Karekea Reireiam Man Ana Taeka Te Atua
A a Kaman Taekinaki Kanoan Taai Aika A na Roko n te Baibara?
Iai i nanon te kaongora aei, titiraki aika tao ko a tia n tabeki ao a kaotaki naba kaekaaia n am Baibara. A kukurei Ana Tia Kakoaua Iehova ni maroroakini kaekaaia ma ngkoe.
1. A koaua taetae ni burabeti aika n te Baibara?
Bon tii te Atua ae Moan te Mwaaka ae kona n taekini kanoan taai aika a na roko n te aro ae mataata raoi. (Amota 3:7) N te katoto, e a kaman taekinaki rimoa rokon teuare e aranaki bwa te Mesia, ke te Kristo. E na riki te mwaane are kakaonimaki ae Aberaam bwa ana bakatibu te Mesia. E na riki bwa te tia tautaeka i aoia aomata aika ongeaba, are e na manga kaoka te kakabwaia ae te maiu n aki toki are ai akea iai te aoraki. (Karikani Bwaai 22:18; Itaia 53:4, 5) E na roko Teuare Beritanaki mai Betereem.—Wareka Mika 5:2.
E kaotaraea raoi Iesu bwa boni ngaia te Mesia. E a kaman taekinaki mai mwaina n te Baibara itiua tabun te tienture n nako, bwa e na bungiaki te Mesia iroun te teinnaine ao e na ribaaki. E na anga naba maiuna ibukin aia bure aomata aika bati, ao e na taunaki i rarikia kaubwai. (Itaia 7:14; 53:3, 9, 12) E a kaman taekinaki mai imwaina n te Baibara nimaua tabun te tienture n nako bwa e na rin i Ierutarem i aon te aati, ao e na kamwaneaki n 30 te mwakoro n tirewa. A bane ni koro bukin baike a taekinaki.—Wareka Tekaria 9:9; 11:12.
2. E a kaman taekin rikini bwaai te Atua?
E taetae ni burabetinaki mai imwaina n te Baibara nimaua tabun te tienture n nako, bwa e na kaoti Iesu bwa te Mesia. E katautauaki te tai anne, ni karokoa kaotina ni wiki aika ririki, ae titeboo te “wiki” ma itiua te ririki. E kangai kabwarabwaraana: 7 n ikotaki ma 62 te wiki, e reke iai 69 te wiki aika ririki. Titeboo anne ma 483 te ririki. A moa man ningai ririki akanne? N aron ae taekinaki n te Baibara, e moa te tai anne man rokon ana toro te Atua are Neemia i Ierutarem ao ni manga katea te kaawa anne. E kaotaki te bong are a moanaki iai anne bwa 455 B.C.E. n rongorongon te aba ae Botia rimoa. (Neemia 2:1-5) E bwabetitoaki raoi Iesu bwa te Mesia 483 te ririki imwina, n 29 C.E.—Wareka Taniera 9:25, BG.
3. A a moanna ngkai ni koro bukin taetae ni burabeti aika n te Baibara?
E taetae ni burabetini baika kakawaki Iesu, aika a na riki n ara tai aikai. E taetae ni burabetina te rongorongo ae raoiroi ibukin Ana Tautaeka n Uea te Atua are e na kabebeteia aomata ake a tangira te Atua ni kabutaa aonnaba. E na kamauna te waaki ae buakaka ae ngkai i aon te aba te Tautaeka n Uea aei.—Wareka Mataio 24:14, 21, 22.
E kabwarabwaraaki raoi tokin te waaki ae ngkai i aon te aba n taetae ni burabeti aika n te Baibara. E kaotaraeaki n te Baibara bwa a na urua aon te aba aomata ni kaitaraan te rikirake ae kantaningaaki. A na riki karawawata man taiani buaka, roongo, mwaeiei ao aoraki aika ewewe ake a ituia aomata aika bati. (Ruka 21:11; Te Kaotioti 11:18) E nang akea te aroaro ni maiu ae riai. A na tataekina te rongorongo ae raoiroi ibukin Ana Tautaeka n Uea te Atua taan rimwin Iesu, nakoia botannaomata nako n taai aika kangaanga aikai.—Wareka Mataio 24:3, 7, 8; 2 Timoteo 3:1-5.
4. Tera kanoan taai aika a na roko ibukia botannaomata?
A bati baika a raraoi ake e katauraoi te Atua ae Moan te Mwaaka ibukia aomata aika kakaonimaki. A na tautaekana te aba mai karawa Iesu Kristo ae te Mesia ma ake a rineaki. A na kaaina te Tautaeka n Uea ao n tautaeka i nanon tenga te ririki. A na kautaki maate ike a nang anganaki aia tai ni motikaki taekaia ibukini karekean te maiu n aki toki. Irarikin anne, e na katoki aorakia aomata ni kabane te Tautaeka n Uea aei. A nang akea te aoraki ma te mate.—Wareka Te Kaotioti 5:10; 20:6, 12; 21:4, 5.
Ibukin rongorongona riki tabeua, nora iteraniba 23-25 ao 197-201 n te Tera Ana Reirei ni Koaua te Baibara? boki ae kaotaki aei.