Kakairi Irouia Taani Kawakintiibu Aika Rangi Ni Kakannato Ngkami Taani Kawakintiibu
“E kammarakaki naba Kristo ibukimi, ao e katuka te banna ni katoto nakoimi bwa kam na toua raoi mwini mwanekana.” —1 BETERO 2:21.
KO NA KANGA NI KAEKA?
A na kanga ni kakairi iroun Iehova unimwaane n te ekaretia ngkai taani kawakintiibu ngaiia?
A na kanga ni kakairi unimwaane n te ekaretia iroun Iesu Kristo?
Tera tiaia unimwaane n te ekaretia ni karaoan aia mwakuri ni kawakintiibu?
1, 2. (a) Tera ae na riki ngkana a aki tabeakinaki raoi tiibu? (b) Bukin tera bwa a bati aomata n ana bong Iesu ake ai aroia tiibu aika akea te tia kawakinia?
E MAIURAOI te nanai n tiibu ngkana a tabeakinaki raoi iroun te tia kawakintiibu. E taekinaki n te boki teuana ni kaineti ma kaikawaaia tiibu, bwa “te mwaane ae e tii kaira te nanai nakon te tawaana ao n aki tabeakinia riki ke n iaiangoiia, a na bae ni mamaara ao n aoraki ana tiibu aika bati imwin tabeua te ririki.” Ma ngkana a tabeakinaki raoi tiibu, a na bane ni korakora ao ni marurung te nanai ni kabane.
2 A na bon marurung raoi aia onimaki kaain te ekaretia ni kabane ngkana e raoiroi aia tararua taani kawakintiibu ao a tabeakina ana nanai te Atua n tatabemania nako ake a mwiokoaki iai. Ko bae n uringnga are e nanoangaia aomata aika uanao Iesu ibukina bwa “a karawawataaki ma ni kananoanga, ao a kamaenakoaki n aroia tiibu aika akea te tia kawakinia.” (Mataio 9:36) Bukin tera bwa e riki te bwai ae kananokawaki anne nakoia? Ibukina bwa a rangi n iowawa, a tuamatoa ao a mwamwanaa te aba naake a mwiokoaki bwa a na reireinia Ana Tua te Atua. N oneani mwin are a na buokiia ma ni karikirakeia kaain aia nanai taani kairiri n te Iteraera n taamnei, a boni katokai “uota aika tinebu” i aon angaia.—Mataio 23:4.
3. Tera ae a riai n ururingnga unimwaane n te ekaretia ngkai a karaoi mwiokoaia ae taani kawakina te nanai?
3 E rangi ni kakawaki mwiokoaia taani kawakintiibu aika Kristian ni boong aikai, aika unimwaane n te ekaretia ake a a tia n rineaki. Bon ana bwai Iehova ma Iesu nanai n tiibu. A rangi ni kakawaki tiibu aikai iroun Iesu are e bon taetae ibukina bwa boni ngaia “te tia kawakintiibu ae raoiroi.” (Ioane 10:11) A a tia tiibu ni “kabooaki n te bwai ae rangi ni kakawaki” are e kabwakaa Iesu “n [raraana] ae rangi ni kakawaki.” (1 I-Korinto 6:20; 1 Betero 1:18, 19) E rangi ni korakora tangiraia ana tiibu ai ngaia are e a kukurei ni kareana maiuna ibukia. A riai n uringnga n taai nako unimwaane bwa aia mataniwi bon Iesu Kristo ae “te tia kawakintiibu ae kakannato.” Ngaia are a riai ni kaekaa bukinaia n aroia ni kawakina te nanai.—I-Ebera 13:20.
4. Tera ae na rinanoaki n te kaongora aei?
4 Tera ae a riai ni karaoia unimwaane aika Kristian nakoia tiibu? A kaumakaki kaain te ekaretia bwa a na “ongeaba irouia akana kairiri” i buakoia. N iterana are teuana, a kaumakaki naba unimwaane aika Kristian bwa a na rarawa n “taui aroia te koraki ake ana bwai te Atua.” (I-Ebera 13:17; wareka 1 Betero 5:2, 3.) A na kanga ngkanne unimwaane aika rineaki ni kona ni kairiri ao n aki taua aron te nanai? N taeka riki tabeua, a na kanga unimwaane n te ekaretia n tabeakini baika a kainnanoi tiibu n te aro are a na aki riaoni mwaakan te Atua are a a tia n anganaki?
“E NA UOTIIA NI BABAKOIIA I NANONI BANIBANNA”
5. Tera reireiara ibukin Iehova man Itaia 40:11?
5 E taku te burabeti ae Itaia ni kaineti ma Iehova: “E na kakaamarakea ana nanai n ai aron te tia kawakin-tiibu, E na botiia tiibu aika ataei ni baina, ao E na uotiia ni babakoiia i nanoni banibanna, ao E na kairiia raoi akana mammaiia natiia.” (Itaia 40:11, BG) E kaotaki n te taeka aei bwa Iehova e bon tabeakini baika a kainnanoi kaain te ekaretia aika mamaara ao ni kai rotaki. N aron te tia kawakintiibu ae atai baika a onoti aika kainnanoi ana tiibu n tatabemania nako n te nanai ao n tauraoi ni buokiia, e atai naba baika a kainnanoi kaain te ekaretia Iehova ao e kukurei ni katauraoa te aro n tararua ae kainnanoaki. E na uouotiira Iehova ae “te Tama ae nananoanga” n taai ake ti aitara iai ma kangaanga aika rangi ni korakora n aron naba te tia kawakintiibu ae uouota te tiibutetei ae e a tibwa bungiaki i nanoni kunnikaina ae rukumaki ngkana e nora riaina. E na kabebeteira ngkana ti rinanon te kataaki ae korakora ke ti rangi ni kainnanoa buokara.—2 I-Korinto 1:3, 4.
6. E na kanga unimwaanen te ekaretia ni kakairi n ana katoto Iehova ngkai te tia kawakintiibu ngaia?
6 Ai bon raoiroira reireiaia taani kawakina te ekaretia ae kona n reke mairoun Tamara are i karawa! A riai ni kakairi iroun Iehova n tabeakin raoi kainnanoia tiibu. Ngkana e atai kangaanga aika a aitara ma ngaai ao baika a kainnanoi aika a riai n tabeakinaki ngkekei naba, e na boni kona te unimwaane n anga te kaungaunga ma te ibuobuoki ae kainnanoaki. (Taeka N Rabakau 27:23) E teretere ngkanne bwa e riai te unimwaane ni karekea ana itoman ae raoiroi ma raona n te onimaki. E ngae ngke e karinea inaomataia, ma e mutiakina naba te bwai ae noria ao n ongo n te ekaretia, ao e kamwawaa ana tai ma te tangira ni “buokiia ake a mamaara.”—Mwakuri 20:35; 1 I-Tetaronike 4:11.
7. (a) Tera are karaoaki nakoia ana tiibu te Atua n aia bong Etekiera ma Ieremia? (b) Tera reireiara n aron Iehova ni kabuakakaia taani kawakintiibu ake a aki kakaonimaki?
7 Iangoa aroaroia taani kawakintiibu ake e kabuakakaia te Atua. N ana bong Etekiera ma Ieremia, ao E boaia te koraki ake a riai n tararuaia ana tiibu ma a aki karaoia raoi. Ngkana akea ae teimatoa ni kawakinia tiibu, e na riki te nanai anne bwa kanaia maan ao a na maenako. A karaoi mwakuri n iowawa nakoia tiibu ao a “kaamarakeia i bon i rouia taani kawakintiibu n oneani mwin are a na kaamwarakeia tiibu.” (Etekiera 34:7-10; Ieremia 23:1) E kona ni kaineti kabuakakaaia taani kawakintiibu akanne nakoia mataniwi n Aaro ake aongkoa Kristian ngaiia. Ma e kateretereaki naba iai bwa e kakawaki irouia unimwaane aika Kristian tararuaan ao mwannanoan ana botaki Iehova.
“I KATEA TE BANNA NI KATOTO NAKOIMI”
8. E kanga Iesu ni katea te katoto ae moan te tamaroa ni kaineti ma kaetan aroaro aika kairua?
8 Ibukin aki kororaoia aomata, a kona ni baenikai ana tiibu te Atua tabeman n ota n te bwai ae e kantaningaia Iehova mairouia. A kona ni kabwaka ni karaoa ae boraoi ma te reirei ni kairiri man te Baibara, ke a kona ni karaoa te mwakuri n te aro are e a kaotaki iai bwa a tuai ikawai n te onimaki. Tera aroia unimwaane ngkana e riki aei? A riai ni kakairi n ana taotaonakinnano Iesu nakoia taan rimwina ngke a iaiangoa te titiraki ae antai i buakoia ae na riki bwa te kabanea ni kakannato n te Tautaeka n Uea. N oneani mwin are e na urarakeia Iesu, e teimatoa n reireinia taan rimwina ao n angania te reirei ni kairiri ma te tangira ibukini kaotiotan te nanorinano. (Ruka 9:46-48; 22:24-27) N tebokani waeia iroun Iesu, e a angania iai te reirei ae kakawaki ibukin te nanorinano, ae te aroaro ae a riai ni kaotiotia mataniwi aika Kristian.—Wareka Ioane 13:12-15; 1 Betero 2:21.
9. Tera te aroaro ae taekinna Iesu nakoia taan rimwina?
9 E kaokoro ana iango Iesu ibukini mwiokoan te tia kawakina te nanai ma are a kaotia Iakobo ma Ioane n te tai teuana. A ukoukora reken te nakoa ae rietata n te Tautaeka n Uea abotoro aika uoman aikai. Ma e kaetii aia iango Iesu ngke e kangai: “Kam ataia bwa a kani kairiia aia aomata n aron nanoia taan tautaeka aika ianena. Ao a rangi ni mwaaka i aoia aomata nako aia mataniwi aika kakannato. Ma tai katotongia. Ngkana kam kani kakannato, ao kam riai n riki bwa aia tabonibai aomata nako.” (Mataio 20:25, 26, Contemporary English Version) A riai n rarawa abotoro nakon te katei ae buakaka ae te kan ‘tautaekania’ raoraoia ke ni ‘kairiia aomata n aron nanoia.’
10. Tera aroia unimwaane n tararuaa te nanai are e tangiria Iesu, ao tera ana katoto Bauro n aei?
10 E kantaningaia unimwaane aika Kristian Iesu bwa a na tararuaa te nanai n aron are e karaoia. A riai n ingainga ni kani mwakuri bwa tooro nakoia raoraoia, ma a na aki mataniwi i aoia. Iai iroun te abotoro Bauro te aroaro ae te nanorinano, bwa e tua ae kangai nakon te ekaretia i Ebeto: “Kam bon ataia bwa man te moani bong are I roko iai n te aono n Atia, ao ai bon raou naba ngkami n taai nako n toro iroun te Uea ma te nanorinano.” E tangiriia unimwaane te abotoro bwa a na buokiia aomata nako ma te nanorinano ni koaua. E taku: “I a tia ni kaotia nakoimi ni bwaai ni kabane, bwa kam riai ni bekutata n aron aei ni buokiia ake a mamaara.” (Mwakuri 20:18, 19, 35) E tuangia kaaini Korinto Bauro bwa e aki ueana aia onimaki. Ma bon raoia ni mwakuri ae nanorinano ibukini kimwareireia. (2 I-Korinto 1:24) E boni katea naba te katoto ae raoiroi ibukin te nanorinano ao te mwakuri korakora Bauro nakoia unimwaane n te ekaretia ni boong aikai.
“TAUA RAOI BUKIN TE TAEKA AE KOAUA”
11, 12. E na kanga te unimwaane ni buoka raona n onimaki bwa e na karaoa ana motinnano?
11 E riai unimwaanen te ekaretia n “taua raoi bukin te taeka ae koaua n arona n angareirei.” (Tito 1:9) Ma e na karaoia “n te nano ae nimamannei.” (I-Karatia 6:1) N oneani mwin are e na kataia ni kairoroia raoraona n te ekaretia te tia kawakina te nanai ae raoiroi bwa a na karaoa te mwakuri n te aro teuana, e iaiangoi aanga aika a na anaaki iai nanoia. E kona te unimwaane ni katuruturui booto n reirei man te Baibara ake e riai n iaiangoi te tari anne ngkana e kakorakoraa ni karaoa ana motinnano ae kakawaki. E kona n rinanon te bwai ae boreetiaki n te reirei anne ma ngaia. E kona naba ni kaumaka te aomata anne bwa e na iangoa aron rotakin ana iraorao ma Iehova ni karaoani motinnano aika kakaokoro. E kona te unimwaane ni katerea raoi nakon te tari anne kakawakin ukoukoran ana kairiri te Atua n te tataro imwaini karaoan ana motinnano. (Taeka N Rabakau 3:5, 6) Imwini maroroakinani baikanne ma raona n onimaki, e na bon anganna ana tai ni karaoa oin ana motinnano.—I-Rom 14:1-4.
12 E bon reke mwaakaia ni kairiri mataniwi aika Kristian man te Baibara. Mangaia are e rangi ni kakawaki bwa a na mwaatai ni kamanena te Baibara ao n nimti baika taekinaki iai. Ni karaoan anne, a a buokaki iai unimwaane bwa a na rarawa ni kamanena te mwaaka ni kairiri anne n te aro ae riao. Ni koauana, bon tii taani kawakintiibu ngaiia aika beku i aan ana kairiri Kristo ao a na bane ni kaekai bukinaia i matan Iehova ma Iesu kaain te ekaretia ni kabane ibukin aia motinnano are a karaoia.—I-Karatia 6:5, 7, 8.
“KATOTO NAKON TE NANAI”
13, 14. N itera raa are e riai n riki iai te unimwaane n te ekaretia bwa te banna ni katoto nakon te nanai?
13 Imwini kaumakaia mwaane aika ikawai riki n te ekaretia iroun te abotoro Betero bwa a na aki ‘tau aroia te koraki ake a anganaki,’ e a kaungaia iai bwa a na “riki bwa katoto nakon te nanai.” (1 Betero 5:3) E na kanga n riki te unimwaane n te ekaretia bwa te katoto nakon te nanai? Iangoi uoua mai buakoni bwaai aika riai n reke iroun te tari te mwaane “ae ukoukora te kan riki bwa te mataniwi.” E riai n “taubaang ni bwaai ni kabane” ao ni “kairiia kaaini batana n te aro ae riai.” Ngkana iai ana utu unimwaanen te ekaretia, e riai ni kairiia n te aro ae moan te tamaroa bwa “ngkana e babanga te aomata ni kairiia kaaini batana, e na kanga ngkanne n tararuaa ana ekaretia te Atua?” (1 Timoteo 3:1, 2, 4, 5) Ibukini katauan temanna nakon te mwakuri ni mataniwi, e riai teuanne n taubaang ni bwaai ni kabane, n ota raoi n ana boto n reirei te Atua ao n ataa arona ni maiuakini. E na bwaina te rau n taai aika kangaanga ao e na aki waekoa ni kabuakakaa te aomata. N noran aroaro aikai irouia unimwaane, e a kaotaki iai bwa a riai n onimakinaki i buakoia kaain te ekaretia.
14 Te kairiri n te mwakuri ni minita, bon te itera riki teuana ae a riai mataniwi ni katea iai te banna ni katoto ae raoiroi nakoia raoia ni Kristian. E boni katea te katoto Iesu ibukia mataniwi ni kaineti ma aei. Bon iteran ana mwakuri Iesu i aon te aba ae kakawaki, tataekinan te rongorongo ae raoiroi ae taekan te Tautaeka n Uea. E boni kaota aroni karaoan te mwakuri aei nakoia taan rimwina. (Mareko 1:38; Ruka 8:1) Ai kaungaakira nanoia taan uarongorongo ngkana a kaai ni mwakuri ma unimwaane ni boong aikai, bwa a a kona ni kakoauaa iai ingaingan nanoia unimwaane n te mwakuri ni kakamaiu aei, ao a reke naba reireiaia man aia aanga n uarongorongo! Ngkana e ingainga te mataniwi ni kabanea ana tai ao korakorana n tataekina te rongorongo ae raoiroi n aki ongei tabena aika bati, a na boni kaungaaki iai kaain te ekaretia ni kabane bwa a na kaotiota te aeka n ingaingannano anne. A kona naba unimwaane ni katea te banna ni katoto ae raoiroi ibukia tariia man aia katauraoi ao aia anganga kaeka n taai ni bobotaki ao ni mwakuri riki tabeua, n aron te kaitiaki ao kateimatoaan tamaroan te Tabo n Taromauri.—I-Ebeto 5:15, 16; wareka I-Ebera 13:7.
“BOUTOKAIIA AKANA MAMAARA”
15. Tera bukini kawaraia kaain te ekaretia ni mwengaia irouia unimwaane?
15 E waekoa ni karaoi mwakuri n ibuobuoki aika korakora te tia kawakintiibu ae raoiroi ngkana e ikoaki ke e aoraki ana tiibu. N aron anne, a riai naba unimwaane ni waekoa n anga te ibuobuoki nakoia kaain te ekaretia aika rawawata ke aika kainnanoa kakorakoraan ana onimaki. A bae ni kainnanoa te ibuobuoki kaara ao aika aoraki ibukini baika a kainnanoi ni katoabong, ma a kainnanoa riki kakorakoraan aia onimaki ao te kaungaunga. (1 I-Tetaronike 5:14) A bae ni kaaitara naba ma kangaanga kaain te ekaretia aika rooro n rikirake n aroni buakanakini “baike a bwabwarui rooro n rikirake.” (2 Timoteo 2:22) Mangaia are e irekereke kawakinan te nanai ma kawaraia kaain te ekaretia n tabetai ma iangoan ae a na kona n ota n te kangaanga ake a aitara ma ngaai ao kaungaaia n te reirei ni kairiri man te Baibara. Ngkana a karaoaki aaro n ibuobuoki aikai n taia aika kainnanoaki iai, a a kona ngkanne ni kaetaki kangaanga aika bati imwain ae a a rangi ni kakaiaki.
16. Tera te ibuobuoki ae a kona n anga unimwaane ngkana e kainnanoa boutokaan ana onimaki temanna kaain te ekaretia?
16 Tera ae na karaoaki ngkana e a rikirake te kangaanga ao e a ruanikai ana onimaki temanna kaain te ekaretia? E titiraki ni kangai Iakobo ae te tia korea te Baibara: “Iai ae aoraki i buakomi? Ke e weteiia unimwaanen te ekaretia, ao a na tataro ibukina ao ni kabiria n te bwaa n aran Iehova. Ao e na marurung te aomata ae aoraki n te tataro ae nako man te onimaki, ao e na kateirakeaki iroun Iehova. Ao ngkana e a tia ni karaoa ae bure ao e na kabwaraaki ana bure.” (Iakobo 5:14, 15) E ngae naba ngkana e aki “weteia unimwaane” te aomata ae mamaara ana onimaki, ma a riai ni waekoa n roko ni buokia n te tai are a ataa iai te bwai ae riki nakoina. Ngkana a tataro unimwaane n te ekaretia ma tariia ao ibukia naba taari ma ni buokiia n taai ake a kainnanoa iai buokaia, a a boni kaotiia iai bwa bon taani boutokaa te onimaki ao ni kaungaunga nakoia te koraki ake a tararuaia.—Wareka Itaia 32:1, 2.
17. Tera ae kona n riki ngkana a kakairi unimwaane n te ekaretia iroun “te tia kawakintiibu ae kakannato”?
17 A kakairi unimwaane n te ekaretia iroun “te tia kawakintiibu ae kakannato” ae Iesu Kristo ni bwaai ni kabane aika a karaoi n ana botaki Iehova. E rangi ni kakabwaiaaki te nanai ao e teimatoa ni maiuraoi mani kakorakoraan aia onimaki irouia mwaane aika onimakinaki raoi aikai. Ti rangi ni kakaitau ao ni kaungaaki ibukini bwaai aikai ni kabane bwa ti na neboa ara tia Kawakintiibu ae akea kabotauana ae Iehova.
[Taamnei n iteraniba 26]
[Taamnei n iteraniba 29]
A buokiia kaain aia utu unimwaane n te ekaretia ni katauraoi nakon te mwakuri ni minita (Nora barakirabe 13)
[Taamnei n iteraniba 30]
A katea te banna ni katoto mataniwi n te mwakuri ni minita (Nora barakirabe 14)