‘I Aon Bwaai Ni Kabane Ao Kam Na Kakaonimaki N Itangitangiri’

“E a kan roko tokini bai ni kabane. . . . I aoni bai ni kabane ao kam na kakaonimaki [“kakorakoraingkami,” NW] ni itangitangiri.”​—1 BETERO 4:7, 8, BK.

E ATAIA Iesu bwa e rangi ni kakawaki ana kabanea n aoa ake tabeua ma ana abotoro. E atai naba bwaai ni kabane ake a na kaaitara ma ngaai ana abotoro. Iai aia mwakuri ae rangi ni bati are a riai ni katiaa, ma a na ribaaki ao ni bwainikirinaki n aron are e karaoaki naba nakoina. (Ioane 15:18-20) E okioki ni kauringia bwa a riai n “i tangitangiri” n ana kabanea n tairiki ma ngaiia.​—Ioane 13:34, 35; 15:12, 13, 17.

² Bon raoia naba n te tairiki anne te abotoro Betero, ao e ataia bwa e kakawaki ana kauring Iesu arei. Tabeua te ririki imwina, e koroboki Betero teutana te tai imwain uruakan Ierutarem, ao e katereterea iai kakawakin te tangira. E reireia Kristian ni kangai: “E a kan roko tokini bai ni kabane. . . . i aoni bai ni kabane ao kam na kakaonimaki [“kakorakoraingkami,” NW] ni itangitangiri.” (1 Betero 4:7, 8, BK) A rangi ni manena ana taeka Betero ibukia te koraki ake a maiu i nanoni “boong aika kaitira” ibukin te waaki ae ngkai. (2 Timoteo 3:1) Tera nanon te “kakaonimaki ni itangitangiri”? Bukin tera bwa e kakawaki bwa ti na kaotiota te aeka n tangira anne nakoia aomata? Ao ti na kanga ni kaotiotia?

Tera Nanon te “Kakaonimaki ni Itangitangiri”?

³ A mwaiti aomata aika iangoia bwa te tangira bon te namakin ae e na bon riki i bon irouna i nanora. Ma e aki taekina te tangira ae e aki akaka Betero; e taekina te aeka n tangira ae te kabanea ni kakawaki. Te taeka ae “itangitangiri” n te 1 Betero 4:8, bon rairan te taeka n Erene ae a·gaʹpe. E nanonaki n te taeka aei te aeka n tangira ae e aki bangaaomata, are e kairiraki ke e baireaki arona n te riai. E taekinaki ae kangai n te boki teuana: “E kona ni kairaki man te iango te tangira ae te agape, ibukina bwa [te aeka n tangira aei] e aki boto i aon te namakin ma e boto i aon te motinnano, ao imwina e kaotaki n te mwakuri.” Kioina ngkai bon aroaroia aomata bwa a na iangoa moa oin nanoia, ti kainnanoa ngkanne kauringakira bwa ti na kaotiota te itangitangiri, ao ni kairaki iai n taiani kaetieti mairoun te Atua.​—Karikani Bwaai 8:21; I-Rom 5:12.

⁴ E aki nanonaki n aei bwa ti na itangitangiri tii ibukina bwa ti kabaeaki bwa ti na karaoia. Tiaki nanona bwa akea te nano n iraorao ke te namakin ae korakora n te a·gaʹpe. E taku Betero bwa ti riai ni “kakaonimaki [are nanona “karaababaa,” Kingdom Interlinear] ni itangitangiri.”a Mangaia are e na boni kainnanoaki te kakorakora ibukin te tangira anne. E taekina ae kangai te tia rabakau temanna ni kaineti ma te taeka n Erene ae rairaki ikai bwa “kakaonimaki, [“kakorakoraingkami,” NW]”: “E kaotaki iai bannan te tia takaakaro, are e karaababai nako mwatiretin baina ma waena ngke e angita kabanean angina ngke e nang roko n te tia.”

⁵ Mangaia are e aki riai n tianaki ara tangira nakon tii karaoan ae e bebete iroura, ke ni kaonotaki nakoia tabeman. E kainnanoaki bwa ti na “karaababaa” nako nanora n te tangira ni Kristian, are nanona kaotan te tangira e ngae ngke e kangaanga iroura karaoana. (2 I-Korinto 6:11-13) E teretere raoi ngkanne bwa te tangira aei, bon te bwai ae ti riai ni karikirakea iroura ma ni keiakinira iai, n aron te tia takaakaro ae e kataneiai ma ni kakorakoraa bwa e aonga n rikirake ana konabwai n takaakaro. E rangi ni kakawaki bwa e na reke iroura te aeka n tangira aei i marenara. Bukin tera? Aikai tenua bukina.

Bukin Tera bwa Ti Riai n Itangitangiri?

⁶ Bukina are te moan, bwa boni “mairoun te Atua te tangira.” (1 Ioane 4:7) E tangirira moa Iehova, are boni ngaia Nibwan te aroaro ae anainano aei. E taku te abotoro Ioane: “E kaotaki tangirara i roun te Atua n aei, ngke E kanakomaia Natina are te riki-temanna te Atua nako aon te aba, ba ti aonga ni maiu i Rouna.” (1 Ioane 4:9) E ‘kanakomaiakaki’ Natin te Atua n te aro are e riki bwa te aomata i aon te aba, e karaoa ana mwakuri ni minita, ao imwina e mate i aon te kai. A bane n riki baikai “ba ti aonga ni maiu” iai. Tera arora ni kaineti ma kaotiotan ana tangira te Atua ae moan te rietata aei? E taku Ioane: “Ngke E tangirira te Atua n te aro aei, ao e riai naba ba ti na i tangitangiri iai.” (1 Ioane 4:11) Taraia bwa ngke e korea ae kangai Ioane, “Ngke E tangirira te Atua,” e aki kangai tangiriko ma e kangai tangirira. E ota raoi ngkanne te bwai ae nanonaki iai, bwa ngkai e tangiriia raora n onimaki te Atua, ti bon riai naba ngaira n tangiriia.

⁷ Te kauoua, e a moamoa riki kakawakin kabatiaan te itangitangiri i marenara n taai aikai, bwa a aonga ni buokaki naba iai tarira ake a kainnano kioina ngkai “e a kan roko tokini bai ni bane.” (1 Betero 4:7, BK) Ti a mena ngkai i nanon “tai aika kamamate.” (2 Timoteo 3:1) Ti a karawawataki ibukin aroaron te aonnaba ae ngkai, kabuanibwai aika riiriki iai ao te kairiribai. Ti riai ni kaanira riki ma raora n onimaki, n taai aika ti taonaki iai n te rawawata. E na katiteuanaira te tangira ae korakora, ao ni kairira naba bwa ti na “i akoakoi.”​—1 I-Korinto 12:25, 26.

⁸ Te katenua, ti kainnanoa te itangitangiri ibukina bwa ti aki tangiria bwa ti na “kakatokaa boran te riaboro” n urui arora. (Ebeto 4:27, BK) E baitii Tatan ni kabongana aki-kororaoia raora n onimaki n aron mamaaraia, kairuaia, ao tibanakoia, bwa a na kabwakaira. E riai bwa ti na kerikaki man te ekaretia ibukin ana taetae-ni-kawai raora n onimaki aika aki-raraoi, ke ana mwakuri ae e aki kaota iai te akoi? (Taeka N Rabakau 12:18) Ti na bon aki, ngkana iai iroura te itangitangiri ae korakora! E kateimatoaa te rau iroura ao te katiteuanaki ni beku iroun te Atua “n te bo n nano,” te aeka n tangira anne.​—Tebania 3:9.

Arom ni Kaotiota Tangiraia Aomata

⁹ E riai ni moanaki kaotiotan te tangira mai nanon te utu. E taekinna Iesu bwa a na kinaaki taan rimwina ni koaua, man aroia n itangitangiri. (Ioane 13:34, 35) E riai ni kaotiotaki te tangira tiaki tii i nanon te ekaretia ma i nanon te utu naba, i marenaia taanga, ao i marenaia kaaro ma natiia. E aki tau tii namakinan ae ti tangiriia kaain ara utu, ma ti riai naba ni kaotia n ara mwakuri aika raraoi.

¹⁰ A na kanga raao ni mare ni kaota aia tangira i marenaia? Te buu te mwaane ae tangira raoi buuna, e na kaotiotia nakon buuna rinanon arona n taetae-ni-kawai ao n ana mwakuri, bwa e rangi ni kakawaki neiei irouna. E na karaoa aei i mataia aomata ao ngkana tii ngaiia naba uoman. E karinea buuna ibukin aroarona aika raraoi, ao e atataiaomata nakon ana iango, ana kaantaninga, ma ana namakin ake e kaotii. (1 Betero 3:7) E karimoai bwaai aika e tatangiri buuna imwain nanona, ao e kabanea korakorana ni karekei bwaai aika e kainnanoi buuna n te itera n taamnei ao n rabwata, ao ni kaineti ma ana iango ao ana namakin. (I-Ebeto 5:25, 28) Te buu te aine ae tangira buuna ma nanona ni koaua, e angan buuna te ‘karineaki ae korakora,’ e ngae ngke n taai tabetai e aki-kororaoi are e kaantaningaia mairouna. (I-Ebeto 5:22, 33) E boutokaa buuna n ana iango ao e aantaeka nakoina, e aki kabinekaau ibukin bwaai aika a aki manena ma e inanoi ma buuna ibukin kaatuuan aia iango i aoni bwaai n taamnei.​—Karikani Bwaai 2:18; Mataio 6:33.

¹¹ Kaaro, kam na kanga ni kona ni kaota tangiraia natimi? Nanomi ni kakorakoraingkami ibukin karekean bwaai aika a kainnanoi ibukin maiuiia, boni ngaia aron kaotiotan ami tangira. (1 Timoteo 5:8) Ma iai riki bwaai aika a kainnanoi natimi i rarikin te amwarake, te kunnikai ao mwengaia. A kainnanoa reireiaia i aoni bwaai n taamnei ngkana ko tangiriia bwa a na ikawai rake i nanon tangiran te Atua ni koaua ao ni beku naba ibukina. (Taeka N Rabakau 22:6) E nanonaki n aei karaoan te babaire ibukin te reirei n te Baibara i nanon te utu, irakin te mwakuri ni minita, ao kaakaean botaki ni Kristian. (Te Tua-Kaua 6:4-7) E kainnanoaki te anganano ni koaua ibukin kakororaoan te babaire aei, kioina ngkai ti a mena i nanon taai aika kamamate. Arom ni kakorakorako ibukin tabeakinan kainnanoia natim ni bwaai n taamnei, boni kaotiotan am tangira nakoia, bwa ni karaoan aei iroum ko kaotiko bwa ko moanibwaia karekean te maiu are aki toki irouia.​—Ioane 17:3.

¹² E kakawaki naba irouia kaaro bwa a na kaota tangiraia natiia ni karekei bwaai aika a kainnanoi ni kaineti ma aia iango ao aia namakin. A kakai uruaki nanoia ataei aika uarereke, mangaia are a kainnanoa karauan nanoia n am tangira. Tuangia bwa ko bon tangiriia, ao kaota koauana n aroarom nakoia, bwa ngkana ko karaoa aei, a na kona ngkanne ni kakoauaa iai bwa a kona n tangiraki ao iai manenaia. Kamoamoaia ma nanom ni koaua ao n akoi ibukin baika a karaoi, bwa ni karaoan aei, ao a na ataia iai bwa ko nori aia mwakuri ao a kakawaki iroum. Kaetiia ma te tangira, bwa ngkana ko karaoa aei, ao ko kaotia iai nakoia bwa ko bon tabeakinia bwa a na ikawai raoi. (I-Ebeto 6:4) Mwakuri ni kabane aika kaotiota te tangira, a buoka karikirakean te utu ae kakukurei ma n ibuokanibwai i marenaia, n te aro are a na tauraoi riki n totokoi kangaanga aika kaaitarai i nanoni boong aika kaitira aikai.

¹³ E kairira te tangira bwa ti na mwanuokin aia kairua aomata. Uringa are e tuangia taani wareware n ana koroboki Betero ni kangai, “kam na kakaonimaki [“kakorakoraingkami,” NW] ni itangitangiri,” ao e kaota bukina ae moan te kakawaki ngke e kangai: “Ba e rabuni buure aika a maiti te tangira.” (1 Betero 4:8, BK) ‘Rabunan’ buure, e aki nanonaki iai ‘rabunan’ buure aika kakaiaki. A riai n ribootinaki bure aika kakaiaki, nakoia aomata ake a mwiokoaki iai i nanon te ekaretia bwa a na bairei taekaia. (Nakoaia Ibonga 5:1; Taeka N Rabakau 29:24) Bon te mwakuri ae akea iai te tangira ao e aki rinanon naba ana reirei te Baibara, ngkana ti kariaia taani karaoi buure aika kakaiaki bwa a na teimatoa ni kammarakiia ke ni bwainikirinia aomata aika raoiroi nanoia.​—1 I-Korinto 5:9-13.

¹⁴ N angiin te tai ao a karaoi buure aika bebete raao n onimaki. Ti aki toki n tibanako n ara taetae-ni-kawai ke n ara mwakuri, n te aro are ti a kona n ikaunun iai ke ni kamarakinano. (Iakobo 3:2) Ma e riai bwa ti na waekoa ni katanoataa aia kairua aomata tabeman? E na boni karika te itabarara te aeka ni mwakuri anne i nanon te ekaretia. (I-Ebeto 4:1-3) Ngkana ngaia bwa ti kairaki n te tangira, ti na bon aki “winantia” raora n onimaki temanna. (Taian Areru 50:20) N aron ae a rabunaki kirimwanomwano ao baarekan oon te auti ni buratitanakina ke beeniakina, ao ai aron naba te tangira bwa e na rabuni aki-kororaoia aomata.​—Taeka N Rabakau 17:9.

¹⁵ E kairira te tangira bwa ti na buokia te koraki ake a rangi ni kainnanoa te ibuobuoki. Ibukina bwa e na rikirake ni korakora riki te buakaka ni boong aika kaitira aikai, e na bae ngkanne n iai tarira n te onimaki aika a na kainnanoi buokaia n te itera n rabwata. (1 Ioane 3:17, 18) N te katoto, e a tia temanna kaain ara ekaretia n rotaki n te kangaanga ni kaineti ma ana kataumwane ke ni kabaneaki man ana mwakuri? Ngkana iai, ao tao ti kona n angabwai nakoina ni bwaai ake e kainnanoi, ni kaineti ma ara konaa. (Taeka N Rabakau 3:27, 28; Iakobo 2:14-17) E kainnanoa onobwaian ana auti te unaine ae e a tia ni mate buuna? Tao ti kona ni kakaai angara ake ti na ibuobuoki iai ni kaineti ma te mwakuri anne.​—Iakobo 1:27.

¹⁶ E aki-tianaki kaotiotan ara tangira nakoia te koraki ake a maeka n taabo ake a uakaan ma ara tabo ni maeka. N taai tabetai, ti kona n ongoraei ribooti ibukia ana toro te Atua n aaba tabeua aika a a tia n rotaki n angibuaka aika korakora, mwaeiei, ke buaka i marenaia kaain te aba anne. E kona ni korakora kainnanoan amwarake, kunnikai, ao bwaai riki tabeua irouia. Akea naba te kangaanga ngkana arona bwa tiaki kaain ara reeti ke tiaki kaain abara. Ti “tangiriia taian tari” ni katobibia te aonnaba. (1 Betero 2:17) Mangaia are titeboo arora ma ekaretia ake n te moan tienture, ae a ingainga nanora ni boutokai waaki n ibuobuoki aika a a tia ni baireaki. (Mwakuri 11:27-30; I-Rom 15:26) Ngkana ti kaotiota te tangira n aron aaro aikai, ti kakorakoraa iai ngkanne te reitaki are ti katiteuanaki iai i nanon boong aika kaitira aikai.​—I-Korote 3:14.

¹⁷ E kairira te tangira bwa ti na buoka tibwatibwan rongorongon ana Tautaeka n Uea te Atua nakoia aomata. Iangoa ana katoto Iesu. Bukin tera ngke e tataekina te rongorongo ae raoiroi ao e angareirei? Ibukina bwa e “nanoangaia” aomata aika kainnano n te itera n taamnei. (Mareko 6:34) A aki tabeakinaki ao a burebureaki irouia mataniwin Aaro aika kewe aika aki kawakina aia nanai, are a na bon riai n tia n reireiia te koaua ibukin bwaai n taamnei ao te kaantaninga ae raoiroi. Mangaia are ibukin riingakin nanon Iesu n tangiraia ao n nanoangaaia, e kabebeteia aomata n taekina “rongorongon uean te Atua, ae raoiroi” nakoia.​—Ruka 4:16-21, 43.

¹⁸ A mwaiti naba aomata ni boong aikai aika a a tia n aki tabeakinaki raoi ma ni burebureaki n te itera n taamnei, ao a bwara nanoia iai. Ngkana ti katotonga Iesu n nanoangaia aomata aika a tuai n ataa te Atua ni koaua ao a kainnano ni kaineti ma bwaai n taamnei, e na bae ni kairira ngkanne te tangira ao te atataiaomata bwa ti na kan taekina ana Tautaeka n Uea te Atua nakoia. (Mataio 6:9, 10; 24:14) E a rangi ni korakora ngkai kainnanoan tataekinan te rongorongo ni kakamaiu aei ma te nano n umaki, kioina ngkai ti noria bwa e a kimototo nikiran te tai.​—1 Timoteo 4:16.

“E a Kan Roko Tokini Bai ni Kabane”

¹⁹ Uringnga bwa e moana ana reirei Betero are e taekina iai te itangitangiri ma taeka aikai: “E a kan roko tokini bai ni kabane.” (1 Betero 4:7, BK) N te tai ae waekoa, ao e nang oneaki mwin te waaki ae buakaka n te aonnaba ae ngkai nakon ana aonnaba ae boou te Atua ae raoiroi. (2 Betero 3:13) Mangaia are akea te tai n aoaori ni boong aikai. E kangai ana kauring Iesu nakoira: “Kam na kawakiningkami, ba a kawa n taonaki ami iango n te buabeka, ma te mamanging, ma taian iango n raraomaeakini bwain te maiu aei, ao ba e rina n roko te bong arei i roumi n ai aron te ao-ni-katatai.”​—Ruka 21:34, 35.

²⁰ Ti bia kakorakoraira ngkanne ni ‘kamarurungira n tantani,’ ao n atai raoi nanon taai aika ti mena iai ngkai. (Mataio 24:42) Ti bia kawakinira man ana kariri Tatan aika a kona n anai nanora. Ti bia aki kariaia te aonnaba ae akea te tangira i nanona aei, bwa e na tukira man kaotiotan te tangira nakoia aomata. Ma ae kakawaki riki i buakon bwaai aikai ni kabane, ti bia kaanira riki ma te Atua ni koaua ae Iehova, ae e nang waekoa ni kakoroa bukin ana kaantaninga ae moan te raoiroi ibukin te aonnaba, rinanon ana Tautaeka n Uea iroun te Mesia.​—Te Kaotioti 21:4, 5.

[Kabwarabwara ae nano]

TITIRAKI IBUKIN TE REIREI

• Tera ana reirei Iesu are e angania taan rimwina imwain ae e kitania, ao tera ae e kaotia bwa e ota raoi iai Betero? (Bar. 1-2)

• Tera nanon te “kakaonimaki ni itangitangiri”? (Bar. 3-5)

• Bukin tera bwa ti riai n itangitangiri? (Bar. 6-8)

• Ko na kanga ni kaotiotia bwa ko bon tangiriia aomata? (Bar. 9-18)

• Bukin tera bwa tiaki tain te aoaori taai aikai, ao tera ae ti riai ni kakorakoraira ni karaoia? (Bar. 19-20)

[Taamnei n iteraniba 29]

E tauraoi riki ni kaaitarai kangaanga ni boong aika kaitira aikai, te utu ae reitaki raoi n te tangira

[Taamnei n iteraniba 30]

E kairira te tangira bwa ti na buokia te koraki ake a kainnanoa buokaia

[Taamnei n iteraniba 31]

Bon te mwakuri n tangira, tibwatibwan euangkerion ana Tautaeka n Uea te Atua