Kakairi n Aia Katoto Burabeti n Aron—Abakuka
1. E aera ngkai ti kona n ota n ana namakin Abakuka?
1 Ngkai ti a kaaitara ma rikiraken te buakaka ae otabwaninira n te aonnaba aei, ti a kona n namakina aron are e namakinna Abakuka are titirakina Iehova ni kangai: “Bukin tera ngkai Ko kaota te buakaka nako iu, ma n tara te iowawa?” (Aba. 1:3, BG; 2Tim. 3:1, 13) E kona kananoan ara iango n ana rongorongo Abakuka ao arona ni kakaonimaki ni buokira ni kateimatoaira ngkai ti kantaningaa ana bong ni motikitaeka Iehova.—2Bet. 3:7.
2. Ti na kangaa ni kaotia bwa ti maiu n ara onimaki ni boong aikai?
2 Maiu n te Onimaki: N onean mwin are e na taonakinako Abakuka ni baike e kaaitarai, e teimatoa n tantani ao ni kamarurungnga n te itera n taamnei. (Aba. 2:1) E karaua nanon te burabeti aei Iehova bwa e na boni koro bukin Ana taeka n taina ae riai ao “e na maiu ane raoiroi n ana onimaki.” (Aba. 2:2-4, BG) Tera nanon anne ibukia Kristian ake a maiu n raabanen tain te toki? E kakawaki riki kakoauaan ae e na bon roko te toki nakon ataakin te tai ae e na roko iai. E kairira te onimaki bwa ti na teimatoa n tantani ao ni moanibwaia ara mwakuri ni minita.—Ebera. 10:38, 39.
3. E aera bwa ti riai ni kateimatoa kimwareireira ni beku ibukin Iehova?
3 Kakatonga Iroun Iehova: E na kataaki ara onimaki n te tai are e a buakania iai ana aomata te Atua Koka mai Makoka. (Etek. 38:2, 10-12) E karika te kangaanga te buaka ao nakoia naba taan tokanikai. E kona n tare te amwarake. A kona ni bua aia bwai aomata ao ni kerikaaki te maiuraoi. Tera arora ngkana a riki kangaanga? E ataia Abakuka bwa a na riki kangaanga, ngaia are e motikia bwa e na kateimatoa kimwareireina ni beku ibukin Iehova. (Aba. 3:16-19) E buokira ‘kimwareireira iroun Iehova’ ni kaaitarai kataaki aika imwaira.—Neem. 8:10, BG; Ebera 12:2.
4. Tera te kimwareirei ae ti kona ni karekea ngkai ao n te tai ae na roko?
4 A na teimatoa n reireinaki n ana kaetieti te Atua ibukin te maiu naake a kamanoaki iroun Iehova ao a rinanon ana bong ni motikitaeka. (Aba. 2:14) A na reiakina naba taekan Iehova akana kautaki. Ma ti bia kabonganai ngkai taai ni kabane ni maroroakina taekan Iehova ao ana mwakuri aika kamimi!—TaiAre. 34:1; 71:17.