Soddvonne Pasot Tumi Upkariponn Koxim Dakhoitolim?

1-2. Jezun amchea pasot zo mog dakhoila tea pasot ami kitem korunk zai, ani kiteak? (2 Korintkarank 5:14, 15) (Chitr pasun polloiat.)

KOSLLON poddlolea bilddingant tumi xirkon urleant ani tantuntlean tumkam konnui salvar korta zalear, tea munxa vixim tumkam koxem distolem? Tannem zaitea zannancho jiv salvar kelear pasun, tumi taka khub upkari asat ani tannem kelam tem kednanch visorchimnant mhunn taka sangonk sodhtolim nhoi!

² Fattlea lekhant ami polloilem toxem, ami amkanch patok ani mornna thaun soddounk xokonant. Punn Jezuchea bolidana udexim, (1) amkam patkanchem bhogsonnem melltta, (2) fuddarak poripurnn zauncho bhorvonso melltta, ani (3) Deva sangata porot ixttagot korunk sondhi melltta. Ani hea soglea vorvim amkam novea sonvsarant sasnak jieuncho bhorvonso melltta. Khorench, soddvonne udexim Jezu amcho kitlo mog korta tem amkam kolltta. Hea prithumer ieunchea poilim thaun to amcho mog kortalo. (Mho. 8:30, 31) Dekhun apostl Paulun mhunnttlem: “Kristacho mog amkam fuddem kaddit asa.” (2 Korintkarank 5:14, 15 vachat.) Mhunnttlear, Jezun amkam zo mog dakhoila tea pasot ami upkariponn dakhounk zai ani tannem amchea pasot jem kelam tem ami kednanch visronk zaina.

3. Amchea modlo dor eklo soddvonne pasot veg-veglle toren upkariponn kiteak dakhoit?

³ Tumi soddvonne pasot upkari asat mhunn koxem dakhoitolim? Amcho zonn ekleacho zobab veg-vegllo asot. Kiteak? Hem somzonk hea vixim chintat. Tin munxam ekuch zagear vochonk sodhtat. Punn tim tigaim veg-vegllea xarant asat. Tor tim veg-vegllea vatte thaun provas kortolim. Teach bhaxen, ami soddvonne pasot koxem upkariponn dakhoitolim tem ami (1) Bible vidʼdhearthi asat, (2) bautizm ghetlolim porgottnnaram asat, vo (3) Jehova thaun pois gelʼlim menddram asat, tacher tharlolem asa. Tor hea tinui zomeamnim soddvonne pasot koxem upkariponn dakhounk zata tem ami hea lekhant polloitolim.

BIBLE VIDʼDHEARTHI

4. Bible vidʼdheartheam vixim Jehovak koxem bhogta?

⁴ Tumi Jehovachea Sakxeam sangata Bible obheas kortat zalear, hem ugddas dovrat: Tumi Jehova vixim ani Bible-antlea xikounne vixim zannam zaunk sodhtat, hem dakhoun dita ki Jehovak zai tumi tachim ixttam zalolim, ani toxem korunk to tumkam modot korta. (Ju. 6:44; D.I. 13:48) Toxench, “Sorvespor kallzanchi porikxa korta.” Hacho orth, Jehovachi vollokh gheunk tumi zo vavr kortat tacher to dhean dita, ani taka manvota tem korunk tumi bodlav kortat tem polloun to khuxal zata. (Mho. 17:3; 27:11) Tor Jehova sangata ixttagot zoddunk tumkam ji sondhi mellʼllea ti fokot soddvonnekuch lagon zaunk pavlea mhunn kednanch visornakat.—Rom. 5:10, 11.

5. Filipkarank 3:16-nt dilʼlo solʼlo Bible vidʼdheartheamnim koso apnnaunk zata?

⁵ Bible vidʼdheartheamno, tumi soddvonne pasot upkariponn koxem dakhounk zata? Ek vatt mhunnttlear, apostl Paulun Filipkarank dilʼlo solʼlo tumi apnnaunk zata. Tannem mhunnttlem: “Atam meren, ami jitli vaddavoll kelea teach vatten ami mukhar nitt cholot ravom-ia.” (Filp. 3:16) Tor jivitak pavoita tea vatten cholot ravonk kiteakuch vo konnankuch lagon bond korinakat.—Mt. 7:14; Luk. 9:62.

6. Jehovak avoddna ti sonvoim soddun diunk Bible vidʼdheartheamnim kitem korunk zata? (Dusri Somurt 30:11-14) (Chitr pasun polloiat.)

⁶ Bible-achi umkich xikounn manunk kotthin zata zalear tea vixim sodh korunk zata. Ani ti bore toren somzonk Jehova lagim modot magonk zata. (St. 86:11) Torui, tumkam to vixoi somzonk kotthin zata zalear tea vixim chodduch usko korinakat. Tumkam to ghoddie uprant somzot. Tor tumcho Bible obheas chaluch dovrat. Jehovak avoddna tosli ek sonvoim soddunk tumkam kotthin zata zalear kitem? Aplea sevokam lagim jem korunk zaina tem Jehova tankam korunk sangona mhunn ugddas dovrat. Tor tumi tachea dorjeam pormonnem jieunk zata. (Dusri Somurt 30:11-14 vachat.) Ani tumkam modot kortolo mhunn Jehovan bhas dilea. (Iz. 41:10, 13; 1 Kor. 10:13) Tor soddun dium nakat. Tumchea oddchonnecher dhean diunchea bodlek, Jehovan tumchea pasot kitem kelam tacher dhean diat, khas korun soddvonnechea manddavollicher. Jehova pasot tumcho mog vaddttolo toso, “tacheo adnea . . . vojem koxem nhoi” mhunn tumkam kollon ietolem.—1 Ju. 5:3.a

7. Sotant vaddttolea bhurgeamnim kitea vixim bariksannen chintunk zata?

⁷ Sotant vaddttolea bhurgeamno, tumi pasun Bible vidʼdhearthi zaun asat. Khorem mhunnttlear, tumi tumchea avoi-bapaichim sogleam-von mhotvachim Bible vidʼdhearthi zaun asat. Bible-ant tumkam oxi urba dilea: “Devak lagim sorat, ani to tumchea lagim sortolo.” (Jak. 4:8; 1 It. 28:9) Tor Jehova lagim ixttagot zoddunk tumi poilem panvl ghetat tednam, to-ui tumcho ixtt zaunk fuddem sortolo. Tumchim avoi-bapui sotant asat dekhun Jehovan tumcher dhean dilem oxem nhoi, punn to tumcho-i ixtt zaunk sodhta dekhun tannem tumcher dilem mhunn ugddas dovrat. Ani tumi tachim lagxilʼlim ixttam zaunk Jehovan kitem kelam? Tannem aplea Putak tumchea pasot dilo. Jehovan tumkam hem moladik dennem dilam mhunn kednanch visornakat. (Rom. 5:1, 2) Tor Jehovan ani Jezun tumchea pasot kitem kelam tea vixim Ugddas Disachea thoddea sumanam poilim bariksannen chintat. Ani upkariponn dakhounk, tumi tumchem jivit koxe toren jieunk zata vo Jehovache sevent kosle dhei dovrunk zatat tea vixim chintat.b

BAUTIZM GHETLOLIM PORGOTTNNARAM

8. Bautizm ghetlolea porgottnnaramnim soddvonne pasot upkariponn koxem dakhoilam?

⁸ Bautizm ghetlolim porgottnnaram zalʼlean, tumi soddvonne pasot zaitea vattamnim upkariponn dakhoilam. Zoxem, Jehovak manvota tem korunk ani tachim ixttam zaunk, tumi tumchea jivitant bodlav keleat. Toxench, porgottnni korun ani xis korchea kamant bhag gheun Jezuchi adnea pallʼllea. Tea bhair, tumi tumchem jivit Jehovak somorpit korun bautizm ghetla. Tumkam virodhacho pasun fuddo korunk poddlo zait. (2 Tim. 3:12) Torui, tumi visvaxi ravon Jehova pasot mog ani soddvonne pasot upkariponn dakhoilam.—Heb. 12:2, 3.

9. Bautizm ghetlolea porgottnnaramnim kosli chotrai dovrunk zai?

⁹ Tumi bautizm ghetlolim Kristanvam zalear pasun, ek chotrai dovrunk zai. Vell voita toso, soddvonne pasot tumchem upkariponn unnem zaunk xokta. Koxem? Poilea xekddeantlea Efezkaram vixim chintat. Tannim sosnikai dakhoilʼli mhunn Jezun tanchi tokhnnai keli. Punn tannem oxem-i sanglem: “Mhaka tujea add hem sangpachem asa ki tujea bhitor poilim zo mog aslo to atam na.” (Prok. 2:3, 4) Tor sovkas-sovkas, eka Kristanvacho mog unno zaunk xokta mhunn Jezuchea utrantlean kolltta. To magnnem korit, toxench mittingek ani porgottnnek vochot, punn oxem to Jehovacho mog korta mhunn nhoi, punn toxem korchi sonvoim zalea mhunn korit. Tor Jehova pasot tumcho mog unno zala oxem tumkam dista zalear tumi kitem korunk zata?

10. Paulun Timotak dilʼlo solʼlo Kristanvamnim koso apnnaunk zata? (1 Timotak 4:13, 15)

¹⁰ Apostl Paulun Timotak kitem sanglolem tem ugddas korat. Paulun taka Jehovache bhokte sombondit aslolea kamam vixim “bariksannen chintit rav ani tantuntuch buddon rav” mhunn sanglolem. (1 Timotak 4:13, 15 vachat.) Ho solʼlo ami koso apnnaunk zata? Jehovache sevent amchi urba samballunk kitem korunk zata tea vixim ami chintunk zata. (Rom. 12:11; “Be aglow with the spirit” study note polloiat.) Udharonnak, mittinge pasot bori toiari korunk ami chodd vell gheunk zata. Hea vorvim ami mittingek anik bore toren dhean diunk pavtolim. Vo svotacho Bible obheas korunk ami ek xant zago vinchun kaddunk zata, zoim ami xiktat tacher bore toren niall korunk pavtolim. Oxem kelʼlean amkam anikui faido zatolo. Zoxem, uzo pettot ravonk zai zalear tantunt lakddam ghalit ravonk poddttat. Teach bhaxen, Jehovan dilam tem soglem ani khas korun soddvonne pasot upkariponn dakhoit ravonk, ami heo vostu korit ravonk zai. Toxench, Jehovachim Sakxi aslolean amkam koslim besanvam mellʼlleant tea vixim ami Ugddas Disachea thoddea sumanam poilim chintunk zata. Oxem kelʼlean, soddvonne pasot upkariponn vaddounk amkam modot zatoli. Karonn soddvonne vorvim ami Jehova sangata natem zoddunk pavleant.

11-12. Jehovachi sevent tumchi urba unni zalea hacho orth kitem nhoi tem somzaiat. (Chitr pasun polloiat.)

¹¹ Jehovache sevent tumchi urba unni zalea, oxem thodde pavtti tumkam dista zalear niraxi zainakat, vo Jehovan tumkam povitr xokti divop bond kelea oxem chintinakat. Aplea seve vixim apostl Paulun Korintkarank kitem sanglem tacher dhean diat. Tannem mhunnttlem: “Mhaka hem kam korunk khuxi na zalear pasun, hi mhoji zobabdari zaun asa ji mhaka Devan dilea.” (1 Kor. 9:17) Hantuntlean ami kitem xiktat?

¹² Apostl Pauluk thodde pavtti porgottnni korunk itsa nasli. Punn taka koxem-i disom, porgottnni korit ravonk tannem nichov kelʼlo. Tumi pasun toxench korunk zata. Sarkem tem korunk itsa na zalear pasun, tem korit ravonk tumi nichov korunk zata. Ani oxem korunk tumkam ‘itsa di ani ti itsa purnn korunk xokti-i’ di mhunn tumi Jehova lagim magnnem korunk zata. (Filp. 2:13) Toxench, Jehovak lagim soronk modot kortat teo vostu korit ravat. Oxem kelʼlean, sovkas-sovkas korun Jehova pasot tumcho mog porot vaddttolo ani tachi seva korunk urba-i vaddttoli.

13. Ami “bhavarthant asat kai na” hem zannam zaunk svotachi topasnni koxi korunk zata?

¹³ Paulun 2 Korintkarank 13:5-ant sanglem: “Tumi bhavarthant asat kai na, hem topaxit ravat. Tumi koslea torechim munxam zaun asat tacho puravo di-it ravat.” Tor vella-vellar, ami svotachi topasnni korop gorjechi. Tea pasot ami amkanch vicharunk zata: ‘Jehovache sevek hanv poilo zago ditam mhunn mhojea jivitantlean dison ieta kai?’ (Mt. 6:33) ‘Mhojea monoronjona vorvim hanv vaittacho dves kortam mhunn dison ieta kai?’ (St. 97:10) ‘Mhojea utram ani korneam vorvim sobhent xanti ani ekvott samballunk hanv proitn kortam mhunn dison ieta kai?’ (Ef. 4:2, 3) Ugddas Disachea thoddea sumanam poilim hea vixim chintlear borem zatolem. Toxench, Jehovan ani Jezun amchea pasot kitem kelam tea vixim niall kelʼlean ami Jehovak upkariponn dakhounk pavtolim. Ani Paulun sanglem toxem, ami svota pasot nhoi, punn Krista pasot jietat mhunn dakhounk pavtolim.c

JEHOVA THAUN POIS GELʼLIM MENDDRAM

14. Thoddeamnim mittingek ievop kiteak bond kelam?

¹⁴ Thoddeamnim mittingek ievop bond kelam. Hantuntlim thoddim zannam zaitea vorsam thaun Jehovachi seva kortalim. Tannim oxem “jivitachea uskeank lagon” kelam. (Luk. 21:34) Vo bhav-bhoinnamnim kitem tori mhunnttlem vo kelem dekhun thoddim zannam niraxi zaleant. (Jak. 3:2) Toxench, thoddeamnim gombhir patok kelam ani tim modot magonk fattim sortat. Karonn kitem-i asum, tumi Jehova thaun pois geleant zalear porot tachea lagim ieunk kitem korunk zata? Soddvonne udexim Jehovan ani Jezun zo mog dakhoila, to tumkam kitem korunk fuddem kaddttolo?

15. Jehova aplea thaun pois gelʼleanchi porva korta mhunn koso dakhoita? (Ezekiel 34:11, 12, 16)

¹⁵ Aplea thaun pois gelʼleam vixim Jehovak koxem bhogta tem chintat. To tancher ragar na, nhoi mhunn tankam visorla. Punn to tankam sodhta ani aplea lagim porot ieunk modot korta. (Ezekiel 34:11, 12, 16 vachat.) Hoi, Jehova tumkam-i aplea lagim haddunk sodhta. Tumi ho lekh vachtat tachea voilean kolltta ki Devak manvota tem tumi korunk sodhtat. Poilim Jehovan tumchea bhitor kitem borem polloun aplea familicho bhag zaunk modot kelʼli, toxench atam-i to tumchea bhitor bore gunn polloita ani aple familint tumkam porot haddunk sodhta.

16. Jehova lagim porot ieunk tumkam kitem modot korunk xokta? (Chitr pasun polloiat.)

¹⁶ Return to Jehovah pustikent him urbebhorit utram asat: “Jehovak lagim soronk tumi zo vavr kortat tacher to besanv ghaltolo mhunn khatri dovrat. To tumkam jivitachea uskeancho fuddo korunk, toxench bhav-bhoinnank lagon zalʼlem niraxiponn pois korunk modot kortolo. Tea bhair, to tumkam bhogxitolo, jea vorvim tumkam ek nitoll ontoskornn mellttolem. Hea vorvim, tumi bhav-bhoinnam sangata porot tachi seva korunk pavtolim.” Hem-ui ugddas dovrat ki vhoddil tumkam modot korunk axeun asat. Te tumkam ‘varem suttʼtta tednam lipʼpachea zagea bhaxen ani vadollachea pausan asro koxe zatole.’ (Iz. 32:2) Tor soddvonne pasot upkariponn dakhounk tumkanch vicharat: ‘Jehova lagim porot ieunk hanvem atam kitem korunk zata?’ (Iz. 1:18; 1 Ped. 2:25) Zoxem, tumi Raj-ghorant mittingek hajir zaunk zata kai? Tumi Jehova lagim porot ieunk sodhtat mhunn eka vhoddilak sangonk zata kai? To ghoddie thoddea vella pasot tumcho Bible obheas gheunk manddavoll korit. Tor soddvonnek upkariponn dakhounk ani Jehova lagim porot ieunk tumi zo vavr kortat tacher Jehova besanvam ghaltolo mhunn khatri dovrat.

TUMI KITEM KORTOLIM?

17-18. Hea vorsachea Ugddas Disachea thoddea sumanam poilim tumi tumcho vell bore toren koso uzar korunk zata?

¹⁷ Jezun sanglem ki “tacher bhavarth dovortat tea sogleancho nas zaina zaunk punn tankam sasnachem jivit mellchem mhunn” Jehovan soddvonnechi manddavoll keli. (Ju. 3:16) Tor soddvonne udexinch Jehova amkam patka ani mornna thaun suttka diunk xokta dekhun ami sodanch tache upkari asonk zai. (Rom. 3:23, 24; 2 Kor. 6:1) Ani hem upkariponn dakhounk Ugddas Disachea thoddea sumanam poilim, Jehovan ani Jezun amkam mog koso dakhoila tacher niall kelʼlean amkam modot zatoli.

¹⁸ Tumi upkariponn koxem dakhoitolim? Tumcho zobab heram poros vegllo asot. Punn lakʼkhamnim bhav-bhoinnam sangata mellon, ‘svota pasot nhoi, punn tumchea pasot zo mela, tachea pasot jieunk’ tumi kortat tea vavracher Jehova besanv ghaltolo mhunn khatri dovrunk zata.—2 Kor. 5:15.