E Nanonaki ni Mangautin Iesu te Maiu n Aki Toki!

MANGAUTIN Iesu bon te bwai ae rangi n ataaki ao n riki n taai akekei are e rangi ni kakawaki ibukira ni boong aikai. E katerea kakawakina te abotoro Bauro ngke e korea ae kangai: “[E a tia ni] kautaki Kristo mai buakoia maate, ae te moan uaa i buakoia te koraki ake a mate. Bwa ngkai e mate te aba iroun te mwaane ae tii temanna ao a na mangauti maate iroun te mwaane ae tii temanna. Bwa n aron ae a bane ni mate aomata i nanon Atam, ao ai arona naba bwa a na bane ni kamaiuaki i nanon te Kristo.”​—1 I-Korinto 15:​20-22.

E kautaki Iesu n Nitian 16 n 33 C.E., n te bong naba are a anga iai aia moan uaa I-Iutaia man arokaia nakon Iehova ae te Atua n te tembora ae tabu i Ierutarem. N atongan Iesu bwa te moan uaa irouni Bauro, e a kaotia iai bwa iai riki aika a na manga kautaki.

E kabwarabwaraa Bauro n ana taeka ake imwina te bwai are e kona n riki ni mangautin Iesu. E taku: “Bwa ngkai e mate te aba iroun te mwaane ae tii temanna ao a na mangauti maate iroun te mwaane ae tii temanna.” Ti bane ni mate ibukina bwa ti karekea te bure ao te aki kororaoi mairoun Atam. Ma rinanon maiun Iesu n aomata ae kororaoi are e anga bwa te karea ni kaboomwi, e a kauka iai kawaia te botannaomata bwa a na kainaomataaki man te tautoronaki n te bure ao te mate rinanon te mangauti. Ni kabwaninan te rongorongo n te aro ae mataata, e a korea ae kangai Bauro n I-Rom 6:23: “Bwa boon te bure te mate, ma te bwaintituaraoi are e anga te Atua, bon te maiu are aki toki rinanoni Kristo Iesu ae ara Uea.”

E boni kabwarabwaraa Iesu nanoni matena ao mangautina ibukira. E taekina ae kangai ibukina: “Ai aron naba Natin te aomata bwa e riai n tauraki, bwa e aonga n reke te maiu are aki toki irouia aomata nako ake a kakoauaa. Bwa e rangi n tangiriia kaain te aonnaba te Atua, n te aro are e a anga Natina ae te rikitemanna, bwa e aonga n aki kamaunaaki ane onimakinna, ma e na reke irouna te maiu are aki toki.”​—Ioane 3:​14-16.

Iangoa aron te maiu ae aki toki are akea iai te maraki, te rawawata ke te nanokawaki! (Te Kaotioti 21:​3, 4) Ai boni kakukureira te kantaninga aei! E taekina aei te tia rabakau temanna, n aron aei: “Kioina ngkai e kona ni kauringaki temanna bwa e kimototo te maiu aei man noran taian ruanimate, e a kakoauaaki ngkanne n te mangauti bwa e kimototo naba te mate.” Eng, e nanonaki ni mangautin Iesu te maiu n aki toki!