Bible-antlim Sotam Mogan Sangat

1. Jehovachea familicho bhag zaunk ami kitem korunk zai?

AMI khoinchea-i eka bhav vo bhoinnik poilech pavtt melltta tednam tankam oxem vichartat: “Tuka sot koxem mellʼllem?” Thoddim ghoddie mhunnot ki tim “sotant vaddleant,” ani thoddim mhunnot ki tankam halinch “sot mellʼllam.” Ami soglim hea toren zobab kiteak ditat? Karonn Bible-antlea sotacho amchea jivitacher khub probhav poddla ani amchem akʼkhem jivit bodol’lam. Jehovachea familicho bhag zaunk, ami tea sota pasot amcho mog vaddoila ani tea pormonnem jieunk lagleant. Zoxem, ami sot ulounk laglim, ani soglim kamam promannikponnan korunk proitn korunk laglim.—St. 15:1-3.

2. (a) Jezu vixim lok kitem zannam aslo? (b) Jezun xikoilʼlea sotancho lokancher kitem porinnam zaunk xoktalo?

² Jezu sodanch sot uloitalo. Jezu uloita tem tachea dusmanank avoddnaslem. Torui, to sot tench uloita mhunn te manun ghetale. (Mt. 22:16) Apunn xikoitalo tea sotancho lokancher kitem porinnam zatolo tea vixim Jezun oxem sanglem: “Hanv putak tachea bapaichea add, dhuvek tichea avoichea add, ani sunek tichea sasumaichea add korunk ailam.” (Mt. 10:35) Apunn vo aple pattlavdar sangtat tea sotancho lokamnim virodh kelʼlo Jezuk naka aslem, punn toxem zatolench mhunn taka khobor asli. (Mt. 23:37) Tea sotancho thoddo lok mog kortolo ani thoddo lok dves kortolo mhunn taka khobor asli.—2 Tes. 2:9-11.

3. Hea lekhant ami kitem polloitolim?

³ Ami sot uloitat ani sotan vagtat dekhun lokank ami avoddnant. Torui ami Jezu bhaxen toxem korop bond korinant. Toxench, thoddea lokank sot avoddna zalear pasun ami porgottnni kortat ani Bible-antlem sot xikoitat. Hacho orth, ami Bible-antlem sot khoinchea-i vellar ani koxe-i toren sangtolim kai? Hea lekhant ami heach vixim zannam zatolim. Sogleant poilim, amkam sot khoim mellonk xokta tem ami polloitolim. Tea uprant ami kiteak, koxe toren, ani kednam lokank sot sangtolim tem-ui polloitolim. Hem zannam zalʼlean ami lokank sot xikoitana tem mogan kortolim, mhunnchem tem chintun kortolim ani sarkea vellar kortolim.

AMKAM SOT KHOIM MELLONK XOKTA?

4. Jehova sotachi Zhor zaun asa oxem ami kiteak mhunnonk zata?

⁴ Jehova sotachi Zhor zaun asa. To sodanch sot uloita. Udharonnak, borea ani vaitta vixim to jem sangta tem sot zaun asa. (St. 19:9; 119:142, 151) To fuddara vixim jeo bhasaunneo korta teo purnn zatach. (Iz. 55:10, 11) To apli bhas sodanch purnn korta, ani fott ulounkuch xokona! (Lok. 23:19; Heb. 6:18) Tor hachea voilean Jehovak “sotacho Dev” kiteak mhunnttla tem ami somzonk xoktat.—St. 31:5, NW.

5. “Sotacho Dev” Jehovak sodhunk kiteak kotthin nhoi? Somzaiat. (Itihas 17:27)

⁵ “Sotacho Dev” Jehova vixim zannam zaunk khub kotthin oxem thoddeank dista. Punn tem khorem nhoi! Karonn amchea bhonvtonnim asloleo vostu Dev khoreaninch asa mhunn puravo ditat. (Rom. 1:20) Athenantlea thoddea munxam lagim uloitana, apostl Paulun sanglem ki ami taka ‘sodhlolo’ Devak zai, ani to “amchea modlea konnam thaunuch pois na.” (Itihas 17:27 vachat.) Tor khalti kallzache lok Deva vixim sot zannam zaunk proitn kortat tednam to tankam aplea lagim ieunk modot korta.—Ju. 6:44.

6. Bible-ant aslolim thoddim sotam khoinchim, ani tim zannam zalʼlean tumi upkari kiteak asat?

⁶ Ami Bible-acho obheas korun Jehova vixim sot zannam zaunk xoktat. Bible munxamnim boroila tem khorem, punn to borounk Jehova Devan tankam prerit kele. (2 Ped. 1:20, 21) Tor Bible-ant sanglam tem soglem sot zaun asa ani ami tacher visvas dovrunk zata. Udharonnak, hea vixvachi ani prithumer jivitachi survat koxi zali tea vixim tantunt boroilʼlem asa. (Ut. 1:1, 26) Toxench ami soglim patok kiteak kortat ani hea sonvsarant itlem dukh-tras ani moronn kiteak asa tem pasun tantunt sanglam. (Rom. 5:12; 6:23) Tea bhair, “fottincho bapui” Soitanan jem luksonn kelam tem Jehova aplea Puta vorvim sarkem kortolo mhunn sanglam. (Ju. 8:44; Rom. 16:20) Itlench nhoi, Jezu noxtteancho nas kortolo, meloleank jivont kortolo, hi prithum ek sobit bag kortolo ani amkam poripurnn zaunk modot kortolo mhunn Bible-ant bhas dilea. Bible-ant sanglolea hea soglea sotancher ami purnn visvas dovrunk zata. (Ju. 11:25, 26; 1 Ju. 3:8) Tor him sotam zannam zaunk ani tea vixim dusreank sangonk Jehovan amkam kitlo vhodd sueog dila nhoi!—Mt. 28:19, 20.

AMI SOT KITEAK ULOUNK ZAI?

7-8. Sot ulounchea fattlean amcho hetu kitem asa tem Jehovak mhotvachem asa kai? Ek udharonn diat. (Marku 3:11, 12) (Chitram pasun polloiat.)

⁷ Ami poilim polloilʼlem toxem, Jehovachea familicho bhag zaunk ami sodanch sot ulounk zai. Punn Jehovak khuxal korunk fokot sot uloilearuch puro nhoi. Ami sot kiteak uloitat, mhunnche tachea fattlean amcho hetu kitem asa tem taka chodd mhotvachem. Jezu hea prithumer astana ek pavtt kitem ghoddlem tacher dhean diat. (Marku 3:11, 12 vachat.) Galiliechea Doria lagim porgottnni kortana, Jezu lagim lokancho ek vhodd zomo ailo. Tanchea modlea thoddeancher noxtte dut boslole. Te lok Jezu mukhar ieun poddle ani oxi bob marunk lagle: “Tum Devacho Put.” Tannim Jezu vixim sanglem tem sot aslem, punn tachea fattlean tancho hetu kitem aslo? Lokamnim tancher visvas dovrunk ani uprant tankam Deva thaun pois vhoronk te sodhtale zait. Punn tanchea monant kitem aslem tem Jezun zannam aslo dekhun to fosonk na. Tea pasot aplea vixim tannim konnankuch sangchem nhoi mhunn Jezun tankam hukum dilo.

⁸ Hea ghoddnnentlean amkam kitem xikonk melltta? Sot ulounchea fattlean amcho hetu kitem asa tacher Jehova dhean dita. Tea pasot lokank sot xikoitana amcho hetu sarko asop khub mhotvachem. Ani ami sangtat tea sondexak lagon konnui amchi vakhannʼnni korta zalear, ami sogli mhoima Jehova diunk zai.—Mt. 5:16; Itihas 14:12-15 sor korat.

9. Ami kitem korchem nhoi, ani kiteak?

⁹ Anik eke poristhitint lok amchi koxi vakhannʼnni korunk xoktat ani toxem zaina zaunk ami kitem korunk zata tem polloum-ia. Chintat, dusreank sangonk zaina tosli mahiti vhoddil tumkam sangta, punn tumi ti dusreank sangtat. Uprant, tumi sanglolem tem sot mhunn tankam kollon ailem zalear, tim amchi vakhannʼnni korunk xoktat ani amkam zaiti gupit mahiti khobor asa mhunn chintunk xoktat. Tor lokanche nodren ami khub mhotvachim asat oxem dison ieit punn ami Jehovache nodren sokol poddttolim. (Mho. 11:13) Karonn sangonk zainasli mahiti ami dusreank sangli ani ti sangonk amcho hetu sarko naslo.

AMI SOT KOXEM ULOUNK ZAI?

10. Ami sot “mogall” toren ulounk zai, hacho orth kitem? (Koloskarank 4:6)

¹⁰ Koloskarank 4:6 vachat. Apostl Paulun Kolosantlea Kristanvanchea ugddasak haddlem ki tanchim utram “sodanch mogall” asonk zai. Hacho orth kitem aslo? “Mogall” hea utrak jem Grik utor uzar kelʼlem, tacho orth, amchem ulovop dusreank faideak poddtta toslench nhoi, punn doiall ani dusreank avoddtta toxem asonk zai.

11-12. Lokank Bible-antlem sot xikoitana ami kitem ugddas dovrunk zai? Ek udharonn diat. (Chitram pasun polloiat.)

¹¹ Lokank Bible-antlem sot xikoitana apostl Paulucho solʼlo apnnaun ami mogall toren ulounk zai. Devachem Utor donui vatten pazlole tolvari poros chodd dharechem asa, jem ek munis bhailean ani bhitorlean koso asa hacho ontor dakhoun dita. Mhunnche tachim bhavnam ani hetu zannam zaunk modot korta. (Heb. 4:12) Punn ami Bible bore toren uzar korinant zalear, ami lokam lagim bexttoch vad-vivad korunk xoktat ani tanchem mon dukhounk xoktat. Koxem?

¹² Hea vixim chintat. Porgottnnent amkam ek munis melltta, zaka Devacher khub visvas asa ani to chukonastana murteam lagim magnnem korta. Toxench, taka aplea famili sangata Christmas ani Easter monounk khub avoddtta. Tor Bible uzar korun murteam lagim magnnem korop kitlem pixeponn, toxench Christmas ani Easter khottea dhorma thaun aileat mhunn ami poilech bhettek taka sangtolim kai? (Iz. 44:14-20; 2 Kor. 6:14-17) Oxem kelear ami sot uloitat tem khorem, punn ami Bible bore toren uzar korinant oxem zatolem.

13. Amchem ulovop mittan ruchichem zaunk ami kitem korunk zata?

¹³ Apostl Paulun oxem-i sanglem ki Kristanvanchem ulovop mittan ruchichem zaunk zai. Tor godd-godd utram uloun ami sot lipounk proitn korunk zai oxem to sangonk sodhinaslo. Punn dusreank sot xikoitana, amchem ulovop tankam avoddtta tea toren asonk zai. (Job 12:11) Oxem korunk amkam kotthin zaunk xokta. Zoxem, ami jea toren jevonn randlam tem amkam avoddtta dekhun, tem dusreankui avoddttolem oxem amkam disot. Toxench ami jea toren uloitat tem sogleank avoddttolem oxem amkam disot. Punn soglech pavtti toxem asona. Udharonnak, thoddea sonskrutintle lok piraien vhodd aslolea munxank pasun aple vichar ukteponnim sangtat. Punn dusrea sonskrutimnim hea toren ulovop chukichem asot, vo toxem uloilear dusreank vaitt disot. Tea pasot apostl Paulun sanglem ki “dor ekleak koxi zap diunk zai” tem amkam kollonk zai. Hacho orth, lokam lagim uloitana amkam borem dista vo amche sonskrutaie pormonnem nhoi, punn aiknnareak borem dista tea toren ami ulounk zai.

AMI SOT KEDNAM ULOUNK ZAI?

14. Prithumer astana, apleak khobor asli tem soglem Jezun aplea pattlavdarank xikoilem kai? Somzaiat.

¹⁴ Jezu aplea pattlavdaram lagim sodanch mogan uloilo ani doiall toren tankam zaiteo vostu xikoileo. (Mk. 6:34) Punn tankam xikounk anikui zaiteo vostu asleo. Tor taka zai zalear, tem to soglem ekuch pavtti tankam xikounk xoktalo. Punn tannem toxem korunk na. Karonn te kitle somzonk xoktat tem to zannam aslo. Ani taka khobor asli ki thoddim sotam sangonk to sarko vell naslo ani tim sanglear pasun te somzonk pavchenant. (Ju. 16:12) Hantuntlean ami kitem xiktat?

15. Ami zannant tem soglem ami Bible vidʼdheartheank ekuch borabor xikounk zai kai? Somzaiat. (Mhonnʼnneo 25:11) (Chitr pasun polloiat.)

¹⁵ Jezuchea udharonnantlean ami xiktat ki amkam Bible-antlem sot khobor asa hacho orth, ami dusreank soglem ekuch borabor sangonk zai oxem nhoi. Tor ami Jezuchi dekh koxi gheunk zata? Dor ek munis vegllo asa mhunn ami ugddas dovrunk zai. Aplea famili sangata Christmas ani Easter monounk avoddtta tea munxa vixim ami porot chintunk zata. Heo porbo khottea dhorma thaun suru zaleat ani Devak teo avoddnant mhunn amkam khobor asa. Punn chintat, tumi tea munxa lagim Christmas-achea ek vo don sumanam poilim Bible obheas suru kela. Tednam Christmas-a vixim Bible kitem xikoita tem ami taka sangtolim kai, ani to tem monovop rokddoch bond kortolo oxi ami opekxa kortolim kai? Oxem kelear ami mogall toren uloitat mhunn dakhoun ditolim kai? Hem khorem ki thoddim, Bible-antlean jem xiktat tem rokddench apnnaitat. Punn dusreank tanchem chintop ani vagnnuk bodlunk vell lagta. Bible vidʼdheartheamnim vaddavoll kelʼli amkam zai zalear, tankam khoinchi vost kednam xikounchi tem amkam khobor asonk zai.—Mhonnʼnneo 25:11 vachat.

16. ‘Sotache vatten cholot ravonk’ ami Bible vidʼdheartheank koxi modot korunk zata?

¹⁶ Thoddea kamamnim amkam khub khuxalkai melltta. Tantuntlem ek mhunnttlear, lokank Jehova vixim sot xikovop. ‘Sotachea vatten cholot ravonk’ ami dusreank koxi modot korunk zata? Ami sodanch tanchea pasot bori dekh dovrunk zai. (3 Ju. 3, 4) Bible-antlea bhasaunnecher amkam purnn visvas asa mhunn amchea vagnnuke vorvim dison ieunk zai. Toxench, sot xikoitana amcho hetu sarko asonk zai. Tea bhair ami mogan ulounk zai, kednam kitem uloitolim tem chintunk zai, ani sogleam-von mhotvachem mhunnttlear ami sogli mhoima Jehovak diunk zai. Oxem kelʼlean, ami sotacho Dev Jehovachi bhokti kortat mhunn dakhoitolim.