Karekea Reireiam Man Ana Taeka te Atua Tera Arora ae Riai Ibukini Kauringani Maten Iesu?
Iai titiraki n te kaongora aei aika ko bae n tia n tabeki ao a kaotaki naba kaekaaia n am Baibara. A kukurei Ana Tia Kakoaua Iehova ni maroroakini kaekaaia ma ngkoe.
1. E aera bwa ti riai ni kauringa maten Iesu?
E tuangia taan rimwina Iesu bwa a na kauringa matena, n te amwarake ni kaikonaki are e kamanenaaki iai te bwerena ma te wain. E tei te bwerena ibukin rabwatan Iesu ao te wain ibukin raraana.—Wareka Ruka 22:19, 20.
E kamanena Iesu te bwerena are e aki karikaki ke are akea te iiti iai. N angiin te tai, e kamanenaaki te iiti n te Baibara ibukin te bure. Mangaia are e tonu raoi te bwerena ibukin rabwatan Iesu ae kororaoi. E anga rabwatana bwa te karea are a a katokaki iai angakarea aika maan n te Tua Rinanoni Mote. (I-Ebera 10:5, 9, 10) E tei te wain ibukin raraan Iesu ae rangi ni kakawaki, ae kawawaeaki bwa te karea ibukin ara bure.—Wareka 1 Betero 1:19; 2:24; 3:18.
2. N ningai ae ti riai ni kauringa iai maten Iesu?
E mate Iesu n Nitian 14 n tain te Toa ae te Riao. A moanaki aia bong I-Iutaia mani bungintaai. E kana te Toa ae te Riao Iesu ma ana abotoro n te tairiki are imwaini matena, ao imwina e a manga karaoa te katairiki ae te kauring ae boou ibukini kauringani matena.—Wareka Ruka 22:14, 15.
Ni boong aikai, a kauringa te baere e katauraoia te Atua, ana aomata rinanon Iesu ibukini kainaomataaia te botannaomata man te bure ao te mate. (Te Otinako 12:5-7, 13, 17) N aron are e kakauringaki te Toa ae te Riao teuana te tai n te ririki, e kakaraoaki naba Kauringani maten Iesu ni katoa ririki imwini bungintaai, n Nitian 14 ni kaineti ma ana karenta te Baibara.—Wareka Ioane 1:29.
3. Antai aika a riai ni katoonga te bwerena ao te wain?
E taekina ae kangai Iesu ngke e angania taan rimwina te wain: “E tei te mwangko aei ibukin te berita ae boou.” (1 I-Korinto 11:25) E oneaki mwin te berita n Tua Rinanoni Mote n te berita ae boou, are e beritanna te Atua ngkoa nakoia I-Iteraera bwa a kona n riki bwa ana aomata, ngkana a ongeaba raoi irouna. (Te Otinako 19:5, 6) E ngae n anne, a aki ongeaba I-Iteraera ni bwanaan te Atua. Ngaia are e a karaoa te berita ae boou Iehova.—Wareka Ieremia 31:31.
E karekei kakabwaiaaia aomata aika bati Iehova, n te berita ae boou rinanoia te koraki ake a karako mwaitiia. E karako mwaitiia te koraki ake n te berita ae boou bwa tii 144,000. A na kakabwaiaaki mirion ma mirion aomata man natannaomata nako rinanoia naakai, bwa a na karekea te maiu ae akea tokina n te bwaretaiti i aon te aba. A beku ibukin Iehova tabeman mai buakoia kaain te berita ae boou i aon te aba ni boong aikai. Bon tii ngaiia aika a na katoonga te bwerena ma te wain, bwa e tei te mwangko “ibukin te berita ae boou.”—Wareka Ruka 12:32; Te Kaotioti 14:1, 3.
4. Ti na kanga ni kakabwaiaaki man te Kauring?
A kakorakoraaki nanora ni kakaitau ibukin ana tangira Iehova ae rianako ni Kauringani maten Iesu ae karaoaki ni katoa ririki. E kanakoa Natina bwa e na mate ibukin ara bure. Ngaia are ti riai n iaiangoa nanoni maten Iesu ibukira, ngkana ti ira te Kauring. Ti riai n iangoi arora ake ti kona ni kaotiota iai ara kakaitau ibukin te bae a a tia ni karaoia ibukira Iehova ao Iesu.—Wareka Ioane 3:16; 2 I-Korinto 5:14, 15.
[Taamnei n iteraniba 11]
Ibukin rongorongona riki tabeua, nora iteraniba 206-208 n te Tera Ana Reirei ni Koaua te Baibara. boki aei ae boreetiaki irouia Ana Tia Kakoaua Iehova.