Amkam Soddvonnechi Goroz Kiteak Asa?

1-2. Amkam kitea thaun salvar zaunk zai, ani kiteak? (Romkarank 7:22-24) (Chitr pasun polloiat.)

HEA vixim chintat. Ek bildding kosollʼllam ani tantunt ek munis xirkon urla. To jivo asa punn tachea lagim tantuntlean bhair soronk zaina. Tannem fokot apleak salvar kor mhunn bob marunk zata ani konnui apleak modot kortolo mhunn bhorvonso dovrunk zata.

² Amchi poristhiti pasun tea munxa sarkich asa. Koxi? Adanvan Devachi adnea moddli tednam to patki zalo ani ami tachi sonsot zalʼlean ami-i patki zalim. To munis tea bilddingant xirkon urlolo toso, ami pasun patkant xirkon urleant ani ami amkanch tantuntlean bhair kaddunk xokonant. Patkak lagon apli poristhiti koxi asa tea vixim apostl Paulun Romkarank boroilem. (Romkarank 7:22-24 vachat.) Tannem mhunnttlem: “Morta tea mhojea hea kuddi thaun mhaka konn soddoitolo?” Adanva thaun mellʼllolea patkant Paulu xirkololo aslo, jem taka mornnak pavoitalem. (Rom. 6:23) Amchi poristhiti pasun toxich asa. Patkantlean ani mornnantlean salvar zaunk amkam pasun modot zai.

3. Soddvonne udexim amkam koso faido zata?

³ “Morta tea mhojea hea kuddi thaun mhaka konn soddoitolo” oxem vicharlea uprant, Paulu tacho zobab dita. To mhunntta: “Somi Jezu Krista udexim Devache upkar!” (Rom. 7:25) Tor Paulu hanga Jezuchea soddvonnea vixim uloitalo. Soddvonne udexim amkam (1) bhogsonnem melltta, (2) fuddarak poripurnn zauncho bhorvonso melltta, ani (3) ami porot Jehovachim ixttam zaunk xoktat. Hea lekhant ami hea mudʼdeancher dhean ditolim. Oxem kelolean, “bhorvonso diupi Dev” Jehova pasot amcho mog anikui vaddttolo. (Rom. 15:13) Toxench, Jezu pasot amchem upkariponn vaddttolem. Karonn Jehovan amkam “tachea udexim soddvonn diun . . . suttka dili.”—Kol. 1:14.

SODDVONNE UDEXIM AMKAM BHOGSONNEM MELLTTA

4-5. Amkam sogleank soddvonnechi goroz kiteak asa? (Upodexok 7:20)

⁴ Patkanchem bhogsonnem mellonk amkam soddvonnechi goroz asa. Dor ek munis opurnn aslolean, ami utramnim ani korneamnim patok adartat. (Upodexok 7:20 vachat.) Thoddim patkam ekdom gombhir astat. Udharonnak, Moizesa udexim dilʼlea Kaidea pormonnem, pordvar vo khun korta tea munxak moronn favo aslem. (Lev. 20:10; Lok. 35:30, 31) Punn zaitim patkam titlim gombhir asonant. Torui tem patok zaun asa. Udharonnak, stotrkar Davidan mhunnttlem: “Chotraien hanv choltolom mhollem hanvem ani mhoje jibek mhaka patkank ghalunk diuncho na.” (St. 39:1) Tor ami utramnim pasun patok adarunk xoktat.—Jak. 3:2.

⁵ Tumi mhunnonk zainaslem toslem kitem tumi mhunnttlam kai? Vo tumi oxem kitem kelam kai, jea vixim tumkam atam vaitt dista? Ami sogleamnim oxem kitem mhunnttlam vo kelam mhunn dubhav na. Karonn Bible sangta: “‘Amchea bhitor patok na,’ oxem ami mhunnttat zalear, ami amkanch fottoitat ani sot amchea bhitor na.”—1 Ju. 1:8.

6-7. Jehova kiteachea adarit amchim patkam bhogsunk xokta? (Chitr pasun polloiat.)

⁶ Neai korpi Dev zalʼlean, Jehova kiteachea adarit amchim patkam bhogxita? Amchim patkam bhogsunk tannem soddvonnechi manddavoll kelea. (Ef. 1:7) Punn hacho orth, to bexttinch amchim patkam bhogxita oxem nhoi. Karonn, to patkancho dves korta.—Iz. 59:2.

⁷ Moizesa udexim dilʼlea Kaidea pormonnem, patkanchem bhogsonnem mellonk Izraelitkaramnim zonvaranchim bolidanam diunk zai aslim. (Lev. 4:27-31; 17:11) Ani him bolidanam fuddarak Jezu diuncho aslo tea bolidanak suchit kortalim, jea vorvim munxakullak zaitim besanvam mellttolim aslim. Tor Jezuchea bolidana adarit Jehova amchim patkam bhogsunk xoktalo. Hem bolidan kitlem valorachem asa tem apostl Paulu somzolo. Hem tannem Korintkarank boroilʼlea chittintlean kolltta. Tannim adim kelʼlea vaitt kamam vixim sanglea uprant, apostl Paulun tankam oxem sanglem: “Tumkam dhuvun xudʼdh keleat, povitr keleat. Ani amchea Somi Jezu Kristachea nanvan ani amchea Devachea povitr xokten tumkam nitivont lekhleat.”—1 Kor. 6:9-11.

8. Ugddas Disachea thoddea sumanam poilim tumi kitea vixim niallunk zata?

⁸ Ugddas Disachea thoddea sumanam poilim soddvonnek lagon amchem jivit kitlem borem zalam tacher niallunk ami vell kaddunk zai. Udharonnak, soddvonnek lagon ami poschatap kelʼlea patkanchem amkam bhogsonnem mellʼllam. Tor tea patkam vixim chintit ravon ami niraxi zaunchi goroz na. Torui amkam guneanvkari bhavnam asat zalear kitem? Tumi ghoddie oxem chintʼtat astolim, ‘Jehova mhaka bhogsunk xokta mhunn hanv zannam, punn hanv mhaka kednanch bhogsunk xokona.’ Oxem tumkam dista zalear ugddas dovrat ki bhogsunchem kam Jehovachem asa ani neai korcho odhikar tannem aplea Putak dila. Tor konnank bhogsunchem ani konnank nhoi, to odhikar tannem tumkam vo her konnui munxak diunk na. Bible sangta: “Zoso [Jehova] svota uzvaddant asa toxim ami-i uzvaddant cholot ravlim zalear, . . . tachea Putachem, mhunnche, Jezuchem rogot amkam soglea patkam thaun dhuvun xudʼdh korta.” (1 Ju. 1:6, 7) Ami Bible-achea her xikounneancher dovortat titloch bhorvonso ami hea utrancher dovrunk zata. Soddvonnek lagonuch amkam bhogsunk Jehovak odhikar asa. Ani Bible sangta ki to amkam “bhogsunk toiar asa.”—St. 86:5, NW.

SODDVONNEK LAGON AMKAM FUDDARAK PORIPURNN ZAUNCHO BHORVONSO MELLTTA

9. Bible-ant “patok” hea utracho orth kitem? (Stotr 51:5)

⁹ Bible-ant, “patok” hem utor ami kortat tea vaitt kamankuch nhoi, punn amkam zolma thaun mellʼllolea opurnntaiek pasun lagu zata. (Stotr 51:5 vachat.) Opurnntaiek lagon amchea monant vaitt chintnam ietat ani ami vaitt kamam kortat. Toxench Jehovan amkam jea toren kam korunk rochlim, tea toren ami kam korunk xokonant. Hea pasot ami duent ani zannttim zatat ani mortat. Haka lagon lhan ballkam, zannim koslench patok korunk na tim pasun duent zaun kiteak mortat tem ami somzonk xoktat. Itlench nhoi, vaitt toxench borea munxank tras sosun kiteak moronk poddtta tem amkam kollon ieta. Tor Adanva thaun mellʼllolea patkak lagon ami soglim hea vaitt poristhitint asat.

10. Patok kelea uprant Adanv ani Evek koxem bhoglem?

¹⁰ Patok kelea uprant, Adanv ani Evek koxem bhoglem tea vixim chintat. Patok kortanch tanchem ontoskornn tankam sotaunk laglem. (Rom. 2:15) Tem mhunnttlear, tannim kitem tori chuk kelea oxem tankam disonk laglem. Apli kudd dhampunk ani Deva thaun liponk tankam dislem. (Ut. 3:7, 8) Patok kelea uprant poilech pavtti tim guneanvkari asat oxem tankam bhoglem, tankam loz disli, ani khub usko zalo. Ani him bhavnam tankam morosor aslim.—Ut. 3:16-19.

11. Opurnn aslolean amchi poristhiti koxi asa?

¹¹ Opurnn aslolean amkam-i guneanvkari bhavnam ietat, loz bhogta ani usko zata. Toxench amkam dukh-tras sosunk poddttat. Amchi poristhiti sudharunk vo oddchonneo ani tras pois korunk ami kitle-i proitn kelear pasun, ami te purnn toren kaddun uddounk xokonant. Karonn Bible sangta ki Adanv ani Evechea patkak lagon amkam oddchonneo astoleoch. (Rom. 8:20) Ani hem amchea vixinch nhoi, punn soglea munxakulla vixim pasun khorem zaun asa. Udharonnak, zaito lok prithumecho samball korunk, toxench hinvsa, goribi, ani zhuzam kabar korunk proitn kortat. Thoddea babtint tankam ies mellʼllam, punn tim heo oddchonneo purnn toren suttaveo korunk xokonant. Punn soddvonne udexim amkam khoro bhorvonso melltta. To koslo?

12. Soddvonne udexim amkam koslo bhorvonso melltta?

¹² Soddvonne udexim amkam bhorvonso melltta ki “rochnna anik fuddem patkachi ani mornnachi gulam aschi na. Tika . . . svotontrtai mellttoli.” (Rom. 8:21) Hacho orth, sobit bagent ami poripurnn zatolim tednam, ami porot kednanch duent zaunchimnant vo amkam dukh-tras sosunk poddchenant. Toxench, amkam guneanvkari bhavnam aschimnant, loz bhogchina ani usko zaunchona. Tea bhair “Xanticho Kunvor” Jezu, zannem amchea pasot aplo jiv bolidan kelo to raz choloitolo. Tor ami svota zaun jeo oddchonneo suttaveo korunk xokonaslim, teo to amchea pasot suttaveo kortalo.—Iz. 9:6, 7.

13. Ugddas Disachea thoddea sumanam poilim ami anik kitea vixim niall korunk zata?

¹³ Tumi opurnn aschimnant tea vellar tumchem jivit koxem astolem tem chintat. Dor sokallim uttʼttana tumchea jivak borem distolem, ani tumi toxench tumchim mogachim bhuken urtolim vo duent zatolim vo mortolim mhunn tumi usko korchi goroz poddchina. Toxench, fuddarachea bhorvonxea vixim chintunk vell ghetlolean atam pasun tumcho usko pois korunk tumkam modot zatoli. Zoso ek nangor boat-ik thir dovrunk xokta, teach bhaxen amcho bhavarth ghott dovrunk ani amcher ietat tea trasancho fuddo korunk amcho bhorvonso amkam modot korunk xokta. (Heb. 6:18, 19) Khorench, ‘zo konn taka kallzantlean sodhta taka Jehova inam ditolo’ mhunn ami visvas dovrunk zata. (Heb. 11:6) Tor soddvonnek lagonuch amkam atam bhuzvonn melltta ani fuddara pasot ek bhorvonso melltta.

SODDVONNE UDEXIM AMI POROT JEHOVACHIM IXTTAM ZAUNK XOKTAT

14. Patkak lagon kitem porinnam zalo, ani kiteak?

¹⁴ Adanv ani Even patok kelem tednam tim ani soglim munxam Deva thaun pois gelim. Bible-ant oxem-i sanglam ki ami Devachim dusmanam zalim. (Rom. 8:7, 8; Kol. 1:21) Karonn Jehova poripurnn asa ani taka patok matui manvona. Bible-ant Jehova vixim oxem boroilam: “Tuje dolle itle xudʼdh asat ki tum vaittponn pollounk xokona, Ani noxtteponn tujean sosunk zaina.” (Hab. 1:13) Patkak lagon ami Deva thaun pois gelim dekhun, porot tachea lagim ieunk, mhunnttlear tachea sangata amchem natem porot zoddunk soddvonnechi goroz asa.

15. Soddvonnek lagon kitem zaunk pavlem?

¹⁵ Bible sangta ki Jezu “amchea patkam pasot oslem bolidan zaun asa, jem amkam Deva lagim porot xanti melloun gheunk modot korta.” (1 Ju. 2:2) ‘Porot xanti melloun gheunk bolidan,’ hea utrank jem Grik utor uzar kelʼlem tacho orth, “Jehovak khuxal korop” pasun asa. Tor soddvonnek lagon Jehova koso khuxal zalo? To aplea Putachea mornnak lagon khuxal zalo oxem nhoi, punn Jezuchea bolidanachea adarit munxank tachea sangata porot natem zoddunk ek vatt ukti zali dekhun to khuxal zalo. (Rom. 3:23-26) Itlench nhoi, Jezu morchea poilim visvaxiponnan Jehovachi seva kortalim tea munxank pasun Jehova nitivont mhunn lekhunk xoklo. (Ut. 15:1, 6) Koso? Aplo Put soddvonn ditoloch mhunn Jehovak khatri asli dekhun to oxem korunk xoklo. (Iz. 46:10) Tor soddvonne udexim munxank porot Jehovachim ixttam zaunk sondhi mellʼlli.

16. Ugddas Disachea thoddea sumanam poilim ami anikui kitea vixim niall korunk zata? (Chitr pasun polloiat.)

¹⁶ Soddvonnek lagon ami Jehova sangata porot natem zoddunk pavleant. Hea vixim chintun kitlem borem dista nhoi! Zoxem Jezun sanglolea pormonnem ami Jehovak amcho ‘Bap’ mhunnonk xoktat. (Mt. 6:9) Ghoddie ami taka amcho “Ixtt” pasun mhunnttat. Punn ugddas dovrat, oxem ami khub respedan ani khaltikaien korunk zai. Karonn patkak lagon ami amchea bollan Deva sangata natem kednanch zoddunk pavchim naslim. Fokot soddvonnek lagon ami Jehova sangata natem zoddunk pavleant. ‘Krista udexim, mhunnche, tannem trasanchea khambear jem rogot varoilʼlem tea rogta udexim Dev sogleam sangata xanti korunk xoklo.’ (Kol. 1:19, 20) Khorench, opurnn aslear pasun soddvonnek lagon ami Devachim ixttam zaunk xoktat.

SODDVONNE UDEXIM JEHOVA KHUB DOIALL MHUNN KOLLTTA

17. Jehova doien bhorlolo asa mhunn soddvonne udexim koxem kolltta? (Efezkarank 2:4, 5)

¹⁷ Soddvonne udexim Jehova “doien bhorlolo asa” mhunn kolltta. Karonn ‘ami amchea patkank lagon melolim aslim tednam tannem amkam jivont kelim.’ (Efezkarank 2:4, 5 vachat.) Ami poilim polloilʼlem toxem, tea moddlolea bilddingant xirkolʼlea munxa bhaxen, ‘sasnik jivit favo aslolo lok,’ tim patkant xirkolʼlim asat ani tantuntlean salvar zaunk tankam konnanchi tori modot zai mhunn vollkhon ghetat. Tor tim modoti pasot bob martat. (D.I. 13:48) Ani Jehova bore khobre udexim tankam modot korta, jea vorvim tim Jehovachi ani Jezuchi vollokh gheunk pavtat. (Ju. 17:3) Tor Adanv ani Evechea patkak lagon Jehovacho udʼdhex purnn zaunchona oxem Soitanan chintlolem zalear, tachem hem chintop kitlem chukichem aslem nhoi!

18. Soddvonne vixim niall kortana ami kitem ugddas dovrunk zai?

¹⁸ Soddvonne vorvim amkam koso faido zata tea vixim niall kortana, Jehovan soddvonnechi manddavoll kiteak keli tachem mukhel karonn ami ugddas dovrunk zai. Tannem amkam salvar korunkuch nhoi, punn Soitanan Eden bagent tacher ghatlolo arop suttavo korunk pasun hi manddavoll keli. (Ut. 3:1-5, 15) Soddvonne udexim Jehova aplem nanv povitr korta. Mhunnche, tachea nanvak laglolo dag pusun kaddtta. Toxench, amkam patkantlean ani mornnantlean salvar korun apunn ek mogall Dev mhunn to puravo dita. Ani ami patki aslearui tachea favo naslole doiek lagon Soitanan tachea vixim jem sanglam tem sogleo fott mhunn dakhoun diunk to amkam sondhi dita. (Mho. 27:11) Tor soddvonne pasot ami upkari asat mhunn koxem dakhounk zata tem fuddlea lekhant polloum-ia.