MAIURA NI KRISTIAN
Uringnga n Tataro Ibukia Tarira Aika Bwainikirinaki
E taetae ni burabetinaki n te Baibara ae e na bwainikirinira Tatan bwa e aonga ni katoka ara mwakuri ni minita. (Io 15:20; Kao 12:17) Ti na kangaa ni buokiia tarira n te onimaki aika bwainikirinaki n aaba tabeua? Ti kona n tataro ibukia. “E rangi ni mwaaka ana kakorakora n tataro ni bubutii te aomata ae raoiroi.”—Iak 5:16.
Tera ae ti na taekinna n ara tataro? Ti kona ni butiia Iehova bwa e na angania tarira te ninikoria ao ni buokiia bwa a na aki maaku. (It 41:10-13) Ti kona naba n tataro ibukia taani kairiri n te tautaeka bwa a na kariaia ara mwakuri n uarongorongo, “bwa ti aonga ni maiu i nanon te rau ma te mweraoi.”—1Ti 2:1, 2.
Ngke a bwainikirinaki Bauro ao Betero, a tataro Kristian ake n te moan tienture n atongi araia. (Mwa 12:5; Ro 15:30, 31) E ngae ngkana ti aki atai araia ni kabane naake a bwainikirinaki ni boong aikai, ma ti kona n taekina aia ekaretia, abaia, ke aia aono?