Que é a Biblia?
O que di a Biblia
A Biblia é unha colección de 66 libros sagrados. Foi escrita durante un período de aproximadamente 1.600 anos. A Biblia contén a palabra de Deus, a súa mensaxe (1 Tesalonicenses 2:13).
Neste artigo veremos o seguinte:
Feitos sobre a Biblia
Quen escribiu a Biblia? Deus é o autor da Biblia, pero empregou aproximadamente uns 40 homes diferentes para escribila. Algúns destes homes foron Moisés, o rei David, Mateo, Marcos, Lucas e Xoán.a Deus puxo os seus pensamentos na mente dos escritores para que escribisen a súa mensaxe (2 Timoteo 3:16).
Para ilustralo: o director dunha empresa pídelle ó seu secretario que escriba unha mensaxe no seu nome. El dálle as ideas principais, así que o director da empresa segue sendo o autor desa mensaxe. Do mesmo xeito, aínda que Deus usou a homes para escribir a súa mensaxe, el é o verdadeiro autor da Biblia.
Que significa a palabra “Biblia”? “Biblia” provén da palabra grega biblia, que significa “libros pequenos”. Co tempo, biblia chegou a describir toda a colección de libros máis pequenos que xuntos compoñen a Biblia.
Cando se escribiu a Biblia? A Biblia comezou a escribirse no ano 1513 a.n.e. e rematouse máis de1.600 anos despois, arredor do 98 n.e.
Onde está a Biblia orixinal? Non se sabe se os escritos bíblicos orixinais sobreviviron. Isto débese a que os escritores da Biblia empregaron os materiais dispoñibles naquel momento, como o papiro e o pergamiño, que eran perecedoiros. Aínda así, os escribas profesionais copiaron unha e outra vez minuciosamente os escritos da Biblia durante séculos preservando o seu contido para futuros lectores.
Que son o “Antigo Testamento” e o “Novo Testamento”? Ó que comunmente se lle chama o Antigo Testamento describe a parte da Biblia que foi escrita principalmente en hebreo,b tamén coñecida como as Escrituras Hebreas. O Novo Testamento refírese á sección escrita en grego, coñecida como as Escrituras Gregas Cristiás. Estas dúas partes forman un libro completo, chamado as Santas Escrituras.c
Que atopamos na Biblia? Nas diferentes partes da Biblia atopamos historia, leis, profecías, poesía, proverbios, cancións e cartas. Aquí podes atopar a “Lista dos libros da Biblia”.
De que trata a Biblia?
A Biblia comeza cunha breve descrición de como Deus, o Todopoderoso, creou os ceos e a Terra. Ademais, a través da Biblia Deus dá a coñecer o seu nome, Xehová ou Iavé, e invita as persoas a coñecelo (Isaías 42:8).
A Biblia explica que se dixeron moitas mentiras sobre Deus e ensina como vai limpar o seu nome.
A Biblia ensina cal é o propósito de Deus para a humanidade e a Terra. E mostra como Deus acabará co sufrimento no futuro.
A Biblia dános consellos prácticos para o día a día. Estes son algúns exemplos:
Como levarse ben cos demais. “Así que tratade á xente en todo conforme queredes que vos traten a vós” (Mateo 7:12).
Significado: Debemos tratar os demais como nos gustaría que nos tratasen a nós.
Loitar contra o estrés. “Así que non vos angustiedes polo de mañá; mañá xa traerá a súa angueira” (Mateo 6:34).
Significado: En lugar de preocuparnos moito polo que poida pasar no futuro é mellor que nos centremos nos problemas de cada día.
Desfruta dun matrimonio feliz. “Todos e cada un de vós, debe ama-la súa muller coma a si mesmo; e a muller, que respecte ó seu marido” (Efesios 5:33).
Significado: O amor e o respecto son esenciais para ter éxito no matrimonio.
Cambiouse algo da Biblia?
Non. Os expertos compararon con moito coidado os manuscritos antigos da Biblia coa actual e déronse conta de que a mensaxe orixinal da Biblia non cambiou. Se Deus quere que se entenda a súa mensaxe, loxicamente tivo que asegurarse de que non cambiara, non si?d (Isaías 40:8).
Por que hai tantas traducións da Biblia?
A maioría dos lectores actuais non entenden os idiomas antigos da Biblia. Non obstante, a Biblia ten boas noticias para “tódalas nacións, razas, linguas e pobos” (Apocalipse 14:6). Por iso as persoas precisan unha tradución da Biblia nun idioma que poidan entender. Así poderán ler e comprender ben a mensaxe de Deus.
Hai tres formas de traducir a Biblia:
Palabra por palabra, o máis literal posible.
Idea por idea, usando palabras que transmitan o sentido do texto orixinal.
Parafraseando, é dicir, reformando o texto libremente co obxectivo de que sexa máis fácil de ler. Non obstante, esta forma de traducir ás veces pode cambiar o significado do texto.
Unha boa tradución da Biblia ten que equilibrar unha tradución literal cunha linguaxe moderna e fácil de ler. Deste xeito transmítese con exactitude a mensaxe de Deus.e
Quen decidiu o que se escribiría na Biblia?
Como Deus é o autor da Biblia, el decidiu o que incluír nela. Ó principio decidiu confiarlle á nación de Israel as “palabras de Deus”, é dicir, eles protexerían as Escrituras Hebreas (Romanos 3:2).
Perdéronse algúns libros da Biblia?
Non. A Biblia está completa, non hai “libros perdidos”. Algúns poden afirmar que certos libros antigos que estiveron ocultos durante moito tempo pertencen á Biblia.f Non obstante, os libros que de verdade foron inspirados por Deus cumpren con certas características que establece a propia Biblia (2 Timoteo 1:13). Por iso, non se contradín. Isto non se pode dicir de tódolos escritos antigos que algunhas persoas din que pertencen á Biblia.g
Como atopar versículos na Biblia
Lista dos libros da Biblia
a Para obter unha lista completa de tódolos libros da Biblia, quen os escribiu e cando se escribiron, consulta a “Tabla de los libros de la Biblia”.
b Pequenas partes da Biblia escribíronse en arameo, un idioma moi relacionado co hebreo.
c Moitos lectores da Biblia prefiren as expresións “Escrituras Hebreas” e “Escrituras Gregas Cristiás”. Deste xeito, non dá a impresión de que o “Antigo Testamento” está anticuado e de que se substituíu polo “Novo Testamento”.
d Le o artigo “Cambiouse ou manipulouse a Biblia?”.
e A moitas persoas gústalles ler La Biblia. Traducción del Nuevo Mundo porque é exacta e fácil de entender. Mira o artigo “É exacta a Traducción del Nuevo Mundo?”.
f A estes escritos chámaselles apócrifos. Segundo a Enciclopedia Británica “na literatura bíblica este termo refírese a obras fóra do canon aceptado polas escrituras”, é dicir, fóra da lista autorizada de libros que pertencen á Biblia.
g Se desexas máis información, le o artigo “Los evangelios apócrifos: ¿contienen verdades ocultas sobre Jesús?”.