Te Botaki n Itaritari ae Katiteuanaaki

I NANON 1,500 tabun te ririki, ao e a kaokoroa te natannaomata ae Iteraera Iehova ae te Atua bwa e na uouota arana. Imwina ao e a manga “mutiakinia aomata aika tiaki I-Iutaia, ni karekeia te koraki ake a na uouota arana mai buakoia.” (Mwa. 15:14) Aomata aika uouota aran Iehova bon ana tia kakoaua, aika katiteuanaaki n te iango ao n te mwakuri, n aki ongeia bwa a maeka ia. A a katiteuanaaki aomata aika uouota aran te Atua aikai, man te mwakuri are e tua karaoana Iesu nakoia taan rimwina ni kangai: “Mangaia are naako, reireinia aomata mai buakoia botannaomata nako bwa a na riki bwa taan rimwiu ao bwabetitoiia n aran te Tama, ao te Nati, ao te taamnei ae raoiroi. Ao reireinia bwa a na kakairi ni bwaai ni kabane ake I tua nakoimi.”​—Mat. 28:​19, 20.

² Ni katabuani maium nakon Iehova ao ni bwabetitoam, ko a riki iai bwa te tia rimwin Iesu Kristo. Ko a kaaina te botaki n itaritari ni Kristian ae katiteuanaaki, ake a aki kariaia kaokoron abaia, aia baronga, ke kaubwaia, bwa e na karaurenakoia. (TaiAre. 133:1) Ibukin anne, ko a tangiriia ao ni karineia kaain te ekaretia. Tabeman i buakoia bon aomata ake ko maakinia ngkoa ibukini kakaokoron aia reeti ke abaia ke aia reirei. Ko a karekea ngkai te itangitangiri n tari ae rangi ni korakora nakon reitaki riki tabeua, ake tao n am kaawa, n am Aro, ke n am utu.​—Mareko 10:​29, 30; IKoro. 3:14; 1Bet. 1:22.

KAETAN TE IANGO

³ Ngkana iai tabeman ae kangaanga irouia katokan te nano n reeti, n tautaeka, ni kaawa, ke te inanonano ae korakora, a riai n iaiangoi aroia Kristian ake I-Iutaia rimoa, ake a kaokoroia ma ana waaki n inanonano te Aro n Iutaia nakoia natannaomata nako. Ngke e tuangaki Betero bwa e na nakon ana auti te mataniwi n ana taanga ni buaka Rom, ae Korenerio, ao Iehova e katauraoa raoi Betero nakoni mwiokoana aei.​—Mwakuri, mwa. 10.

⁴ E tuangaki Betero n te miitara bwa e na tiringi ao ni kang maan tabeua aika aki itiaki i aan te tua n Iutaia. Ngke e rawa Betero, ao e a taku te bwanaa nakoina mai karawa: “Katoka atongani baike e a tia ni kaitiakii te Atua bwa a kamwara.” (Mwa. 10:15) E buokaki Betero n ana ibuobuoki te Atua aei ni kaeta ana iango imwain te mwioko are e nang anganaki, are e na kawara te mwaane ae tiaki te I-Iutaia. E ongeaba Betero n ana kairiri Iehova, ao e taku nakoia naake a ikotaki: “Kam bon ataia bwa e aki riai iroun te I-Iutaia bwa e na iraorao ke ni kawara te aomata ae kaain te reeti teuana, ma e ngae n anne e kaotia te Atua nakoiu bwa I aki riai n arana te aomata temanna bwa e kamwara ke e aki itiaki. Ai ngaia ae I roko iai, ao I aki rawa ngke I kawaekoaaki.” (Mwa. 10:​28, 29) Imwina, e a nora te bwai ni kakoaua Betero ae e boni butimwaeaki Korenerio ma ana utu iroun Iehova.

⁵ E riai n nanorinano Tauro are kaain Tareto, ae te Baritaio ae rangi ni bubura ana reirei, ao n iraorao ma aomata ake e riribaiia ngkoa. E riai naba ni butimwaea aia kairiri. (Mwa. 4:13; IKar. 1:​13-20; IBir. 3:​4-11) Ti kona n iangoa aroni kaetan aia iango Terekio Bauro, Rionutio, Tamariti, Biremon, Onetimo, ao tabeman riki, ngke a a butimwaea te rongorongo ae raoiroi ao n riki bwa taan rimwin Iesu Kristo.​—Mwa. 13:​6-12; 17:​22, 33, 34; Bire. 8-20.

KATEIMATOA KATITEUANAAKIRA NI KATOBIBIA TE AONNABA

⁶ Akea te nanououa bwa e anaaki nanom nakon Iehova ao ana botaki, man aia tangira taari n te ekaretia. Ko nora te tangira ae kanikinaeaia raoi taan rimwin Iesu Kristo ni koaua, n aron are e taku: “I anganingkami te tua ae boou, bwa kam na itangitangiri i marenami, n arou ae I tangiringkami, ao kam na itangitangiri naba. Ao ane a na ataingkami aomata ni kabane bwa bon taan rimwiu ngkami, n aei: ngkana kam itangitangiri.” (Ioa. 13:​34, 35) E a ririkirake am kakaitau ibukin Iehova ma ana botaki, n ataakin ae te tangira ae kaotiotaki n te ekaretia boni bannan raoi te tangira ae n te botaki n itaritari ae katobibia te aonnaba. Ko a nora ngkai koroni bukin te taetae ni burabeti n te Baibara, ni kaineti ma ikotakia aomata ni kabaneani boong bwa a na taromauria Iehova ma te rau ao te katiteuanaaki.​—Mika 4:​1-5.

⁷ N norani baika bati aika karika te iraraure ni boong aikai, antai ae kona n iangoia bwa a kona ni katiteuanaaki aomata aika “nako mai buakoia natannaomata ma baronga ma botannaomata ma taian taetae”? (TeKao. 7:9) Iangoa kaokoroia aomata aika kabonganai rabakau aika boou ma aomata aika teimatoa n taui katein rimoa. Nora te kaiangatoa ibukin te Aro irouia aomata aika titeboo aia reeti ao abaia. Rikiraken te nanonnaba, e a karikirakea riki ngkai te bwenaua irouia taan tautaeka. Ao ngkana ko iangoa kakaokoroni kaubwaia aomata n ikotaki ma baika kakarika te iraraure, e oti iai bwa katiteuanaakia aomata aika nako mai buakoia natannaomata, taetae, kurubu, ao koraki nako, n te bwai ni kabaebae ae matoatoa ae te tangira ao te rau, bon te kakai ae e tii kona ni karaoia te Atua ae Moan te Mwaaka.​—Tek. 4:6.

⁸ Ma bon iai te aeka ni katiteuanaaki anne, ao ko kona n riki bwa kaaina ngkana ko katabua maium ao ni bwabetitoaki bwa Ana Tia Kakoaua Iehova. Ngkai ko a kakabwaiaaki man te katiteuanaaki anne, tabem bwa ko na buoka kateimatoaana. E kona ni karaoaki anne, ni mutiakinan ana taeka te abotoro Bauro are n I-Karatia 6:10 ae kangai: “Ti na kakaraoa ae raoiroi nakoia aomata ni kabane ngkai ti anganaki ara tai, ma e a moamoa riki nakoia ake a katiteuanaaki ma ngaira n te onimaki.” Ti kakairi naba n te reirei ni kairiri aei: “Tai karaoa te bwai teuana ma te kaiangatoa ke te kainikatonga, ma kam na nanorinano n iangoia bwa a kakawaki riki tabemwaang nakoimi, ao kam na aki tii tabeakin oin aromi, ma kam na tabeakin naba aroia tabemwaang.” (IBir. 2:​3, 4) Ngkana ti kataneiaira n taraiia tarira n aron taraakia iroun Iehova, ao n aki tarai tinanikuia, ti na teimatoa iai n rau ao ni kukurei n reitakira ma ngaiia.​—IEbe. 4:​23, 24.

TI NA KAAI N TABEAKINIRA

⁹ N aron are e kaikonakia nakoira te abotoro Bauro, akea te iraraure n te ekaretia, ma a kaai n tabeakinia ni kabane i marenaia kaaina. (1Kor. 12:​14-26) E ngae ngke ti raroanako ma tarira tabeman, ma ti bon tabeakinia naba. Ngkana a bwainikirinaki tarira tabeman, ao ngaira ake nikirana ti rangi n rawawata naba iai. Ngkana iai tabeman aika kainnanoi bwaai tabeua ke a rotakibuaka n te kabuanibwai ae karina ke te buaka ke te kakiriwe i abaia, ao ngaira ake nikirana ti rangi ni kan ukeri aanga ibukini buokaia n te onimaki ao n te itera n rabwata naba.​—2Kor. 1:​8-11.

¹⁰ Ti riai ni bane n tataro ni katoabong ibukia tarira. Iai tabeman aika kaririaki nakoni karaoan ae buakaka. Iai naba aika boo ma karawawata aika tao a ataaki. Ma iai naba aika ti aki ataiia, ake a kakaitaraaki irouia raoia ni mwakuri, ao aia utu aika tiaki kaain te onimaki. (Mat. 10:​35, 36; 1Tet. 2:14) Ti tabeaianga naba iai kioina ngkai ti a kaaina te botaki n itaritari ae katobibia te aonnaba. (1Bet. 5:9) Iai i buakora aika a kakorakoraia ni beku ibukin Iehova, ni kairan te uarongorongo ao taian ekaretia. Iai naba aika mwiokoaki bwa a na tararuaa te mwakuri ni katobibia te aonnaba. A bane ni kainnanoa ara tataro, are ti a kaota iai tangiraia ao tabeakinaia ni koaua, e ngae naba ngkana ti aki kona ni buokiia n te bwai teuana.​—IEbe. 1:16; 1Tet. 1:​2, 3; 5:25.

¹¹ A riai ana aomata Iehova n tatauraoi n ibuobuoki i marenaia, ngkai e a rikirake ni mangaongao te aonnaba ni kabaneani boong aikai. N rikini kabuanibwai aika karina, n aron te mwaeiei ao te ieka, e a kainnanoaki iai te mwakuri n ibuobuoki ae bubura ao baireani baika bati aika kainnanoaki. A katea te katoto ae raoiroi Kristian ake n te moan tienture n te itera aei. N uringan ana reirei ni kairiri Iesu, a kukurei taan rimwina ake n aaba tabeua, n anga bwaai n ibuobuoki nakoia taari ake i Iutaia n tain te rongo. (Mwa. 11:​27-30; 20:35) E kaungaia I-Korinto imwina riki te abotoro Bauro bwa a na boutokaa te mwakuri n ibuobuoki are karaoaki, bwa e aonga n aki mangaongao. (2Kor. 9:​1-15) N taai aikai, ngkana a rotaki tarira ni kangaanga ao a kainnanoa te ibuobuoki, e waekoa ana botaki Iehova ao Kristian n tatabemania nako n anga aia ibuobuoki ao ni karekei baika kainnanoaki.

TI KAOKOROAKI IBUKINI KARAOAN NANON IEHOVA

¹² E baireaki ara botaki n itaritari ae katiteuanaaki ni katobibia te aonnaba ibukini karaoan nanon Iehova. Bon nanon Iehova ngkai bwa e na tataekinaki te rongorongo ae raoiroi ibukin te Tautaeka n Uea n te aonnaba ni kabutaa, bwa te bwai ni kaotioti nakoia botannaomata ni kabane. (Mat. 24:14) Ngkai ti karaoa te mwakuri aei, ao bon nanon Iehova bwa ti na maiuakin ana kaetieti aika rietata ibukin te aroaro ni maiu ae riai. (1Bet. 1:​14-16) Ti riai n tauraoi n aantaeka i marenara ao ni kabutaanako te rongorongo ae raoiroi. (IEbe. 5:21) Bon tiaki ngkai te tai n ukeri baika ti tangiri, ma te tai ni moanibwaia Ana Tautaeka n Uea te Atua ni maiura. (Mat. 6:33) Ururingan aei ni karaoan ara beku ibukin te rongorongo ae raoiroi, e karekea nakoira ngkai te kimwareirei ao te raunnano, ao e na kairira nakoni kakabwaia aika akea tokia.

¹³ Ngkai Ana Tia Kakoaua Iehova ngaira, ti a tei n okoro, ao ti kaokoroaki mai buakoia botannaomata nako, kioina ngkai ti itiaki ao ti ingainga n ara beku ibukin Atuara. (Tit. 2:14) Ti kaokoro man arora n taromauria Iehova. Ti aki tii katiteuanaaki ni mwakuri ma tarira ni katobibia te aonnaba, ma ti kabongana naba te taetae ae tii teuana ae te koaua, ao ti maiuakina naba te koaua ae ti tataekinna. E a kaman taekinaki aei ngke e taetae Iehova rinanon ana burabeti are Tebania ni kangai: “N na bita aia taetae botannaomata nakon te taetae ae itiaki, bwa a aonga n taboa aran Iehova, ao n taromauria ma te katiteuanaaki.”​—Teb. 3:9.

¹⁴ Imwina e a kaira Tebania Iehova bwa e na kabwarabwaraa te botaki n itaritari ae e a noraki ni boong aikai, ni kangai: “A na aki kakaraoa ae buakaka nikiraia tibun Iteraera. A na aki taekina te kewe ao e na aki naba kuneaki te newe ae mwamwanaa te aba i wia. A na amwarake ao ni wene, ao akea temanna ae e na kakamaakuia.” (Teb. 3:13) Ti a beku ma te katiteuanaaki, ngkai ti a ota n te koaua ae n Ana Taeka Iehova, ao ti kabotoi ara iango iai, ma ni kaboraoi maiura ma ana kaetieti Iehova. Ti kakororaoa te bae e taraa ni kangaanga rekena, n te taratara n aomata. Eng bon aomata ngaira aika ti kaokoro, aika ana aomata te Atua aika karekea neboana n te aonnaba ni kabutaa.​—Mika 2:12.