A na Kangaa ni Buoka te Ekaretia Taari Mwaane Ake A Aranaki Bwa Unimwaane?

A aki kakabooaki mataniwi n ara botaki. Ma ti kakairi n aroia Kristian bwa ni moani katean te ekaretia ao a rineaki mataniwi aika tau bwa a na “kawakina ana ekaretia te Atua.” (Mwakuri 20:28) Unimwaane aikai boni mwaane aika ikawai n te onimaki ake a kairiri n te ekaretia ao ni kawakina te nanai, ‘tiaki ibukina bwa a kairoroaki ma a tararuaia ma kukurein nanoia, ao tiaki ibukin te kani karekearo n te babakanikawai, ma ibukin ingaingan nanoia.’ (1 Betero 5:1-3) Tera aia mwakuri ae a karaoia ibukira?

A kawakinira ao n tararuaira. A katauraoa te kairiri man te Baibara unimwaane ibukini buokaia kaain te ekaretia bwa a na teimatoa ni kaania Iehova. Ibukin ataakin ae e a tia n angania te Atua te mwioko ae kakawaki aei, a aki kairimatoa nakoia ana aomata ma a boutokai marurungira ao kimwareireira. (2 I-Korinto 1:24) N aron te tia kawakintiibu ae taningamarau ni kawakinia ana tiibu n tatabemania nako, a kataia naba unimwaane ni kinaia raoi kaain aia ekaretia n tatabemania nako.​—Taeka N Rabakau 27:23.

A reiakinira arora ae ti na karaoa iai nanon te Atua. A kairi bobotaki n te ekaretia ni katoa wiki unimwaane ibukini kakorakoraan ara onimaki. (Mwakuri 15:32) A kairiri naba mwaane aika tatangira mani kakaonimaki aikai n te mwakuri n uarongorongo, ao a mwakuri ma ngaira ao n reireinira iteran nako te mwakuri ni minita.

A anganira taeka ni kaungaunga. A kona naba unimwaane ni kawarira n tatabemanira nako ni mwengara ke n te Tabo n Taromauri ibukini kakorakoraan ara iraorao ma Iehova rinanon te ibuobuoki ao te kabebetenano man te Baibara.​—Iakobo 5:14, 15.

Irarikini mwiokoaia unimwaane n te ekaretia, a mwakuri ni kareketianti angiina mai buakoia ao iai naba tabeia ibukia aia utu are e kainnanoaki iai aia tai ao aia tararua. Ti riai ni karineia taari mwaane aika mwakuri korakora aikai.​—1 I-Tetaronike 5:12, 13.

• Tera mwiokoaia unimwaane n te ekaretia?

• N aaro raa ake a kaota iai tabeakinara unimwaane?