Tera ae A Riai n Reiakinna Ataei?
“E kairaki korean te Koroboki ae Tabu ni kabane iroun te Atua ao e manena ibukin te angareirei, ao ibukini boaan te aomata, ibukini kaetani bwaai, ao ibukin te reirei ni kaetieti ae boraoi ma ana kaetitaeka te Atua.”—2 TIMOTEO 3:16.
A KAINNANOA reiakinaia ataei te koaua ibukin te Atua. A na reiakina ia taekan te koaua anne? Mani bokin te Aro ae te Baibara ae taabangaki karineana n te aonnaba.
Te Baibara ai aron te reta mairoun te Atua. I nanon te reta anne, e kaota iai aroarona te Atua ao e katauraoi naba iai kairiri aika eti ibukia natina nako aika ataei ao kaara. Nori tabeua mai buakon angareirei aika n te Baibara ao reirei aika a kona ni karekei mai iai naba rooro n rikirake.
Tera ae e tangiria te Atua bwa ti na ataia ibukina?
◼ Te bae reiakinaki n te Baibara: “[Bon] IEHOVA aram, ba bon ti Ngkoe Teuare Moan te Rietata i aonaba ni bane.”—Taian Areru 83:18, BG.
Reireiara: Bon tiaki te korakora te Atua ma bon te aomata ae iai arana ae aki nonoraki.
◼ Te bae reiakinaki n te Baibara: “E ukeuke n naano ni kabane Iehova, ao E atai reken naano ni kabane: ngkana tao ko ukoukoria, ao E na reke i roum.”—1 Rongorongo 28:9, BG.
Reireiara: E tabeakinira ni kabane Iehova ae te Atua, n ikotaki naba ma ataei aika uarereke. (Taian Areru 10:14; 146:9) E tangirira bwa ti na reiakina taekana.
◼ Te bae reiakinaki n te Baibara: “Kam na aki karawawata . . . te tei temanna ae e mate tamana. Ngkana tao ko karawawataia n te bwai teuana, ao ngkana tao a tang teutana nako Iu, ao N na bon ongo tangia.”—Te Otinako 22:22-24, BG.
Reireiara: E ongoraei naba aia tataro ataei aika uarereke Iehova. Ti kona ni katoatai ni maroro ma te Atua ao ni bunrii nanora ma ara iango nakoina.
◼ Te bae reiakinaki n te Baibara: “A okioki ni kata te Atua ma ni karawawata Teuare e tabu ae Atuaia Iteraera.”—Taian Areru 78:41, BG.
Reireiara: E rotaki nanon Iehova n ara taetae ni kawai ao ara mwakuri, ngaia are ti riai n iango moa imwain ae ti na taetae ao ni mwakuri.
Tera arora ae riai nakoia aomata aika a kaokoro ma ngaira?
◼ Te bae reiakinaki n te Baibara: “E aki inanonano te Atua, ma a butimwaeaki irouna aomata ni kabaneia aika maakua ma ni kakaraoa ae raoiroi, mai buakoia botannaomata nako.”—Mwakuri 10:34, 35.
Reireiara: Ngkana e butimwaeia aomata ni kabane te Atua, ti riai n aki inanonano nakoia ibukini karani kunia ke teia ae kaokoro ma ngaira.
◼ Te bae reiakinaki n te Baibara: “[Bwaina te] tauraoi n taai nako ni kaekaia aomata nako ake a titiraki bwa tera bukin te kantaninga ane iroumi, ma karaoa anne ma te nimamannei ao te karinerine ae bati.”—1 Betero 3:15.
Reireiara: Ti riai ni kaota ara iango ma te koaua ngkana e maroroakinaki taekan te Aro, ma ti riai n taekinna ma te karinerine. Ti riai naba ni kaota karinean aia koaua n aia Aaro te koraki ake a kaokoro ma ngaira.
Tera arora ae riai nakoia kaain ara utu?
◼ Te bae reiakinaki n te Baibara: “Ngkami aika ataei, kam na ongeaba nakoia ami karo ni bwaai ni kabane, bwa e kakukurei te aro aei i nanon te Uea.”—I-Korote 3:20.
Reireiara: E aki tii kakoauaaki n ongeabaia ataei bwa a tangira aia karo ma a tangiria naba ni kakukureia te Atua.
◼ Te bae reiakinaki n te Baibara: “Teimatoa n taotaon nanomi i marenami ao tauraoi n ikabwarabure ngkana iai bukini ngurenguremi i marenami, n aron Iehova ngke e tauraoi ni kabwarai ami bure, ao ai aromi naba.”—I-Korote 3:13.
Reireiara: N tabetai a kona ni bwainikirinira tabemwaang n ikotaki naba ma kaain ara utu. Ma ti riai ni butimwaea kabwaraan aia bure tabemwaang ngkana ti tangiria bwa e na kabwarai ara bure te Atua.—Mataio 6:14, 15.
E aera bwa ti riai ni bwaina te koaua ao te akoi?
◼ Te bae reiakinaki n te Baibara: “Kaaki te kewekewe, ao ke e atoatonga te koaua temanna ma temanna nakon raona.”—I-Ebeto 4:25.
Reireiara: Ngkana ti atoatonga te koaua, ti a kakairi iai iroun te Atua ao ti kakukureia naba. Ngkana ti karikirakea te aroaro ae bwainan te kewe, ti a riki iai n aron te tia ribaa te Atua ae te Riaboro are “taman te kewe.”—Ioane 8:44; Tito 1:2.
◼ Te bae reiakinaki n te Baibara: “Karaoa ae riai nakoia aomata n aron ae ko tangiria bwa a na karaoia naba nakoim.”—Mataio 7:12, “Contemporary English Version.”
Reireiara: Ti riai n tabeakin aia namakin, aia iango ao kainnanoia kaain ara utu ao tabemwaang n ara aono. Ngkana ti kaotiota te “atataiaomata,” a na kona tabemwaang n rangi n akoira riki.—1 Betero 3:8; Ruka 6:38.
N aron ae kaotaki ni katoto aikai, a kona ni buokaki ataei n reirei aika n te Baibara bwa a na bwaina te kakaitau, te karinerine ao n riki bwa ikawai aika tabeakinia aomata. Ma antai ae a riai n reiakinia ataei reirei aikai?