E Kainnanoaki Te Kamaiuaki!
E KARINA n iekaki n te ran ae nakon iraua te mirion te rita, te tabo ni keni kooro i rarikin Pittsburgh, Pennsylvania, U.S.A. A bae taani keniken aika ruaman n te nangananga teuana ae uarereke ae 73 te mita nanona. Tenibong imwina a a otinako man te tabo aei ma te marurung ao akea ikoakiia. A kanga ni kamaiuaki?
Man te ibuobuoki ae reke mani mwaben te tabo ni keniken aei ao te GPS, ae te mitiin ae kaotii taabo i aantano n ana ibuobuoki te satellite. A a kena ngkanne aontano taani kamaiuia naakai, ae raababana 30 te inti ao ni karuoa rikaaki te oo ae nneia taani keni kooro ni karuoaki ao n aekaki. A aekaki taani keniken aikai, temanna imwin temanna n te oo aei, ike a a otinako iai man te tabo are a kuri ni mate iai. A oki nanoia mwaane aikai, ma ni kukurei, ao a rangi ni kakaitau ibukin kamaiuaia.
Angiia i buakora, ti na bon aki kona ni bae i aantano n aroia taani keni kooro ake ruaman akekei, ke ti na aki kaaitarai kabuanibwai aika a kona ni kamateira. Ma e ngae n anne, ti boni kainnanoa naba kamaiuara man ana urubwai te aoraki, te kara ao te mate, ae baika ti aki kona ni birinako mai iai. E taekina ae kangai te baatua ae kakaonimaki ae Iobi: “Te aomata ae bungiaki mairoun te aine, Ai ti tabe bong ana bong, ao e on n te rawawata. E oti nako n ai aron te ue, ao e koreaki: Ao e biri nako n ai aron te nu, ao e aki nene.” (Iobi 14:1, 2) Tao ai 3,500 te ririki imwin korean taeka aikai, ma e bon teimatoa naba n noraki koauana ngkai. Antai i buakora ae e kona ni birinako mani kabuanibwain te maiu aei ae te mate? N aki ongeia bwa ti maeka ia, ke tera arora ni kamarurung, ma ti boni kainnanoa naba kamaiuara man te karawawataaki, te kara ao te mate, aika a taui arora ngkai.
A a tia taan rabakau ma tabeman riki ni kataia ni kaananaua te maiu i aon riki te abwaki ae a taneiai ngkai iai aomata. E taekinna te botaki teuana bwa tiana bon “te tokanikai i aon te mate ae taui arora” ao “buokaia naba kaain te botaki aei bwa a na mwakuri ni karekea te aki mamate n rabwatan te aomata.” Ma e ngae n anne, rabakau aika boou n ikotaki ma aia kakorakora ni kan tokanikai aomata, e tuai mani kona ni kabwabwaka maiun te aomata i aon 70 ke 80 te ririki, n aron are e taekinna Mote 3,500 te ririki n nako.—Taian Areru 90:10.
E ngae ngke ko boraoi ke ko aki ma ana namakin Iobi ni kaineti ma te maiu ao te mate, ma ni waakinakon te ririki ko aki kona n tukaki mani ‘biri nakom n aron te nuu,’ nakon te tabo ae raroanako mairouia raoraom, am utu, mwengam ao am bwai. Aio bon taekan tokim ae te mate. E korea ae kangai Uean Iteraera ngkoa ae wanawana ae Toromon, “Akana maiu a bon ataiia ba a na mate: ma a bon aki ata te bwai teuana akana mate, ao bon akea riki boon aia makuri; ba e manuokaki uringaia.”—Te Minita 9:5.
Te bwai ae kananokawaki bwa te Baibara e katerea ae “e uea” te mate i aoia aomata n aron te tia tautaeka ae buakaka. Eng, a kainnanoa kamaiuaia aomata man te kaitira ni kairiribai ae te mate. (I-Rom 5:14; 1 I-Korinto 15:26) A aki kona ni karekea nakoira te inaomata taani mwakuri aika bane aroia n reireiaki ma ni kataneiaki raoi, ao n taubobonga naba aroia ma bwaai ni mwakuri. Ma e ngae n anne, e a tia Iehova ae te Atua ae te tia Karikiriki ni bairea aroni kamaiuara.
[Picture Credit Line n iteraniba 3]
Photo by Gene J. Puskar-Pool/Getty Images