Debería deixar de conducir?

Estás nunha situación coma esta? Se é así, que podería axudarche a decidir se deberías seguir conducindo?

Nalgúns países, a partir de certa idade os condutores que queren renovar o seu carné teñen que ser examinados por un doutor. Os cristiáns que viven nestes países cumpren coas leis e coas decisións que toman os que están autorizados polo goberno (Rom. 13:1). Pero sen importar onde vivas, podes avaliar a túa capacidade para conducir de forma segura.

PON A PROBA A TÚA CONDUCIÓN

Tal e como suxire a páxina de Internet dun instituto dos Estados Unidos onde se investiga o envellecemento (National Institute on Aging), poderías empezar facéndote estas preguntas:

• Cústame ler os sinais ou ver de noite?

• Perdín a miña flexibilidade e cústame xirar a cabeza o suficiente para comprobar os espellos e os puntos cegos?

• Fáiseme difícil reaccionar rapidamente, como cando teño que mover o pé do acelerador ó freo?

• Conduzo tan amodo que interfiro no tráfico?

• Recentemente, estiven a punto de ter algún accidente ou deille algún golpe ó coche?

• Paroume a policía pola miña condución?

• Empecei a quedarme durmido algunha vez mentres conducía?

• Tomo algunha medicación que pode afectar á miña condución?

• Díxome alguén da miña familia ou un amigo que estaba preocupado pola miña maneira de conducir?

Se respondiches que si a unha ou dúas destas preguntas, quizais é o momento de facer algúns cambios. Por exemplo, poderías conducir menos, especialmente pola noite. Ademais, sigue avaliando a túa condución. Podes pedirlle a un familiar ou un amigo que che dea algunha idea para mellorar. Tamén podes facer un curso sobre como conducir de maneira segura. Pero se respondiches que si a máis de dúas preguntas, quizais o mellor para ti sexa deixar de conducir.a

DÉIXATE GUIAR POLOS PRINCIPIOS BÍBLICOS

Quizais nos custe recoñecer que xa non podemos conducir tan ben coma antes. E a idea de pensar en se deberiamos seguir conducindo ou non pode ser un tema sensible. Entón, que principios da Biblia poden axudarche a ver a túa situación de maneira obxectiva e a tomar a mellor decisión? Vexamos dous.

Mantén a modestia (Prov. 11:2). Cando nos facemos maiores, a nosa vista, oídos, músculos e reflexos empeoran. Por exemplo, moitas persoas deixan de practicar certos deportes cando se fan maiores porque se dan conta de que se poden facer dano máis facilmente. Pois coa condución pasa algo parecido. Chegado certo momento, unha persoa pode decidir con modestia deixar de conducir pola súa propia seguridade (Prov. 22:3). E se outros lle comentan que están preocupados, unha persoa modesta será receptiva e escoitará (compara con 2 Samuel 21:15-17).

Evita causar a morte de alguén (Deut. 22:8). Un coche é unha arma perigosa cando non se usa de maneira segura. Se alguén segue conducindo cando xa non ten a capacidade de facelo ben, podería poñer en risco a súa vida ou a doutros. E se causa un accidente grave, podería ser responsable de matar alguén.

Se estás ante a difícil decisión de se deixar de conducir ou non, evita pensar que poderás perder a túa dignidade ou valor como persoa. Xehová quérete polas túas bonitas cualidades, o que inclúe a túa modestia, humildade e a preocupación que mostras polo benestar dos demais. Ademais promete que te sosterá, que te consolará e que nunca te abandonará (Is. 46:4). Así que pídelle que che axude a usar a sabedoría práctica e os principios bíblicos para decidir se debes deixar de conducir.