1
Rochnnar Monxak Ek Bhuimkutt Dita
Dev vixv rochta ani prithumer jivim rochnnam rochta; To ek sompurnn dadlo ani ostori rochta, tankam ek sobit bhagent dovorta, ani adnia pallunk sangta
KEDNANCH konnem borovunk na toslea famad utranim Bibleachi ukttauni kelea. “Orombak Devan Sorg ani prithum rochlim.” (Utpoti 1:1) Hea manadik vachanant Bible amkam ek mukhel Vyaktichi vollokh korun dita ani To zavun asa Sorvpodvedar Dev Jehovah. Akʼkhea vixvacho ani ami ravtanv tea grahacho rochnnar Dev mhonn Bibleantlem poilem vachan dakoita. Fuddlim vachanam amkam sozmonni ditat ki zaito kall sorlea uprant, tea kallak khunna rupan dis mhunnttleat, tantunt Devan monxam khatir ravunk prithum ani soglleo ochoriancheo soimbacheo vostu sonvsarant rochleo.
Sonvsarantlea sogllea rochnnam modem, Devachi mhotvachi rochnna mhollear monis. Hea monxak Devan aplea rupkaracho kelo, mhonnge Devache gunn-zoxe mog ani zannvai fankounk xokta toslo kelo. Devan monxak zomniche dhullicho kelo. Devan taka Adanv hem nanv dilem, uprant taka eka bhuimkuttant dovorlo – ti zavun asli Eden bhag. Devan khud hi bhag roili ani sobit folladik zaddanim bhorli.
Monxak ek sangatinichi goroz asa mhonn Devan pollelem. Adanvanchi ek bor kaddun, Devan ek ostori ghoddli ani tika haddun Adanvak potinn mhonn dili. Uprant tika Eve mhonn nanv dilem. Adanv itlo khoxeal zalo ki tannem ek git gailem: “Xekim hi mhojea haddanchem hadd ani mhojea masachem mas!” Devan mhollem: “heach pasot dadlo aplea avoibapaik soddta ani eke bailek ektthovta ani tim dogam-i zonnam ekuch kudd zatat.”—Utpoti 2:22-24; 3:20.
Devan Adanvak ani Evek don adnia dilʼleo. Poilem, Tannem tankam prithum rovun poramos korunk ani xekim tanche sonsotin bhorunk sanglem. Dusrem, te vhodd bhagentlea fokot ekach rukhachem foll khainakat mhonn Tannem tankam sanglolem: “punn borea ani vaittachi zannvai ditea rukhachem foll mat khaum noie.” (Utpoti 2:17) Zoritor, tannim Tachi adnia moddlear tim mortelim aslim. Tea adnia udexim Devan dadleak ani bailek apunn tancho Odhikari mhonn manʼnun gheunk sondhi dili. Adnia pallʼleo zalear tim Devacho mog kortat ani tachea upkarant asat mhonn dakoitolim aslim. Tacho mogall odhikar svikar korunk soglle ritinim, tankam faideachem aslem. Tea sompurnn zoddpeant kainch unnemponn naslem. Bible amkam sangta: “Apnnem kelʼlem tem sogllem Devan pollelem ani khorench tem sogllem ekdom borem aslem.”—Utpoti 1:31.
—Utpoti Avesvor 1 ani 2 hacher adarlelem asa.