“E Tauraoi [Iehova] ni Kabwarai Ami Bure”

“Ngkana iai ae aki kona ni kabwarai aia bure aomata, titeboo iai ma e a urua te buriiti are e riai n toua.” Akanne ana taeka te tia kororongorongo ae Edward Herbert ae kaain Engiran n te ka-17 n tienture, are e a katuruturua bukina teuana ae ti riai ni kabwarai aia bure aomata bwa n te tai ae waekoa ke rimwi riki, ti na bae ni manga tuangia bwa a na kabwarai ara bure. (Mataio 7:12) Ma bon iai bukina ae kakawaki riki ngkai ti riai ni kabwarai buure. Nori ana taeka te abotoro Bauro n I-Korote 3:13.​—Warekia.

Ibukina bwa ti bane n aki kororaoi, ti kona ni kammarakiia ke ni kaunia tabeman ao a kona naba ni karaoa anne nakoira. (I-Rom 3:23) Ti na kanga ni kateimatoa te rau ma raora aika aki kororaoi? E kairaki Bauro iroun te Atua bwa e na anganira te taeka n reirei ae ti na taotaon nanora ao ni kabwarai buure. E rangi ni kakawaki te reirei ni kairiri anne ni boong aikai, n aron naba kakawakina ngke e koreaki e kaania uoua te nga te ririki n nako. Ti na neneri raoi ana taeka Bauro.

“Teimatoa n taotaon nanomi i marenami.” Taeka aika “teimatoa n taotaon nanomi” a raira te taetae ni Kuriiti ae nanonaki iai kariaiakan temanna ni karaoa te bwai ae tangiria ke te rau n taai ake a riai n un iai. E taekinaki n te boki teuana bwa a kaotiota te aroaro aei Kristian rinanon “tauraoia n aki un irouia te koraki aika teimatoa ni kaunia n aia mwakuri aika kairua ke aroaroia.” Ti tuangaki n taeka aika “i marenami” bwa ti riai ni kaai n taotaonakinnano. E nanonaki n anne, bwa ngkana ti uringnga bwa iai aroarora aika tao a un iai tabemwaang, ti na bon aki kariaia bwaai aika tao ti ribai irouia bwa e na urua te rau i marenara ma ngaiia. Ma tera ae ti na karaoia ngkana a bure aomata nakoira?

“Teimatoa . . . [n] tauraoi n ikabwarabure.” Ni kaineti ma te tia rabakau temanna, te taetae ni Kuriiti ae rairaki bwa “tauraoi n ikabwarabure” “bon tiaki te taeka ae taneiai te aba iai ibukini kerikaakin te un ke te kabwarabure . . . ma bon teuana mai buakon te anua ae katuruturuaki iai te akoi ni kabwaraani buure.” E taekinaki n te boki teuana riki bwa e kona naba n nanonaki te taeka aei bwa “karekean te bwai teuana ae karaunano, te akoi ao te kakabwaia.” Ti kaotiira bwa ti akoi ngkana ti tauraoi ni kabwarai buure, e ngae naba ngkana ‘iai bukini ngurengurera i marenara.” Ma e aera ngkanne bwa ti riai n tauraoi ni kaotiota te akoi? Teuana bukina, bwa e aki maan imwin anne ao ti na bae n tangira te aomata ae ti kaunna bwa e na manga akoira naba ni kabwarai ara bure.

“N aron Iehova ngke e tauraoi ni kabwarai ami bure, ao ai aromi naba.” Aio bukina ae moan te kakawaki ngkai ti riai n tauraoi n ikabwarabure, bwa e bon tauraoi Iehova ae te Atua ni kabwarai ara bure. (Mika 7:18) Karaua iangoa ana tangira Iehova ae korakora nakoia taani bure aika rairi nanoia. E kaokoro Iehova ma ngaira bwa e kororaoi. E bon tauraoi ni kabwarai aia bure ni kabane naake a rairi nanoia, e ngae naba ngke e ataia bwa e aki kainnanoia taani bure akanne bwa a na kabooa mwin ana tangira ni kabwaraa ana bure. Ni koauana, Iehova bon te banna ni katoto ae moan te tamaroa ni kaineti ma tauraoina ni kabwarai aia bure aomata aika rairi nanoia!

Ti atikaki ni kaania Iehova man ana nanoanga ao ni kaungaaki bwa ti na katotongnga. (I-Ebeto 4:32–5:1) Ti karaoa ae raoiroi ngkana ti titirakinira ni kangai: ‘Kioina ngkai e akoi mani kabwarai au bure Iehova, N na kanga ngkanne n rawa ni kabwaraa ana bure raou ae aki kororaoi ae raira nanona ni koaua ibukin ana bure?’​—Ruka 17:​3, 4.