Taiani Miitara Ibukin te Aba n Taamnei

N aki ongeia bwa maanra ngkoe n taraa karawa, ma ko na bon aki nora te taamnei. Kakauongo, ma ko na bon aki ongo bwanaan temanna. Ma e ngae n anne, ko kona ni kakoauaa bwa bon iai taamnei. A rangi ni wanawana ao ni mwaaka, ao a kakaokoro araia ao aroaroia. Iai aika a karaoa ae raoiroi ao iai aika a kani kaikoakira. A bane n iai nanoia iroura.

Te Atua ae koaua bon te Taamnei. (Ioane 4:24) Iai arana ae okoro ae kaokoroa ma atua aika kewe aika bati. Arana bon Iehova. (Taian Areru 83:18) E korea ae kangai te tia areru: “E kakanato Iehova, ao E na bati ni kamoamoaki: E na makaki riki nakoia anti ni kabaneia. Ba boni boua antiia botanaomata ni kabaneia [“ake akea manenaia,” NW]: Ma E karaoa karawa Iehova. E mena i matana te karineaki ma te mimitong: E mena te korakora ma te tamaroa n umana ae tabu.”​—Taian Areru 96:4-6, BG.

Taiani Miitara Ibukin te Atua ae Koaua

Ti tuangaki n te Baibara ae kangai: “Akea te aomata ae e a tia n nora te Atua n te tai teuana.” (Ioane 1:18) E riaon ara ataibwai aron tarakin teina ao mimitongina, n ai aron iangoan taiani kara iroun te aomata ae bungiaki ni mataki. Ma n aron te tia reirei ae rabakau ae kabwarabwarai baika kangaanga te ota iai n taeka aika kona n ota iai ataein te reirei, ngaia are te Atua e kabwarabwarai naba baika ti aki kona n nori ni baika ti kona n nori rinanon Ana Taeka ae te Baibara. E buokira Iehova ni kataamneia karawa bwa ti aonga n ota n aron reitakira ma te koraki ake a maeka iai, rinanon taiani miitara aika kairaki rinanon taamneina ake a anganaki te koraki ake rimoa aika a kakaonimaki.

N te katoto, teuana te miitara are e anganaki te burabeti ae Etekiera, e kairekerekea mimitongini Iehova ma te ai, te bae raneanea, te atibu ae te tabeiro, ao nei wirara. N te miitara riki teuana, ao e nora Iehova te abotoro Ioane bwa e tekateka n ana kaintokanuea ao e taekinna ae te Atua “kaanga ai aron te atibu ae te iatiba ma te atibu ae kakawaki ae uraura,” n ikotaki ma anne “e otabwaniniaki te kaintokanuea n nei wirara ae ai aron taraan te atibu ae te emerote.” Ti tuangaki ni kabwarabwara aikai bwa e rangi n okoro noran Iehova ibukin raneanean tamaroana ao te rau ae bati.​—Te Kaotioti 4:2, 3; Etekiera 1:26-​28.

E miitaraea naba Iehova te burabeti are Taniera, ike e noriia iai ‘anera aika terebu terebu ake a tei i matan Iehova.’ (Taniera 7:10, BG) Ai kamimira norakin anne! E na bon rangi ni kamimi norakin temanna te anera n te miitara, ma kataia ngkanne n iangoiia anera aika kororaoi aika reebu!

E kaania 400 te tai taekinaia anera n te Baibara, ao iai nakoaia n aron terabim ao kerubim. Te taetae ni Kuriiti ao n Ebera ake a rairaki bwa “anera” n te Baibara, a uaia n nanonaki bwa “te tia uarongorongo.” Ai ngaia are a kona n reitaki anera i marenaia, ao a a tia naba n reitaki ma aomata n taai ake ngkoa. Anera bon tiaki aomata ake a a tia ni maeka i aon te aonnaba ngkoa. E a kamani karikiia taamnei aika maiu aikai Iehova imwaini karikan te aomata.​—Iobi 38:4-7.

N ana miitara Taniera, a mwaitikurikuri anera ake a botaki ni matakuakina te bwai ae kamimi. E nora temanna Taniera “ae ai aron natin te aomata” are e kaania ana kaintokanuea Iehova bwa e na anganaki “te tautaeka, ma te neboaki, ma ueana, ba a aonga ni bane natanaomata, ma botanaomata, ma taian taetae, n toro i rouna.” (Taniera 7:13, 14, BG) Iai mwiokoan “natin te aomata” ae kakawaki n te aba n taamnei, ae Iesu Kristo are e kautaki, ao e anganaki te mwaaka n tautaeka i aon te aonnaba ni kabutaa. E nang waekoa ana tautaeka n onei mwin aia tautaeka aomata ni kabane ao e nang katoka te aoraki, te nanokawaki, te rawawata, te maiu ni kainnano ao ai te mate.​—Taniera 2:44.

E karekea te kimwareirei ae korakora nakoia anera aika kakaonimaki aika mwaitikurikuri kaueaan Iesu, ake a tangira ae moan te raoiroi ibukia aomata. E ngae n anne, e kananokawaki bwa a aki bane n namakina anne taamnei.

Taani Kairiribai Nakon te Atua ao Aomata

Ni moani karikaia aomata, e kaitaraa Iehova temanna te anera ngke e kairaki n tangiran te kan taromauriaki, ao e a karikia iai bwa Tatan, ae nanona “te tia Kakaaitara.” Tatan bon te taamnei ae karoton te buakaka ao e boni kaitaraa Iehova ae te taamnei ae te kabanea n tatangira. A raona Tatan n ana karitei tabeman anera ao a aranaki n te Baibara bwa taimonio. A a tia n riki taimonio bwa taani kairiribai nakon te botannaomata, aika rangi n iowawa n aron Tatan. A riki angiin te rawawata n te aonnaba, te ribuaka, te aoraki, te maiu ni kainnano ao buaka man aia kariri.

E a taabangaki ngkai aroia Aaro aika bati mai buakoia Aaro ake aongkoa Kristian ngaiia, n aki manga tataekina Tatan n aron are a kakaraoia mai mwaina. Ma ti karekea ataakin ae te aeka n aomata raa te anera ae te tia karitei aei, ao bukini karaoan ana karitei man te Baibara n te boki ae Iobi. E taekinaki ae kangai iai: “Ao bon iai te bongina ngke a nako natin te Atua ba a na kaotiia i matan Iehova, ao e roko naba Tatan i buakoia.” N te maroro imwin anne, e a bukina Iobi Tatan bwa e toro iroun te Atua tii ibukini baike e karekei. N ana kakorakora ibukini kakoauaan ana bukibuki, e a karekea te rawawata ae korakora Tatan nakon Iobi, ngke e kamateia ana nanai ni man ao natina ni kabane ake tengaun. Imwin anne, e orea Iobi ni kaboa aika kammaraki are riki ni kabutaa rabwatana. A bane n aki nakoraoi ana waaki Tatan ake e karaoi.​—Iobi 1:6-19; 2:7, BG.

Iai bukina aika riai ngkai e taona nanona Iehova iroun Tatan n te tai ae rangi ni maan, ma e na aki teimatoa ni karaoa anne. N te tai ae e a rangi ni kaan e nang kamaunaaki te Riaboro. Iai mwaneka ake a a tia ni karaoaki, ao a kabwarabwaraaki n te boki ae Te Kaotioti, ike e a kaotaki iai te waaki riki teuana ae kakawaki n te aba n taamnei are ti aki kona n noria i bon iroura. Ti wareka ae kangai: “E boo te buaka i karawa. A buakana te rakon [ae Tatan] Mikaere [ae Iesu Kristo are e kautaki] ma ana anera, ao te rakon ma ana anera a buakania ma a aki tokanikai, ao e a aikoa manga reke aia tabo i karawa. Mangaia are e a tewenakoaki te rakon are korakora, are te naeta nikawai, are arana te Riaboro ao Tatan, are e burebureiia kaain te aonnaba ni kabutaa. E tewenakoaki nakon te aonnaba, ao a tewenakoaki naba ana anera ma ngaia.”​—Te Kaotioti 12:7-9.

Noria bwa e kabwarabwaraaki ae “e burebureiia kaain te aonnaba ni kabutaa” Tatan. E burebureiia aomata ni karikirakean aia kewe Aaro bwa e aonga ni katannakoia mairoun Iehova ao ana Taeka. Te kewe teuana are taekan ae a na nako aomata ni kabane nakon te aba n taamnei imwini mateia, boni karoton ana kewe aika bati. A a rangi ni bati iango aika kakaokoro i aon aei. N te katoto, a bati ake a kakoauaa i aon Aberika ma Atia bwa a na nako aomata imwini mateia nakon te aonnaba n taamnei are e maekanaki irouia aia bakatibu. Te reirei ibukin te burikatorio ao moone a boto naba i aon te iango are e teimatoa te aomata ni maiu imwini matena.

Iai te Maiu i Karawa Imwin te Mate?

Ma tera aron te koaua ae a bwabwainna aomata aika mirion ma mirion mwaitiia n te aonnaba, ae a na nako karawa aomata ni kabane aika raoiroi? E koaua ae iai tabeman aomata aika raoiroi aika a na nako karawa, ma e uarereke mwaitiia ni kabotauaki ma aomata ake a a tia ni mate aika birion ma birion. E kaotaki n te Baibara bwa aomata aika 144,000 mwaitiia a na “kabooaki mai aon te aba” ao a na riki bwa “ibonga” ao “ueea n tautaekana te aonnaba.” (Te Kaotioti 5:9, 10; 14:1, 3) N ikotaki ma Natin te aomata ae Iesu Kristo, a na riki bwa te tautaeka i karawa ae Ana Tautaeka n Uea te Atua. E nang kamaunaia Tatan ma ana taimonio te tautaeka anne, ao e nang karaoa te aonnaba bwa te bwaretaiti. N te tai ae na roko ao a nang kautaki angiia te koraki ake a mate ma kantaningaan te maiu are aki toki n te aonnaba ae Bwaretaiti.​—Ruka 23:43.

Ibukini kamatataan te reirei aei, iai te koraki ae mwaitikurikuri aika maeka n te aba n taamnei. Te kabanea n rietata mai buakoia bon Iehova ae te Atua ae te tia Karika te maiu. A kakaonimaki n toro irouna anera aika reebu. A kaitaraa Iehova anera tabemwaang ake a kairaki iroun Tatan, ao a burebureiia aomata. Irarikin anne, iai te koraki ae uarereke mwaitiia aika a “kabooaki,” ke a rineaki mai aon te aba bwa a na anganaki mwiokoaia ae okoro i karawa. Ngkai ti tabe n iangoa aei, ti na rinanona ngkai bwa antai aika ti kona n reitaki ma ngaiia n te aba n taamnei, ao tera arora n reitaki ma ngaiia.