Te Uarongorongo ma Booki Ake a Kaotiotaki

E kakoauaaki bwa e rangi n uaana te uarongorongo ma te kaa ae kokokaki ke te taibora ibukini katikaia nakon te koaua, naake a raoiroi nanoia. (Io. 6:44) Ngaia are, a kaungaaki unimwaane n te ekaretia bwa a na bairea te uarongorongo ibukia botannaomata n aonon te ekaretia ae bati te ririaki iai. Kioina ngkai a aki titiku ara bwai ni mwakuri aikai n te tabo ae tii teuana, e aki riai karekean te kariaia mairouia taani kairiri n te tautaeka. Antai aika a tau iai? Taan uarongorongo aika kaotiota te iangoraoi, a bwaina te aroaro ae raoiroi ao a mwaatai ni maroro. Aikai baika a na karaoaki ao aika aki riai ni karaoaki ibukini buokaia taan uarongorongo bwa a na mwaatai riki.

Baika a na Karaoaki:

Kaota te mata n iraorao, te butimwaei ao te ibuobuoki nakoia naake a ririaki. Tabeman taan uarongorongo, a kaotiota te mata n akoi, te moangare ao a biririmoa ni kamauri. Ngkana e mamataku ni booki ake a kaotiotaki te aomata ae ririaki, ko kona ni kangai, “Ko kona n rinea ae ko tangiria.”
Kararoako teutana mai iai. N taabo tabeua, a noria taan uarongorongo bwa e nakoraoi riki ngkana a kararoaia teutana. Ma a noria tabeman bwa te anga aei a kona taan ririaki n rawa ni kaania, ngaia are a kararoaia riki teutana ao n tataninga ni karokoa e tei temanna irarikina. N te tai are e a kaania iai, maroro ma ngaia tao n titirakinna ni kangai: “Ko a tia n iaiangoa te titiraki anne mai mwaina?”
Kabongana n taai nako te Baibara.
Kabwarabwaraa te babaire ibukin te reirei n te Baibara nakon te aomata ae tangira ara boki, n aron Ana Reirei te Baibara. Kaota nakoina te taamnei ae E Aera Ngkai E Raoiroi te Reirei n te Baibara? n te intanete man am mobwao.
Karekei aia atureti naake a kan ongora ngkana ko kona. Ngkana iai ae e aki maeka n am aono, kanoaa te booma ae te Please Follow Up (S-43) ao angan te tia koroboki ngkekei naba.