E Kona Ni Kabebeteko Te Atua

BUKIN NANOKOKORAKIA TABEMAN: E ngae ngkana a rangi ni kainnanoa kabebetean nanoia aomata tabeman, ma a bon namakinna naba bwa a tii iangoia i bon irouia ngkana a bubutiia te Atua bwa a na tokanikai i aon aia kangaanga. E taku Nei Raquel: “Ngkana I nori mwaitiia aomata aika rangi ni bati n te aonnaba ao kangaanga aika kakaiaki ake a a aitara ma ngaai, e taraa n akea uaan tabeaiangau ngkai I baenikai ni butiia te Atua ana ibuobuoki.”

TE REIREI MAN ANA TAEKA TE ATUA: E a kaman ibuobuoki te Atua n te aro ae kamimi ao e kabebeteia aomata. Ni boong aikai, ao bon rikiaia aomata ni kabane te bure, ae kabwakaia ae wenemaan ni kaineti ma maiuakinan ana tua te Atua aika kororaoi. Ma e ngae n anne, “e tangirira te Atua ao e kanakoa Natina [are Iesu Kristo] bwa te kareanraoi ibukin ara bure.” (1 Ioane 4:10, kabwarabwara mai nano) E karekea te anga te Atua ibukini kabwaraan ara bure rinanoni kareanakini maiun Iesu, mataniwin nanora ae itiaki ao kantaningaan te maiu ae aki toki n te waaki ae boou i aon te aba ike e mena iai te rau.a Ma e koaua bwa te angakarea anne bon tii ibukia botannaomata ni kabane ke e kaotiotaki iai ae e tabeakiniko te Atua?

Iangoa te abotoro Bauro. E kaungaaki nanona n ana angakarea Iesu ao e korea ae kangai: “I maiu . . . n te onimaki ni kaineti ma Natin te Atua, are e tangirai ao e anga ngaia ibukiu.” (I-Karatia 2:20) Ni koauana, e boni mate naba Iesu imwain rikini Bauro bwa te Kristian. Ma e ngae n anne, e bon iangoa te angakarea anne bwa ana bwaintituaraoi te Atua ibukina.

Bon ana bwaintituaraoi te Atua nakoim naba kareanakini maiun Iesu. E kakoauaaki n te bwaintituaraoi anne bwa ko rangi ni kakawaki iroun te Atua. E kona ni karekea nakoim “te kabebeteaki n aki toki ma te kantaninga ae raoiroi” ao man anne, ‘ko a kateimatoaaki iai ni mwakuri nako aika raraoi ma taeka aika raraoi.’—2 I-Tetaronike 2:16, 17.

Ma e anga maiuna Iesu bwa te karea tao e kaania 2,000 te ririki n nako. Tera te bwai ni kakoaua ibukin aron te Atua ni kani karekea ana iraorao ma ngkoe ni boong aikai?