Dhavean: Hurricane Ian, Florida, USA, Setembr 2022 (Sean Rayford/Getty Images); modem: Avoi aplea puta sangata pollon voita, Donetsk, Ukraine, Julay 2022 (Alex Chan Tsz Yuk/ SOPA Images/LightRocket via Getty Images); ujvean: Abril 2022 tarker, China-achea Beijing xarant, zaitea lokancho COVID test kortat. (Kevin Frayer/Getty Images)
ZAGRUT RAVAT!
2022: Uskeamnim Bhorlolem Voros—Hea Vixim Bible Kitem Sangta?
2022 hea vorsa thaun, amkam dis-rat news-ar zhuzam vixim, poixeanchea unnemponnam vixim ani odruxttam vixim chodduch aikonk melltta. Punn hem kiteak ghoddtta hachem karonn fokot Bible amkam sangonk xokta.
2022-ant ghoddloleo ghoddnneo
Ami “nimannea disamnim” jietat mhunn Bible sangta. (2 Timotak 3:1) Hem nimanne dis, 1914 hea vorsa thaun suru zale. Ani gelʼlea vorsa ghoddloleo ghoddnneo hem khorem mhunn anik spoxtt ritin dakhoun ditat. Tor, gelʼlea vorsa ghoddloleo ghoddnneo, Bible-a pormonnem sarkeo koxeo asat tem polloum-ia:
‘Zhuzam.’—Matev 24:6.
“2022 hea vorsa, Europe-ak zhuzak lagon porot ekdom vaitt porinnam soscho poddlo.”a
“Russia Ukraine-acher Akromonn Korta,” ho lekh polloiat.”
“Bhuk.”—Matev 24:7.
“2022 hea vorsa, Ekdom Chodd Dukholl poddlo”b
“Ukraine-antlea Zhuzak Lagon Jevnna-khannachem Unnemponn Anikui Vaddlam,” ho lekh polloiat.
“Pidda.”—Lukas 21:11.
“Polio portun suru zalo, monkeypox-ak lagon khub tras zale ani COVID-19 hi pidda posrot asa dekhun khub luksonn zalam. Hantuntlean roddinch posorta tim duensam kitlim dokheachim asat ani munxam modem hem kitlem sompeponnim posronk xoktat tem kollon ieta.”c
“COVID-ak Lagon 60 Lakh Lok Melo,” ho lekh polloiat.
“Bhirankull ghoddnneo dixtti poddttoleo.”—Lukas 21:11.
“Gormi chodduch vaddlea, zomin sukun poddlea, ranam ujeant pettʼttat ani buddʼtti zata. 2022 gormeche dis sodanch ugddasak urtole. Karonn hea vorsa ghoddlolea ghoddnneank lagon zaitem luksonn zalam, hozaramnim lokancho jiv gela ani lakʼkhamnim lokamnim aplim ghoram hogddaileant.”d
“Sonvsarbhor Gormi Vaddot Asa,” ho lekh polloiat.
‘Goddbodd’ [vo ‘lok uchamboll zata; odhikaream add voita,’ ftn.].”—Lukas 21:9.
“Poixeanchea unnemponnank lagon khas korun mhargaiek lagon, lok itlo ragar zalo ki tannim 2022-ant sorkara add vhoddle morchea kaddle.”e
“Sonvsarbhor Mhargai Vaddot Asa,” ho lekh polloiat.
Fuddlea vorsa kitem ghoddttolem?
Fuddlea vorsa mhunnchem, 2023-ant kitem ghoddttolem tem konnakuch khobor na. Punn, amkam hem khobor asa ki beginuch Devachem Raj vo sorgincho sorkar, hea prithumecher vhodd promannan bodlav haddttolo. (Daniel 2:44) Ani toxench, munxak lagon zalʼle dukh-tras kaddun uddoitolo ani Devachi khuxi hea prithumer zaum-xi kortolo.—Matev 6:9, 10.
Tor ami tumkam Jezu Kristacho solʼlo pallunk ani hea sonvsarant ghoddttat teo ghoddnneo Bible-ant aslolea bhasaunneam pormonnem koxeo purnn zatat tea vixim ‘zagrut ravunk’ vo tacher dhean diunk urba ditat. (Marku 13:37) Tea bhair, Bible aiz tumkam ani tumchea familik koso modot korunk xokta ani tumkam ek boro fuddar koso diunk xokta tea vixim anik zannam zaunk amkam sompork korat.
a Dezembr 8, 2022 hea tarker, Jill Lawless-acho AP News, “2022 Was Year the Horror of War Returned to Europe.”
b World Food Programme-acho, “A Global Food Crises.”
c Setembr 22, 2022 hea tarker, Lawrence O. Gostin, JD-acho, JAMA Health Forum, “Living in an Age of Pandemics—From COVID-19 to Monkeypox, Polio, and Disease X.”
d Otumbr 24, 2022 hea tarker, Martina Igini-cho, Earth.Org, “What’s Behind the Record-Breaking Extreme Weather Events of Summer 2022?”
e Dezembr 8, 2022, hea tarker, Thomas Carothers ani Benjamin Feldman-acho, Carnegie Endowment for International Peace, “Economic Anger Dominated Global Protests in 2022.”