“Ao Ane A na Ataingkami Aomata ni Kabane Bwa Bon Taan Rimwiu Ngkami, n Aei”

1. Tera ae anaaki iai nanoia aomata aika bati aika kan ongora, ngke a kaea te taromauri? (Nora naba te taamnei.)

IANGOIIA taanga aika a tibwa moani kaea te taromauri n Aia Tabo n Taromauri Ana Tia Kakoaua Iehova. A rangi n ringaki nanoia n aroni butimwaeaia ma te akoi, ao te itangitangiri i marenaia kaain te ekaretia. I aoni kawaia n okira mwengaia, ao e a taku neiere te aine nakoni buuna, ‘Iai te bwai ae a kaokoro iai Ana Tia Kakoaua Iehova, ae te bwai ae raoiroi.’

2. E aera bwa a katoka aia beku iroun Iehova tabeman?

² E rangi n okoro te tangira are i marenaia ana aomata Iehova. A bon aki kororaoi Ana Tia Kakoaua Iehova. (1Ioa. 1:8) Ngaia are ngkana ti a kinaia riki kaain te ekaretia, ti a kona naba ni kai nori kabwakaia. (IRom 3:23) E kananokawaki bwa tabeman a a katoka aia beku iroun Iehova, ibukin aki kororaoia tabemwaang.

3. Tera kanikinaeaia taan rimwin Iesu ni koaua? (Ioane 13:34, 35)

³ Taraa riki te kibu ae aana te kaongora aei. (Wareka Ioane 13:34, 35.) Tera kanikinaeaia taan rimwini Kristo ni koaua? Bon te tangira, ma tiaki te kororaoi. Noria naba bwa e aki kangai Iesu: ‘Ao ane kam na ataaki bwa bon taan rimwiu ngkami, n aei.’ Ma e kangai: “Ao ane a na ataingkami aomata ni kabane bwa bon taan rimwiu ngkami, n aei.” E katerea Iesu bwa tiaki tii taan rimwina aika a na kona ni kinaia taan rimwina ni koaua, man aia itangitangiri ae e aki bangaomata ma bon aomata naba aika tiaki kaain te ekaretia.

4. Tera ae a kan ataia tabeman ibukia Kristian ni koaua?

⁴ A kona ni kangai tabeman aika tiaki Ana Tia Kakoaua Iehova: ‘E na kangaa te tangira ni buokira ni kinaia taan rimwin Iesu ni koaua? E kangaa Iesu ni kaotiota te tangira nakoia ana abotoro? Ao e na kangaa ni kona ni kakairi te aba n ana katoto Iesu ni boong aikai?’ A wanawana taani Kakoaua ngkana a iaiangoi kaekaan titiraki aikai. E na buokira karaoan anne ni kaotiota raoi te tangira, moarara riki n taai ake ti kabokorakora iai ma aki kororaoia tabemwaang.—IEbe. 5:2.

E AERA NGKAI TE TANGIRA BON TII KANIKINAEAIA TAAN RIMWIN IESU NI KOAUA?

5. Kabwarabwaraa nanon ana taeka Iesu are n Ioane 15:12, 13.

⁵ E kamataata raoi Iesu bwa a na kinaaki taan rimwina n te aeka n tangira ae okoro. (Wareka Ioane 15:12, 13.) Noria bwa e tua aei Iesu nakoia: “Kam na itangitangiri i marenami n arou ae I tangiringkami.” Tera nanon anne? E reitia ni kabwarabwaraa Iesu bwa aei te tangira ae ko anga iai boni ngkoe, ae e kairaki iai te Kristian bwa e na mate ibukin tarina, ngkana e riai.b

6. E kangaa ni katuruturuaki kakawakin te tangira n Ana Taeka te Atua?

⁶ E bati te tai ae katuruturuaki iai kakawakin te tangira n Ana Taeka te Atua. A bati aomata aika a mamate nanoia ni kiibu aikai: “Te Atua bon te tangira.” (1Ioa. 4:8) “Ko riai n tangira raom n aomata n aron tangiram i bon iroum.” (Mat. 22:39) “E rabuni buure aika rangi ni bati te tangira.” (1Bet. 4:8) “Akea kabwakan te tangira.” (1Kor. 13:8) E mataata mani kiibu aikai ao tabeua riki aroni kakawakini karikirakean ao maiuakinan te aroaro ae tamaroa aei.

7. Bukin tera bwa e aki kona Tatan ni katiteuanaia aomata n te tangira ni koaua?

⁷ A bati aomata aika titiraki ni kangai: ‘Ti na kangaa ni kona ni kinaa te Aro ae koaua? A taku Aaro ni kabane bwa a reirei te koaua, ma a bane ni kaokoro aia reirei ibukin te Atua.’ E a tia Tatan ni kamangaoi aia iango aomata n arona ni katei botaki n Aro aika kewe. Ma e bon aki kona ni katea te botaki n itaritari ni Kristian aika itangitangiri i marenaia. Tii Iehova ae kona ni karaoa anne. Ao e bon riai anne ibukina bwa te tangira ni koaua e bon roko mairoun Iehova, bwa tii naake iai taamnein Iehova i aoia ao ana kakabwaia, aika a itangitangiri ni koaua. (1Ioa. 4:7) Anne bukina are e taku iai Iesu bwa te tangira ae e aki bangaomata anne, boni kanikinaeaia taan rimwina ni koaua.

8-9. Iraman aika a a tia n rotaki nanoia n te tangira are a noria i marenaia Ana Tia Kakoaua Iehova?

⁸ N aron are e a kaman taekinna Iesu, a bati aika kinaia taan rimwina ni koaua, man aia itangitangiri ni koaua i marenaia. N te katoto, e uringa te moani bwabwaro are e kaea te tari te mwaane ae Ian, ae e boo n te titeiteam n takaakaro ae uakaan ma mwengana. Tabeua te namwakaina mai mwaina ao e a tia Ian n roko n te titeiteam aei ni mataku n te takaakaro. E taku: “E rangi ni bubura kaokorona ma te bwabwaro aei. A akoi taani Kakoaua, a taraaraoi oneaia, ao a ongotaeka natiia.” E a manga taku riki: “Ae rianako riki, iai te rau irouia aomata aikai, ae te bwai ae I a kamani kani karekea. I aki uringi kabwarabwara ake n te bong anne, ma I aki kona ni mwaninga aroaroia taani Kakoaua.”c Aeka n aroaro aikai boni uaan te tangira ni koaua i marenara. Ti kaotiota te akoi ao te karinerine i marenara ibukina bwa ti tangirira ni koaua.

⁹ Anne naba rotakin te tari temanna ae John, ngke e moani kaakaei bobotaki n taromauri, e taku: “E rotaki nanou n aia momoaaomata . . . boni ngaiia ni kabane, ao I a iangoiia bwa a kororaoi. I a kakoauaa man aia tangira ni koaua bwa I a kunea te Aro ae koaua.”d A aki toki aekaki n rongorongo aikai ni kaotia bwa ana aomata Iehova boni ngaiia Kristian ni koaua.

10. N ningai ae ti a kainnanoa riki iai kaotiotan te tangira ni Kristian? (Nora naba te kabwarabwara mai nano.)

¹⁰ N aron ae oti ni moan te kaongora, bon akea ae kororaoi i buakora ngaira taani kakoaua. Iai taai ake a na taekin ke ni karaoi iai bwaai tarira ni kaunira iai.e (Iak. 3:2) Ngkana e riki anne, e a reke iai ara tai ni kakorakoraira ni kaotiota te tangira ni Kristian nakoia. Tera ngkanne reireiara man ana katoto Iesu, ni kaineti ma aei?—Ioa. 13:15.

E KANGAA IESU NI KAOTIOTA TE TANGIRA NAKOIA ANA ABOTORO?

11. Baikara aroaro aika aki raraoi ake a oti irouia Iakobo ma Ioane? (Nora naba te taamnei.)

¹¹ E aki kantaningaia taan rimwina Iesu bwa a na kororaoi. Ma e buokiia ma te tangira ni kaetii aroaroia aika aki raraoi, bwa a aonga ni karekea akoaia iroun Iehova. N te taina, ao a kanakoa tinaia abotoro aika uoman aika Iakobo ma Ioane, bwa e na tuanga Iesu karekean aia tabo ae kakannato n te Tautaeka n Uea. (Mat. 20:20, 21) E oti n aroia Iakobo ma Ioane aei bwa a nanorieta ao a kani kakannato.—TaeRab. 16:18.

12. Tii Iakobo ma Ioane n oti aroaroia aika aki raraoi? Kabwarabwaraa.

¹² Tiaki tii Iakobo ma Ioane n oti aroaroia aika aki raraoi n te tai anne. Nora aroia abotoro ake tabeman: “Ngke a ongo naake tengaun taekan te baei, ao a a maraki nanoia irouia taari aika uoman aikai.” (Mat. 20:24) Ti kona ni kataamneia bwa tao e a boo atin te kauntaeka i marenaia Iakobo, Ioane, ao abotoro ake tabeman. Tao ake tabeman a bae ni kangai: ‘Kaanga antai ngkami ngkai kam na tuatua nnemi ae kakannato n te Tautaeka n Uea? Kai tiaki tii ngkami ni mwakuri korakora i rarikin Iesu. Bon titeboo arora ma ngkami, ngaira naba e riai n reke nnera ae kakannato!’ N aki ongeia bwa tera raoi ae riki, ma a a tia abotoro aikai ni kariaia te kangaanga aei bwa e na uruana aia itangitangiri n tari i nanon tabeua te tai.

13. Tera ae e karaoia Iesu ni kaineti ma kabwakaia ana abotoro? (Mataio 20:25-28)

¹³ Tera ae e karaoia Iesu ngke e riki aei? E bon aki un. E aki te roko n taekinna bwa tao e nang kakaaeia riki ana abotoro aika raraoi riki, aika a nanorinano ao aika a na teimatoa n itangitangiri i marenaia. Ma e kataetaeia mwaane aikai ma te nanorinano bwa e ataia ae e raoiroi nanoia. (Wareka Mataio 20:25-28.) E teimatoa ni kaotiota te tangira nakoia, e ngae ngke tiaki aio aia moantai ke aia kabane abotoro aikai n uneakinna bwa antai ae kakannato i buakoia.—Mareko 9:34; Ruka 22:24.

14. Aekakira te tabo ae a bwebwerake iai ana abotoro Iesu?

¹⁴ Akea te nanououa bwa e boni kinaia raoi ana abotoro Iesu. (Ioa. 2:24, 25) A bwebwerake n te tabo ae a angareirei iai mataniwi n Aaro bwa ko kakawaki riki ngkana iai nnem ae kakannato. (Mat. 23:6) A iaiangoia naba mataniwin te Aro n I-Iutaia bwa a raoiroi riki nakoia tabemwaang.f (Ruka 18:9-12) E ota Iesu bwa te aekaki n tabo anne e kona n rota aia taratara abotoro aikai, i bon ibukia ao ibukia naba tabemwaang. (TaeRab. 19:11) E aki kantaningaa te bae e riao mairouia taan rimwina ao e aki naba un ngkana a kabwaka. E ataia ae a raoiroi nanoia, ngaia are e buokiia ma te taotaonakinnano bwa a aonga n tokanikai i aon te nanorieta ao te kani kakannato, ao ni karikirakea te tangira.

TI NA KANGAA NI KAKAIRI N ANA KATOTO IESU?

15. Tera reireiara man te baere e riki iroun Iakobo ma Ioane?

¹⁵ Ti kona ni karekei reireiara aika bati man te baere e riki irouia Iakobo ma Ioane. A boni bure ngke a tuatua nneia ae kakannato n te Tautaeka n Uea. Ma a bure naba abotoro ake tabeman ngke a kariaia te baenne bwa e na urua katiteuanaakia. Ma e bon akoi ao n tatangira Iesu nakoia ana abotoro ake 12. Tera reireiara? E aki tii kakawaki bwa tera ae a karaoia aomata, ma e kakawaki naba bwa tera arora nakoia ngkana a kairua ao ni kabwaka. Tera ae kona ni buokira? Ngkana ti un iroun tarira temanna, ti kona n titirakinira ni kangai: ‘E aera ngkai I a rangi n un n te baere e karaoia? E oti n aei bwa iai anuau ae aki raoiroi ae I riai ni mwakuria? Iai ana kangaanga te aomata ae kaunai aei? E ngae ngkana e eti uniu, ma I kona ni kaotiota te tangira ae aki bangaomata n arou n tarariaoa te baei?’ Ngkana ti kabatiaa riki ara tai ni kaotiota te tangira nakoia tabemwaang, ti a kaotira iai bwa taan rimwin Iesu ni koaua.

16. Tera riki reireiara man ana katoto Iesu?

¹⁶ Ti reiakinna naba man ana katoto Iesu bwa ti na kataia n ota irouia raora n te onimaki. (TaeRab. 20:5) E koaua ae Iesu e kona n nori naano, ao ngaira ti aki. Ma ti kona n tarariaoi aki kororaoia tarira. (IEbe. 4:1, 2; 1Bet. 3:8) E bebete karaoan anne ngkana ti karekei kinaakia raoi. Iangoa te katoto teuana.

17. E kangaa ni kakabwaiaaki te mataniwi ae mwamwananga aei man arona n ataa raoi moa anuan te tari arei?

¹⁷ Temanna te mataniwi ae mwamwananga ae beku i Aberika Mainiku, e uringa te tari te mwaane temanna are e iaiangoia bwa e aki ataa te riai. Tera aron te mataniwi ae mwamwananga aei? E taku: “N oneani mwin are N na kararoaai ma te tari aei, I kakorakoraai bwa N na ataa raoi moa anuana.” Ni karaoan anne, e a atai bwaai tabeua ibukin te tari te mwaane aei, ake a karika anuana aikai. E reitia ni kangai te mataniwi ae mwamwananga aei: “Ngke I a ota raoi n aron teuaei ni kakorakoraa n tokanikai i aon anuana ae reke ibukini kaikawaana aei ao bitaki aika bati ake e a tia ni karaoi iai, e a anaaki ngkanne nanou irouna. Ti a riki bwa raao ni koaua.” Eng, ngkana ti kataia n ota irouia tarira ma mwaanera, n angin te tai e na bebete riki iroura kaotiotan te tangira nakoia.

18. Baikara titiraki aika ti riai n titirakinira iai, ngkana iai te tari ae kaunira? (Taeka N Rabakau 26:20)

¹⁸ N tabetai ti namakinna bwa ti a riai ni kawara te tari are e kaunira. Ma ti wanawana ngkana ti titirakinira moa titiraki aikai: ‘E tabwanin raoi au koaua?’ (TaeRab. 18:13) ‘E kona n ae bon tiaki nanona ni kaunai?’ (TeMin. 7:20) ‘I a tia naba ni karaoa te kairua ae aron anne?’ (TeMin. 7:21, 22) ‘Ngkana I kawara te aomata aei, N na kabuburaa riki te kangaanga?’ (Wareka Taeka N Rabakau 26:20.) Ngkana ti karekea ara tai n iaiangoi titiraki aikai, ti kona ni motinnanoia ae tangiran tarira iroura e kona ni kairira bwa ti na tarariaoa te baere riki.

19. Tera ae ko motinnanoia bwa ko na karaoia?

¹⁹ E oti n aia botaki Ana Tia Kakoaua Iehova bwa bon taan rimwin Iesu ni koaua ngaiia. Ao e oti naba man arora n tatabemanira nako bwa taan rimwin Iesu ni koaua ngaira, ngkana ti kaotiota te tangira ae aki bangaomata nakoia tarira ma mwaanera, n aki ongea aki kororaoia. Ni kakaraoan anne, ti a buokiia iai tabemwaang bwa a na kinaa te Aro ae koaua ao n raonira n taromauria Iehova, ae te Atua ae nibwan te tangira. Ti bia bane ni motinnanoia bwa ti na teimatoa ni kaotiota te tangira ae kanikinaeaia Kristian ni koaua.