Nora ae Raoiroi n Am Mwakuri Korakora
1. Tera ae kona ni kakerikaaka ingaingara n te mwakuri ni minita?
1 E karaoaki te aomata bwa e na “kakukureia taamneina n te raoiroi i buakon ana makuri.” (TeMin. 2:24, BG) Ma ngkana ti aki kona n nora ae raoiroi n ara mwakuri ni minita, e kona ni bwara iai nanora n te aro are e a bua kimwareireira ao ni kerikaaki ingaingara. Tera ae kona ni buokira bwa ti na kateimatoa te iango ae raoiroi?
2. Bukin tera bwa ti riai ni karekea te kantaninga ae raoiroi ni kaineti ma butimwaeara n ara mwakuri ni minita?
2 Karekea te Kantaninga ae Raoiroi: Uringnga are e ngae ngke tii tabeman aika butimwaea ana rongorongo Iesu, ma e kakoauaaki bwa e uaana ana mwakuri ni minita. (Ioa. 17:4) N ana kaikonaki Iesu ibukin te tia ununiki, ao e a kaman taekinna bwa a na mwaiti ni kabaneani boong aika a na aki butimwaea rongorongon te Tautaeka n Uea. (Mat. 13:3-8, 18-22) Ma e ngae n anne, e teimatoa n uaana ara mwakuri korakora.
3. Ti na kanga ni “karikii uaa” e ngae ngke e aki rangi ni butimwaeaki ara uarongorongo?
3 Arora ni Karikii Uaa Aika Bati: Ni kaineti ma ana kaikonaki Iesu, ao e taekinna bwa te koraki ake a butimwaea te rongorongo a na boni “karikii uaa”. (Mat. 13:23) Ngkana e a tia ni karika baana te uita ma n ikawai, ao e a karikii koraa aika boou ma tiaki kain uita aika uarereke. Mangaia are te uaa are a karikirakea Kristian bon tiaki taan rimwin Iesu aika tibwa reke, ma boni kabatiaan unikani koraa ae ara uarongorongo ibukin te Tautaeka n Uea. Aei are e a karekea te “raoiroi” ae bati ae ti na rauaki iai, n aki ongeia bwa a butimwaeira aomata ke a aki. Ti boutokaa iai katabuan aran Iehova. (Ita. 43:10-12; Mat. 6:9) Ti kimwareirei n riki bwa raon te Atua ni mwakuri. (1 Kor. 3:9) E kakukureia Iehova te karea ni karaoiroi anne ae “nako mai wira.”—Ebera 13:15, 16.
4. Tera uaan ara mwakuri ni minita ae ti aki kona n ataia?
4 Irarikin anne, e kona n uaana ara mwakuri korakora ma ti aki ataia. E riki naba aei nakoia tabeman ake a butimwaea Iesu ngke e uarongorongo, bwa a aki waekoa n riki bwa taan rimwina ni karokoa banen ana mwakuri ni minita i aon te aba. N aron naba anne, e kona n aki waekoa ni bwebwerake koraan te Tautaeka n Uea ae ti unikia i nanon te aomata ni karokoa ae e a butimwaea te koaua man te Baibara n akea ataakina iroura. Ni koauana, e rangi ni bati bongan ara mwakuri ni minita. Ai ngaia are ti bia “teimatoa ni karikii uaa aika bati,” ao ni kakoauaa bwa bon taan rimwin Iesu ngaira.—Ioa. 15:8.