Jezu Amcho Doia-maia Dakhoupi Mha-iadnik Zaun Asa

1-2. (a) Jehovan aplea Putak hea prithumer kiteak dhaddlo? (b) Hea lekhant ami kitem polloitolim? (Hebrevank 5:7-9)

SUMAR 2,000 vorsam poilim, Jehovan aplea opurbaiechea Putak hea prithumer dhaddlo. Kiteak? Ek karonn mhunnttlear soglea munxank patkantlean ani mornnantlean suttka diunk. Ani Soitanan jem vaitt kelam tem soglem kaddun uddounk tannem oxem kelem. (Ju. 3:16; 1 Ju. 3:8) Toxench hea prithumer munis mhunn jielʼlean Jezu dusreank anikui doia-maia dakhoupi Mha-iadnik zatolo mhunn Jehovak khobor asli. Jezun 29 K.X.-anta bautizm ghetlea uprant to Mha-iadnik mhunn seva korunk laglo.

² Jezu munis mhunn jielʼlean to doia dakhoupi Mha-iadnik koso zaunk pavlo tem ami hea lekhant polloitolim. Hem zannam zavop khub mhotvachem. Karonn hea vorvim Jehova lagim magnnem korunk amkam anikui sompem zatolem. Toxench, ami taka anikui lagim sortolim, khas korun amchea oskotaienk lagon amkam niraxiponn bhogta tednam.—Hebrevank 5:7-9 vachat.

DEVACHO OPURBAIECHO PUT PRITHUMER AILO

3-4. Jezu prithumer ailo tednam tachea jivitant kosle vhoddle bodlav zale?

³ Amchea sogleanchea jivitant zaite bodol zaleat astole. Amchem ghor soddun amkam eka dusrea zagear vochonk poddlem zait vo amchi famil vo ixttam thaun pois vochonk poddlem zait. Oxem korop sompem asona. Punn khoinchea-i munxa poros Jezuchea jivitant sogleam-von vhoddle bodol zale. To Jehovan rochlolo poilo ani sogleam-von mhotvacho devdut. Jehova tacho khub mog korta ani tachea sangata kam korunk Jezu khub khuxal aslo. (St. 16:11; Mho. 8:30) Punn Filipkarank 2:7-ant sanglam toxem prithumer opurnn munxam sangata jieunk Jezun “aplea lagim aslolem soglem soddun dilem.”

⁴ Jezu hea prithumer zolmolʼlo tea vella vixim chintat. Tachea zolma uprant tachea avoi-bapain ji bhettounni dilʼli tea vorvim tachi famil gorib asli mhunn kollon ieta. (Lev. 12:8; Luk. 2:24) Toxench, noxtto Raza Herodak tachea zolma vixim kollʼllea uprant to taka jivexim marunk sodhtalo. Haka lagon tachea familik thoddea vella pasot Ejipttant pollon vochonk poddlem. (Mt. 2:13, 15) Tor prithumer ailea uprant Jezuchem jivit purnn toren bodolʼlem.

5. Prithumer astana Jezun kitem polloilem, ani to lokanchem dukh somzon gheta toslo Mha-iadnik koso zaunk pavlo? (Chitr pasun polloiat.)

⁵ Prithumer astana, lok khub tras sostat tem Jezun polloilem. To lhan aslo tednam ghoddie tacho posko bapui Juze melo. Tor aplo mogacho morta tednam kitlem dukh bhogta tem tannem onnbhovlem. Toxench, Jezu oslea lokank mellʼllo zankam kodd zalʼle, je kuddʼdde asle, opong asle ani zanchim bhurgim melʼlim. Jezuk tanchi doia disli. (Mt. 9:2, 6; 15:30; 20:34; Mk. 1:40, 41; Luk. 7:13) Jezun sorgar thaun hem soglem polloilʼlem tem khorem, punn to prithumer munis mhunn jielo tednam trasam vellar munxank koxem bhogta tem to anik bore toren somzonk pavlo. (Iz. 53:4) Tor veg-vegllea poristhitimnim munxank koxem bhogta ani oddchonneank lagon tankam kitle tras sosunk poddttat tem to purnn toren somzolo. Ani Jezu munis aslo dekhun to-ui thoklo, dukhi zalo ani taka usko zalo.

JEZUN LOKANCHO MOG KELO

6. Lokam pasot aslolea Jezuchea doie vixim Izaias provadean kelʼlea bhasaunnentlean amkam kitem xikonk melltta? (Izaias 42:3)

⁶ Hebrev Bhaxent Boroilʼlea Pustokamnim, girest ani bollvont munxank, thodde pavtti borem udok mellttolea bagek vo vhodd zhaddank sor keleant. (St. 92:12; Iz. 61:3; Jer. 31:12) Punn jim gorib asat ani dusrim tankam unnea molachim mhunn lekhtat tankam maddoilʼli boddi ani minnminnttea vati sangata sor keleant. (Izaias 42:3 vachat; Mt. 12:20) Jezu tanchea sangata doiallaien ani mogan vagtolo mhunn Jehovan Izaias provadea vorvim dilʼlea bhasaunnent sanglolem. Ani Jezu hea prithumer aslo tednam zanchea sangata onʼneai zalʼlo ani jim oskot aslim tankam tannem somzon ghetlem. Hem tannem koxem kelem tem polloum-ia.

7-8. Izaiasan boroilʼli bhasaunni Jezun koxi purnn keli?

⁷ “Khoinchich maddoilʼli tonnachi boddi to moddchona, Ani minnminntta ti khoinchich vat to palounchona,” hi Izaiasan kelʼli bhasaunni Jezun purnn keli mhunn Matevan sanglem. Jea lokank dusream koddlean onʼneai sosunk poddttalo ani apunn borim zatolim mhunn zankam kainch bhorvonso naslo tankam modot korunk Jezun zaitim vizmitam kelim. Udharonnak, eka vellar taka kodd zalʼlo ek munis mellʼllo zo dusreank mellonk xokonaslo. Apunn boro zaun aplea familik ani ixttank porot mellttolo mhunn tannem ghoddie kednanch chintunk naslem. (Luk. 5:12, 13) Anik eka vellar Jezuk ek munis mellʼllo zo bhero aslo ani tachea lagim sarkem ulounk zainaslem. Dusrim eka-meka lagim uloitat tem to polloitalo tednam taka koxem bhogtalem tem chintat. (Mk. 7:32, 33) Punn hachea bhair lokank anikui tras sosunk poddttale.

⁸ Jezuchea disamnim zaite Judev lok mantale ki je lok dukhant ani opong asat te aplea vo aplea avoi-bapaichea patkank lagon tras sostat. (Ju. 9:2) Hea chukichea chintpak lagon lok tanchea sangata onʼneai kortalo ani apunn kainch valorachim nant oxem tankam distalem. Punn Jezun tankam borim kelim ani Jehovak tanchi porva asa mhunn dakhoili. Oxe toren, Izaiasan boroilʼli bhasaunni tannem purnn keli. Tor aiz Jezuk amchea vixim koxem bhogta tea vixim ami kitem xiktat?

9. Jezu opurnn munxancheo oskotaieo khoreponnim somzon gheta mhunn Hebrevank 4:15, 16-ntlean koxem kolltta?

⁹ Hebrevank 4:15, 16 vachat. Jezu sodanch amcheo oskotaieo somzon ghetolo mhunn ami khatri dovrunk zata. “Oskotaieo somzon ghevop” hea utrank jem Grik utor uzar kelʼlem tacho orth, dusreank kitle dukh ani tras zatat tem khoreponnim somzon ghevop. Ani bondkhonnint asloleanchi poristhiti ami somzon ghetat mhunn dakhounk Paulun Hebrevank 10:34-ant hench Grik utor uzar kelʼlem. Jezun kelʼlea vizmita vorvim taka dusreanchi kitli doia-maia asli tem kollon ieta. Tannem fokot korunk zai mhunn nhoi, punn taka dusreanchi kallji asli ani to tankam modot korunk sodhtalo dekhun dusreank borim kelim. Udharonnak, to pois ravon pasun tea kodd zalʼlea munxak boro korunk xoktalo. Punn tannem taka hat lavun boro kelo. Itlea vorsa uprant konnem tori tea munxak poilech pavtti hat lailʼlo zait. Toxench, Jezun tea bherea munxachi poristhiti somzon taka lokam thaun kuxin vhoron boro kelo. Tea bhair, poschatap kelʼlea eke bailen aplea dukhamnim Jezuche paim dhuile, tednam ek Farizev tichea vixim krur toren uloilo. Punn Jezu tichea pasot uloilo ani tannem tea Farizevak khor utramnim xittkailo. (Mt. 8:3; Mk. 7:33; Luk. 7:44) Tor duent vo opong aslim vo gombhir patkam kelʼlim tankam Jezun pois korunk na. Punn tankam aplea lagim ieunk dilem ani apunn tancho mog korta mhunn dakhoilem. Tor heach toren Jezuk amchea pasotui doia-maia asa mhunn ami visvas dovrunk zata.

AIZ AMI JEZUCHI DEKH KOXI GHETAT?

10. Kuddʼddeank ani bhereank Jehovak lagim soronk ami koxi modot korunk zata? (Chitram pasun polloiat.)

¹⁰ Jezuchim pattlavdaram zalʼlean ami tachi dekh gheun dusreank mog ani doia-maia dakhounk proitn kortat. (1 Ped. 2:21; 3:8) Ami vizmitam korun bhereank vo kuddʼddeank borim korunk xokonant tem khorem. Punn ami tankam Jehova vixim xikoun tachea lagim soronk modot korunk zata. Oxem korunk amchem songotton 100-am poros chodd sign language-imnim prokaxonam toiar korta. Toxench, kuddʼddeank ani sarkem disona tankam modot korunk 60-am poros chodd bhasamnim braille prokaxonam toiar korta. Ani video-nt kitem zata te sangonk tanchea pasot 100-am poros chodd bhasamnim audio description toiar korta. Hea vorvim kuddʼddim ani bherim asat tankam Jehovak ani Jezuk lagim soronk modot zata.

11. Jezu bhaxen Jehovachem songotton soglea lokank doia-maia koxem dakhoita? (D.I. 2:5-7, 33) (Chitram pasun polloiat.)

¹¹ Soglo lok Jehovak lagim soronk tachem songotton aiz khub vavr korta. Ugddas korat, Jezu jivont zalea uprant Ponʼnasavea disa tannem aplea xisank povitr xokti dili. Hea vorvim thoim ektthaim zalʼlea lokank bori khobor “tanchea bhaxent” aikonk mellʼlli. (D.I. 2:5-7, 33 vachat.) Jezuchea margdorxona khala aiz Jehovache songotton 1,000-am poros chodd bhasamnim Bible adarit prokaxonam toiar korta. Hantuntleo thoddeo bhaso fokot thoddoch lok uloita. Udharonnak, Utʼtor ani Dokxinn Amerikent ravpi khub thoddo lok Amerindian bhaso uloitat. Torui, amchea songottnnen 160-am poros chodd Amerindian bhasamnim prokaxonam toiar keleant. Karonn soglea lokank bori khobor mellʼlloli amkam zai. Toxench, amchim prokaxonam 20-am poros chodd Romany bhasamnim pasun asat. Ani heo bhaso uloupi hozaramnim lok aiz Jehovachi seva kortat.

12. Jehovachem songotton anik khoinchea vattamnim lokank modot korta?

¹² Amchem songotton fokot bori khobor porgott korina, punn odruxttank sampoddloleank pasun modot korta. Odruxtt ghoddtta tednam hozaramnim bhav-bhoinnam gorjevontank modot kortat. Tea bhair, amchem songotton zaitea zagear Raj-ghoram pasun bandta. Hea udexim lokank ektthaim ieun Jehova vixim xikonk ani tacho mog onnbhovunk melltta.

JEZU AMKAM MODOT KORUNK XOKTA

13. Jezu amkam koso modot korta?

¹³ Amcho boro gonvlli zalʼlean, Jehovak lagim ravonk amchea lagim goroz tem soglem asa mhunn Jezu khatri korun gheta. (Ju. 10:14; Ef. 4:7) Ami kotthin poristhiticho fuddo kortat dekhun, ek-ek pavtti ami minnminntte vati sarkim vo maddoilʼle boddie sarkim asat oxem amkam disot. Ek gombhir duens vo amchea chukik lagon, vo sobhentlea eka bhav vo bhoinni lagim amchi ixttagot poilim bhaxen na dekhun, ami khub niraxi zaunk xoktat. Toxench, fuddarachea bhorvonxeacher dhean dinastana ami fokot amchea trasam vixim chintit. Tor oslea vellar Jezu amcher dhean dita ani amkam koxem bhogta tem to somzota mhunn ugddas dovrat. To amkam doia dakhoitolo ani modot kortolo. Zoxem, ami oskot astat tednam povitr xokti diun to amkam ghottai diunk xokta. (Ju. 16:7; Tit. 3:6) Toxench sobhentlea vhoddilam ani bhav-bhoinnam vorvim to amkam urba diunk ani modot korunk xokta.—Ef. 4:8.

14. Ami niraxi aslear kitem korunk zai?

¹⁴ Ami niraxi asat zalear, Jezu amcho Mha-iadnik mhunn ami ugddasak haddunk zai. Jehovan Jezuk hea prithumer amkam soddvonn diunkuch nhoi, punn amche tras bore toren somzonk dhaddlolo. Tor amchea oskotaienk lagon vo patkank lagon ami niraxi zatat tednam, Jezu “sarkea vellar” ani ap-khuxen amkam modot korunk toiar asta.—Heb. 4:15, 16.

15. Jehovak soddun gelʼlea eka bhavak porot Sakxi zaunk koxi modot zali?

¹⁵ Jehovak soddun geleant tankam pasun modot korunk Jezu amkam uzar korta. (Mt. 18:12, 13) Hea vixim Stefano-chob onnbhov polloum-ia. Sobhentlean bhair kaddun 12 vorsam uprant tannem porot mittingek ieunk tharailem. To mhunntta: “Oxem korop sompem naslem, punn mhaka bhav-bhoinnam sangata porot Jehovachi seva korunk zai asli. Mhaka modot kortale tea vhoddilamnim mhaka mogan ieukar dilo. Punn hanv Jehovak soddun gelʼlo dekhun, thodde pavtti khub dukhi zatalom, ani soglem soddun diunk sodhtalom. Punn hanvem toxem kelʼlem Jehovak ani Jezuk naka mhunn vhoddilamnim mhojea ugddasak haddlem. Hanv porot Jehovacho Sakxi zalo tednam, soglea bhav-bhoinnamnim mhaka mogan ieukar dilo ani mhojea familik pasun mog dakhoilo. Vell soron gelo toso, mhojea bailen Bible obheas suru kelo ani atam ami sangata khuxalkaien Jehovachi seva kortat.” Tor poschatap kortat tankam porot Jehova lagim ieunk soglim bhav-bhoinnam modot kortat tem polloun amcho mogall Mha-iadnik kitlo khuxal zata astolo nhoi!

16. Jezu amkam somzon gheta toslo Mha-iadnik mhunn tumi kiteak upkari asat?

¹⁶ Prithumer astana Jezun zaitea lokank sarkea vellar modot keli. Ani to amkam-i goroz tednam modot kortolo mhunn amkam purnn khatri asa. Toxench, prithum sobit bag zatoli tednam to amkam patkantlean purnn toren suttka mellonk modot kortolo. Tor Jehovan amcho itlo mog kela ki tannem Jezuk amkam doia dakhoupi Mha-iadnik mhunn nemla dekhun, ami tache khub upkari!