A Uki Taningan Iehova Nakon Ara Wewete Ni Kani Buokaki

“A memena matan Iehova i aoia akana raoiroi ni kan akoiia, ao a uki taningana nakon aia wewete.”—TAIAN ARERU 34:15.

1, 2. (a) Tera aia namakin aomata aika mwaiti ni boong aikai? (b) E aera ngkai ti aki mimi iai?

KO KARAWAWATAKI ngkai? Ngkana ngaia aei ae riki nakoim, ao bon tiaki tii ngkoe. A tabe ngkai ni kabokorakora mirion ma mirion aomata ni kaaitarai kangaanga aika riiriki n te bong teuana ma teuana i nanon te waaki ae buakaka ae ngkai. Irouia tabeman, e taraa n rangi ni kangaanga te nanomwaaka iai. Titeboo aia namakin ma te tia areru ae Tawita, are e korea ae kangai: “I nimamate ao I bati ni kaikoakaki: I ngirangira ngkae e aki rau nanou. E bati n tata burou, e kitanai korakorau: Ao norabani matau e nako naba mai rou.”—Taian Areru 38:8, 10.

² Ngkai Kristian ngaira, ti aki mimi ni karawawatan te maiu aei. Ti ataia ae “rikini maraki” boni kanoan te kanikina ibukin menan Iesu ma aomata, are e a kaman taekinaki. (Mareko 13:8; Mataio 24:3) Te moan taeka are e rairaki mai iai te taeka ae “rikini maraki” e nanonaki iai te maraki ae rangi ni korakora n aron ae e namakinaki n te bung. Ai etira ngkanne te kabwarabwara ni kaineti ma aron korakoran te rawawata are a namakinna aomata n taai aika “kamamate” ke n “tiritiri” aikai!—2 Timoteo 3:1, 3.

E Atai Rawawatara Iehova

3. Tera ae a ataia raoi ana aomata te Atua?

³ A ataia raoi ana aomata Iehova bwa a na bon rotaki naba ni karawawata aikai, ao a a bae n rikirake n rangi ni korakora riki. Irarikin te bwai ae a rinanona te botannaomata ni kabane, ngaira aika ana toro te Atua ti kaaitara naba ma te “kairiribai are te riaboro,” are e kakorakoraa n urui ara onimaki. (1 Betero 5:8) Ai bebetera ngkanne iroura namakinan are e rinanona Tawita ngke e kangai: “E urua nanou te taetaebuakaki; ao I bati n rawawata: Ao I kaantaningaiia akana a na nanoangai, ao akea naba; ao akana a na kabebetea nanou, ma a aki reke i rou”!—Taian Areru 69:20.

4. Tera kabebeteara ngkana ti rinanon te rawawata?

⁴ Te koaua bwa e nanonna Tawita bwa ai akea riki ana kaantaninga ae raoiroi? E aki. Nori ana taeka riki akana n te areru naba anne: ‘E ongo Iehova irouia akana akea aia bwai, ao e aki ribaia ana koraki aika kataenikaiaki.’ (Taian Areru 69:33) Ni koauana, n tabetai ao ti kona n namakinna bwa titeboo ma ti kataenikaiaki n te rawawata. E kona n taraa n ae a aki mataata raoi n aroarora aomata, ke a bon aki ota iai. Ma n aron Tawita ti kona naba ni kabebeteaki n ataakin ae e atai raoi rawawatara Iehova.—Taian Areru 34:15.

5. Tera are e kakoauaa raoi te Uea ae Toromon?

⁵ E kamataataa te koaua aei natin Tawita ae Toromon ni katabuan te tembora i Ierutarem. (Wareka 2 Rongorongo 6:29-31.) E onnonia Iehova bwa e na ongoraai aia tataro aomata aika raoiroi nanoia n tatabemania nako, ake a tataro Nakoina ni kaineti ma “kain nanoia ma rawawataia.” Tera aron te Atua ni kaekai aia tataro te koraki aika karawawataki n tatabemania nako? E kakoauaa raoi Toromon, bwa e na aki tii ongoraei aia tataro te Atua ma e na karaoa naba te bwai teuana ni buokiia. Bukin tera? Ibukina bwa e atai raoi “nanoia natiia aomata.”

6. Tera arora ni kaaitarai raraomara, ao bukin tera?

⁶ Ti kona naba ngaira ni kakairi iroun Toromon n tataro nakon Iehova ni kaineti ma ‘oin kainnanora ao rawawatara.’ Aikai boni karawawatara n tatabemanira nako. Ti riai ni kabebeteaki n ataan ae e atai raoi rawawatara ao e mutiakinira. E kaota koauan aei te abotoro Betero ngke e kangai: “Kabane ami iango, ae te iango n raraoma, ni kaki i aona, ba E mumutiakiningkami.” (1 Betero 5:7) E mutiakinira Iehova ni baika a riki nakoira. E kamataataa ana mwamwannano Iehova Iesu ngke e kangai: “Tiaki a kaboaki uoman te tibaaro n te aba-bene? Ao e bon aki bwaka i aontano temanna n aikai ngkana e aki ataki iroun Tamami: ma a bane naba ni warekaki iranatumi. Ma ngaia ae kam na tai maku; ba kam bongana riki nakoia tibaaro aika bati.”—Mataio 10:29-31.

Onimakina Ana Ibuobuoki Iehova

7. Tera te ibuobuoki ae na karaoaki ibukira?

⁷ Ti kakoauaa bwa e kani buokira Iehova ao e kona ni buokira ngkana ti karawawataki. “Boni nera ni kamaiu ma korakorara te Atua, bon te tia buokira ae bon iai i roura ngkana a kai nanora.” (Taian Areru 34:15-18; 46:1) E kanga te Atua ni katauraoa te ibuobuoki anne? Iangoa ae taekinaki n 1 I-Korinto 10:13: “E kakaonimaki te Atua, ae bon aki kitaningkami ba kam na kaririaki n te aro ae kam aki kona n teimatoa iai; ma E na karaoia ba raon te kaririaki kawaimi ni biri nako maiai, ba kam aonga ni kona n taon nanomi.” Tao ane e na kaangaraoi rikin bwaai Iehova ibukin kamaunan karawawata aikai ke tao e na anganira te korakora ae ti kainnanoia ibukin te nanomwaaka. Ti boni buokaki iroun Iehova n te aro teuana ke teuana.

8. Ti na kanga ni karekea ana ibuobuoki te Atua?

⁸ Ti na kanga ni kona ni karekea buokara n aei? Nora te bwai ae ti reireiaki bwa ti na karaoia: “Kabane ami iango, ae te iango n raraoma, ni kaki i aona.” E nanonaki n aei bwa ti na angan Iehova te mwioko ibukin raraomara ao tabeaiangara ni kabane n te aro ni kaikonaki. Ti kataia ni katoki raraomara ao ti taon nanora n onimakinna bwa e na tabeakinira ni baika ti kainnanoi. (Mataio 6:25-32) Onimakinana n te aro anne, e kainnanoaki iai te nanorinano bwa ti na aki onimakina oin korakorara ke rabakaura. Ngkana ti kananorinanoira “i aani bain te Atua ae e maka,” ti kaotia iai bwa ti mangori. (Wareka 1 Betero 5:6, BK.) Ibukin anne ti a buokaki iai ni kaaitarai baika e kariaia te Atua. E kona ni korakora ingaingara ni kani karekea inaomatara man te kangaanga anne n te tai ae waekoa. Ma ti onimakina Iehova bwa e ataa raoi te tai ae riai ibukin aei ao aroni buokara iai.—Taian Areru 54:7; Itaia 41:10.

9. Te aeka ni kangaanga raa are e riai Tawita ni kaaki i aon Iehova?

⁹ Uringa ana taeka Tawita aika koreaki n Taian Areru 55:22, BK: “Angan Iawe rawawatam, ao e buokiko, e aki kariaia te aomata ae raoiroi ba e na konaaki.” E rangi n rawawata Tawita ngke e korei taeka aikai. (Taian Areru 55:4) E ataaki bwa e koreaki te areru aei ngke e a baireia natina ae Abetarom n te aro ae raba bwa e na iraea ueana mairouna. E reitaki ma Abetarom n te waaki ni karitei arei, ana tia reirei Tawita temanna ae Aitobera are e rangi n onimakinna. E riai n nako Ierutarem Tawita ibukin rawean maiuna. (2 Tamuera 15:12-14) E ngae ngke e korakora karawawatakin Tawita ma e teimatoa n onimakina te Atua ao e aki maneang.

10. Tera ae ti riai ni karaoia ngkana ti kaaitara ma te rawawata?

¹⁰ N ai aron Tawita, e kakawaki naba iroura kawaran Iehova n te tataro ni kaineti ma rawawatara aika taonira ngkai. Ti bia iangoa ae kaumakira te abotoro Bauro bwa ti na karaoia ni kaineti ma aei. (Wareka I-Biribi 4:6, 7.) Tera ae kona n reke imwin te kakorakora n tataro aei? Bon ‘te rau are mairoun te Atua, are te rau are aki konaki n ataki teutana, e na kawakin nanora ao ara iango i nanoni Kristo Iesu.’

11. A na kanga ni kamanoaki nanora ma ara iango n “te rau are mairoun te Atua”?

¹¹ Te koaua bwa e na reke bitakin aroaromi imwin te tataro? Tao e kona, ma ti riai n ataia bwa e aki kaekaa ara tataro Iehova n aron ae ti tangiria. Ma e ngae n anne, e buokira te tataro ni kateimatoaa raoiroin ara iango n te aro ae ti na aki taonaki nako ni karawawatara. E kona ni karaui nanora “te rau are mairoun te Atua” ngkana a rawawata nanora. N ai aron te taanga ni buaka ae mwiokoaki bwa kamanoan te kaawa teuana man niniakina, e na boni kamanoi naba nanora ao ara iango te “rau are mairoun te Atua.” E na buokira n tokanikai i aon te nanououa, te maaku ao iango aika aki riai ao n tukira man karaoan ae buakaka ao te aki wanawana naba.—Taian Areru 145:18.

12. Kabwarabwaraa aroni karekean te raunnano iroun te aomata.

¹² Ti na kanga ni karekea raun ara iango ngkana ti karawawataki? Iangoa te kabotau ae kuri n titeboo ma aroarora ngkai. Tao e mwakuri te tia mwakuri i aan ana kairiri te manatia ae iowawa nakoina. Ma e kona n taekin ana kangaanga te tia mwakuri anne nakon te tia bwaibwai n te kambwana ae akoi ao n aki inanonano. E karauaki nanon te tia mwakuri aei iroun te tia bwaibwai, n taekinan ae e ota n te kangaanga ae riki ao ni kaotan naba ae n te tai ae waekoa ao e nang kakerikakaki te manatia aei man nakoana. Tera aron rotakin te tia mwakuri aei n te baene e karaoaki anne? Ibukin onimakinan te karaunano anne ao ataakin te bwai ae e a kaan riki, e a kakorakoraki teuaei ni kateimatoaa ana kekeiaki, e ngae ngke e riai ni kaaitarai kangaanga tabeua ngkai ni karokoa te tai anne. N aron naba anne, ti ataia bwa e atai ara kangaanga Iehova, ao e karaui nanora bwa e na waekoa n “teweaki nako uean aonaba ngkai.” (Ioane 12:31) Ai karaunanora aei!

13. Tera ae ti riai ni karaoia i rarikin te tataro?

¹³ Te koaua bwa e a tau naba tii tataroan ara kangaanga nakon Iehova? E aki. E bati riki ae kainnanoaki. Ti riai ni kakaraoa ae boraoi ma ara tataro. Ngke e kanakoia mwaane te Uea are Tauro nakon ana auti Tawita bwa a na tiringnga, ao e tataro ni kangai Tawita: “Kamaiuai mairouia taan ribaai, Atuau: Katokaai i eta mairouia akana tei rake n ekai nako. Kamaiuai mairouia akana karaoa ae buakaka, ao kamaiuai mairouia aomata aika bwaruu raraa.” (Taian Areru 59:1, 2) E aki tii tataro Tawita, ma e ongoraei naba ana taeka buuna ao e karaoi baika riai ibukin kamanoana. (1 Tamuera 19:11, 12) N aron naba anne, ti kona n tataro bwa ti na anganaki te wanawana ae e na buokira ni kaaitarai aaro aikai ao ni kabebetei rawawatara.—Iakobo 1:5.

Aroni Karekean Korakorara n Nanomwaaka

14. Tera ae e kona ni kananomwaakaira i aani karawawatara?

¹⁴ Tao a na aki kona ni katokaki rawawatara n te tai ae waekoa. Ma a kona ni waaki nako i nanon tabeua te tai. Ngkana ngaia aei arora, tera ngkanne buokara bwa ti aonga n nanomwaaka? Te moan, uringnga bwa ngkana ti teimatoa ni kakaonimaki ni beku iroun Iehova n aki ongei kangaanga, ti kaotia iai bwa ti tangiria. (Mwakuri 14:22) Ururinga naba ana kabuakaka Tatan ibukin Iobi ae kangai: “E mamaka te Atua Iobi n aki kani kaboaki ke e aki? Tiaki Ko a tia ni karaoa te o n otabaninia, ma ana auti, ma ana bwai ni kabane, ni kabuta? Ko kamateraoa aia makuri baina, ao a kabatiaki ana bwai i aon te aba. Ma Ko na arora baim ngkai, ao ring ana bwai ni kabane, ao e na taetaebuakaiko i matam.” (Iobi 1:9-11) Ibukin kakaonimakin Iobi, e a kakoauaki iai ae bon te kewe ae rangi ni buakaka te bukibuki anne. Ngkana ti nanomwaaka i aan rawawatara, ti a kona naba iai ni kaotia bwa bon te tia kewe Tatan. E kakorakoraki ara kaantaninga ao mwiokoan te Atua iroura man nanomwaakara.—Iakobo 1:4.

15. Baikara katoto aika kona ni kakorakoraira?

¹⁵ Te kauoua, uringnga bwa “a kumeaki ni kakoroaki maraki aika ti te bo ma marakimi i nanoia tarimi aika mena i aon te aba.” (1 Betero 5:9) Eng, “e tuai men roko i roumi te kaririaki teuana ae e aki kona te aomata n rawa nako iai.” (1 I-Korinto 10:13) Mangaia are e kona n reke korakorami ao ninikoriami ni kananoan ami iango i aon aia katoto tabemwaang, n onean mwin are kam na kaatuua iaiangoan ami kangaanga. (1 I-Tetaronike 1:5-7; Ebera 12:1) Karekei ami tai n iangoi aia katoto te koraki ake kam ataiia bwa a a tia ni kakaonimaki ao n nanomwaaka, n aki ongei karawawata aika kammaraki aika tabe n taonaki iai. Kam a tia n ukoukori rongorongoia aomata aika boretiaki ao n nori karakinaia bwa kam aonga n atai aroia te koraki ake a a tia n rinanon aaro aika titeboo ma aika kam aitara ma ngaai? Ane kam na namakina kakorakorami n rongorongo aikai.

16. E na kanga ni kakorakoraira te Atua ngkana ti aitara ma kataaki aika kakaokoro?

¹⁶ Te katenua, uringnga bwa Iehova bon “te Tama ae nanoangaea te aba, ae te Atua ae te tia karika kabebetean te nano ni kabanea; ae kabebetei nanora n rawawatara ni kabane, ba ti aonga ni kona ni kabebetei nanoia akana rawawata n rawawata nako, ni kabebetean te nano are a kabebeteaki moa iai nanora iroun te Atua.” (2 I-Korinto 1:3, 4) Ai aron ae e tei i rarikira te Atua ni kaungaira ao ni kakorakoraira, tiaki tii n rawawatara aika ngkai ma “n rawawatara ni kabane.” Mangaia are ti a kona iai ni kabebeteia aomata ngkana a taonaki “n rawawata ni kabane.” E nori koauan taeka aikai Bauro i nanoni maiuna.—2 I-Korinto 4:8, 9; 11:23-27.

17. E na kanga ni buokira te Baibara ni kaaitarai karawawatan te maiu?

¹⁷ Te kaaua, iai iroura Ana Taeka te Atua, ae te Baibara, ae “manena nakon te reirei, ao nakoni kaotan ana buakaka te aomata nako ina, ao nakoni manga-kaetana, ao nakoni kawanawanana n te raoiroi: ba e aonga ni moan te raoiroi ana aomata te Atua, ao e na kabaneaki ni kataeaki nangina nakoni makuri aika raraoi ni bane.” (2 Timoteo 3:16, 17) E aki tii ‘karaoiroira’ Ana Taeka te Atua ao ni ‘kataei nangira nakoni mwakuri aika raraoi ni kabane.’ Ma e anganira naba te kona ni kaaitarai karawawatan te maiu aei. E karikira bwa ti na “moan te raoiroi” ao ni “kabaneaki ni kataeaki” nangira. N te taetae are e moani koreaki iai te Baibara, ao te taeka ae rairaki bwa “kabaneaki ni kataeaki nangina” e bon nanona raoi “taubobonga.” E kakabonganaki te taeka aei n taai ake rimoa ibukin te booti ae taubobonga ni bwaai ni kabane aika kainnanoaki ibukin te mwananga ke te mitiin ae kona ni karaoi bwaai ni kabane ake e kaantaningaki bwa e na karaoi. N aron naba anne, e katauraoi bwaai ni kabane Iehova aika ti kainnanoi ibukin kaitaraan baika ti kona n aitara ma ngaai. Mangaia are ti a kona ngkanne ni kangai: “Ngkana e kariaia te Atua bwa N na kaaitara ma te kataaki teuana, I ataia bwa I kona n nanomwaaka iai man ana ibuobuoki.”

Kainaomatara Man Rawawatara ni Kabane

18. Tera ae ti na kaatuua iangoana riki bwa ti aonga ni buokaki ni kakaonimaki ao n nanomwaaka?

¹⁸ Te kanimaua: Teimatoa ni kaatuua iangoan te koaua ae rangi n tamaroa are, e na waekoa Iehova ni kainaomataia botannaomata man rawawata ni kabane. (Taian Areru 34:19; 37:9-11; 2 Betero 2:9) Ngkana e a tia ni koro bukin aei, e aki tii nanonaki iai kamaiuara iroun te Atua man rawawatara aika ngkai, ma ti na kakabwaiaki naba n anganaki te kona ni karekea te maiu ae aki toki, tao i karawa ma Iesu ke i aon te aonnaba ae baretaiti.

19. E na kanga ni kona n reke te kakaonimaki ao te nanomwaaka?

¹⁹ Ti na bon teimatoa ni kaaitara ma karawawatan te waaki ae buakaka aei ni karokoa te tai anne. Ai ingaingara nanora ni kariariaa te tai are a nang akea iai karawawata aikai! (Taian Areru 55:6-8) Ti bia ururingnga ae e na kakoauaki ae bon te tia kewe te Riaboro ngkana ti kakaonimaki n nanomwaaka. Ti kona ni kakorakoraki n ara tataro ao ara botaki n itaritari ae katobibia te aonnaba, ngkana ti ururinga ae a tabe naba ngkai tarira nako ni kaaitara ma kataaki aika ti kaaitarai. Teimatoa n taubobonga ao tauraoi ni kamanena raoi Ana Taeka te Atua. Tai kariaia bwa e na mamaara onimakinan te mwamwannano ae reke mairoun “te Atua ae te tia karekea kabebetean te nano.” Uringnga bwa “a memena matan Iehova i aoia akana raoiroi ni kan akoiia, ao a uki taningana nakon aia wewete.”—Taian Areru 34:15.

Ko Kona ni Kaeka?

• Tera ana namakin Tawita ni kaineti ma karawawata ake e kaaitarai?

• Tera are e kaotia te Uea ae Toromon bwa e kakoauaa raoi?

• Tera ae e kona ni buokira ni kaaitarai baike e kariaia Iehova?

[Taamnei n iteraniba 19]

E onimakina Iehova Toromon bwa e na boni buokiia Ana aomata aika karawawataki