2023 Hem Voros Amkam Kitem-i Boreponn Haddttolem Kai?—Hea Vixim Bible Kitem Sangta?

2023 hem voros suru zalem! Ani hem voros amkam ani amchea familik boreponn haddttolem mhunn ami bhorvonso dovortat. Kiteak?

Bible amkam bhorvonso dita

Aiz ami fuddo kortat te dukh-tras thodde tempa pasot asat, ani te beginuch kabar zatole mhunn amkam Bible bhorvonso dita. Titlench nhoi, Bible-ant amkam zaiteo boreo vostu xikonk mellttat, amkam bhuzvonn melltta ani toxench amkam boro bhorvonso pasun melltta.—Romkarank 15:4.

• Bible amkam kitem bhasaita tea vixim anik zannam zaunk, “A Real Hope for a Better Tomorrow,” ho lekh vachat.

Ho bhorvonso tumkam aiz koso modot korunk xokta?

Bible dita to bhorvonso eka ‘nangra bhaxen asa, zo amchem jivit surokxit dovorta.’ (Hebrevank 6:19) Ho bhorvonso amkam thir ravonk modot korta. To koso? Amcher ietat tea oddchonneancho bore toren fuddo korunk, poristhiti vaitt aslear pasun amchem chintop borem dovrunk ani sasnachi khuxalkai melloun gheunk modot korta. Udharonnak:

• Eka munxak khub soro pieunchi sonvoim asli. Ti sonvoim soddun diunk taka Bible-ant aslolea bhorvonxea udexim koxim modot zali tem zannam zaiat. ‘Hanv Mhojea Jivitant Samkoch Bejarlolo’ ho video polloiat.

• Tumcho konnui mogacho mela kai? Hea vellar tumkam Bible-a thaun bhuzvonn koxi mellonk xokta hem zannam zaunk, Dukhant Asat Tankam Bhuzvonn, ho video polloiat.

Tumcho bhorvonso ghott korat

Zaito lok hea sonvsarant boreponn ietolem mhunn axa dovortat, punn oxem khorench zatolem vo na tem tankam khobor na. Punn, Bible-ant kelʼleo bhasaunneo purnn zatoleoch mhunn ami khatri dovrunk zata. Kiteak? Karonn heo bhasaunneo Jehova Devana keleat, zo “kednanch konnak fottoina.” (Titak 1:2) Toxench, heo sogleo bhasaunneo purnn korunk fokot Jehovak xokti asa, ani to “apnnak zai toxem” korunk xokta.—Stotr 135:5, 6.

Tor ami tumkam Bible vachunk, ‘tacher bariksannen topasunk’ ani Bible-ant dilʼlea bhorvonxeancher tumcho bhavarth ghott korunk ami tumkam urba ditat. (Itihas 17:11) Tumkam zai zalear, khoinchea-i eka Jehovachea Sakxeam sangata tumi kainch farik korinastana Bible xikonk zata. Hea toren tumi 2023 hem voros, boro bhorvonso dovrun suru korunk xoktat!