Arora ni Kakorakoraa Ara Itangitangiri i Marenara

1-2. (a) Bukin tera ngke e taekinna te abotoro Bauro bwa te tangira bon te aroaro ae “kakawaki riki?” (b) Baikara titiraki aika ti na rinanoi?

NGKE e maroroakina taekan te onimaki, te kantaninga, ao te tangira, te abotoro Bauro ao e motikia n taekinna bwa “e kakawaki riki te tangira i buakoia.” (1Kor. 13:13) Bukin tera ngke e taekina aei Bauro? N taai aika imwaira ao ti nang aki kainnanoa onimakinan ana berita nako te Atua ibukin te aonnaba ae boou ke kantaningaani kakoroani bukia, bwa a nang koro nanoia n te tai anne. Ma ti na teimatoa ni kainnanoa tangiran Iehova ao aomata. Ni koauana, e na teimatoa n ririkirake tangiraia n aki toki.

² Ngkai ti na teimatoa ni kainnanoa te tangira anne, ti na rinanon titiraki aika tenua. Te moan, bukin tera bwa ti na itangitangiri i marenara? Te kauoua, ti na kangaa ni kaotiota te itangitangiri i marenara? Te katenua, ti na kangaa ni kakorakoraa ara itangitangiri i marenara?

BUKIN TERA BWA TI NA ITANGITANGIRI I MARENARA?

3. Baikara bukina ngkai ti itangitangiri i marenara?

³ Bukin tera bwa e kakawaki iroura bwa ti na itangitangiri i marenara? Teuana naba bukina, ti kinaaki n te tangira bwa Kristian ni koaua ngaira. E tuangia Iesu ana abotoro ni kangai: “Ao ane a na ataingkami aomata ni kabane bwa bon taan rimwiu ngkami, n aei: ngkana kam itangitangiri.” (Ioa. 13:35) Irarikina, te itangitangiri i marenara, e kateimatoa katiteuanaakira. E taekina Bauro te tangira bwa “te bwai ni kabaebae ae katiteuanaia aomata n te aro ae kororaoi.” (IKoro. 3:14) Iai riki bukina teuana ae kakawaki ngkai ti riai n itangitangiri i marenara. E korea ae kangai te abotoro Ioane nakoia raona n te onimaki: “Ane e tangira te Atua, ao e riai naba n tangira tarina.” (1Ioa. 4:21) Ngkana ti itangitangiri i marenara, ti kaotia bwa ti tangira te Atua.

4-5. Kamataata irekereken ara tangira ibukin te Atua ao ibukia tabemwaang.

⁴ E kangaa n irekereke tangiran te Atua iroura ma tangiraia taari n te onimaki? Ibukini kamatataana, iangoa irekerekeni buroora ao bwain rabwatara ake tabeua. Ngkana e tuoa tatani buroora te taokita i aoni baira bwa e mamaara ke e korakora, e na kona ngkanne n ataa marurungini buroora. Ti na kangaa ni kairekerekea te boto n reirei aei ma taekan te tangira?

⁵ N aron te taokita ae kona n ataa marurungini buroora ngkana e tuoa tatani buroora i aoni baira, ti kona naba n ataa korakoran ara tangira ibukin te Atua, ngkana ti tutuoa korakoran ara tangira ibukia tabemwaang. Ngkana ti noria bwa e a kekerikaaki tangiraia raora n te onimaki iroura, nanona ngkanne bwa e a kekerikaaki naba tangiran te Atua iroura. Ma ngkana ti katoatai ni kaotiota tangiraia taari n te onimaki, aei bon te kanikina bwa e korakora tangiran te Atua iroura.

6. Bukin tera ngkai ti riai n tabeaianga ngkana e a kekerikaaki iroura tangiraia tarira n te onimaki? (1 Ioane 4:7-9, 11)

⁶ Ti riai n tabeaianga ngkana e a kekerikaaki tangiraia taari n te onimaki iroura. Bukin tera? Ibukina bwa e kona n nanonaki iai bwa e a ruanikai ara onimaki. E kamataata raoi anne te abotoro Ioane ngke e kauringira ni kangai: “Ane e aki tangira tarina ae e a tia n noria, ao e aki kona n tangira te Atua ae e tuai n noria.” (1Ioa. 4:20) Tera reireiara? E kukurei Iehova iroura tii ngkana ti “itangitangiri i marenara.”—Wareka 1 Ioane 4:7-9, 11.

TI NA KANGAA NI KAOTA TE ITANGITANGIRI I MARENARA?

7-8. Baikara aanga tabeua aika ti kona ni kaota iai te itangitangiri i marenara?

⁷ Ti kunea n taai nako n Ana Taeka te Atua te tua ae ti na “itangitangiri i marenara.” (Ioa. 15:12, 17; IRom 13:8; 1Tet. 4:9; 1Bet. 1:22; 1Ioa. 4:11) Ma te tangira bon te namakin ae mena n te nano ae akea temanna ae kona n noria. Ngaia are e na kangaa n noraki ara itangitangiri i marenara? Man ara taeka ao ara mwakuri.

⁸ A bati aanga aika ti kona ni kaota iai tangiraia tarira n te onimaki. Aikai katoto tabeua: “Tataekina te koaua i marenami.” (Tek. 8:16) “Kateimatoa te rau i marenami.” (Mareko 9:50) “Biririmoa ni kaotiota te ikarinerine.” (IRom 12:10) “Kam na imwanemwane i marenami.” (IRom 15:7) “Teimatoa . . . n ikabwarabure.” (IKoro. 3:13) “Kam na ibuobuoki i marenami ni baika karawawataingkami.” (IKar. 6:2) “Teimatoa ni kabebeteingkami i marenami.” (1Tet. 4:18) “Teimatoa . . . ni kateimatoaingkami.” (1Tet. 5:11) “Tataro ibukia raomi n tatabemaningkami nako.”—Iak. 5:16.

9. Bukin tera ngkai kabebeteaia tabemwaang bon te anga ae kakawaki ae ti kaotia iai bwa ti tangiriia? (Nora naba te taamnei.)

⁹ Ti na nora ngkai teuana te anga ae ti kona ni kaota iai tangiraia tabemwaang. Ti na nenera ana kaungaunga Bauro aei: “Teimatoa ni kabebeteingkami i marenami.” Bukin tera bwa kabebeteaia tabemwaang bon te anga ae kakawaki ibukini kaotan tangiraia? E taekinaki n te boki teuana ae kabwarabwaraa te Baibara bwa te taeka ae “kabebeteaki” are kabongana Bauro, e nanonaki iai “te tei i rarikin temanna ni kaungaa ngkana e rinanon te kataaki ae kakaiaki.” Ngaia are ngkana ti anga te kabebetenano, ti a buoka iai te tari temanna n te onimaki ae rawawata bwa e na teirake ao n teimatoa n nakonako ni kawain te maiu. Ni katoatai are ti buoka iai tarira ke mwaanera n rawawatana, ti a kaota iai tangiraia raora n te onimaki.—2Kor. 7:6, 7, 13.

10. Tera irekereken te nanoanga ao te kabebetenano?

¹⁰ Namakinan te nanoanga ao te anga te kabebetenano boni baika a irekereke. N te aro raa? Te aomata ae nanoanga e kairaki bwa e na kabebeteia tabemwaang ao ni kataia ni katoka rawawataia. Ngaia are ti namakina moa te nanoanga ao imwina ti anga te kabebetenano. Nora aroni Bauro ni kairekerekea ana nanoanga Iehova ma te kabebetenano are E anga. E kabwarabwaraa Bauro bwa Iehova bon “te Tama ae nananoanga ao te Atua ae anga te kabebetenano n aekana nako.” (2Kor. 1:3) Te taeka ae e kamanena ikai Bauro ae “nananoanga,” e kaineti ma namakinan nanoangaaia tabemwaang. Ngaia are “E aranaki te Atua bwa te Tama ke Nibwan te nanoanga ibukina bwa e korakora irouna nanoangaaia aomata.” Ao e kairaki n te nanoanga anne bwa e na kabebeteira “ni kataakira nako.” (2Kor. 1:4) N aron te ran ae itiaki ae bwaro man te karaanga ae karekea kamaiuaia aika a taka, e karekea naba Iehova kamaiuaia ao kabebeteaia naake a rawawata. Ti na kangaa ni kakairi iroun Iehova n namakina nanoangaaia tabemwaang ao ni kabebeteia? Te anga teuana ae ti kona ni karaoia ngkana ti karikirakei aroaro aika irekereke ma nanoangaaia ao kabebeteaia tabemwaang. Baikara tabeua aroaro aikai?

11. Ni kaineti ma I-Korote 3:12 ao 1 Betero 3:8, baikara aroaro riki tabeua aika ti riai ni karikirakei bwa e aonga n teimatoa te tangira are e kairirira bwa ti na kabebeteia tabemwaang?

¹¹ Tera ae e na buokira ni kateimatoa te tangira ae ti kainnanoia bwa ti aonga n ‘teimatoa ni kabebeteira i marenara’ n te bong teuana ma teuana? Ti riai ni karikirakei aroaro aika irekereke ma te nanoanga n aroni kaotiotan te atataiaomata, te itangitangiri n tari, ao te akoi. (Wareka I-Korote 3:12; 1 Betero 3:8.) A na kangaa aroaro aikai ni buokira? Ngkana a riki bwa aroarora namakinan te nanoanga ao aroaro riki tabeua ake a irekereke ma ngaia, ti na tauraoi naba n anga te kabebetenano nakoia ake a rawawata. N aron ae taekinna Iesu, “e taetae te wi man onraken te nano. E kaotii baika raraoi te aomata ae raoiroi mani baike e kakawakin aika raraoi.” (Mat. 12:34, 35) Kabebeteaia tarira n te onimaki bon te anga ae rangi ni kakawaki ae ti kaota iai tangiraia.

TI NA KANGAA NI KAKORAKORAA ARA ITANGITANGIRI I MARENARA?

12. (a) Bukin tera bwa ti riai n teimatoa n taratara raoi? (b) Tera te titiraki ae ti na rinanona ngkai?

¹² Ti bane n tangiria bwa ti na “teimatoa n itangitangiri i marenara.” (1Ioa. 4:7) Ma e kakawaki bwa ti na ururinga ana kauring Iesu are “e nang kerikaaki aia tangira angia aomata.” (Mat. 24:12) E aki taekinna Iesu ae e na riki aei irouia taan rimwina aika bati. Ma e ngae n anne, ti bon riai n teimatoa n taratara raoi bwa ti aonga n aki iraraang n aia aki tatangira kaain te aonnaba aei. N iangoan anne, ti na maroroakina moa te titiraki ae kakawaki aei: Iai te anga teuana ae ti kona n tuoa iai korakoran tangiraia taari n te onimaki iroura?

13. Tera ae e kona n tuoa ara tangira?

¹³ Te anga teuana ae ti na ataa iai korakoran ara tangira, ngkana ti tuoi arora ni kaineti ma bwaai aika riki ni maiura. (2Kor. 8:8) E taekina anne te abotoro Betero ni kangai: “Ma ae moamoa riki, kam na kakorakoraa te itangitangiri i marenami, ibukina bwa e rabuni buure aika rangi ni bati te tangira.” (1Bet. 4:8) Ngaia are mamaaraia ao aki kororaoia tabemwaang e kona n tuoaki iai korakoran ara tangira.

14. Ni kaineti ma 1 Betero 4:8, tera te aeka n tangira ae ti kainnanoia? Taekina te kabotau.

¹⁴ Ti na karaua n iangoi ana taeka Betero. Ni moan iterani kibuna 8 ao e kabwarabwaraaki te aeka n tangira ae ti riai ni karekea ae, ‘te itangitangiri ae korakora.’ Te moan taeka are kabongana Betero ae rairaki bwa “kakorakoraa” e nanonaki iai “reena.” Ni kauouan iteran te kibu ao e kabwarabwaraaki mwin te tangira ae korakora anne. E rabuni aia bure tarira n te onimaki. Ti kona ni kataamneia ni kangai: Ti taua ara tangira ni baira aika uoua bwa kaanga te kunnikai ae uarereke ae reena, ao ni kareena ni karokoa e rabuna tiaki tii teuana te bure ke uoua ma “buure aika rangi ni bati.” Rabuna bon te taeka riki teuana ibukini kabwaraani buure. N aron te kunnikai ae uarereke ae kona n rabuna te memea, e kona naba te tangira n rabuni mamaaraia ao aki kororaoia tabemwaang.

15. Ngkana e korakora tangiraia taari n te onimaki, tera ae ti na kona ni karaoia? (I-Korote 3:13)

¹⁵ E riai ni korakora tangiraia tabemwaang iroura n te aro ae ti na kona ni kabwarai aia bure tarira n te onimaki, e ngae naba ngkana e rangi ni kangaanga n tabetai. (Wareka I-Korote 3:13.) Ngkana ti kabwarai aia bure tabemwaang, ti kaotia bwa e korakora ara tangira ao ti kani kakukureia Iehova. Tera riki ae kona ni buokira n tarariaoi aroaroia aika kamarakinano tabemwaang ao aia kairua?

16-17. Tera naba ae e na buokira n tarariaoa aia bure ae uarereke tabemwaang? Taekina te kabotau. (Nora naba te taamnei.)

¹⁶ Kaatuua am iango n aroaroia aika raraoi tarim n te onimaki, ao tiaki n aroaroia aika buakaka. Iangoa te kabotau aei. Iangoia bwa ko mena n te botaki teuana ma taari n te onimaki. Ko rangi ni kukurei n te tai anne, ao n tokin te botaki, ko a rawetaamnei. Ni koauana, ko rawei uoua riki am taamnei bwa mwina e na aki nakoraoi te moan taamnei. E a reke ngkai iroum taamnei aika tenua. Ma teuana mai buakon taamnei akanne, ko noria bwa e mata n un iai te tari te mwaane temanna. Tera ae ko karaoia ma te taamnei anne? Ko kamauna ibukina bwa iai riki am taamnei ake uoua ae a bane iai aomata ni moangare, n ikotaki naba ma te tari te mwaane anne.

¹⁷ Ti kona ni kabotaui taamnei aika ti kakawakin ma ara ururing. Ti aki toki n ururingi taai aika raraoi ake ti kabanea ma tarira n te onimaki. Ma iangoia bwa aongkoa teuana mai buakon taai akanne, e taekina iai ke ni karaoa te bae e aki kaota te akoi tarira ke mwaanera temanna. Tera ae ti riai ni karaoia ma ara ururing anne? E aera ko aki kataia ni kamauna, kaanga n ai aron ae ko kamauna teuana mai buakon taamnei akanne? (TaeRab. 19:11; IEbe. 4:32) Ti kona ni kamauna uringan ana bure ae uarereke tarira n te onimaki, ibukina bwa a bati riki ara ururing aika raraoi aika kakukurei ma ngaia. Akanne aeka n ururing aika ti kani kakawakin.

BUKINA AE E A KAINNANOAKI RIKI NGKAI TE TANGIRA

18. Baikara reirei aika kakawaki ibukin te tangira aika ti a tia n nori n te kaongora aei?

¹⁸ Bukin tera bwa ti kani kateimatoa te itangitangiri ae korakora i marenara? N aron ae ti a tia n rinanona, ngkana ti kaota tangiraia taari n te onimaki, ti kaota naba iai tangiran Iehova. Ti na kangaa ni kaota tangiraia taari n te onimaki? Te anga teuana ae ti kaotia iai ngkana ti kabebeteia. Ti na bon ‘teimatoa ni kabebeteira i marenara’ ngkana ti kairaki n te nanoanga. Ti na kangaa ni kakorakoraa ara itangitangiri i marenara? Ngkana ti kabanea ara konaa ni kabwarai aia kairua tabemwaang.

19. Bukin tera bwa e a rangi ni kakawaki ngkai kaotiotan te itangitangiri i marenara?

¹⁹ Bukin tera bwa e a rangi ni kakawaki riki ngkai kaotiotan te tangira i marenara? Nora bukina ae koreia Betero ni kangai: “E a kaan tokini bwaai ni kabane. Mangaia ae, . . . kam na kakorakoraa te itangitangiri i marenami.” (1Bet. 4:7, 8) Ngkai e a kaan tokin te aonnaba ae buakaka aei, tera ae ti kona ni kantaningaia? E a kaman taekina aei Iesu ibukia taan rimwina: “Ane kam na riribaaki irouia natannaomata ni kabane ibukin arau.” (Mat. 24:9) Ngkana ti na nanomwaaka i aan te riribai anne, ti riai n teimatoa ni katiteuanaaki. Ngkana ti karaoa anne, e na boni matebuaka ana kakorakora Tatan, ibukina bwa ti kaai ni kabaeaki n te tangira, ae te “bwai ni kabaebae ae katiteuanaia aomata n te aro ae kororaoi.”—IKoro. 3:14; IBir. 2:1, 2.