15, 16.

6. Tera are e taekinna Iesu bwa e na rikirake imwin tabeua te tai?

⁶ E a kauringira “taiakin uaan te aonnaba” aei, ana kaikonaki Iesu ibukin te uita ao te titania. E boni kabotaua Iesu ma te mwaane are e uniki koraan uita i abana ma iangoan are e na taia uaan uita aika raraoi ni kabane are a nanonaki iai “natin te tautaeka n uea,” aika Kristian ni koaua aika kabiraki bwa a na tautaeka ma ngaia n ana Tautaeka n Uea. Ma n te tairiki ao e uniki koraan te titania te kairiribai are “te Riaboro” ma “natin nako teuare buakaka.” E tuangia ana tia mwakuri te tia ununiki bwa a na aoriia ni kaai n rikirake te uita ao te titania ni karokoa tain taiakia n “tokin te waaki ae ngkai.” N te tai anne ao e na kanakoia ana anera bwa a na kaokoroa te uita ma te titania.​—Mataio 13:24-30, 36-41.

7. E na kanga Kristo ni waakina “taiakin uaan te aonnaba”?

⁷ E a tia Iesu ni kaira te mwakuri n tai ni katobibia te aonnaba ni kakoroani bukin te miitara are e anganaki Ioane. E moanaki “taiakin uaan te aonnaba” ni bobotaia nikiraia te koraki ake 144,000 aika “natin te tautaeka n uea,” aika “uita” n ana kaikonaki Iesu. E otara riki te kaokoro i marenaia Kristian ni koaua ao Kristian ni kewe imwin te Moani Buaka Are Kabutaa Aonnaba, ai ngaia are e a rangi ni korakora boutokaani kauouani mwakoron “taiakin uaan te aonnaba” ae bobotaia tiibu tabemwaang. Bon tiaki “natin te tautaeka n uea” naakai ma bon “te koraki ae uanao” ake a kukurei n aantaeka nakon te Tautaeka n Uea anne. A taiaki mai buakon “te natanaomata, ma botanaomata, ma taian taetae” ni kabane. A aantaeka nakon te Tautaeka n Uea iroun te Mesia, are e kaainaki iroun Kristo Iesu ao te koraki are 144,000 “ake a itiaki” ake a na tautaeka ma ngaia i karawa.​—Te Kaotioti 7:9, 10; Taniera 7:13, 14, 18, BG.

Te Tia Kairiri n Ekaretia Nako

8, 9. (a) Tera ae kaotia bwa e aki tii taratarai aroaron ekaretia ni kabane Kristo ma e tarai naba aroaroni maiuia kaaina n tatabemania nako? (b) Baikara “ana bwai Tatan aika nano” ake ti riai n rarawa nako iai, n aron ae kaotaki n iteraniba 31?

⁸ Ti noria n te kaongora ae imwain aei aroni Kristo n atai raoi aroni marurungin aia onimaki ekaretia n tatabeua nako n te moan tienture C.E. N ara bong aikai, ngkai ngaia te Uea ae e a “anganaki te mwiokoaki i aoni bwaai ni kabane i karawa ao i aonnaba,” e a kaotiotia Kristo are ara tia Kairiri bwa te tia kairiri ae mwakuri korakora i aon ekaretia ni katobibia te aonnaba ma aia mataniwi. (Mataio 28:18; I-Korote 1:18) E a tia Iehova ni “karaoia bwa te atu i aoni bwaai ni kabane ibukini kakabwaiaan te ekaretia” ae kaainaki irouia aika kabiraki. (I-Ebeto 1:22) Kioina ngkai atun te ekaretia ngaia, e a nori baika riiriki n aia ekaretia nako Ana Tia Kakoaua Iehova aika e raka i aon 100,000 mwaitiia.

⁹ E kanakoa te rongorongo aei Iesu nakon te ekaretia rimoa are i Tuateira: “Aikai baika e taekin Natin te Atua, are a takarokaro matana n ai aron te ai, . . . ‘I atai am mwakuri.’” (Te Kaotioti 2:18, 19) E boaia kaain te ekaretia anne ibukin aia mwakuri aika kammaira ao katokan nanoia ni baike a tangiri, ngke e tuangia ae kangai: “Boni ngai teuae tutuoi naano aika raba ma taian iango, ao N na anganingkami n ai aron ami mwakuri n tatabemaningkami nako.” (Te Kaotioti 2:23) E kateretereaki n te kibuntaeka anne bwa e aki tii taratarai ekaretia n tatabeua nako Kristo ma e tarai naba aroaroni maiuia kaaia n tatabemania nako. E kamoamoaia Kristian ake i Tuateira Iesu aika a “aki atai baika atongaki irouia temwangina bwa ‘ana bwai Tatan aika nano.’ ” (Te Kaotioti 2:24) N aron anne ni boong aikai, e butimwaeia te koraki aika a ataei ke a kara ake a rawa n ukeri “ana bwai Tatan aika nano” rinanon te Internet, taian takaakaro ni kaineti ma te tiritiri n te viteo ke ni butimwaea aia iango aomata ni kariaia baika bure. Ai kukureira Iesu ni matakuakina te kakorakora ao te anganano irouia Kristian aika bati ni boong aikai, ake a kabanei korakoraia ni kakairi n ana kairiri rinanon aroaroni maiuia ni kabane!

10. E kanga ni kabwarabwaraaki ana kairiri Kristo i aoia unimwaane n te ekaretia, ma tera te babaire ae a riai n ataia?

¹⁰ E katauraoa te kairiri ae tatangira Kristo n ana ekaretia nako i aon te aba rinanoia unimwaane n te ekaretia ake a rineaki. (I-Ebeto 4:8, 11, 12) A bane mataniwi ni kabiraki n te taamnei n te moan tienture. A kaotaki n Te Kaotioti bwa itoi i nanoni baini Kristo are te atai. (Te Kaotioti 1:16, 20) Ni boong aikai, angiia unimwaane n te ekaretia bon tiibu tabemwaang. A rineaki imwin te tataro ao i aan ana kairiri te taamnei ae raoiroi, mangaia are a kona naba n iangoaki bwa a mena i aan ana kairiri Kristo ke i aani baina. (Mwakuri 20:28) Ma e ngae n anne, a ataia ae e kamanena te botaki ae uarereke Kristo are e kainaki irouia mwaane aika Kristian ake a kabiraki are te Rabwata n Tautaeka, ibukini kairaia ao baireaia taan rimwina i aon te aba.​—Wareka Mwakuri 15:6, 28-30.

“Nakomai, te Uea ae Iesu”

11. E aera bwa ti ingainga ni kan nora ara tia Kairiri bwa e na waetata n roko?

¹¹ N te kaotioti are e anganaki te abotoro Ioane, n taai tabetai e taekinna iai Iesu bwa e na waetata n roko. (Te Kaotioti 2:16; 3:11; 22:7, 20) Akea te nanououa bwa e boni kaineta aei ma rokona ni motika taekani Baburon ae Kakannato ao nikiran ana waaki nako aika buakaka Tatan. (2 I-Tetaronike 1:7, 8) E ingainga te abotoro Ioane ae e a kara ni kan nora kakoroan nanoni baika kamimi aika a na riki ake a kaman taekinaki, ngke e taku: “Amen! Nakomai, te Uea ae Iesu.” Ti ingainga naba ngaira aika ti maeka n tain tokin te waaki ae buakaka ae ngkai ni kan nora ara tia Kairiri ao rokoni mwaakan ana Tautaeka n Uea ni katabua aran Tamana ao ni katerea riain Iehova n tautaeka.

12. Tera te mwakuri ae na katiaa Kristo imwaini kanakoan aang ibukin te urubwai?

¹² Imwain rokon Iesu ni kamauna ana botaki Tatan ae nonoraki, e na kanikinaeaki te kabanea n aomata i buakoia 144,000 ake kaain te I-Iteraera n taamnei. E kamataata te Baibara bwa a na bon aki kanakoaki aang ibukini kamaunanakoan ana waaki Tatan imwain tian raoi kanikinaeaia te koraki ake 144,000.​—Te Kaotioti 7:1-4.

13. E na kanga Kristo ni katerea okina ma n tiku ni moani mwakoron “te rawawata ae korakora”?

¹³ E bon aki ataaki ‘okini Kristo ma n tiku’ irouia angiia kaain aon te aba ni moa man 1914. (2 Betero 3:3, 4) Ma e na katerea okina n te tai ae waekoa rinanoni karaoan ana motikitaeka Iehova i aon ana waaki Tatan aika kakaokoro nako. Kamaunaakin “teuare kakaraoa ae buakaka” ae mataniwia Aaro ake aongkoa Kristian ngaiia e boni “kateretereaki iai bwa e a tia n oki.” (Wareka 2 I-Tetaronike 2:3, 8.) E na katauraoaki iai te bwai ni kakoaua bwa e a tia Kristo n riki bwa ana tia Motikitaeka Iehova ae rineia. (Wareka 2 Timoteo 4:1.) E na kamaunaaki moa mwakoroni Baburon ae Kakannato ae Aaro ake aongkoa Kristian ngaiia are e kabuakakaaki riki imwaini kamaunaan te botaki n Aro ae kewe ni katobibia te aonnaba. E na kaaki Iehova i nanoia taani kairiri n te botaki n tautaeka te kani kamauna te kabekaau aei. (Te Kaotioti 17:15-18) Bon anne moani mwakoron “te rawawata ae korakora.”​—Mataio 24:21.

14. (a) Bukin tera bwa e na kakimototoaki moani mwakoron te rawawata ae korakora? (b) Tera nanoni “kanikinaean Natin te aomata” irouia ana aomata Iehova?

¹⁴ E taekinna Iesu bwa a na kakimototoaki boong akanne “ibukia te koraki ake a rineaki” ae nikiraia Kristian aika kabiraki i aon te aba ngkai. (Mataio 24:22) E na bon aki kariaia Iehova bwa a na kamaunaaki Kristian aika kabiraki ao raoia ake tiibu tabemwaang ni kamaunanakoaia Aaro aika kewe. E reitia n taekinna Iesu bwa “imwin raoi te rawawata ni boong akanne” ao a na oti kanikina n taai, n namwakaina, n taian itoi, “ao e na kaoti kanikinaean Natin te aomata i karawa.” Aei are e na kairiia natannaomata nako mai aon te aba bwa a na “ororei bwanibwania ibukin nanokawakia.” Tiaki aei ae e na riki nakoia taani kabiraki ake a kantaningaa te maiu i karawa ao raoia naba ake a kantaningaa te maiu i aon te aba. A na ‘teirake ni kaetiia raoi ma n tararake bwa e a kan roko kamaiuaia.’​—Mataio 24:29, 30; Ruka 21:25-28.

15. Tera te mwakuri ae na karaoia Kristo n rokona?

¹⁵ E na kaoti Natin te aomata n te aro riki teuana imwain ae e na bon tokanikai. E taetae ni burabeti ni kangai: “Ngkana e a roko Natin te aomata ni mimitongina, ma anera ni kabane i rarikina, ao e na tekateka i aon ana kaintokanuea ae mimitong. Ao a na bane botannaomata n ikotaki i matana, ao e na kaokoroia te korakina ma te korakina, n aron te tia kawakintiibu ngkana e kaokoroia tiibu ma kooti. Ao e na kaakiia tiibu i angaataina, ao kooti i angamaingina.” (Mataio 25:31-33) E kaineti aei nakon rokoni Kristo bwa te tia Motikitaeka are e na kaokoroia iai aomata mani ‘botannaomata nako’ nakoni koraki aika uoua aika “tiibu,” ae te koraki ake a tia ni kaota boutokaia tarina (ake Kristian aika kabiraki i aon te aba) ao “kooti,” ae te koraki “ake a aki ira nanon te rongorongo ae raoiroi ae taekan ara Uea ae Iesu.” (2 I-Tetaronike 1:7, 8) A kabwarabwaraaki tiibu bwa “naake a raoiroi” ake a na karekea “te maiu are aki toki” i aon te aba, ma kooti a na “nakon te kamaunaaki n aki toki.”​—Mataio 25:34, 40, 41, 45, 46.

E na Bon Tokanikai Iesu

16. E na kanga ni bon tokanikai Kristo are ara tia Kairiri?

¹⁶ E mwananga Kristo bwa “e na bon tokanikai” ma raona ni kabane ake ueea ao ibonga aika kanikinaeaki ao tiibu aika kaotaraeaki ao ni kaakaki i angaataina ibukini kamaiuaia. (Te Kaotioti 5:9, 10; 6:2) Ni koauana e na kamauna ana botaki n tautaeka ni kabane Tatan, ana taanga ni buaka ao ana waaki ni bitineti i aon te aba, ngkai ngaia mataniwin te taanga n anera ae korakora ao tarina aika kautaki man te mate. (Te Kaotioti 2:26, 27; 19:11-21) E na bon tokanikai Kristo ngkana e kamauna ana waaki ae buakaka Tatan. Ngkanne e nang kaina Tatan ma taimonio i nanon tenga te ririki.​—Te Kaotioti 20:1-3.

17. E na kairiia nakon tera ana tiibu tabemwaang Kristo n ana Tautaeka ae Maanna Tenga te Ririki, ao tera ae ti riai ni kakaonimaki nako iai?

¹⁷ N taekinan “te koraki ae uanao” aika tiibu tabemwaang, ake a na kamaiuaki man te rawawata ae korakora, e taetae ni burabeti te abotoro Ioane bwa “e na kawakinia te Tiibutetei are mena i rarikin te kaintokanuea, ao e na kairiia nakoni koburaken raan ni kamaiu.” (Te Kaotioti 7:9, 17) Eng, e na teimatoa Kristo ni kaiririia tiibu tabemwaang ake a mutiakina raoi bwanaana ao ni kairiia nakon te maiu ae e aki toki n ana tai n Tautaeka ae Maanna Tenga te Ririki. (Wareka Ioane 10:16, 26-28.) Ti bia kakaonimaki ni kakairi iroun ara tia Kairiri ae te uea ngkai ao ni karokoa te waaki ae boou i aon te aba are e beritanna Iehova!

Titiraki ni Kauring

• Tera te mwakuri ae na karaoia Kristo imwini kaueaana?

• Antai ake e kamanenaia Kristo i aon te aba ni kairiia ekaretia?

• N te aro raa ae e na roko iai Kristo are ara tia Kairiri?

• E na kanga Kristo n teimatoa ni kairira nakon te waaki ae boou n te aonnaba?

[Taamnei n iteraniba 32]

E na katereaki okini Kristo ma tikuna ni kamaunanakoan ana waaki ae buakaka Tatan