Ko Ataia?

Tera mwiokoan te mataniwi n tautia n ana taanga ni buaka Rom?

A mwaiti kiibu aika kaotaki n te Koroboki ni Kristian ae Tabu n te Taetae ni Kuriiti aika taekinaki iai taekaia mataniwi n tautia n Rom. E taua te nakoa anne te mataniwi n tautia are e kaira kamatean Iesu n aron naba Korenerio are te moan Tientaire ae e rairaki nakon te Aro ni Kristian. Te tautia are e kaira kataerean te abotoro Bauro ao te tautia ae Iurio are e nikira Bauro i Rom, boni mataniwi n tautia naba ngaiia.—Mareko 15:39; Mwakuri 10:1, te kabwarabwara are i nano; 22:25; 27:1.

E kairiri n angiin te tai te mataniwi n tautia i aoia te taanga n tautia ae 50 kaaina ke 100 aika nakonako ni waeia. E mwiokoaki bwa e na anga te kataneiai ao te reirei ni kaetieti nakoia ana tautia, e na tuoi kunnikaia ma aia bwai ni buaka ao n angania te kairiri n tain te buaka.

Bon te nakoa ae te kabanea n rietata te mataniwi n tautia ae kona n reke iroun te tautia. Te koraki ake a karekea te nakoa aei bon tautia aika a mwaatai ao taani kairiri aika raoiroi. A onimakinaki te koraki aikai ibukin nakoraoin ao kataneiaakin te taanga ni buaka n Rom ae korakora. Ni kaineti ma te rongorongo teuana ao e taekinaki iai taekaia mataniwi n tautia bwa boni “mwaane aika a rangi ni mwaatai ngaiia ao n rabakau i nanon te taanga ni buaka.”

A kangaa ni kaokoro tirotaam n taai ake a karakinaki n te Baibara ma aika n ara bong aikai?

A kaokoro tirotaam n taai ake a karakinaki n te Baibara ma aika n ara bong aikai bwa a karaoaki n angiin te tai mani biiti aika rangi n raneanea n aron te buraonti ao n tabetai te buraati, te tirewa, te koora ke te bititaom. A moan taekinaki taekan tirotaam n te Baibara n rongorongoni katean umwan te Atua are aia tabo n taromauri tibun Iteraera. A anganako aia tirotaam aine ibukini karaoan te taabu n tebotebo ae te buraati ao nangoana. (Te Otinako 38:8) N taraana, a kabuekaki tirotaam aikai bwa a aonga n ran ibukini karaoan te taabu n tebotebo anne.

A aki toki ni kunei tirotaam taan rabakau aika taani keniken i nanon ao irarikin Iteraera ma bwaai ni katamaroa ao bwaai riki ni kabotonnaine tabeua. A mronron tein tirotaam akanne n angiin te tai ma katamaroaani mataniwia aika karaoaki man te kai, te biti, ke kain tauana ae te aiwere ae kaanga ai aron tein te aine. N angiin te tai ao e aki katamaroaaki matan te tirotaam are aki raneanea.

A aki rangi n itiaki matan tirotaam ake rimoa ni kabotauaki ma tirotaam aika n ara bong aikai. E kabwarabwaraa taekan aei te abotoro Bauro ngke e kangai: “Bwa n te tai aei ao e maabubu ara taratara, kaanga ai aron ae ti taratara rinanon te tirotaam ae maabubu.”—1 I-Korinto 13:12.