ATUN TE MAEKATIN | E NA REKE IA KABEBETEAN NANOM?
Kabebetean Te Nano N Tain Te Kangaanga
A bati aeka ni kangaanga nako. Ti bon aki kona n taekin aeka ni kangaanga nako ikai, ma ti na nori ngkai katoto aika aua ake ti a tia n taekin. Nora aroia aomata ni kaaitarai kangaanga aika rangi ni kaokoro ake a bon reke kabebeteaia ni koaua iroun te Atua.
NGKANA KO KAAITARA MA AKEAN TE MWAKURI NI KAREKETIANTI
“E reke reireiau bwa N na butimwaei aeka ni mwakuri nako, ao ti a katoki ara kabanemwane aika aki kainnanoaki.”—Jonathan
E ururing Setha ni kangai: “A bua ara mwakuri ngai ma kaainnabau n te tai ae tii teuana. Ti mamaiu i nanon uoua te ririki n te mwane ae rereke nakoia utu aika maiu ni kainnano, ao man taiani mwakuri aika aki teimaan. Ibukin anne ao e a rotaki n te rawawatannano iai buu ae Nei Priscilla, ao I a namakinna bwa ai akea uaau.
“Ti kangaa ni kekeiaki ribuakon anne? E aki toki Priscilla ni kauringnga i bon irouna ana taeka Iesu ake ni Mataio 6:34. E taku iai Iesu bwa ti riai n aki iango n raraoma ibukin ningabong, kioina ngkai e bon tannako te bong ma kararaomana. Ao e kakorakoraaki bwa e na teimatoa ni waaki nako man ana tataro ae nako raoi mai nanona. E reke ngai kabebeteau n Taian Areru 55:22. I kaaki rawawatau i aon Iehova n aron te tia areru, ao I noria bwa e boni kateimatoaai. E ngae ngke e a reke ngkai au mwakuri, ma ti teimatoa ni kabebetea maiura ni kaineti ma ana taeka n reirei Iesu are ni Mataio 6:20-22. Ao ae kakawaki riki, ti a kaaniaki riki ma te Atua ao ti a kaan naba bon i marenara.”
E kaotia ni kangai Jonathan: “I tabeaianga ibukin taai aika imwaira ngke e a ruuti ara karikirake ae uarereke n ara utu. Ibukin rikiraken te kangaanga ibukin te mwane, ao ai akea uaan ara mwakuri korakora i nanon 20 te ririki. Ti a moanna ni kakauntaeka ibukin te mwane ngai ma kaainnabau. Ti aikoa kona ni kabongana ara credit card, bwa e a tei nangin ae e nang aki butimwaeaki ara boobwai iroun te kambwana n taarau.
“Ma e buokira ana Taeka te Atua ao taamneina bwa ti na karaoi motinnano aika raraoi. E reke reireiau bwa N na butimwaei aeka ni mwakuri nako, ao ti a katoki ara kabanemwane aika aki kainnanoaki. Ngkai Ana tia Kakoaua Iehova ngaira, ti boni boutokaaki naba irouia raao n te onimaki. A kakorakoraira bwa ti na onimakinira i bon iroura ao a anga baia n ibuobuoki n taai ake ti rangi n rotakibuaka iai.”
NGKANA E A URUAKI TE MARE
E ururing ni kangai Raquel: “I namakina te maraki ma te un ngke e rina ni kitanai buu. Ao I a rangi n taonaki n te nanokawaki. Ma I kaania te Atua ao e a kabebeteai. E kabebetea nanou ana rau te Atua ngkana I tataro nakoina ni katoabong. Irou e taraa n ae e a katoka uruakin nanou.
“Ao I kakaitau n ana Taeka ae te Baibara, bwa I a tokanikai iai i aon namakinan te un ma te marakinnano. I taua i nanou ana taeka te abotoro Bauro n I-Rom 12:21 ae kangai: ‘Tai kariaia konaakim n te buakaka, ma teimatoa ni kataenikaia te buakaka n te raoiroi.’
“Iai te tai ae ti a riai iai n ‘iangoa te bwai teuana bwa e a boni bua.’ . . . A a manga reke ngkai tiau aika boou ni maiuu.”—Raquel
“E buokai raoraou temanna ae rabakau bwa N na ataia bwa I a riai ni waaki nako. E kaota nakoiu Te Minita 3:6 ao e tuangai ma te akoi bwa iai te tai ae ti a riai iai n ‘iangoa te bwai teuana bwa e a boni bua.’ E matoa te taeka n reirei aei, ma bon aei ae I kainnanoia. A a manga reke ngkai tiau aika boou ni maiuu.”
E taku Elizabeth: “Ko kainnanoa te boutoka ngkana e a uruaki am mare. Iai raoraou ae e anganai te aeka ni boutoka anne n te bong teuana ma teuana. E tang ma ngai, e kabebeteai, ike I a namakina iai ae I tangiraki ao I aki katinanikuaki. I kakoauaa bwa e boni kabonganaaki neiei iroun Iehova bwa e na kabebetea nanou.”
N TAIN TE AORAKI KE TE KARA
“I a namakina taamnein te Atua bwa e kakorakoraai imwin au tataro nakoina.”—Luis
Luis are taekinaki ni moan te kaongora ae rereitaki aei, bon iai aorakini buroona ae kakaiaki ao e a tia ni kuri ni mate uatai. E a riai ngkai n anganaki te oxygen 16 te aoa n tebongina. E taku: “I tatataro nakon Iehova, ao I a namakina taamnein te Atua bwa e kakorakoraai imwin au tataro nakoina. E anganai te korakora te tataro bwa N na teimatoa ni waaki nako, ibukina bwa I onimakinna ao I ataia bwa e bon tabeakinai.”
E kabwarabwara ni kangai Nei Petra ae ai 80 tabun ana ririki: “I kani karaoi baika bati ma I a bon aki kona. E rangi ni kangaanga irou tataraakini kerikaakini korakorau. I namakina te korakai ao I a riai ni maiu ma te bwainnaoraki. I aki toki n iangoa aron Iesu ni butiia Tamana bwa e na kararoaa te kangaanga teuana mairouna ngkana e kona.” Ma e kakorakoraaki Iesu iroun Iehova, ao e kakorakoraai naba. Bon au bwainnaoraki te tataro ni katoabong. I namakina ae I a kabebeteaki riki imwin au taetaenikawai nakon te Atua.”—Mataio 26:39.
E namakina naba anne Julian ae kabokorakora ma te aoraki ae bati mwangangana ae te sclerosis n te maan ae kaania 30 te ririki. E taku teuaei: “I a tia ni mwaing man ana kaintekateka te manatia nakon ana kaintekateka te mwauku ae kokokaki. Ma e manena maiuu ibukina bwa I beku ibukia tabemwaang. E kona ni bebete riki te rawawata n te anganga, ao e boni kakakoroa bukin ana berita Iehova ae e na kakorakoraira n ara tai ni kainnano. I a kona raoi ni kangai n aron te abotoro Bauro: ‘I konai bwaai ni kabane ni karaoi iroun teuare anganai te korakora.’”—I-Biribi 4:13.
NI MATEN TEMANNA
E ururing ni kangai Antonio: “Ngke e mate tamau n te kabuanibwai n te kawai, ao I aki moa kakoauaa. E bon rangi n taraa n aki riai bwa e bon aki urua tuan te kawai ngke e rianna. Ma bon akea te bae I kona ni karaoia. E aki namakinaaba i nanon nimabong imwaini matena. I kakaina tangiu i matan tinau ma e a otinako tangiu ngke ai tii ngai. I teimatoa n titirakinai i bon irou ni kangai ‘Bukin tera? Bukin tera?’
“I nanoni boong akana karawawata akanne, ao I teimatoa ni butiia Iehova bwa e na buokai n taotaona nanokawakiu ao n anganai te rau. Ao I a tabe n namakina te rau teutana imwin teutana. I uringa are e kabwarabwaraa te Baibara bwa a kona n riki “baika aki kantaningaaki” nakon temanna ma temanna i buakora. Kioina ngkai e aki kona ni kewe te Atua, I kakoauaa bwa N na manga bon nora tamau n te mangauti.”—Te Minita 9:11; Ioane 11:25; Tito 1:2.
“E ngae ngke e bua maiun natira te mwaane ni kuratin te wanikiba, ma ti teimatoa n ururingi taai aika bati aika kakukurei ake ti kaai n ikotaki iai.”—Robert
E iangoa naba anne Robert are taekinaki n te moani kaongora. E taku teuaei: “Ti namakina te raunnano ngai ma buu are taekinaki n I-Biribi 4:6, 7. E roko iroura rinanon ara tataro nakon Iehova. E kakorakoraira te raunnano aei bwa ti na kona n taetae nakoia taani kareke rongorongo ibukin ara kantaninga ae taekan te mangauti. E ngae ngke e bua maiun natira te mwaane ni kuratin te wanikiba, ma ti teimatoa n ururingi taai aika bati aika kakukurei ake ti kaai n ikotaki iai, ao ti kataia n ururingi riki.
“Ngke a tuangira kaain ara Aro bwa a nora taamneira n te terewitin ni kabwarabwaraa ara onimaki ma te rau, ao ti tuangia ae e bon riki man taian tataro aika bati ibukira. I kakoauaa raoi bwa e boutokaira Iehova rinanon aia taeka ni kabebetenano nakoira aika rangi ni bati.”
N aron ae e kaotaki ni katoto ake mai mwaina, e kona te Atua ni kabebeteia ana aomata aika kaaitara ma kangaanga aika rangi ni bati ma kataaki. Ao tera ngkoe arom? N aki ongeia bwa te kangaanga raa ae tao ko kaaitara ma ngaia i nanoni maium, ma e boni kona n reke kabebeteam, ae e na buokiko n tain te kangaanga.b Ngaia are e aera ngkai ko a aki butiia Iehova ana ibuobuoki? Boni ngaia “te Atua ae anga te kabebetenano n aekana nako.”—2 I-Korinto 1:3.
a A bitaki aara tabeua n te kaongora aei.
b Ngkana ko kani buokaki bwa ko na kaania te Atua ao ni kabebeteaki irouna, taiaoka reitaki ma Ana tia Kakoaua Iehova n am tabo ke kororeta nakon te aobiti n tararua ae ko kaan riki ma ngaia.