Aron Reiakinaia Ataei Taekan te Atua​—Baikara Aanga Aika Nakoraoi Riki?

“A na mena i nanom taeka aikai, aika I tuangko n te bong aei: ao ko na [“okioki n,” NW] reireiia raoi natim n aikai, ma n taekin ngkana ko tekateka i nanon am auti, ao n nakonakom i nanon te kawai, ao ni wenem, ao n teirakem.”​—TE TUA-KAUA 6:6, 7, BG.

N TABETAI a kona n namakina te bwarannano kaaro n tabeia are a na anga te reirei ni kataneiai nakoia natiia. Tao a kona kaaro ni kamangaoaki aia iango rinanon iango aika kakaokoro ake a ongoraei ke ni wareki, ngkana a kakaaei buokaia. A aki toki kaain utu ao raoraoia kaaro ni waekoa n anga aia reirei n ibuobuoki. Ao a teimatoa naba ni karekei taeka n reirei mani booki, maekatin, ao kaongora man te Internet ae n tabetai a boni kauntaba.

N te itera are teuana, e katauraoaki n te Baibara tiaki tii te reirei ni kairiri ae manena ibukini baika a na reiakinia iai natiia kaaro, ma bon reirei naba aika uaana ibukin aroia n reireinia natiia. N aron ae e oti mai eta ni kibun te Baibara, a kainnanoaki kaaro bwa a na kakaaei aanga tabeua ni katoabong ni maroroakina iai taekan te Atua ma natiia. E kabwarabwaraaki mai nano tii aua reirei n ibuobuoki aika boto i aon te Baibara, ake a a tia ni buokaki iai nga ma nga kaaro n reiakinia natiia taekan te Atua.

1. Reiakinia natim baike a kona n reiakin man te karikibwai. E korea ae kangai te abotoro Bauro: “A teretere raoi [aroaron te Atua] aika aki nonoraki mani moani karikan te aonnaba ni karokoa ngkai, bwa a noraki ni baika karikaki. E teretere raoi iai bwa bon te Atua ngaia, ao e noraki naba iai mwaakana n aki totoki.” (I-Rom 1:20) A kona kaaro ni karaoa ae bati riki ni buokia natiia n ota n ae a kona ni karekea aia itoman ma te Atua rinanon iaiangoan ana mwakuri ni karikibwai, ao n nora aroarona aika kaotaki n ana karikibwai akanne.

E kamanena te anga aei Iesu ngke e reireinia taan rimwina. N te katoto, e taku: “Taraiia raoi mannikiba i annang, bwa a aki ununiki ke n tai, ke n rikoi uaan arokaia nakon auti ni kaikobwai. Ma e ngae n anne, e kakaamwarakeia Tamami are i karawa. Tiaki kam kakawaki riki nakoia?” (Mataio 6:26) E katuruturua ikai Iesu aroaron Iehova ae te tangira ao te atataiaomata. Ma e bati riki ae karaoia. E buokia naba taan rimwina bwa a na iangoa aron te Atua ni kaotiotii aroaro akanne nakoia natina.

E taekina wanawanan te Atua are e angan te kinnongo te Uea ae wanawana ae Toromon, ao e kabonganai maan aika uarereke aikai ni katereterea iai te reirei ae kakawaki. E korea ae kangai: “Ko na nako n te kinongo, ngkoe ae te tia taningaroti; Taratarai arona, ao ko na wanawana; Akea ana toka, Ao akea naba te tia teinna, ao akea mataniwina, Ma e karikoa naba ana amarake n te moanibong, Ao e kaiko kanana n te tai.” (Taeka N Rabakau 6:6-8, BG) E katekenano te aeka n angareirei ae e reiakinaki iai kakawakin uaiakinan tiia aika manena ao ni manga kamanena korakorara are mairoun te Atua ni kakororaoi!

A kona kaaro ni kakairi n aia angareirei ae uaana Iesu ao Toromon ni karaoani baikai: (1) N titirakinaia natiia bwa baikara aroka ao maan aika anaaki riki iai nanoia. (2) Kabatiaan reiakinan riki taekan aroka ao maan akanne. (3) Reiakinaia bwa a na karekei reireiaia ibukin te Atua mani karikibwai akanne.

2. Kakairi n aroaron Iesu nakoia te koraki ake e reireinia. E taekini baika a rangi ni kakawaki riki Iesu mai buakoia aomata ni kabane ake a tia ni maiu i aon te aonnaba. Ma e ngae n anne, e kabanea ana tai ae bati riki n tititiraki. E rangi n tabeakin riki aia iango ao aia namakin koraki ake e reireinia. (Mataio 17:24, 25; Mareko 8:27-29) N aron anne, a bati naba reirei aika kakawaki ake a riai kaaro n reiakinia iai natiia. A riai kaaro ni kakairi iroun Iesu ao ni kaungaia natiia bwa a na kaota raoi aia namakin, ngkana a tangiria bwa e na uaana aia angareirei.

Tera aroia ataei ake a kaotiota te aroaro ae e aki riai ke n iremwe n iangoi reireiaia tabeua aika kakawaki? Iangoa aron Iesu n reiakinia ana abotoro. N tabetai e korakora aia kakauntaeka i marenaia ao n iremwe naba n iangoa te ibuobuoki are e reke n te nanorinano. Ma e teimatoa Iesu n taotaona nanona ao n okioki n taekina kainnanoan te nanorinano. (Mareko 9:33, 34; Ruka 9:46-48; 22:24, 25) A taotaona naba nanoia kaaro ake a kakairi iroun Iesu ni kaetietaia natiia, ao ni kaokioki reirei aika titeboo ngkana e kainnanoaki ni karokoa ae a boni mataata raoi natiia ni kakawakina.a

3. Reireinia rinanon am katoto. A karaoa ae raoiroi kaaro ngkana a kakauongo nakon te reirei ni kairiri are e anga te abotoro Bauro nakoia Kristian ake a maeka i Rom. E koroboki nakoia ni kangai: “Ngkoe ae ko reireinia aomata, ko bon reireiniko moa? Ngkoe ae ko tataekina ae kangai, ‘Ko na tai iraa,’ ko iraa?”​—I-Rom 2:21.

E rangi ni kakawaki te taeka n reirei anne ibukina bwa a kai anaaki riki nanoia ataei ni baika a karaoi kaaro nakon are a taekin. Ni koauana, ngkana a karaoi baike a reiakinia iai natiia kaaro, a bae ataei ni butimwaei baike a reiakin mairouia aia kaaro.

4. Moana reiakinan te teei mangke e uarereke. E karekea taekana ae moan te raoiroi raon te abotoro Bauro ni mitinare n ana aono are Timoteo. (Mwakuri 16:1, 2) Bukina teuana ngkai e riki anne, bwa e a kaman reiakinaki taekan “te koroboki ae tabu mangke te merimeri.” A aki tii wareka te Koroboki ae Tabu tinan Timoteo ao tibuna nakoina, ma a buokia naba bwa e na iaiangoi koaua ake a koreaki i nanona.​—2 Timoteo 1:5; 3:14, 15.

Te Tabo Are Ko Kona ni Kunea Iai Buokam

A karaoi booki aika rangi ni bati Ana Tia Kakoaua Iehova ibukini buokaia kaaro n reiakinia natiia te koaua ibukin te Atua. A karaoaki tabeua ibukini buokaia ataei moarara riki ataei aika uarereke. Ake tabeua a kona ni buokaki iai kaaro ao natiia aika rooro n rikirake bwa a na kateimatoa aia itoman i marenaia.b

Ni koauana, a bon riai moa kaaro n atai kaekaan titiraki tabeua aika kangaanga ake a kona n tabeki natiia, imwain ae a reireinia natiia taekan te Atua. N te katoto, tera arom ni kaekai titiraki ae aron aikai: E aera ngkai e a aki katoka te rawawata te Atua? Tera ana kantaninga te Atua ibukin te aonnaba? A mena ia maate? A kukurei Ana Tia Kakoaua Iehova ni buokiko ni kaekai titiraki akanne, ao tabeua riki n te aro bwa ko na kona ngkoe ao am utu ni kaaningkami riki ma te Atua.​—Iakobo 4:8.

[Kabwarabwara ae nano]