MARS 9-15, 2026
GIT 45 Mhojea Kallzachim Chintnam
Tumi Niraxiponna Add Zhuzonk Xoktat
“Kitlo lachar munis hanv!”—ROM. 7:24.
MUKHEL MUDʼDO
Niraxiponna add zhuzonk kitem korchem?
1-2. Apostl Pauluk thodde pavtt koxem bhoglem, ani tachea udharonnantlean amkam kiteak faido zaunk xokta? (Romkarank 7:21-24)
APOSTL Pauluchem nanv aikotanch tumchea monant kitem ieta? Tannem dhiran mixinori seva keli, to ekdom boro xikoupi aslo vo tannem Bible-antlim zaitim pustokam boroilim hem tumchea monant ieit. Ani hem khorem zaun asa. Punn thodde pavtti to pasun niraxi zalo. Tor taka amcheach sarkim bhavnam aslim.
2 Romkarank 7:21-24 vachat. Tannem Romkarank boroilʼlea chittint apleak koxem bhogta tem sanglem. To visvaxiponnan Jehovachi seva kortalo ani kallzantlean Jehovacheo adnea pallunk sodhtalo. Punn opurnn aslolean taka tachea vaitt vondovnneam add zhuzon Devak zai tem korunk khub vavr korcho poddlo. Toxench, Kristanv zaunchea poilim tannem jim vaitt kamam kelʼlim taka lagon to niraxi zatalo. Tea bhair, taka khub temp poriant eke umkech oddchonnecho fuddo korunk poddlo. Amchea modlea zaitea zannank Paulu bhaxenuch bhogta astolem.
3. Hea lekhant ami khoinchea prosnanche zobab polloitolim? (“Utrachi Somzonni” pasun polloiat.)
3 Thodde pavtt Paulu niraxia zatalo tem khorem. Punn jea karonnank lagon to niraxi zatalo, tea vixim to chintit ravonaslo. Hea lekhant ami hea prosnanche zobab polloum-ia: Paulun apleakuch “lachar” kiteak mhunnttlo? Niraxiponna add zhuzonk tannem kitem kelem? Ani ami niraxiponna add zhuzonk kitem korunk zata?
PAULU KITEAK NIRAXI ZALO?
4. Paulu kiteak niraxi zalo?
4 Tannem adim kelʼlea vaitt kamank lagon. Paulu Kristanv zaunchea poilim, taka Saulu mhunn vollkhotale ani tannem zaitim vaitt kamam kelʼlim. Zoxem, Istevak jivexim marunk tannem maniotai dilʼli. (D.I. 7:58; 8:1) Toxench, to Kristanvank khub dhumallo ditalo ani tanchea sangata krur toren vagtalo.—D.I. 8:3; 26:9-11.
5. Apostl Paulun adim kelʼlea vaitt kamank lagon taka koxem bhogtalem?
5 Apostl Paulu Kristanv zalea uprant tannem adim kelʼlea vaitt kamank lagon to niraxi zatalo. Ani vorsam gelim toxim tachem niraxiponn vaddlem astolem ani taka apleachich loz disonk lagli zait. Oxem ami kiteak mhunnonk zata? Sumar 55 K.X.-ant tannem Korintkarank boroilʼlea poile chittint oxem mhunnttlem: “Ek apostl mhunnonk pasun hanv purto na, karonn hanvem Devache sobhek dhumallo dila.” (1 Kor. 15:9) Sumar panch vorsam uprant Efezkarank boroilʼle chittint, apunn “Devachea lokam modem sogleant lhan asa” mhunn tannem sanglem. (Ef. 3:8) Ani Timotak boroilʼlea chittint tannem mhunnttlem ki poilim to ‘Devachea add uloupi, tachea lokank dhumallo diupi ani tanchea vixim vaitt uloupi munis aslo.’ (1 Tim. 1:13) Tor sobhank bhett ditana, tannem dhumallo dilʼlim munxam vo tanchea familintlim taka mellttalim tednam taka koxem bhogtalem tea vixim tumi chintunk zata.
6. Paulu niraxi zaunk anik ek karonn kitem aslem? (Futtnott pasun polloiat.)
6 Tachea kuddint ek kantto toplolo. Khoinchea tori karonnak lagon taka khub tras zatale mhunn Paulun sanglem. Ani dekhun tannem oxem mhunnttlem: “Mhojea kuddint ek kantto toplolo asa.” (2 Kor. 12:7) Taka kiteak tras zatale tem tannem ukteponnim sangonk na, punn tachea utrantlean oxem dison ieta ki taka ek duens aslem vo khoinchea tori karonnak lagon to khub usketalo.b
7. Opurnntaiek lagon Pauluk kitem korunk kotthin zalem? (Romkarank 7:18, 19)
7 Tachea opurnntaiek lagon. Aplea chukink lagon Paulu khub niraxi zatalo. (Romkarank 7:18, 19 vachat.) Taka kitem sarkem asa tem korunk zai aslem, punn thodde pavtti to toxem korunk pavonaslo. Torui, sarkem tem korit ravonk tannem khub vavr kelo. (1 Kor. 9:27) Punn to oxem korunk xokonaslo tednam to kitlo niraxi zalo astolo tem ami chintunk zata!
NIRAXIPONNA ADD ZHUZONK PAULUN KITEM KELEM?
8. Aplea oskotaiam add zhuzonk Paulun kitem kelem?
8 Kuddicheo itsa pois korunk Devachi povitr xokti Kristanvank koxi modot korunk xokta, tea vixim Paulun niall kelo mhunn tachea chittintlean kolltta. (Rom. 8:13; Gal. 5:16, 17) Jehovak manvota tem korunk tannim koslim kamam korunk zainant tea vixim Paulun zaite pavtti boroilem. (Gal. 5:19-21, 26) Hem dakhoun dita ki Paulun apleak kosleo oskotaieo asat tacher dhean dilem, tea oskotaiam add zhuzonk Devachea Utrant kosle solʼle dileat tea vixim sodh kelo, ani teo pois korunk to koslim panvlam ghetolo tea vixim chintlem. Tor Paulun dusreank dilʼle solʼle svota apnnaile mhunn kainch dubhav na.
9-10. Niraxi aslear pasun khuxal ravonk Pauluk koxi modot zali? (Efezkarank 1:7) (Chitr pasun polloiat.)
9 Paulu thodde pavtti niraxi aslo tem khorem, punn zaitea vostunk lagon to khuxal aslo. Zoxem, poixilʼlea sobham vixim bori khobor aikonk mellttali tednam to khuxal zatalo. (2 Kor. 7:6, 7) Toxench bhav-bhoinnam sangata tachi bori ixttagot asli. (2 Tim. 1:4) Tea bhair to Jehovak manvololo asa mhunn taka khatri asli dekhun to “nitoll ontoskornnan” tachi seva kortalo. (2 Tim. 1:3) Itlench nhoi, Romant koidi astana pasun “Somiachea ekvottant sodanch khuxal ravat” mhunn tannem bhav-bhoinnank sanglem. (Filp. 4:4) Hantuntlean kollon ieta ki niraxi kortat toslea vostum vixim Paulu chintit ravonk na. Ani oslim chintnam ailear pasun to rokddoch borea vostuncher dhean ditalo.
10 Khuxal ravonk Pauluk anik koxi modot zali? Tannem ugddas dovorlem ki Jehova tacho mog korta ani tachea pasot tannem aplea Putachem bolidan dilam. (Gal. 2:20; Efezkarank 1:7 vachat.) Jezuchea bolidana udexim Jehovan tachim adlim patkam bhogxileant ani fuddarakui bhogxitolo mhunn taka khatri asli. (Rom. 7:24, 25) Tea pasot to khuxalkaien Jehovachi ‘povitr seva korit ravonk’ pavlo.—Heb. 9:12-14.
Adlea chukink lagon Pauluk thodde pavtt khub niraxi zatalo, punn soddvonne vixim chintlolean taka tim chintnam pois korunk modot zali (Peregraf 9-10 polloiat)
11. Pauluchea udharonnantlean amkam urba kiteak melltta?
11 Amkam pasun Paulu bhaxen Jehovak manvona toslem chintop, utram vo vagnnuk pois korunk khub kotthin zait. Ani hea karonnak lagon ami pasun lachar asat oxem amkam disot. Hea vixim amkam bhoinn Eliza-chemc udharonn asa. Ti sangta: “Paulu vixim chintlolean mhaka urba melltta. Karonn hanv ekttench niraxiponna add zhuzona mhunn mhaka kolltta. Toxench, Jehova amchi poristhiti bore bhaxen somzota mhunn mhaka kolltta.” Tor niraxi aslear pasun Paulu bhaxen khuxal ravonk ani nitoll ontoskornnan Jehovachi seva korunk ami kitem korunk zata?
NIRAXIPONNA ADD ZHUZONK AMI KITEM KORUNK ZATA?
12. Anikui khuxalkai mellonk ami kitem korit ravonk zai?
12 Jehovak lagim soronk modot kortat teo vostu ami korit ravonk zai. Hea vixim chintat, ami bholaikek boreak poddtta toslem jevonn jevtat, exercise kortat ani favo ti nhid ghetat tednam amchea jivak borem dista. Teach bhaxen, ami dor disa Bible vachtat, porgottnnent bhag ghetat, mittinge pasot toiari kortat, mittingek hajir zatat, ani thoim zobab ditat tednam amkam urba melltta. Ani heo vostu korit ravlear, niraxi kortat toslim chintnam pois korun borea vostuncher dhean diunk amkam modot zatoli, ani amkam anikui khuxalkai mellttoli.—Rom. 12:11, 12.
13-14. Jehovak lagim soronk modot kortat teo vostu korit ravlolean thoddea bhav-bhoinnank koso faido zalo?
13 Bhav John-achea udharonnacher dhean diat. To 39 vorsancho astana, dotoran sanglem ki taka cancer zala. Hem aikon to khub bhielo ani niraxi zalo. To chintunk laglo, ‘Hanv tor azun tornatto asa. Mhaka koso cancer zaunk xokta?’ Tednam tacho put fokot tin vorsancho aslo. Oslea vellar, niraxiponn pois korunk John-ak koxi modot zali? To sangta: “Hanv khub thoklear pasun, amchi famil dor eke mittingek hajir zatali, dor sumanak porgottnnek voitali ani chukonastana kuttumbik bhokti kortali mhunn hanv khatri kortalom. Oxem korop sompem naslem, torui ami tem kelem.” Jehovan taka koxi modot keli hea vixim to sangta, “Okosmat kitem-i vaitt ghoddtta tednam khub vhoddlo dhoko bosta. Punn tea vellar Jehova rokddoch amkam goroz ti xokti dita ani amcho mog korta mhunn khatri dita mhunn hanvem polloilem. Jehovan mhaka modot kelea toxi to tumkam-i kortolo.”
14 Ami poilim uloilʼli bhoinn Eliza mhunntta: “Dor ek pavtt hanv mittingek voitam ani svotacho obheas korta tednam, Jehova mhojem magnnem aikota ani mhozo mog korta mhunn mhaka khatri zata. Hem zannam zalʼlean mhaka khuxalkai melltta.” Bhav Nolan ani tachi bail Diane Afrikent sorkittachem kam kortat. Bhav sangta: “Niraxi aslear pasun, ami magnnem, Bible obheas, mitting ani porgottnni korop chukoinant. Oxem kelʼlean, sarkem chintop dovrunk ani khuxal ravonk Jehova amkam modot korta. Ami sodanch hem ugddas dovrunk proitn kortat ki kitem-i zaum, Jehova amkam modot kortolo ani besanvam ditolo. To hem koso kortolo tem ami nokllo, punn to kortoloch!”
15. Niraxiponna add zhuzonk amkam anik kitem korunk poddot? Ek udharonn diun somzaiat.
15 Niraxiponn pois korunk amkam anikui thoddeo vostu korunk poddot. Hem somzonk hea vixim chintat, tumchi fatt dukhta dekhun tumi konnakui malish korunk sangtat. Punn titlench kelear puro nhoi, tumchi fatt kiteak dukhta tem zannam zaunk tumkam sodh korunk poddot ani dotora lagim pasun ulounk poddot. Teach toren niraxiponna add zhuzonk kitem korchem tem zannam zaunk amkam Bible ani Bible adarit prokaxonamnim sodh korunk poddot ani sotant ghott aslolea Kristanvam lagim pasun ulounk poddot. Toxench ami anik kitem korunk zata tem polloum-ia.
16. Niraxiponnachem karonn zannam zaunk tumi kitem korunk zata? (Stotr 139:1-4, 23, 24)
16 Magnnem korun niraxiponnachem karonn zannam zaunk proitn korat. Jehova apleak ekdom bore toren vollkhota mhunn Raza Davidak khobor asli. Tea pasot apleak niraxi kortat toslim chintnam kiteak asat tem zannam zaunk modot kor mhunn tannem Jehova lagim maglem. (Stotr 139:1-4, 23, 24 vachat.) Ami pasun oxench korunk zata. Amchea niraxiponnachem karonn zannam zaunk ani tacho fuddo korunk ami Jehova lagim modot magonk zata. Toxench, ami amkanch osle prosn vicharunk zatat: ‘Mhojea niraxiponnachem karonn kitem? Oxem kitem tori asa jem mhaka niraxi korta? Niraxiponnachim chintnam monant ietat tednam, tim rokddinch pois korchea bodlek hanv tem chintit ravtam kai?’
17. Niraxiponn pois korunk ami khoinchea vixoi-ancher sodh korunk zata? (Chitr pasun Polloiat.)
17 Tumkam faideak poddttat toslea vixoi-ancher sodh korat. Vella-vellar, Jehovachea gunnancher sodh kelʼlean tumkam faido zaunk xokta. Zoxem, soddvonnecher ani Jehova thaun melltta tea bhogsonnea vixim niall kelʼlean apostl Pauluk faido zalo. Toxench, tumi-i korunk zata. Tumi Research Guide for Jehovah’s Witnesses, Watch Tower Publications Index, vo her prokaxonamnim Jehovache gunn zoxem tachi doia, bhogsonnem ani visvaxi moga vixim sodh korunk zata. Tumkam faideak poddttole tosle lekh mellttat tednam tanchem ek list korun sompeponnim dixtti poddttolem thoim dovrunk zata. Uprant, kednam-i Tumchea monant niraxiponnachim chintnam ietat tednam tea list-ar aslolea lekhancho obheas korunk zata ani tantuntlim lisanvam apnnaunk proitn korunk zata.—Filp. 4:8.
Niraxiponna add zhuzonk modot zatoli toslea vixoi-ancher obheas korat (Peregraf 17 polloiat)
18. Thoddea Kristanvank koslea vixoi-ancher obheas kelʼlean faido zala?
18 Ami poilim uloilʼli bhoinn Eliza-n, Jobachea udharonnacher obheas kelo. Ti sangta: “Mhaka ekach vellar zaitea oddchonneancho fuddo korunk poddlo. Tor hanvem Jobachea udharonnacher obheas kelo. Tacher eka-fattlean-ek zaite tras aile ani to khub niraxi zalo. Tacher tras kiteak aileat ti taka khobor nasli, torui tannem Jehovacher patieunk bond korunk na.” (Job 42:1-6) Toxench ami poilim uloilʼli bhoinn Diane sangta: “Hanv ani mhozo ghov, Draw Close to Jehovah, hea pustokacher obheas kortat. Hantuntlean amkam kollon ailem ki ek kumbhar zoso matiek akar dita, teach bhaxen, Jehova amkam-i akar dita. Tor amchea chukink lagon niraxi zaunchea bodlek Jehova amkam akar dita ani anikui borim munxam zaunk modot korta mhunn ami ugddas dovortat. Oxem kelʼlean ami taka anik lagim soronk pavtat.”—Iz. 64:8.
JEHOVA AMKAM MODOT KORTOLO ANI BESANVAM DITOLOCH
19. Thodde pavtti amkam koxem disot, punn ami kosli khatri dovrunk zata?
19 Hea lekhant xikleant tem soglem apnnailear pasun ami thodde pavtti niraxi zait ani ami lachar asat oxem amkam disot. Torui Jehovachea modotin ami niraxiponna add zhuzonk xoktat. Toxench, Jehova sangata amchi bori ixttagot asa ani ami taka manvololim asat hem zannam zaun ami amche choddxe dis khuxalkaien sartolim mhunn ami khatri dovrunk zata.
20. Tumi kitem korunk ghott nichov kela?
20 Amchea adlea chukink lagon, oddchonneank lagon, vo opurnntaiek lagon ami niraxiponnant buddchimnant mhunn ami ghott nichov korum-ia. Karonn oslea poristhitint Jehova amkam samballttolo. (St. 143:10) Ami tea disachi axeun vatt pollounk zata jednam amkam borea vostuncher dhean diunk chodd vavr korunk poddchona. Karonn tea vellar amchea monant kednanch niraxiponnachim bhavnam ieunchim nant ani ami khuxalkaien amcho mogall Bap Jehovachi seva korunk pavtolim!
GIT 34 Visvaxiponnan Hanv Choltam
a UTRANCHI SOMZONNI: Hea lekhant zoim “niraxi” vo “niraxiponn” him utram uzar keleant thoim ami depression-a vixim uloinant zaka lagon eka munxak dotorachi goroz poddot.
b Pauluchea chittintlean oxem dista ki taka ghoddie sarkem dixtti poddonaslem. Tea pasot sobhank chitteo borounk ani porgottnni korunk taka kotthin zatalem astolem. (Gal. 4:15; 6:11) Vo tannem thoddea khottea xikoupeank lagon toxem mhunnttlolem zait. (2 Kor. 10:10; 11:5, 13) Punn karonn kitem-i asum tea pasot Paulu ek-ek pavtti khub niraxi zatalo mhunn ami zannant.
c Thoddim nanvam bodolʼleant.