Iai te Kairiri ae Kona n Onimakinaki Ibukini Karekean te Kabwaia n Taai Aika a na Roko?

N aron ae kaotaki ni kaongora ake mai mwaina, a bati aika kataia ni karekea te kabwaia nakon taai aika imwaia man onimakinan te koaua are e a kamani baireaki maiuia, te reirei, te kaubwai, ao kakaraoan ae raoiroi. Ma karaoani mwaneka akanne, kaanga ai aron touani mwin te mwabe ae bure. Nanona ngkanne bwa akea te kairiri ae kona n onimakinaki ibukin taai aika a na roko? Tiaki ngaia anne!

TE KAIRIRI MAIROUN TEMANNA AE WANAWANA RIKI

Imwaini karaoan ara motinnano, ti kakarekea buokara mairoun ae e a ikawai ke ae wanawana riki nakoira. N aron anne, ti kona ni karekea te kairiri ae manena ibukini maiura n taai aika a na roko mairoun Teuare e a ikawai riki ao ni wanawana riki nakoira. Ti kona ni karekea ana reirei ni kairiri man te boki ae moanaki koreana tao 3,500 te ririki n nako. Te boki anne bon te Baibara.

E aera bwa ko kona n onimakina te Baibara? Ibukina bwa te tia Koreia bon te kabanea n ikawai ao ni wanawana n te iuniweeti. E taekinaki bwa bon “Teuare iai Mangkoangkoa” ae ‘akea moana ma tokina.’ (Taniera 7:9; Taian Areru 90:2) Bon “te tia Karika karawa ae te Atua ae koaua, ae Teuare karaoa te aonnaba.” (Itaia 45:18) E kaota arana nakoira ae Iehova.—Taian Areru 83:18.

Ibukina bwa te Baibara bon te boki mairoun te tia Karikiia aomata ni kabane, e aki taekinaki iai bwa e raoiroi riki te reeti ke te aba teuana nakon are teuana. E manena n taai nako te reirei ni kairiri are iai, ao a kakabwaiaaki iai aomata man aaba nako. E tauraoi n taetae aika bati, ao e bati riki tibwatibwaakina nakoni booki nako.a Ngaia are a kona aomata n taabo nako n ota iai ao ni kairaki iai. E boraoi anne ma ae taekinaki n te Baibara:

“E bon aki inanonano te Atua, ma a butimwaeaki irouna aomata nako aika maakua ma ni kakaraoa ae raoiroi, mai buakoia natannaomata nako.” —MWAKURI 10:34, 35.

N aron te karo ae tatangira ae anganga te kairiri nakoia natina, bon te Tama naba ae tatangira Iehova ae te Atua ae anganira buokara rinanon ana Taeka ae te Baibara. (2 Timoteo 3:16) Ko kona n onimakina ana Taeka, bwa e boni karikira ao e ataa te maiu ae te kabanea n tamaroa ibukira.

TI KONA N ONIMAKINA TE BAIBARA

Ti kona n onimakina ana taeka te Baibara ibukin taai aika a na roko, kioina ngkai baike e taekin 2,000 tabun te ririki n nako ibukini baika a na riki ao aroaroia aomata, a a bon riki ngkai.

BAIKA A NA RIKI

“E na teirake te natannaomata teuana ni buakana te natannaomata teuana, ao te tautaeka n uea teuana ni buakana te tautaeka n uea teuana. A na roko mwaeiein te aba aika kokorakora, ao roongo ma aoraki aika kamamate n te tabo teuana ma teuana.”—RUKA 21:10, 11.

AROAROIA AOMATA

“A na roko taai aika okoro aika karuanikai, ni kabaneani boong. Bwa ane a nang riki aomata bwa taan tangiriia i bon irouia, taani bakimwane, taani kamoamoa, taan nanorieta, taan taetae ni kabuakaka, taan aki ongeaba irouia aia karo, taani bangaomata, taan aki kakaonimaki nakoia raoia, taan aki tatangira, taani kakanneti, taan uarao, taan aki taubaang, taan iowawa, taan riribaa te raoiroi, taani kamwamwane, taan aki kani bwerengaki, taani kainikatonga, taan tangira riki kakukurein te rabwata nakon tangiran te Atua.”—2 TIMOTEO 3:1-4.

Tera am iango n norakin te Baibara ni kaman taekini baika riki ni boong aikai? Ko bae ni boraoi n iango ma Leung mai Hong Kong. E taku “A a kamani koreaki taetae ni burabeti n te Baibara aikai. A aki kona aomata ni kaman taekini baikai ao a na koro bukia. Ae nanona bwa e bon nako te Baibara mairoun te aomata ae rianako riki wanawanana nakoira.”

Iai n te Baibara bubua ma bubua taetae ni burabeti aika a tia ni koro bukia.b E oti raoi iai bwa te Baibara bon Ana Taeka te Atua. E taku Iehova: “Bon te Atua ngai ao akea riki temanna ae ai arou. I a kamani kaotii tokini bwaai man te moantai.” (Itaia 46:9, 10) Ngaia are ko boni kona n onimakina te baere taekinaki n te Baibara ibukin taai aika a na roko.

TE KAIRIRI AE KO KAKABWAIAAKI IAI NGKAI AO N AKI TOKI

Ngkana ko ongeaba n te kairiri are n te Koroboki ae Tabu ko na boni kakabwaiaaki iai. Iangoi katoto tabeua.

TE TAEKA N REIREI IBUKIN TE MWANE AO TE MWAKURI

“E raoiroi riki te motirawa ae uarereke nakon te mwakuri korakora ae bati ao kaean te ang.”—TE MINITA 4:6.

TE MAIU N UTU

“E riai n tangira buuna temanna ma temanna n arona n tangiria i bon irouna, ao ai arona naba bwa e riai te buu te aine ni korakora karineani buuna irouna.”—I-EBETO 5:33.

TE REITAKI MA AOMATA

“Kanakoa te un ao kitana te un ae korakora. Tai kauna nanom ao n rairaki nakoni karaoan ae buakaka.”—TAIAN ARERU 37:8.

Ko kakabwaiaaki ni maiuakinan ana taeka te Baibara, ao e na kanakoraoa naba maium nakon taai aika a na roko. Ti nori ana berita te Atua n te Baibara, ao e kaotaki naba iai te maiu ae tamaroa riki n te tai ae imwaira

TE RAU AO TE MWERAOI

“E na korakora kimwareireia n te rau ae bati.”—TAIAN ARERU 37:11.

E NANG REKE AIA AUTI AO KANAIA AOMATA NAKO

“A na katei auti ao a na maeka i nanoia, ao a na uniki kureebe ni nne ni kureebe ao ni kang uaaia.”—ITAIA 65:21.

E NANG AKEA TE AORAKI AO TE MATE

“E nang akea riki te mate, ke te nanokawaki ke te tang ke te maraki.”—TE KAOTIOTI 21:4.

Tera ae ko riai ni karaoia bwa ko aonga n roko n te tai anne? Nora te kaongora are imwina.

a Ibukin rongorongon riki rairan ao tibwaakin te Baibara, nakon www.pr418.com i aan BIBLE TEACHINGS > HISTORY & THE BIBLE.

b Ibukin rongorongona riki, nora mwakoro 9 n te boki ae The Bible—God’s Word or Man’s? ae boreetiaki irouia Ana Tia Kakoaua Iehova. E kona n reke naba n te atureti n te intanete ae www.pr418.com. Nakon LIBRARY > BOOKS & BROCHURES.