Titeboo ma Booki Nako?

“E kairaki korean te Koroboki ae Tabu ni kabane iroun te Atua ao e manena . . . , bwa e aonga n taubobonga iai ana aomata te Atua, ma n tauraoi raoi nakoni mwakuri aika raraoi ni kabane.” —2 TIMOTEO 3:16, 17.

A KARAKO aomata ake a iangoa te Baibara, bwa te boki ae rangi ni manena ibukini bwaai ni kabane. Ma tera am iango iai? Ko iangoa te Baibara bwa:

• Te boki ae e kani warekana?

• Teuana mai buakoni booki ae titeboo kakawakina ma booki aika tabu?

• Te boki ae iai i nanona karaki aika a rangi n ataaki ma kaetieti ibukin te aroaro ni maiu ae riai?

• Bon Ana Taeka te Atua?

Iai te titiraki ae irekereke ma akanne ae kangai: E kakawaki bwa tera am koaua iai? Iangoa ae taekinaki n te Baibara ibukini kanoana: “Bwaai ni kabane ake a koreaki ngkoa, a koreaki ibukin reireiara, bwa ti na karekea te kantaninga rinanon nanomwaakara, ao rinanon te kabebeteaki man te Koroboki ae Tabu.” (I-Rom 15:4) E taekinaki n te Baibara bwa e boni koreaki ibukin reireiara, kabebeteara ao karekean ara kantaninga.

Ma ngkana te Baibara bon te boki ae te kabanea ni kakawaki ao ni manena ke teuana mai buakoni booki aika tabu, ko onimakinna bwa e na tuatuangko arom ao n reireinia kaain am utu, ai moarara riki ngkana e kaokoro te rongorongo are iai ma are ko iangoia bwa e eti? Ngkana ngaia bwa kanoan te Baibara bon otokaraki nikawai, ko na karekea te raunnano ao te kantaninga mani berita ake iai?

N te itera teuana, a a tia mirion ma mirion aomata n reiakina te Baibara, ao a kakoauaa bwa e kaokoro Ana Taeka te Atua ma booki nako. Bukin tera? Tera ae e rangi ni kaokoro iai te Baibara ma booki nako? Ti kaungako bwa ko na rinanon rongorongo aika nimaua ake a kaota kaokoron te Baibara ma booki nako, aika a na kabwarabwaraaki ni kaongora aika imwina.