Arora n Riki Bwa Taan Onimaki ni Koaua ao Kaain te Aba Aika Onimakinaki

BAIKARA aroaron Iesu aika uoua ake a okoro ni kaineti ma ana mwakuri ni minita? Te moan, e tangiria Iesu bwa e na bitii nanoia aomata nako ma tiaki waaki n tautaeka. N te katoto, nora te baere e katerea Iesu n ana Kabwarabwara i aon te Maunga. E tuangia taan ongora imwain raoi taetaena ibukin riaia n riki bwa kaanga te taoro ke te oota, bwa aia bwai te kukurei ni koaua akana a “ataia bwa a kainnanoa te Atua.” E raonna riki ni kangai: “A a kukurei akana nimamannei, . . . akana eti nanoia . . . [ao] taan raoi.” (Mataio 5:​1-​11) E buokiia taan rimwina Iesu bwa a na ataia ae e kakawaki kaboraoan aia iango ao aia namakin, ma ana kaetieti te Atua ibukin te bwai ae raoiroi ma ae buakaka, ao ai kakawakin te beku iroun te Atua ma nanoia ni kabane.

Te kauoua, ngke e noriia aomata aika rawawata Iesu, e a kairaki man nanoangaaia bwa e na kabebeteia. Ma e ngae n anne, tiaki ana iango bwa e na kamauna te rawawata ni kabane. (Mataio 20:​30-​34) E kamarurungia aomata ma e aki katoka te aoraki. (Ruka 6:​17-​19) E kabebeteia akana karawawataaki, ma a teimatoa ni karawawataaki mani mwakuri n ribuaka. E angania aika baki kanaia, ma e teimatoa naba ni karawawataaki te botannaomata n te rongo.​—Mareko 6:​41-​44.

Bitakini Maiuia Aomata ao Kabebeteaia

E aera ngke e kaatuua ana iango Iesu i aoni bitakini maiuia aomata ao kabebeteaia ma tiaki bitakin te waaki n tautaeka ke katokan te rawawata? E ataia Iesu ae bon ana kantaninga te Atua bwa e na kamanena Ana Tautaeka n Uea n taai aika imwaira, ike e nang kamaunai tautaeka n aomata ni kabane ao baika a karika te rawawata. (Ruka 4:​43; 8:1) Ngaia are ngke a kaumaka Iesu ngkoa taan rimwina bwa e na kabatiaa riki ana tai ni kamarurungia aoraki, e taku nakoia: “Ti a nako nakon taabo tabeua riki, nakoni kaawa aika uakaan, bwa I aonga n uarongorongo naba iai, bwa ngaia aei bukin nakomaiu.” (Mareko 1:​32-​38) E kabebeteia aomata aika bati Iesu, ma e kakawaki riki irouna tataekinan te rongorongo ae raoiroi ao reiakinaia ana taeka te Atua.

A kakorakoraia Ana Tia Kakoaua Iehova ni kakairi iroun Iesu n aia mwakuri n uarongorongo ni boong aikai. A kaungaaki bwa a na kabebeteia ake a karawawataaki, n aroia n anga te ibuobuoki ae a kainnanoia aomata nako. Ma a aki kakorakoraia taani Kakoaua ni katoki mwakuri n ribuaka n te aonnaba. A kakoauaa bwa a na kamaunaaki baika a karika te rawawata ni kabane n Ana Tautaeka n Uea te Atua. (Mataio 6:​10) A kakorakoraia n aron Iesu ni bitii maiuia aomata ma tiaki botaki n tautaeka. E eti aroaroia anne, ibukina bwa tiaki waaki n tautaeka boton aia kangaanga aomata ma bon aroaroni maiuia.

Kaain te Aba Aika Onimakinaki

A kakoauaa Ana Tia Kakoaua Iehova bwa a riai n riki bwa kaain te aba aika onimakinaki ngkai Kristian ngaiia. Ngaia are a aantaeka ao a karineia taan tautaeka. A kaungaia aomata nako bwa a na ongeaba nakon te tua rinanon aia boki ao aia mwakuri n uarongorongo. Ma ngkana e tua te tautaeka te bwai ae kauntaba ma ana tua te Atua, a aikoa ira nanona taani Kakoaua. A “ongeaba iroun te Atua bwa te tia tautaeka, nakon ae [a] na ongeaba irouia aomata.”​—Mwakuri 5:​29; I-Rom 13:​1-7.

A kawariia aomata nako n aia kaawa Ana Tia Kakoaua Iehova, n angareirei i aon te Baibara n aki kabooaki. A bitaki maiuia aomata aika mirion ma mirion imwin te angareirei anne. Ni katoa ririki, a a tia bubua ma bubua te nga aomata ni buokaki n tokanikai i aon aroia aika urui maiuia n aron te moko, te koro ni manging, kabonganaan taian drug n te aro ae aki riai, te takaakaro n te mwane ao ai te wene ni bure. A a riki bwa kaain te aba aika maiuakina te aroaro ni maiu ae riai ao n onimakinaki, ibukina bwa a a tia n reiakina maiuakinani booto n reirei man te Baibara.

Irarikin anne, a buokaki kaain te utu man te angareirei i aon te Baibara bwa e na korakora te ikarinerine irouia raao ni mare ao n nakoraoi reitakia, n ikotaki naba ma ataei nakoia aia karo, ao i bon i marenaia. E a kakorakoraaki te itoman i marenaia kaain te utu ni kabane ni baikai. Ngkana a korakora utu, a na korakora naba iai taiani kaawa.

Tera am iango imwin rinanoan reirei ni kaongora aikai? A kamoamoaaki n te Baibara te koraki ake a boutokaa te reitaki i marenaia Aaro ma te tautaeka? E teretere raoi kaekaan anne bwa a bon aki. Ma a riai Kristian ni koaua n riki bwa kaain te aba aika onimakinaki? Eng, a bon riai. Ma a na kanga ni karaoa anne? Boni mani mutiakinan ana kaetieti Iesu, are a na riki bwa kaanga te taoro ao ootan te aba.

A na kakabwaiaaki te koraki ake a kakorakoraia ma aia utu, ni maiuakin ana kaetieti Kristo aika manena aikai, n ikotaki naba ma te kaawa are a maeka iai. A kukurei Ana Tia Kakoaua Iehova akana n am tabo, n tibwai rongorongo riki tabeua ibukin te angareirei i aon te Baibara ma ngkoe, n aron ae e tabe ngkai ni waakinaki n am kaawa.a

[Kabwarabwara mai nano]

[Reirei ae kakawaki n iteraniba 7]

E tangiria Iesu bwa e na bitii maiuia aomata, ma tiaki waaki n tautaekaCT100

[Reirei ae kakawa n iteraniba 8]

A kakoauaa Ana Tia Kakoaua Iehova bwa a riai n riki bwa kaain te aba aika onimakinakiCT100