Jehovachea Margdorxonacher Patiet Ravat

1. Munxank kiteachi goroz asa mhunn Jehova zannam? (Matev 5:3)

AMKAM kiteachi goroz asa tem Jehova zannam. Udharonnak, amkam jevonn, kopdde ani ravonk ek zago zai. Heo vostu nant zalear amchem jivit khub kotthin zaunk xokta vo ami moronk pasun xoktat. Toxench, munxank anik kiteachi tori goroz asa mhunn Jehova zannam. Tem mhunnttlear, ami Jehovachi vollokh gheunk zai ani margdorxona pasot tacher patieun ravonk zai. (Matev 5:3 vachat.) Tor amkam margdorxonachi goroz asa mhunn ami vollkhon ghetat ani tacher patieun ravtat tednam ami khoreponnim khuxal astolim.

2. “Devachea margdorxonachi bhuk” asop mhunnttlear kitem tem somzonk ek udharonn diat.

² “Devachea margdorxonachi bhuk” asop mhunnttlear kitem? Hea utrank, Grik bhaxen jem utor uzar kelʼlem tea vorvim amchea dolleam mukhar eka bhikareachem chitr ieta. Hea vixim chintat. Ek bhikari ekdom pinzlole kopdde ghalun rostear bhik magta. Disachem taka koddok vot lagta ani ratchea vellar taka khub thonddi khata. Tachea lagim jevunk-khaunk kainch na. Ani to pollounk ekdom burso dista dekhun lok taka pois korta. Hea pasot to niraxi asa, toxench to khub thokla. Punn jivo uronk ani apli bholaiki bori asonk apleak modotichi goroz asa mhunn to zannam. Teach bhaxen, Devachea margdorxonachi bhuk asa tankam Devachea modotichi goroz asa mhunn tim vollkhon ghetat. Tea pasot aplo mog kortoleank Jehova jem margdorxon dita tacho tim zata titlo faido melloun gheunk sodhtat.

3. Hea lekhant ami kitem polloitolim?

³ Hea lekhant ami poilim, Finisiache eke baile vixim zannam zatolim. Apleak modot kor mhunn tinnem Jezu lagim bhik magli. Tor Deva thaun margdorxon mellonk ami tiche thaun khoinchea tin gunnam vixim xikonk zata tem ami polloitolim. Toxench ami apostl Pedru, apostl Paulu ani Raza Davidachea udharonnancher dhean ditolim, je margdorxona pasot Jehovacher patieun ravle.

FINISIACHE EKE BAILE THAUN XIKAT

4. Finisiachi ek bail Jezu lagim kiteak aili?

⁴ Ek pavtt Jezuk mellonk Finisiachi ek bail aili. Tiche dhuvecher ek ‘noxtto dut boslolo ani taka lagon tika khub tras zatale.’ (Mt. 15:21-28) Tor tea bailen dimi ghalun apleak modot kor mhunn Jezu lagim bhik magli. Tichea borea gunnam thaun ami xikonk zata. Tor tinnem dakhoilʼlea tin gunnancher atam dhean dium-ia.

5. Finisiache bailen kosle gunn dakhoile, ani Jezun tichea pasot kitem kelem? (Chitr pasun polloiat.)

⁵ Ti bail khoreaninch khalti asli. Hem amkam koxem kolltta? Jezu tichea lagim uloitalo tednam, tannem tika sunneachea petteak sor keli. Hem zonvar Judev nhoi te lok aplea ghorant postale. Jezun tumkam oxem mhunnttlolem zalear tumkam vaitt distolem aslem kai ani tumi tachi modot ghenastana cholonk lagtolim aslim kai? Finisiache bailen toxem korunk na. Karonn ti khalti asli. Tea bhair tinnem soddun diunk na. Ti Jezu lagim modot magot ravli karonn tika tacher bhavarth aslo. Khorem mhunnttlear, Jezun tika sanglolem ki taka “Izraelachea ghorachea sanddlolea menddrank” soddun anik konnanch koddem dhaddunk na. Torui, ticho ghott bhavarth polloun to tika modot korunk fuddem sorlo ani tichea dhuvecher boslolo noxtto dut kaddlo.

6. Finisiache baile thaun ami kitem xikonk zata?

⁶ Tor Jehova thaun margdorxon mellonk, amchea bhitor pasun tin gunn asop gorjeche. Te mhunnttlear, ami khaltim asonk zai, soddun diunk zaina ani amkam ghott bhavarth asonk zai. Ami khaltim aslear soddun diunchimnant, punn Jehova lagim modot magot ravtolim. Toxench, ami Jezucher ghott bhavarth dovortolim ani zanchea udexim to aplea pattlavdarank margdorxon dita tancher visvas dovortolim. (Mt. 24:45-47) Tor ami he tinui gunn dakhoitat tednam Jehova ani Jezu khuxal zatole ani amkam modot korunk ani margdorxon diunk toiar astole. (Jakob 1:5-7 sor korat.) Atam ami, Jehova eka orthan amchi bhuk koxi bagoita, novi vagnnuk apnnaunk koso modot korta ani amchi rakhonn koso korta tem polloum-ia. Toxench, tacho faido melloun gheunk ami kitem korunk zai tem zannam zaunk apostl Pedru, apostl Paulu ani Raza Davida thaun kitem xikonk zata tacher dhean dium-ia.

PEDRUCHI DEKH GHEIAT ANI TUMCHI BHUK BAGOIAT

7. Jezun Pedruk kosli zobabdari dilʼli, ani Pedrun kitem korunk zai aslem? Somzaiat. (Hebrevank 5:14–6:1)

⁷ Apostl Pedruchea udharonnacher dhean diat. Jezu Mesias zaun asa ani tachea vorvim Jehova aplea lokank sasnachea jivita vixim xikoita mhunn vollkhon ghetlolea poilea Judevam modem, apostl Pedru eklo aslo. (Ju. 6:66-68) Jezu sorgar voichea poilim tannem Pedruk ek mhotvachi zobabdari dilʼli. Jezun taka sanglem: “Mhojea dhakttea menddrank chorvak vhor.” (Ju. 21:17) Pedrun hi zobabdari visvaxiponnan purnn keli ani Jehovan taka don chitteo borounk pasun uzar kelo, jeo uprant Bible-acho bhag zaleo. Punn Pedrun apli bhuk pasun bagounk zai asli. Tem mhunnttlear, tannem Devachea Utracho obheas korunk zai aslo. Oxem korunk, tannem apostl Paulun boroilʼlea chittincho bariksannen obheas kelo. Paulun boroilʼleo “thoddeo vostu somzonk kotthin asat” mhunn Pedrun manun ghetlem. (2 Ped. 3:15, 16) Torui, Pedru tancho obheas korit ravlo. Karonn teo somzonk ani apnnaunk Jehova apleak modot kortolo mhunn taka bhavarth aslo.—Hebrevank 5:14–6:1 vachat.

8. Pedruk Jehova thaun margdorxon mellʼllem tednam tannem kitem kelem?

⁸ Jehovachem margdorxon apnnaun, apleak kitlo bhavarth aslo tem Pedrun dakhoilem. Udharonnak, ek dis tannem ek dorxon polloilem. Tantunt oslim zonvaram aslim jim Moizesa udexim dilʼlea Kaidea pormonnem oxudʼdh aslim. Devdutan Pedruk tim mar ani kha mhunn sanglem. Punn oxem korop Judevank ekdom vittechem aslem dekhun, Pedrun mhunnttlem: “Na Dhonia, na, karonn hanvem kednanch koslinch mhellim ani oxudʼdh zonvaram khaunk nant.” Punn tea avazan taka sanglem: “Devan xudʼdh keleat tea vostunk tum mhelleo mhunnpachem bond kor.” (D.I. 10:9-15) Tea vellar Pedrun aplem chintop bodolʼlem ani Jehovachem nirdexon apnnailem. Hem amkam koxem kolltta? Tem dorxon polloilea uprant rokddech, Videxi Kornelan dhaddlole tin munis tachea lagim aile. Tannim Pedruk aplea dhonia lagim ieun uloi mhunn sanglem. Pedrun aplem chintop bodlunk naslem zalear, to kednanch eka Videxiachea ghora voicho naslo. Karonn Judev videxiank oxudʼdh mhunn lekhtale. (D.I. 10:28, 29) Punn Pedru rokddoch Kornelachea ghora gelo. Karonn to dorxonacho orth somzolo. Tem mhunnttlear, soglea lokank bori khobor mellʼlloli Jehovak zai aslem mhunn taka kollʼllem. (Mho. 4:18) Pedrun Kornel ani tachea ghorabeak bori khobor sangli tednam tannim sot apnnailem, tankam povitr xokti mellʼlli ani tannim bautizm ghetlo. Hem soglem polloun Pedru kitlo khuxal zalo astolo nhoi!—D.I. 10:44-48.

9. Bible-antlim kholaiechim sotam vollkhon ghetlolean khoinchea don vattamnim amkam faido zata?

⁹ Pedru bhaxen ami Bible-antlim mullavim sotam xikot ravonk zai. Karonn tim dudha bhaxen amkam ghottai ditat. Punn teach borabor, ami Bible-antlim kholaiechim sotam pasun somzon gheunchi goroz asa. Oxem korunk ami vell kaddunk zai ani vavr korit ravonk zai. Oxem kelʼlean, amkam don vattamnim faido zata. Poilem, Jehova vixim ami osleo vostu xiktolim, jea vorvim tachea pasot amcho mog ani resped vaddttolo. Ani dusrem, Jehova kitlo vorto ani mogall Dev asa, tem dusreank sangonk ami fuddem sortolim. (Rom. 11:33; Prok. 4:11) Pedru thaun ami anik ek lisanv xiktat: Bible-ache xikounne vixim kosli-i novi somzonni melltta tednam, ami amchea chintpant rokddoch bodlav korun ti manun gheunk toiar asonk zai. Oxem kelearuch, Jehova amkam margdorxon di-it ravonk pavtolo ani ami tachi seva visvaxiponnan korit ravonk pavtolim.

PAULUCHI DEKH GHEIAT ANI NOVI VAGNNUK APNNAIAT

10. Jehovak khuxal korunk ami kitem korunk zai? (Koloskarank 3:8-10)

¹⁰ Khuxal ravonk ani Jehova thaun margdorxon mellot ravonk, ami “novi vagnnuk” ghalunk zai. (Koloskarank 3:8-10 vachat.) Ani oxem korunk to amkam modot kortolo. Ti vagnnuk ghalunk vell ani vavr lagta. Hea vixim amkam apostl Pauluchem udharonn asa. Devak khuxal korunk to tornattponnar thaun khub vavr kortalo. (Gal. 1:14; Filp. 3:4, 5) Punn Devak manvota tea toren bhokti koxi korchi, tachi taka sarki somzonni nasli. Toxench, taka Jezu vixim sot khobor naslem ani to gorvixtt aslo dekhun to ‘Devachea lokam vixim vaitt uloitalo.’—1 Tim. 1:13.

11. Pauluk koslea oskotaie add zhuzonk poddlem? Somzaiat.

¹¹ Kristanv zaunchea poilim, Paulu ekdom gorom toklecho aslo. Itihas pustokant sanglam ki Paulu “Somiachea xisank dhomkaitalo ani tankam marun uddounk sodhtalo.” (D.I. 9:1) Kristanv zalea uprant pasun, aplea ragacher tabo dovrunk Paulun khub vavr kelo ani to pasiens dakhoupi ani doiall munis zalo. (Ef. 4:22, 31) Punn ek dis, Paulu ani Barnabasachem pottonaslem tednam tanchea modem “boroch vad-vivad zalo.” (D.I. 15:37-39) Tea vellar Paulu Jehovak manvota tea toren vagonk chuklo. Punn tannem soddun diunk na. Jehovachi maniotai melloun gheunk to eka orthan ‘aplea kuddik marit ravlo,’ mhunnche aplea oskotaiam add zhuzot ravlo.—1 Kor. 9:27.

12. Paulu novi vagnnuk kiteak ghalunk pavlo?

¹² Paulu khalti aslo. Tem mhunnttlear, to apleach bollacher patieunk na dekhun, to novi vagnnuk apnnaunk pavlo. (Filp. 4:13) To Pedru bhaxen ‘Dev dita tea xoktecher’ patielo. (1 Ped. 4:11) Punn thodde pavtti to chuklo ani niraxi zalo. Oslea vellar, Jehovan tachea pasot kitem kelam tea vixim tannem niall kelo. Oxem kelʼlean Jehovak manvota tem korunk tacho nichov anikui ghott zalo.—Rom. 7:21-25.

13. Ami Paulu thaun kitem xikonk zata?

¹³ Ami Paulu thaun kitem xikonk zata? Ami zaitea vorsam thaun Jehovachi seva kortat zalear pasun, novi vagnnuk ghalunk proitn korit ravonk zai. Ani ami chuklear, zoxem ami ragar zalear vo dusreank dukhoita toxem kitem-i mhunnttlear, amchea lagim novi vagnnuk ghalunk kednanch zaunchem na oxem ami chintchem nhoi. Tachea bodlek, ami bodlav korit ravonk proitn korunk zai. (Rom. 12:1, 2; Ef. 4:24) Oxem kortana ami hem ugddas dovrop mhotvachem. Novi vagnnuk apnnavop, ami nhestat tea kopddeam sarki nhoi. Karonn ami nhestat te kopdde amkam zai toxe xivonk zatat, punn novi vagnnuk apnnaitolim zalear, ami Jehovak zai toxe amchea bhitor bodlav korunk poddttole.

DAVIDACHI DEKH GHEIAT ANI JEHOVAK TUMCHI RAKHONN KORUNK DIAT

14-15. Jehova aplea lokanchi rakhonn koxi korta? (Stotr 27:5) (Chitr pasun polloiat.)

¹⁴ Ami khoreponnim khuxal astolim zalear, amkam Jehovachi rakhonn zai. Jehova koxe toren amchi rakhonn korta, ani tachi rakhonn mellonk ami kitem korunk zata?

¹⁵ Hea vixim amkam Raza Davidachem udharonn asa. Kotthin vellar pasun, Jehova apleachi rakhonn kortolo mhunn taka visvas aslo. (Stotr 27:5 vachat.) Aiz Jehova aplea lokanchi rakhonn koso korta? Tachea sangata amchi ixttagot sasnak piddʼddear zatoli toslea soglea dhokeam thaun to amkam rakhta. Karonn tannem bhas dilea ki amchea add ubarlolea khoincheach hotʼtearak zoit mellchem na. (St. 34:7; Iz. 54:17) Soitan, tache noxtte dut ani amkam dhumallo ditat te munis bollixtt asat tem khorem. Punn ami Jehovachi rakhonn ghetlear to amkam kainch zaunk diuncho na. Tannim amkam jivexim marlear pasun, Jehova amkam novea sonvsarant jivont kortolo. (1 Kor. 15:55-57; Prok. 21:3, 4) Toxench ami uskean buddon Jehovachi seva bond korina zaunk pasun to amchi rakhonn korta. (Mho. 12:25; Mt. 6:27-29) Tea bhair, kotthin poristhitint amkam urba ani bhuzvonn ditat toslim bhav-bhoinnam diun, toxench amchi kallji ghetat tosle vhoddil diun pasun to amkam rakhta. (Iz. 32:1, 2) Ani ami mittingek hajir zatat tednam Jehova amchi rakhonn korta teo anikui vatto ami xiktat.—Heb. 10:24, 25.

16. Jehovan Davidachi rakhonn koxi keli?

¹⁶ Davidan Jehovachi adnea pallʼlli tea meren to bore nirnnoi korunk pavlo ani khuxal aslo. Hea toren Jehovan tachi rakhonn keli. (Mhonnʼnneo 5:1, 2 sor korat.) Punn Jehovachi adnea moddli tednam, tacho vaitt porinnam taka bhogcho poddlo. (2 Sam. 12:9, 10) Thodde pavtti dusreank lagon tacher tras aile. Tednam Davidan kalliz uktem korun Jehova lagim magnnem kelem. Tea vellar, apunn tacho khub mog korta ani tachi kallji ghetolo mhunn Jehovan taka khatri dili. Oxe toren bhuzvonn diun Jehovan Davidachi rakhonn keli.—St. 23:1-6.

17. Ami Davida thaun kitem xikonk zata?

¹⁷ Davida bhaxen kitem-i korchea poilim, ami Jehova lagim magnnem korun tachi khuxi kitem asa tem zannam zaunk zai. Oxem kelʼlean ami bore nirnnoi gheunk pavtolim ani amchi rakhonn zatoli. Toxench, ami ugddas dovrunk zai ki Jehovachi adnea pallinant tednam amkam tras sosunk poddttole, ani Jehova te addauncho na. (Gal. 6:7, 8) Tea bhair, amkam her karonnank lagon tras sosunk poddttat tednam ami amchea kallzant asa tem soglem Jehovak sangonk zai ani to amchea kallzanchi ani chintnanchi rakhonn kortolo mhunn visvas dovrunk zai.—Filp. 4:6, 7.

JEHOVACHEM MARGDORXON GHEIT RAVAT

18. Amchea bhonvtonnim kosle lok asat, ani Jehovachem margdorxon gheit ravonk ami kitem korunk zai? (Chitram pasun polloiat.)

¹⁸ 2026 vorsachem vers asa: “Devachea margdorxonachi bhuk asa tim munxam khuxal.” Jehovachea margdorxonachi amkam poilim poros aiz chodd goroz asa. Karonn ami oslea lokam modem ravtat, zoim choddso lok Devachi vo tachea margdorxonachi goroz na mhunn chintʼtat. Thoddim zannam Dev asa mhunn mantat, punn tim apleak zai tea ritin bhokti kortat. Ani thoddim zannam munxanchea margdorxonacher patieun asat. Punn tanchea modlim konnui khuxal nant. Oslea lokancho probhav amcher poddona zaunk ami kitem korunk zai? Ami Bible-acho obheas korit ravon Jehova koddlean margdorxon gheunk zai, novi vagnnuk apnnaunk zai, ani Jehovachem aikon tachi rakhonn gheunk zai.