Dusreanchi Kallji Ghetana Khuxal Ravat

1-2. Dusreanchi kallji ghetat tanche vixim Jehovak koxem bhogta? (Mhonnʼnneo 19:17) (Chitram pasun polloiat.)

KOREA-NTLO, Jin-yeol nanvacho ek bhav oxem sangta, “Hanv ani mhoji bail kazar zaun 32 vorsam zalim. Tika Parkinson’s duens asa ani tea pasot tika aple hat-paim halounk khub kotthin zata dekhun fattlea panch vorsam thaun hanv tichi kallji ghetam. Hanv ticho khub mog kortam ani tichi kallji gheunk mhaka khub borem dista. Dor rati ti amchea ghorant eka khas beddar nhidta ani ami eka-mekache hat dhorun nhidtat.”

² Ghoddie tumi tumchea avoi-bapaichi, kazari sangateachi, bhurgeachi vo eka ixttachi kallji ghetat. Tumi tancho mog kortat dekhun tanchi khuxalkaien kallji ghetat. Toxench, hea vorvim tumi Jehovacho pasun mog kortat mhunn dakhoitat. (1 Tim. 5:4, 8; Jak. 1:27) Punn thodde pavtti tumkam ietat teo oddchonneo dusreank disonant zait. Ek-ek pavtti tumkam jeo oddchonneo asat teo anik konnankuch nant oxem tumkam disot. Dusrim tumkam polloitat tednam tumi khuxal asat oxem tankam disot. Punn ek-ek pavtti tumi khub dukhi astat ti tankam khobor na zait. (St. 6:6) Tori astana tumkam koxem bhogta tem Jehova sodanch ani bore bhaxen somzota. (Suttka 3:7 sor korat.) Tumi golloilʼlim dukham ani tumche teag taka khub valorache. (St. 56:8; 126:5) Toxench tumchea mogacheank modot korunk tumi zo vavr kortat tem soglem to polloita. Eka orthan, tumi apleak rinn dilam oxem to lekhta ani tea pasot to tumkam besanvam ditolo mhunn bhas dita.—Mhonnʼnneo 19:17 vachat.

3. Terachi kallji gheunk Abraham ani Sarak kiteak kotthin zalem astolem?

³ Bible-ant zaitea munxanchim udharonnam asat zannim zanntteanchi vo duentanchi kallji ghetli. Abraham ani Sara vixim chintat. Tim Ur des soddun gelim tednam, tancho bapui Tera, sumar 200 vorsancho aslo. Torui to tanchea sangata gelo. Tim Haran-ant gelim, jem sumar 960 kilometr pois aslem. (Ut. 11:31, 32) Abraham ani Sara, Teracho mog kortalim. Punn tachi kallji gheunk, khas korun provas kortana tankam kitlem kotthin zalem astolem tea vixim chintat. Tannim chodd korun unttancher vo gaddvancher provas kelo astolo. Ani ho provas korunk zannttea Terak khub kotthin zalem astolem. Hea pasot thodde pavtti Abraham ani Sara khub thoklim astolim. Punn Jehovan tankam goroz ti ghottai dili. Teach bhaxen aiz pasun dusreanchi kallji ghetat tankam Jehova goroz ti ghottai ditolo.—St. 55:22.

4. Hea lekhant ami kitem polloitolim?

⁴ Tumi khuxal aslear dusreanchi kallji gheit ravonk tumkam anikui sompem zatolem. (Mho. 15:13) Ugddas dovrat, tumchem jivit khub kotthin aslearui tumi khuxal ravonk xoktat. (Jak. 1:2, 3) Oxem korunk ek vatt mhunnttlear, khuxal ravonk koslim karonnam asat tem zannam zaunk tumi Jehova lagim magnnem korit ravonk zata. Khuxal ravonk anik kitem korunk zata tem ami hea lekhant polloitolim. Toxench, dusreamnim tumkam koxi modot korunk zata tem-ui ami polloitolim. Punn poilim, dusreanchi kallji ghetana tumi kiteak khuxal ravonk zai ani oxem kortana tumkam kiteak kotthin zaunk xokta, tem ami polloum-ia.

DUSREANCHI KALLJI GHETANA KHUXAL RAVONK TUMKAM KITEAK KOTTHIN ZAUNK XOKTA?

5. Tumi dusreanchi kallji ghetana kiteak khuxal asonk zai?

⁵ Dusreanchi kallji gheunk jeo oddchonneo asat tancheach vixim chintlear, tumi itlim dukhi zatolim ki kallji gheunk tumche lagim xokti aschi na. (Mho. 24:10) Ani tumche lagim xokti na zalear, tumi tanchea sangata titlim doiall toren vagchimnant vo tankam ji modot zai ti diunk pavchimnant. Tor dusreanchi kallji ghetana khuxal ravonk kiteak kotthin zaunk xokta?

6. Dusreanchi kallji gheupi thoddim zannam kiteak khub thokonk xoktat?

⁶ Tumi khub thoktat zait. Leah nanvachi ek bhoinn oxem sangta: “Soglem borem cholta tednam pasun, sanz zata mhunnosor mhaka khub usko zata. Ani kitench korunk mhaka xokti asona. Ek-ek pavtti mhojean konnachi-i ek message pasun reply korunk zaina.” Toxench dusreanchi kallji ghetana, thoddeank goroz to visov pasun gheunk mellona. Hea vixim bhoinn Ines oxem sangta: “Mhoji sarki nhid zaina. Ratchea vellar mhojea sasumaichi kallji gheunk hanv don-don voramnim utthon tika polloitam. Zaitim vorsam zalim, hanv ani mhozo ghov bhonvonk pasun vochonk nant.” Toxench thoddeank, aplea mogacheanchi purnn vell kallji gheunk poddtta dekhun tanchea ixttam sangata vell sarunk mellona, nhoi mhunn Jehovache sevent umkench kitem korunk mellona. Tea pasot tankam khub eksurponn bhogonk xokta ani eka orthan tim pinzreant asat oxem tankam disonk xokta.

7. Dusreanchi kallji ghetana tumi kiteak khub dukhi zaunk xoktat?

⁷ Tumi title bore toren kallji ghenant oxem chintun vo tanchi bholaiki piddʼddear zait voita tem polloun tumi khub dukhi zait. Hea vixim bhoinn Jessica oxem sangta: “Mhojea daddy-k hanvem chodd modot korunk zai oxem mhaka zaite pavtti dista. Tor hanvem thoddo vell visov ghetlear, hanv mhojeach vixim chintʼtam oxem dison mhaka khub dukh zata.” Hea toren dusreank modot korunk zai titlim tim korunk xokonant dekhun thoddeank khub vaitt dista. Toxench ek-ek pavtti tanche lagim anik tanchi kallji gheunk zaunchem na oxem tankam dista. Vo tim thoklolim astat dekhun, zanchi tim kallji ghetat tankam tim kitem tori vaitt mhunnonk xoktat. Tea pasot tankam uprant dukh zaunk xokta. (Jak. 3:2) Tea bhair apunn mog korta to munis disan-dis duent zata tem polloun tankam khub dukh zaunk xokta. Hea vixim bhoinn Barbara sangta: “Mhoji ek ixttin disan-dis khub duent zata tem polloun mhaka khub dukh zata.”

8. Dusreamnim tanche upkar attoile tednam kallji ghetoleank koxem bhoglem tea vixim ek udharonn diat.

⁸ Konnuch tumcho valor korina oxem tumkam disot. Karonn tumi zo vavr ani teag kortat tea pasot choddxe pavtti konnui tumcho upkar attoina. Punn dusrim tumche upkar attoitat tednam tumkam urba mellonk xokta. (1 Tes. 5:18) Melissa nanvachi ek bhoinn sangta: “Thodde pavtti hanv khub niraxi astam vo thoktam dekhun hanv roddttam. Punn hanv kallji ghetat tim munxam mhozo upkar attoitat tednam mhaka khub borem dista. Ani dusrea disak porot tanchi kallji gheunk mhaka ghottai melltta.” Toxench, bhav Ahmadu ani tachi bail, tanchea bachechi kallji ghetat, zaka ek gombhir duens asa. Bhav sangta: “Tachi kallji gheunk ami kitlo vavr kortat tem taka purnn toren somzona zait, punn itlem duent aslear pasun tem amche upkar attoita ani khub vavr korun amkam ‘I love you’ boroun dita tednam, ami khub khuxal zatat.”

TUMI KHUXAL KOXIM RAVONK ZATA?

9. Tumchea lagim soglench korunk zaunchem na mhunn tumi vollkhotat mhunn koxem dakhounk zata?

⁹ Tumchean kitem korunk zata ani zaina tem vollkhon gheiat. (Mho. 11:2) Tumche lagim soglinch kamam korunk vell ani takot aschina. Tor tumi kitem kortolim tem tumkam poilinch tharaunk poddttolem. Thodde pavtti umkeach kamank tumkam na mhunnonk poddot. Ani hantunt kainch vaitt na. Karonn tumi mannsugen vagtat. Toxench konnui tumkam modot korunk sodhta zalear tanche upkar attoiat ani tanchi modot apnnaiat. Hea vixim Jay nanvacho ek bhav sangta: “Dor disak soglench korunk amchea lagim vell ani takot asona. Tor amchean jem korunk zata titlench kelear ami khuxal astolim.”

10. Tumi somjikai kiteak uzar korunk zai? (Mhonnʼnneo 19:11)

¹⁰ Somjikai uzar korat. (Mhonnʼnneo 19:11 vachat.) Oxem kelʼlean, tumi kallji ghetat tannem tumkam rag haddlear pasun xant ravonk tumkam modot zatoli. Ek munis umkech toren kiteak vagta tem somjikaiecho munis zannam zaunk proitn korta. Thoddea duensank lagon, ek doiall munis pasun vaitt toren vagonk xokta. (Up. 7:7) Udharonnak to taponk, gunngunnunk vo sogle pavtti ragar asonk xokta. Tor tumi gombhir duens zalʼlea eka munxachi kallji ghetat zalear, tachea duensa vixim anik zannam zalʼlean tumkam modot zatoli. Jitlim tumi tachea duensa vixim zannam zatolim titlinch to munis umkech toren kiteak vagta tem somzonk tumkam modot zatoli.—Mho. 14:29.

11. Tumi dor disa khoinchea mhotvachea vostum pasot vell kaddunk zai? (Stotr 132:4, 5)

¹¹ Jehova sangata tumchi ixttagot ghott korunk vell kaddat. Thodde pavtti, tumi thoddeo vostu fattim dovrun ‘chodd mhotvacheo’ vostu korunk vell kaddunk zai. (Filp. 1:10) Hantuntli ek vost mhunnttlear, Jehova sangata tumchi ixttagot ghott korop. Raza David pasun khub bizi aslo, torui Jehovachi bhokti korop taka sogleam-von chodd mhotvachem aslem. (Stotr 132:4, 5 vachat.) Teach bhaxen, bizi aslear pasun dor disa Bible vachunk ani magnnem korunk tumi vell kaddunk zai. Hea vixim bhoinn Elisha sangta: “Magnnem kelʼlean ani stotranchea bhuzvonnechea utrancher niall kelolean hanv khuxal ravonk pavlem. Her kitea-i poros magnnem kelʼlean mhaka chodd modot zata. Mhaka xant ravonk modot kor mhunn hanv disantlean zaite pavtti Jehova lagim magtam.”

12. Tumi tumchea bholaikechi kallji ghevop kiteak mhotvachem?

¹² Tumchea bholaikechi kallji gheiat. Bizi aslolean tumkam jevnnacheo vostu gheunk ani jevonn randunk vell mellona zait. Punn borem jevonn jevlear ani exercise kelear tumchi bholaiki bori urtoli. Tor oxem korunk vell kaddat. (Ef. 5:15, 16) Toxench, sarki nhid gheiat. (Up. 4:6) Zannar sangtat ki sarki nhid ghetlear amcho mendu bore toren kam korta. Hea vixim, Banner Health website-ir “How Sleep Can Affect Stress,” ho lekh sangta ki sarki nhid ghetlear ami chodd usko korchimnant ani kotthin poristhitint pasun xant ravonk pavtolim. Toxench tumkam avoddttat teo vostu korunk vell kaddat. (Up. 8:15) Dusreanchi kallji gheupi eke bhoinnik khuxal ravonk koxi modot zata tea vixim ti oxem sangta: “Climate boro aslear hanv bhair vochon vot ghetam. Toxench mhoineak ek pavtti tori, hanv mhojea ixttam sangata mhaka avoddttat teo vostu korunk vell kaddttam.”

13. Hansop kiteak borem? (Mhonn’nneo 17:22)

¹³ Fokannam korat ani hansat. (Mhonnʼnneo 17:22 vachat; Up. 3:1, 4) Hansop tumchea kuddik ani monak borem zaun asa. Dusreanchi kallji ghetana tumi jem korunk chintlolem tem sogle pavtti zaunchem na zait. Punn ti kotthin poristhiti tumi hanson kaddlear tacho fuddo korunk tumkam anikui sompem zatolem. Ani kallji ghetat tanchea sangata hanslear tumchi ixttagot ghott zatoli.

14. Eka lagxilʼlea ixtta lagim uloilʼlean tumkam koxi modot zaunk xokta?

¹⁴ Tumchea eka lagxilʼlea ixtta lagim uloiat. Khuxal ravonk khub vavr kelear pasun thodde pavtti tumkam usko zaunk xokta. Oslea vellar tumkam koxem bhogta tem tumchea eka ixttak sangat. Karonn tim tumkam vaitt dista toxem kainch mhunnchimnant. (Mho. 17:17) Punn tim tumchem kan diun aikotat ani tumkam bhuzvonn melltta toslim utram sangtat tednam porot khuxal ravonk tumkam modot zatoli.—Mho. 12:25.

15. Tumi Sobit Bagent kitem kortolim tea vixim niall kelear tumkam khuxal ravonk koxi modot zatoli?

¹⁵ Tumi Sobit Bagent sangata mellon kitem kortolim tea vixim chintat. Tumkam sodankal dusreanchi kallji gheunchi poddchina. Karonn oxem korunk Jehovan amkam rochunk nant. (2 Kor. 4:16-18) Tor fuddarak amkam ‘khorem jivit’ mellttolem. (1 Tim. 6:19) Tumi zanchi kallji ghetat tanchea sangata tumi Sobit Bagent kitem kortolim tea vixim uloilear tumi khuxal astolim. (Iz. 33:24; 65:21) Hea vixim bhoinn Heather sangta: “Zanchi hanv kallji ghetam, tankam zaite pavtti hanv sangtam ki ami Sobit Bagent sangata mellon kopdde xinvtolim, dhanvtolim, ani motorcycle-o choloitolim. Toxench, jivont zalolea amchea mogacheam pasot undde kortolim ani jevonn randtolim. Tor Jehovan amkam dilʼlea hea bhorvonxeak lagon ami sangata mellon tache upkar attoitat.”

KALLJI GHETOLEANK AMI KOXI MODOT KORUNK ZATA?

16. Kallji ghetoleank ami koxi modot korunk zata? (Chitr pasun polloiat.)

¹⁶ Kallji ghetoleank goroz to visov mellonk ami modot korunk zata. Oxem korunk ami tea duent vo zannttea munxa sangata vell sarunk zata. Hea vorvim kallji ghetoleak break mellttolo. (Gal. 6:2) Zannttea vo duentank dor sumanak konn modot kortolo tem tharaunk thoddea bhav-bhoinnamnim list toiar kelam. Bhoinn Natalya-cho ghov paralyze zala dekhun tachean cholonk zaina. Ti mhunntta: “Sobhentlo ek bhav sumanak ek vo don pavtti ieun mhojea ghova sangata vell sarta. Te dogui sangata porgottnni kortat, uloitat ani pichʼcheram pasun polloitat. Ho vell mhojea ghovak khub avoddtta. Ani tea vellar mhaka pasun her kamam korunk vell melltta. Zoxem mhaka pasoiek vochonk melltta.” Thodde pavtti tea duent vo zannttea munxa sangata ami ratchem ravonk zata. Hea vorvim tachi kallji ghetoleak goroz ti nhid gheunk mellttoli.

17. Kallji ghetoleank ami mittinge vellar koxi modot korunk zata?

¹⁷ Kallji ghetoleank ami mittinge vellar modot korunk zata. Duent vo zannttea munxa sangata ami akʼkhe mittingek vo mittingechea thoddea vella pasot bosonk zata. Oxem kelʼlean, kallji ghetoleank mittingent, zomatint ani odhivexonant dhean diunk modot zatoli. Toxench tim zannttim vo duent munxam ghora thaun bhair soronk xokonant zalear, ami tanchea ghora vochon online mitting pollounk zata. Hea vorvim, kallji ghetoleank Raj-ghorant mittingek hajir zaun dhean diunk mellttolem.

18. Kallji ghetoleam pasot ami anik kitem korunk zata?

¹⁸ Kallji ghetoleank ami urba diunk zata ani tanchea pasot magnnem korunk zata. Vhoddilamnim kallji ghetoleank chukonastana gonvlli bhett korunk zai. (Mho. 27:23) Toxench ami tancho mog kortat ani tanchea vavracho valor kortat mhunn ami sogleamnim tankam sangonk zata. Tea bhair, tankam ghottai di-it rav ani khuxal ravonk modot kor mhunn ami Jehova lagim magonk zata.—2 Kor. 1:11.

19. Beginuch kitem zatolem mhunn ami vatt polloit asat?

¹⁹ Beginuch, Jehova sogle dukh-tras kaddun uddoitolo. Tea vellar duensam ani moronn aschem na. (Prok. 21:3, 4) “Longdde merva bhaxen uddio martole.” (Iz. 35:5, 6) Zanntteponnak lagon zatat te tras thoim aschem nant. Konnankuch dusreanchi kallji gheunk poddchi na. Tea vellar “adleo vostu porot monant ieuncheonant.” (Iz. 65:17) Amcho ho bhorvonso purnn zata mhunnosor, Jehova sodanch amchea sangata astolo. Ani amkam ghottai mellonk tacher patieun ravlear, to amkam “pasiensan ani khuxalkaien soglea vostumnim thir ravonk” modot kortolo.—Kol. 1:11.