E Bia Reke Buokam Mani Kaotani Kaokoron Iango Aika Uoua ni Kabotauaia

Ko aki kakoauaa ae Iesu bon te tia Reirei ae te kabanea ni kakannato are e a tia ni maiu i aon te aba? Ko bae n tia ni kakairi n arona n angareirei tabeua, tao n arona ni kamanenai titiraki ao kaikonaki. Ma ko a tia n iaiangoia ae n angiin te tai, e kamanena n ana angareirei kaotani kaokoron iango aika uoua ni kabotauaia?

A bati aomata aika kakaraoa naba anne ngkana a taetae. Ko bae n tia naba ni karaoa anne n akea iangoana iroum. Tao ko taekina ae aron aei, “A taku bwa a a bane n tawaa uaanikai, ma a bon rangi ni matoatoa naba aikai.” Ke “Bon te ataei ae rangi ni maamaa ngkoa, ma ngkai e a rangi ni bobo ma aomata.”

Ni karaoan anne, ko taekina moa te koaua ke te iango, ao imwina ko a manga kaota kaokoroia ni kamanenaan te toma n taeka ae ma, ma e ngae n anne, n oneani mwin anne ke n te itera teuana. Ke ko kona ni karaoa naba anne n taekina koauan te rongorongo ke ni kamatoaa riki te iango iai. E boni kan ngkana ko taetae n aron anne, ao a kona ni buokaki iai aomata n ota n te bwai ae ko taekinna.

E ngae naba ngkana e aki bati ni kamanenaaki te aro n taetae aei n aaba ke n taetae tabeua, ma ti riai n ataia bwa e rangi ni kakawaki. Bukin tera? Ibukina bwa a bati aaro n taetae akanne aika ti nori n Ana Taeka te Atua ae kairaki koreana. E kamanena naba te aro n taetae aei Iesu n angiin te tai n aron aikai: “A kauraa te taura aomata ao a aki katikua i aan te bwaene, ma a katokaa i aon te kaintaura.” ‘I aki roko ni kamauna [te Tua] ma I roko bwa N na kakoroa bukina.’ “Kam ongo bwa e taekinaki ae kangai: ‘Ko na tai wene ni kimoa.’ Ma I taku nakoimi bwa ane teimatoa n tarataraa te aine . . . ” “E taekinaki ae kangai: ‘Te mata boona te mata ao te wi boona te wi.’ Ma I taku nakoimi: Tai kaitaraa te aomata ae buakaka, ma ngkana iai ae orea tabam are te atai, ao ko na anganna naba tabam are teuana.”—Mataio 5:15, 17, 27, 28, 38, 39.

Iai naba aaro n taetae aikai ni bokin te Baibara ake tabeua riki. A kona ni buokiko bwa ko na ota n te bwai ae taekinaki ke a katuruturua te aro ae raoiroi riki nakon are e moan taekinaki. Ngkana te karo ngkoe, iaiangoa te kaokoro aio: “Ngkami aika taama, kam na tai kaunia natimi, ma kam na kaikawaiia i nanon ana reirei ni kaetieti Iehova, ao ni kaboraoi aia iango ma ana iango.” (I-Ebeto 6:4) E a tia te abotoro Bauro ni koreia bwa e riai te karo (ke te tina) ni kaikawaa natina man ana reirei ni kaetieti te Atua ae wanawana ao ni koaua. Ma e boni mataata raoi te iango ni kamanenaan kaokoron ae ‘aki kaunia, ma kaikawaaia ni kaboraoan aia iango ma ana iango Iehova.’

E korea ae kangai Bauro n te mwakoro naba anne imwina riki: “Ti aki kaunrabwata ma te iriko ao te raraa ma ti kaunrabwata ma . . . taamnei aika buakaka i karawa.” (I-Ebeto 6:12) E kona kaotani kaokoron anne ni buokiko bwa ko na ota raoi n te iango ae ko kakorakorako ni kaunrabwata ti aki tii ma aomata ma ngaia taamnei aika bubuaka naba.

KAKABWAIA MANI KABONGANANI KAOTANI KAOKORON IANGO AIKA UOUA NI KABOTAUAIA

Ni bokin te Baibara naba ae I-Ebeto, ko kona n nori kiibu riki aika bati are e kamanena iai te aro n taetae aei Bauro. Ngkana ti iaiangoi kiibu aikai, ti na buokaki iai n ota n te bwai ae taekinna Bauro ao ni kona n ota raoi riki n te bwai ae ti riai ni karaoia.

Ko na bae n namakina te kukurei ao n noria bwa e manena iaiangoan te taibora ae n te kaongora aei ibukini kaotani kaokoron iango aika uoua ni kabotauaia n I-Ebeto mwakoro 4 ao 5. Ngkana ko wareki aaro n taetae aikai, iangoa iai aroni maium. Titirakiniko ni kangai: ‘Tera raoi aroarou? Tera au iango n aei ke n te bwai ae riki ae titeboo ma aei? Te itera raa are a na kabotauai iai aomata?’ Ngkana ko a ataia bwa kaotani kaokoron te bwai teuana e kairiko bwa ko na ataa te itera ae ko riai ni mwakuria, kataia ni karaoa anne. E bia reke buokam mani kaotani kaokoron iango aika uoua ni kabotauaia anne.

Ke ko kona ni kamanena te taibora anne bwa kanoan am taromauri n utu. Te moan, a kona kaain am utu ni kabane ni wareki kaokoron iango aika uoua ni kabotauaia. Imwina, e kona temanna mai buakomi n taekina te moan itera ike e a reke iai aia tai ake tabeman n am utu bwa a na kataia n uringa te reirei ae katuruturuaki n te kauoua n itera. E kona anne ni karekea te maroro n te utu ae kakukurei ni kaineti ma aromi ni maiuakina are te kauoua n itera. Eng, ngkana kam nenera kaokoron iango aika uoua ni kabotauaia, a a kona ni buokaki iai rooro n rikirake ao kaara bwa a na uaiakin aroaro ni Kristian i nanon te utu ao n taabo riki tabeua.

Ngkana ko a ataa riki kakawakini kaotani kaokoron iango aika uoua ni kabotauaia, ane ko na rangi ni mwaatai ni kinai n te Baibara ao n ataia naba bwa a ibuobuoki riki n am mwakuri ni minita. N te katoto, ko kona ni kangai nakoia kaain te auti: “A bati aomata aika taku bwai iai te taamnei ae aki mamate i nanoia aomata, ma e ngae n anne nora ae taekinaki n Ana Taeka te Atua ikai.” Ke ngkana ko reirei ma temanna n te Baibara ko kona n titiraki ni kangai: “A kakoauaa angiia aomata n te tabo aei bwa te Atua ao Iesu bon te aomata ae tii temanna, ma e ngae n anne tera ae ti warekia n te Baibara? Ao tera ae ko kakoauaa?”

Eng, e kaotaki n te Baibara kaokoron iango aika uoua ni kabotauaia aika manena ao ni bati, ake a na buokira n nakonako ni kawain te Atua. Ao ti kona ni kamanenai ni buokiia iai aomata bwa a na ataa ana koaua te Baibara.

Kiibu Tabeua n I- Ebeto Mwakoro 4 ao 5 Ake a Kaota Kaokoron Iango Aika Uoua ni Kabotauaia

Kataia ni kamanena te taibora aei n am taromauri n utu!

Ti “aki . . . katiotioaki . . . man aia nanowanawana aomata ae bureburea te aba, ao keewe aika oteaki ibukini kairaia aomata nakon te kairua.”—4:14.

“Ma ngkai ti tataekina te koaua, ti na rikirake n ikawai ni bwaai ni kabane i nanon teuare te atu are Kristo.”—4:15.

“A roo nanoia [natannaomata], . . . ibukina bwa a ronnano ao a matoatoa nanoia.”—4:18, 19.

“Ma tiaki anne aron te Kristo are kam reireinaki, ngkana ngaia bwa kam a tia n ongora ma n reireinaki irouna.”—4:20, 21.

“You should put away the old personality which conforms to your former course of conduct.”—4:22.

“But . . . you should be made new in the force actuating your mind, and should put on the new personality.”—4:23, 24.

“Ke e tai manga iraa te tia iraa.”—4:28.

“Ma ke e mwakuri korakora ni karaoa te mwakuri ae raoiroi ni baina.”—4:28.

“E na tai otinako te taeka ae buakaka mai wimi.”—4:29.

“Ma a na raraoi ami taeka nako ibukini kateimatoaan te aba.”—4:29.

“Kam na kaaki te riribai ae korakora ma te marakinnano ma te un ma te takakaa ma te tinaraa, n ikotaki ma te buakaka ni kabanea.”—4:31.

“Ma kam na iakoakoi i marenami, n atataiaomata ao n tauraoi n ikabwarabure.”—4:32.

“E na aki taekinaki i buakomi te wene ni bure ma te kamwara n aekana nako, ke te nanonrang.”—5:3.

“Ma e raoiroi riki te katituaraoi.”—5:4.

“Kam rotongitong ngkoa.”—5:8.

“Ma kam a oota ngkai ibukina bwa ana bwai te Uea ngkami.”—5:8.

“Tai manga ibuokanibwai ma ngaiia ni mwakuri aika akea uaaia aika bwain te rotongitong.”—5:11.

“Ma n oneani mwin anne, kam na kaotii buakakani baikanne.”—5:11.

“Mangaia ae taratarai raoi aromi n nakonako, bwa kam na aki nakonako bwa aomata aika nanobaba.”—5:15.

“Ma kam na nakonako bwa aomata aika wanawana, ni kabonganai raoi ami tai ni kabane.”—5:15, 16.

“Mangaia ae kam na aki nanobaba.”—5:17.

“Ma kam na ataa nanon Iehova.”—5:17.

“Tai koro ni manging n te wain, ike e mena iai te kaibwabwaru.”—5:18.

“Ma kam na teimatoa ni kaonaki n te taamnei.”—5:18.

“N te aro bwa e na anga [Kristo] te ekaretia bon nakoina, ae te ekaretia ae tamaroa, ae akea baarekana ke bwarukurukuna, ke baika ai aroni baikai.”—5:27.

“Ma e riai n itiaki ao n akea waewaeana.”—5:27.

“Akea te aomata ae ribaa oin rabwatana.”—5:29.

“Ma e wantongaia ma n nabeia, n aron naba ae e karaoia te Kristo nakon te ekaretia.”—5:29.