Ongeaba Irouia Ana Tia Kawakintiibu Iehova
“Kam na ongeaba irouia akana kairiri i buakomi ao kam na aantaeka, bwa a teimatoa n tantani ni kawakini maiumi.”—I-EBERA 13:17.
KO NA KANGA NI KAEKA?
Tera aroia unimwaane n te ekaretia ni kawakinia ana tiibu te Atua?
Bukin tera bwa a riai ni kakauongo tiibu nakoia taani kawakintiibu ake a beku i aan ana kairiri Kristo?
E aera ngkai ti riai n aki iaiangoa aki kororaoia unimwaane n te ekaretia n te aro are ti a kakeaa iai bongan aia reirei ni kairiri?
1, 2. Bukin tera bwa e kakawaki ngkai e boni kabotaua Iehova ma te tia kawakintiibu?
E BONI kabotaua Iehova ma te tia kawakintiibu. (Etekiera 34:11-14) E kakawaki anne bwa ti buokaki iai n ota raoi n aroaron Iehova. E karaoa mwiokoana ma nanona ni kabane te tia kawakintiibu ae tatangira ibukini kamaiuaia ao marurungia ana nanai n tiibu ake e tararuai. E kairiia nakon tawaana n uteute ao raan aika bati (Taian Areru 23:1, 2); e tantani i rarikia n te ngaina ma te bong (Ruka 2:8); e kamanoia mairouia maan aika tiritiri (1 Tamuera 17:34, 35); e bwabwakoia tiibu aika ataei (Itaia 40:11); e ukoukoriia aika bua ao ni bautiia aika ikoaki.—Etekiera 34:16.
2 N taai ake rimoa ao angiia ana aomata te Atua bon taani kawakintiibu ao taan ununiki. Mangaia are a kai ota bwa e aera ngkai e boni kabotaua Iehova ae te Atua ma te tia kawakintiibu ae tatangira. A ataia bwa a kainnanoa tararuaaia ao tabeakinaia raoi tiibu bwa a aonga ni maiuraoi. N aron naba anne, a kainnanoa tararuaaia aomata ao kairiraia iroun Iehova. (Mareko 6:34) A na bon rawawata aomata ngkana akea te kairiri ae raoiroi ao n aki tararuaaki raoi marurungin aia onimaki. A na moanna ni mamaara ao n aki ataa ae raoiroi ma ae buakaka kaanga aroia “tiibu aika akea te tia kawakinia” aika maenako. (1 Uea 22:17, BG) Ma e ngae n anne, e bon tatangira Iehova ni katauraoi baika a kainnanoi ana aomata.
3. Tera ae ti na maroroakinna n te kaongora aei?
3 Ti ota naba ngaira ni boong aikai n aron Iehova ngkai e boni kabotaua ma te tia kawakintiibu. E bon teimatoa naba Iehova ni katauraoi bwaai ibukia aomata aika aroia tiibu. Ti na nora arona ni kairiia ana tiibu ao ni katoki nanoia ni baika a kainnanoi ni boong aikai. Ti na maroroakina naba te bwai ae a na karaoia tiibu ni kaineti ma tabeakinaia ma te tangira iroun Iehova.
E KAREKEIA TAANI KAWAKINTIIBU AIKA BEKU I AANA TE TIA KAWAKINTIIBU AE RAOIROI
4. Tera aron Iesu ni kawakinia ana tiibu Iehova?
4 E a tia Iehova n rinea Iesu bwa Atun te ekaretia ni Kristian. (I-Ebeto 1:22, 23) Ngkai Iesu bon “te tia kawakintiibu ae raoiroi,” e a kaotiota ngkanne ana tangira Tamana, ana kantaninga ao aroarona. E ‘anga naba maiuna ibukia ana tiibu.’ (Ioane 10:11, 15) Bon te kakabwaia nakoia botannaomata ana karea ni kaboomwi Kristo! (Mataio 20:28) Eng, bon ana kantaninga Iehova bwa a na ‘aki kamaunaaki akana onimakina Iesu, ma e na reke irouia te maiu are aki toki’!—Ioane 3:16.
5, 6. (a) Antai ake e a tia n rineia Iesu ibukin tararuaaia ana tiibu, ao tera ae tangiraki mairouia tiibu ngkana a na kakabwaiaaki man te babaire aei? (b) Tera bukina ae moan te kakawaki ngkai ti riai n ongeaba irouia unimwaane n te ekaretia?
5 Tera aroia tiibu nakon te tia Kawakintiibu ae Raoiroi ae Iesu Kristo? E taku Iesu: “A ongo bwanaau au tiibu, ao I ataiia, ao a irirai.” (Ioane 10:27) Te bwai ae nanonaki n te kakauongo nakoni bwanaan te tia Kawakintiibu ae Raoiroi, bon te ongeaba nakon ana kairiri ni bwaai ni kabane. E irekereke n aei, te ongeaba irouia taani kawakintiibu aika beku i aani Kristo ake e a tia n rineiia. E kaotia naba Iesu nakoia ana abotoro ao taan rimwina bwa a riai ni waakinaanako te mwakuri are e a tia ni moanna. A riai n “reireinia” ao ni ‘kaamwarakeia ana tiibu Iesu aika uarereke.’ (Mataio 28:20; wareka Ioane 21:15-17.) Ngke e a butanako te rongorongo ae raoiroi ao n rikirake mwaitiia taan rimwini Kristo, e a karaoa ngkanne ana babaire Iesu bwa a na kawakina te ekaretia Kristian aika ikawai n te onimaki.—I-Ebeto 4:11, 12.
6 Ngke e taetae te abotoro Bauro ma mataniwi n te ekaretia are n te moan tienture i Ebeto, e boni kamataataa nakoia bwa a a tia n rineaki iroun te taamnei ae raoiroi bwa mataniwi aika a na “kawakina ana ekaretia te Atua.” (Mwakuri 20:28) A karaoa naba anne mataniwi aika Kristian ni boong aikai, kioina ngkai e boto rineaia mani kakoroan nanoni kaetieti aika n te Baibara ae kairaki koreana rinanon te taamnei ae raoiroi. Mangaia are ngkana ti ongeaba irouia mataniwi aika Kristian, ti a kaotia iai bwa ti karineia taani Kawakintiibu aika rangi ni kakannato aika Iehova ma Iesu. (Ruka 10:16) Ni koauana, aio bukina ae moan te kakawaki ngkai ti riai n aantaeka nakoia unimwaane n te ekaretia. Ma bon iai bukina riki tabeua ngkai ti riai n ongeaba n aia kairiri.
7. Tera aroia unimwaane ni buokiko ni kateimatoa am iraorao ae kaan ma Iehova?
7 Ngkana a kairiia raoia n onimaki unimwaane n te ekaretia, a a bon anga iai te kaungaunga ao te reirei ni kairiri ae boto man te Baibara. Tiaia ae a uaiakinna n aei, a na aki kairimatoa nakoia taari ibukin aroia ni kamanenai maiuia. (2 I-Korinto 1:24) Ma a na angania raoia n onimaki taeka n reirei man te Baibara bwa a aonga ni buokaki iai ni karaoi aia motinnano aika raraoi ao ni karikirakeaki iai te aantaeka ao te rau n te ekaretia. (1 I-Korinto 14:33, 40) A ‘kawakini maiuia aomata’ unimwaane n aroia ni kani buokiia kaain te ekaretia ni kabane bwa a na kateimatoai aia iraorao ae kaan ma Iehova. Ibukin anne, a na waekoa n anga te ibuobuoki ngkana a ataia bwa e nang toua “te mwaneka ae kairua” te tari temanna ke e a tia. (I-Karatia 6:1, 2; Iuta 22) Tiaki ngkanne aikai bukina aika raraoi ni kaineti ma te “ongeaba irouia akana kairiri”?—Wareka I-Ebera 13:17.
8. A kanga unimwaane ni kamanoa ana nanai te Atua?
8 E korea ae kangai nakoia taari ake i Korote te abotoro Bauro ae bon te tia kawakina naba te nanai: “Kam na tarataraingkami bwa e kaawa n iai temanna ae e na raweingkami bwa konana ni wanawanan aon te aba ao n te mwamwanaa te aba ae akea uaana, ae boto i aon aia katei nikawai aomata ao i aoni baike a boboto iai aia waaki kaain te aonnaba, ma tiaki ni kaineti ma Kristo.” (I-Korote 2:8) E kairiri te kauring aei nakoni bukina riki teuana ae raoiroi iai mutiakinan aia reirei ni kairiri unimwaane man te Baibara. A kamanoa te nanai n aroia ni kateia taari bwa a na kawakinia mairoun temanna ae tao e kataia ni kamamaraa aia onimaki. E anga te kauring te abotoro Betero ni kaineti ma “burabeti ni kewe” ao “taan angareirei ni kewe,” bwa a kataia ni “kamwaneia aomata aika mamaara” bwa a na karaoi mwakuri aika bubuaka. (2 Betero 2:1, 14) A riai unimwaane ni boong aikai n anga kauring n aron naba anne ngkana a nora riaina. Ngkai boni mwaane aika Kristian ngaiia ake a a ikawai n te onimaki, a a tia naba n aitara ma aaro akanne ni maiuia. Irarikin anne, imwain anganakia mwiokoaia, a kaotiotia bwa a ota raoi n te Baibara ao a bon tau n angareirei i aoni koaua man te Baibara. (1 Timoteo 3:2; Tito 1:9) A kona n anga te kairiri ae manena nakon te nanai ibukina bwa a ikawai n te onimaki, a aki tabeitera ao e boto rabakauia i aon te Baibara.
E KAAMWARAKEIA AO NI KAMANOIA TIIBU TE TIA KAWAKINTIIBU AE RAOIROI
9. E kanga Iesu ni kaira te ekaretia ni Kristian ao ni kaamwarakeia ni boong aikai?
9 E anganga taian amwarake n taamnei aika rangi ni bati Iehova nakoia kaain te botaki n itaritari ni katobibia te aonnaba ni kabane. A rangi ni bati reirei ni kairiri man te Baibara aika katauraoaki rinanon ara boki aika aanaki man te Baibara. Irarikin anne, e reke te kairiri n tabetai nakoia unimwaane n te ekaretia man te botaki, tao rinanon reeta ke kaetieti aika uotaki irouia mataniwi aika mwamwananga. A karekea te kairiri ae mataata raoi tiibu rinanon aaro akanne.
10. Tera tabeia taani kawakina te nanai ni kaineti ma naake a tiotionako?
10 Ibukin ngkanne aia onimaki, a mwiokoaki mataniwi bwa a na kamanoia, a na kawakinia ao n tararuaa marurungia kaain te ekaretia, ai moarara riki te koraki ake a a tia ni karaoi buure aika kakaiaki ke a mamaara aia onimaki. (Wareka Iakobo 5:14, 15.) Tao a a tia tabeman mai buakoia aomata aikai n tiotionako man te nanai ao n aki iririi naba mwakuri ni Kristian. Ngkana e riki anne, tiaki e riai te unimwaane ae mwamwannano ni karaoa ana kabanea ni kona n ukoukora te tiibu ae bua ao ni kaumakia bwa e na okira te nanai ae te ekaretia? Eng, bon anne ae na karaoia! E kabwarabwaraa Iesu ni kangai: “E aki tangiria Tamau are i karawa bwa e na bua temanna mai buakoia aika uarereke aikai.”—Mataio 18:12-14.
TERA ARORA AE RIAI N IAIANGOA AIA KAIRUA TAANI KAWAKINTIIBU AIKA BEKU I AAN ANA KAIRIRI KRISTO?
11. E aera ngkai a kona n namakinna tabeman bwa e kangaanga irouia te ongeaba nakon aia kairiri unimwaane?
11 Bon taani Kawakintiibu aika kororaoi Iehova ma Iesu. A bon aki kororaoi taani kawakintiibu aika beku i aan ana kairiri Kristo ake a onimakinaki n tararuaan te ekaretia. Aio bon te kangaanga ae riiriki nakoia tabemwaang ni kaineti ma te ongeaba nakon aia kairiri unimwaane n te ekaretia. A bae n iango n aron aei aomata: ‘A aki kororaoi n ai arora naba. Ao bukin tera bwa ti na kakauongo n aia reirei ni kairiri?’ E boni koaua bwa a aki kororaoi unimwaane. Ma e ngae n anne, ti riai n aki kaatuui ara iango i aon aki kororaoia ao aia kairua.
12, 13. (a) Tera ae kona n taekinaki ibukini kabwakaia tabeman ake e kamanenaia Iehova ni mwiokoaia aika kakawaki? (b) Bukin tera bwa a koreaki n te Baibara aia kairua mwaane aika onimakinaki?
12 E kaotaki n te Baibara koauan ae a kabwaka te koraki ake e kamanenaia Iehova ibukini kairaia ana aomata rimoa. N te katoto, e katabuakaki Tawita bwa te uea ao te mataniwi i aoia I-Iteraera. Ma e ngae n anne, e iraraang n te kariri ike e a wene ni kimoa ao n tiritiri iai. (2 Tamuera 12:7-9) Iangoa naba te abotoro Betero. E ngae ngke e anganaki te mwioko ae kakawaki n te ekaretia ni Kristian are n te moan tienture, ma e boni karaoi naba buure aika kakaiaki. (Mataio 16:18, 19; Ioane 13:38; 18:27; I-Karatia 2:11-14) Akea te aomata ae kororaoi ni moa mairoun Atam ao Ewa ma bon tii Iesu.
13 Bukin tera bwa e kariaia Iehova taani korea te Baibara bwa a na korei aia kairua mwaane ake e a tia n angania mwiokoaia? Mai buakoni bukina riki tabeua, e karaoa aei te Atua ni kaota iai ae e kona ni kamanenaia mwaane aika aki kororaoi bwa a na kairiia ana aomata. Ni koauana, e a tia ni karaoa anne n taai nako. Ngaia are ti riai n aki iangoa aki kororaoia te koraki ake a kairiri i buakora ni boong aikai, bwa aonara ni ngurengure ibukia ke ni kakeaa bongani mwaakaia ni kairiri. E kantaningaira Iehova bwa ti na karineia taari akanne ao n ongeaba irouia.—Wareka Te Otinako 16:2, 8.
14, 15. Tera reireiara n aron Iehova n anga taiani kaetieti nakoia ana aomata rimoa?
14 E rangi ni kakawaki te ongeaba irouia te koraki ake a kairiri i buakora ni boong aikai. Iangoa aron Iehova n itoman ma ana aomata n taai ake a karuanikai rimoa. Ngke a kitana Aikubita kaain Iteraera, e anganga tuua te Atua ibukia rinanoni Mote ma Aaron. Ibukini kamaiuaia kaain Iteraera man rekenikai ake tebwina, a bon riai n ongeaba nakon tuua ni kaineti ma te amwarake ae okoro ao kanimwan raraan te tiibu ae kamateaki i aoni bouan te mataroa ao n te kai are i etana. E aki roko irouia te kaetieti anne rinanon te bwanaa mai karawa. Ma a riai ni kakauongo nakoia mwaanen Iteraera aika ikawai riki, ake a karekei kaetieti aika okoro mairouni Mote. (Te Otinako 12:1-7, 21-23, 29) Bon taani karorokoi ana kaetieti Iehova nakoia ana aomata, Mote ao mwaane aika ikawai riki n taai akanne. A kakororaoa naba te mwioko ae rangi ni kakawaki ae titeboo ma anne unimwaane n te ekaretia ni boong aikai.
15 Ko boni kona naba n iaiangoi rongorongo aika rangi ni bati riki ni bokin te Baibara ngke e anga kaetieti ibukin te kakamaiu Iehova rinanoia aomata ke anera. E noraki n rongorongo aikai bwa e iangoia te Atua bwa e na anga te mwaaka nakoia tabemwaang. A taetae ana tia uarongorongo n arana, ao a tuangia ana aomata baika a riai ni karaoi bwa a aonga ni kamaiuaki man te kabuanibwai. A bati bukina ngkai ti kantaningaa Iehova bwa e na karaoa naba anne ibukia ana aomata n Aremaketon. N etina, a riai n rangi n taratara raoi unimwaane n te ekaretia ni kabane ni boong aikai ake a anganaki mwiokoaia bwa a na tei ibukin Iehova ke ana botaki, bwa a na aki kamanena te mwaaka are a anganaki n te aro ae riaon are a katauaki iai.
“TII TENANAINA, AO TII TEMANNA TE TIA KAWAKINTIIBU”
16. Tera te “taeka” ae ti riai ni kakauongo raoi nako iai?
16 Bon “tii tenanaina” ana aomata Iehova ao a mena i aan “tii temanna te tia kawakintiibu,” ae Iesu Kristo. (Ioane 10:16) E kaotia Iesu bwa e na memena irouia taan rimwina “ni boongi ni kabane ni karokoa tain tokin te waaki ae ngkai i aon te aba.” (Mataio 28:20) Ngkai te Uea ngaia i karawa, e boni mwiokoaki ni bwaai ni kabane ake a riki aika a na kairiri nakoni motikan taekan ana waaki Tatan. Ti riai ni kakauongo nakon ‘taeka mai akura’ aika tuangira kawaira ae ti na toua, ngkana ti na teimatoa ni katiteuanaaki ao ni kamanoaki i nanon ana botaki te Atua. E irekereke te “taeka” aei ma te bwai ae taekinna te taamnei ae raoiroi mairoun te Atua rinanon te Baibara, ao te bwai ae taekinna naba Iehova ma Iesu rinanoia naake a a tia n rineia bwa taani kawakintiibu aika beku i aaia.—Wareka Itaia 30:21, BG; Te Kaotioti 3:22.
17, 18. (a) Tera te kabuanibwai ae karuanikaia te nanai, ma tera ae ti kona n onimakinna? (b) Tera ae na maroroakinaki n te kaongora ae imwina?
17 E taekinaki Tatan bwa e nakonako “ni bekorara n ai aron te raian, n ukoukora ae e na ongnga.” (1 Betero 5:8) N aron te tia kamwane ae mwangainrang ma n tiritiri, e kariki kabuanibwai Tatan nakon te nanai ao e tataningaa ana tai ae angaraoi ibukin raweaia naake a aki taratara raoi ke a tiotionako. Aio bukina ae moan te kakawaki ngkai ti riai n teimatoa n rangi ni kaanira ma kaain te nanai ni kabane ao “te tia kawakintiibu ae te mataniwi i aoni [maiura].” (1 Betero 2:25) E taekinaki ae kangai ibukia aika kamaiuaki man te rawawata ae korakora n Te Kaotioti 7:17: “E na kawakinia te Tiibutetei [ae Iesu] . . . e na kairiia nakoni koburaken raan ni kamaiu. Ao e na kaoa te rannimata ni kabane mai mataia te Atua.” Ai bon raoiroira te berita aei!
18 Ibukina bwa ti a tia ni maroroakini mwiokoaia aika rangi ni kakawaki unimwaane aika Kristian ake taani kawakintiibu aika beku i aan ana kairiri Kristo, ti karaoa ae raoiroi ngkana ti titirakinira ni kangai: A na kanga mwaane aika rineaki aikai n taraia raoi bwa a kawakinia ana tiibu Iesu n te aro ae riai? E na maroroakinaki kaekaana n te kaongora ae imwina.
[Taamnei n iteraniba 21]
[Taamnei n iteraniba 23]
N aron te tia kawakintiibu ae kamanoa ana nanai, a kamanoia naba kaain te ekaretia unimwaane (Nora barakirabe 8)
[Taamnei n iteraniba 25]
A mwakuri korakora unimwaane ni kamanoia utu aika tii temanna iai te karo man iraorao aika karuanikai (Nora barakirabe 17, 18)