Novembr—Jivit ani Porgottnni Mittingechea Pustike Pasot Modot
NOVEMBR 6-12
DEVACHEA UTRANTLE THEVE | AMOS 1-9
‘Jehovak Sodhun Kaddat ani Tumi Jivim Urtolim’
(Amos 5:4) “Israelachea Ghoranneak Sorvespor oxem sangta: Mhaka sodun kaddat ani tumi jivim urtoleat.”
(Amos 5:6) “Sorvesporak sodun kaddat ani tumi jivim urtoleat; na zalear, Juzechea Ghoranneacher uzo koso To poddtolo ani tem lasun uddoitolo, ani to uzo palounk Bethelant konnuch ascho na.”
w04 11/15 24 ¶20
Kallzam Topaspi, Jehovak Sodhat
20 Tea kallar Israelant jietolea konnank-ui Jehovak visvaxi ravonk sompem naslem. Aiz-ui Kristi bhav-bhoinnam, zanttim toxench nnenttim, lharam add penvop kotthin mhunn zannant. Tori astana, thoddea Israelitkarank Devacho mog ani taka khuxal korchi itsa aslolean, khori bhokti korunk tankam urba mellʼlli. Amos 5:4-ant sanglolea pormonnem Jehovan tankam mogan apounnem dilem: “Mhaka sodun kaddat ani tumi jivim urtoleat.” Toxench, aiz-ui jim konn poschatap kortat ani tachea utrantlean khorem ginean gheun tachi khuxi korchea pasot taka sodhtat, tankam Dev doia dakhoita. Hea vatten cholop sompem na, punn toxem kelʼlean sasnachem jivit favo zata.—Juanv 17:3.
(Amos 5:14, 15) “Borem sodat ani vaitt soddun diat, ani oxem tumi jivim urtoleat, ani, tumi sangtat toxem, Sorvespor, Sorvsoktivont Dev, khoreponnim tumche sovem astolo. 15 Vaittacho dves dhorat, boreacho mog korat, xarachea darvonttea-xim nit samballat. Oxem ghoddie Juzechea urlolea zomeachi Sorvespor, Sorvsoktivont Dev, doia kortolo.”
jd 90-91 ¶16-17
Tachea Unch Dorjeam Pormonnem Jehovachi Seva Korat
16 Kitem borem ani vaitt hea vixim konnache dorje sarke tem vinchun kaddttana Adanvan pixemponn kelem. Ami sarko nirnnoi ghetolim kai? Hea vixim Amos amkam solʼlo dita: “Vaittacho dves dhorat, boreacho mog korat.” (Amos 5:15) Hea versa vixim, Chicagochea vixv vidhyalayant Judevanchea sahityacho ani bhaxecho professor, William Rainey Harper hannem oxem sanglolem. “[Amosachea motint] asat te bore ani vaittache dorje, Yahweh-chea khuxe pormonnem asle.” 12 provadeancho hoch mukhel vixoi aslo. Jehovache bore ani vaittache dorje manunk ami toiar asat kai? He unch dorje amkam Bible-ant mellttat ani bhavarthant ghott aslole Kristanv je ‘visvaxi ani xanno chakor’ mhunn vavurtat te amkam tea vixim somzonni ditat.”—Matev 24:45-47.
17 Vaittacho ami dves kortat tednam, Devak kitem avoddnna tea vostum thaun amkam pois ravonk modot zata. Udharonnak, ek munis zannam ki internet-acher pozddim chitram polloilear kitem dokʼkho asa to, ani toslea chitram thaun pois ravonk to proitn korta. Punn tea pozddeam chitram vixim to “bhitorle-bhitor” kitem chintʼta? Kallzant thaun to tancho dves korta kai? (Efezkarank 3:16) Amos 5:15-ant, Jehovan dilʼlo solʼlo apnnailear taka vaittacho dves korunk sompem zatolem. Odheatmik zhuzant to zoitivont zatolo.
Bible-ant Motiam Sodhum-ia
(Amos 2:12) “Punn tumi Naziritank soro pieunk boll kelem ani anink bhakit korum nakat mhonn provadiank tumi hukum ghalo.”
w07 10/1 14 ¶8
Joel ani Amos Pustokantle Mukhel Mudʼde
2:12. Khub thokos gheun kam korpi pioneer-ank, bhonvddi korun dekhrekh korpi bhavank, mixinoreank, vo Bethel kuttumbachea sodosyank purnn vell seva soddun, susegad jivit jie mhunn sangon ami tankam niraxi korunk zaina. Tachea bodlek, ami tankam Devachea sevent boro vavr korit ravonk xabaski diunk zai.
(Amos 8:1, 2) “Sorvespora Devan mhaka dorxonant dakhoilem tem hem: piklolea follamnim bhorlolo ek korondd. 2 Tannem vicharlem: Amos, kitem dixtti poddta tuka? Hanvem mhollem: Piklolea follamnim bhorlolo ek korondd. Tedna Sorvesporan mhaka mhollem: Israel Mhoje porjecho xevott lagim pavla. Tanche okman Hanv anink bhogxicho na.”
w07 10/1 14 ¶6
Joel ani Amos Pustokantle Mukhel Mudʼde
8:1, 2—“Piklolea follamnim bhorlolo ek korondd vo panttlo” kitem dakhoun dita? Jehovacho dis lagim pavla mhunn hem dakhoun dita. Dor xet-kamachea vorsachea xevottak vo kapnni sompta tednam piklolim follam kaddttalim. Jehovan Amosak “piklolea follamnim bhorlolo ek korondd vo panttlo” pollounk sanglo tednam tacho orth, Israelacho xevott lagim pavla oso aslo. Taka lagon Devan Amosak mhunnttlem, “Israel Mhoje porjecho xevott lagim pavla. Tanche okman Hanv anink bhogxicho na.”
NOVEMBR 13-19
DEVACHEA UTRANTLE THEVE | OBADIA 1–JONAS 4
“Tumchea Chukim Thaun Xikat”
(Jonas 3:1-3) “Sorvesporachem utor dusre pavtti Jonasak ailem; Tannem mhollem: Utth! tea vhoddlea Nineveh xarant voch, ani Hanv sangtolom to nirop tankam porgott kor. Mhonnttoch, Sorvesporachea utrak pallo diun, Jonas utthlo, ani Ninevehk gelo. Nineveh mhollear vhoddantlem vhodd xar aslem; itlem ki bhitor sorun bhair sorpak tin dis lagtale.”
ia 114 ¶22-23
To Aplea Chukim Thaun Xiklo
22 Jonasa vixim kitem? Jehovachi adnea pallun aplem upkariponn dakhounk to xiklo kai? Hoi. Tin dis ani tin rati uprant, nustean Jonasak doriache deger haddlo ani “Jonasak suke zomnir onkun uddoilo.” (Jonas 2:11) Jonasak doria deger povon vochonk poddonk na! Punn tea uprant taka apli vatt sodhchi poddli. Magir apunn Jehovak upkari asa vo na tem dakhounk taka sodhi mellʼlli. Jonas 3:1, 2, sangta: “Sorvesporachem utor dusre pavtti Jonasak ailem; Tannem mhollem: Utth! tea vhoddlea Nineveh xarant voch, ani Hanv sangtolom to nirop tankam porgott kor.” Jonas atam kitem kortolo?
23 Jonas fattim-fuddem zaunk na. “Mhonnttoch, Sorvesporachea utrak pallo diun, Jonas utthlo, ani Ninevehk gelo.” (Jonas 3:3) Hoi, tannem Jehovachem aikolem. Tachea chukim thaun to xiklo. Hea vixim ami tachea bhavarthachi dekh gheunk zai. Ami soglim patki, ami chuki kortat. (Rom. 3:23) Amchea vixim kitem? Ami nirax zaun soddun ditat kai? Jonasa sarkim ami amchea chukim thaun xikon Devachea utrak pallo diun tachi seva kortat kai?
Bible-ant Motiam Sodhum-ia
(Obadia 10) “Tunvem tujea bhava Jakobak kelʼle zobordosti khatir, tum lojen bhortoloi ani sorvkallak tujem nisontton zatolem.”
w07 11/1 13 ¶5
Obadia, Jonas, ani Mika Pustokantle Mukhel Mudʼde
10—Edom raxttrachem ‘sorvkallak nisontton’ koxem zalem? Adim sanglolem toxench Edom raxttr, tachem sorkar ani umkeach vattarant ravtale te lok, nanch zale. Babilonachea Raza Nabonidus-an sovea xekddea modem (K.X.A.), Edom raxttracher zoit velem. Chovtea xekddeant (K.X.A.) pavtana, Nabataean lok Edomant ravonk lagle ani Edomitkarank Judachea dokxinnek vochon ravonk poddlem. Ho dokxinn vattar mhunnche Negeb, zaka magir Idumeia mhunn nanv dilem. Uprant, 70-vea (K.X.) vorsa Romkaramnim Jerusalemacho nas kelo tednam Edomitkar kabar zale.
(Obadia 12) “Tujea bhavachea durdoivachea disa tacher nodor ghalun tuje dolle dhadoxi kori naka. Judachea putam-dhuvanchea nisonttonachea disa tanche vixim tunvem boddai ulounk favo naslem, hal-upodreanchea disa tunvem suki boddai ulounk favo naslem.”
jd 112 ¶4-5
Dev Koso Dusream Lagim Vagta Toxem Ami Vagonk Zai
4 Israelachea lagim aslolea Edom raxttrak Jehovan guneavkari kelʼlean amkam kitem xikonk melltta? Jehovan tankam mhunnttlem, “Tujea bhavachea durdoivachea disa tacher nodor ghalun tuje dolle dhadoxi kori naka. Judachea putam-dhuvanchea nisonttonachea disa tanche vixim tunvem boddai ulounk favo naslem.” (Obadia 12) Tirache lok veapar dhondeachea sombondant Israelache bhav koxem aslem. Punn Edomitkar Israelache khaxa bhav zaun asle. Te Jakobacho zunvllo bhav Esau-achea sonsoti modle asle. (Dusri Somurt 2:1-4) Judev lok Babilonachea hata khala hal-upodre sonstale tednam, Edomitkar khuxal zale. Khorench, tannim oxem korunk favo naslem.—Ezekiel 25:12-14.
5 Edomitkaramnim aplea Judev bhavam lagim kelʼli hi vagnnuk Jehovak manvonk na. Ami amkanch ek prosn vicharunk zata, ‘Hanv mhojea bhavam lagim jea ritin vagtam tem Devak manvota kai? Hem vicharop sarkem, khas korun, tanchem ani amchem borem cholona tednam. Udharonnak, chintat eklean tumkam dukhoilam vo tumchea gorcheam lagim tachem kitem tori kestanv zalam. Tumkam “gharannem korunk nimit aslear” tumi rag gheun bostolim kai? Ani tea vixoi-acher tumi visor ghalinastana vo to suttavo korinastana ravtolim kai? (Koloskarank 3:13; Joshua 22:9-30; Matev 5:23, 24) Toxem kelear, tumchea vagnnukecher porinnam zatolo. Tumi kainch zaunk na oxem dakhoitolim punn tachea thaun pois ravtolim vo tacheo chaddio kortolim. Fuddem zor tea bhavan chuk adarli ani taka sobhechea vhoddilam thaun solʼlo ani xist favo zali zalear, tumi kitem kortolim? (Galasiekarank 6:1) Tea bhavak oxem ghoddlem mhunn tumi Edomitkara bhaxen sobhav dakhoun khuxal zatolim kai? Hea vellar tumi koxem vaglolem Devak zai?
NOVEMBR 20-26
DEVACHEA UTRANTLE THEVE | MIKA 1-7
“Jehova Amchea Thaun Kitem Magta?”
(Mika 6:6, 7) “Kitem mhonn gheun hanv Sorvespora mukhar vetolom? Ani sorginchea Deva mukhar koso sorpotttolom? Tache mukhar hom gheun vetolom? Vo eka vorsachea paddkuleak? 7 Hozaranche hozar menddre bhettoile mhonn, ani telache vhall kele mhonn, To prosonn zait? Mhojea chukink lagun mhojeam malgoddeank vopun dium? Mhojea patkam khatir mhoje kuddichem foll bhettoum?”
w08 5/15 6 ¶20
Dusream Thaim Ami Koxem Vagonk Zai?
20 Amchea bhav-bhoinnam lagim boro sombond asop khore bhoktecho ek gorjecho bhag zaun asa mhunn Jehova lekta. Ami pelea lagim sarkim vagona zalear, ami Jehovak ditat tea bhettovnneank kainch valor asona. (Mik. 6:6-8) Teach pasot, Jezun aplea xisank “tontto . . . vatter astanach bore bhaxen sompoi” mhunn sanglem. (Mt. 5:25) Hea vixim Paulun oxem boroilem: “Rag tumkam ietoloch, tori ragak lagun patok korinakat; vell poddo-sor rag dorun ravum nakat; na tor tumchea kallzant devcharak rig dixat.” (Ef. 4:26, 27) Ragar zaunk karonn aslear-ui, ami zata title begin tem kestanv suttavem korunk proitn korunk zai na tor ami rag gheun bostolim ani Soitanak amcho faido kaddunk sondhi ditolim.—Lukas 17:3, 4.
(Mika 6:8) “Monxa, kitem borem tem tuka dakhoilam: promannikponnan bhonv, doiamoia dakhoi, ani Deva kodde khaltikaien chol, itlench puro. Hench Sorvespor tuje lagim magta.”
w12 11/1 22 ¶4-7
“Jehova Amchea Thaun Kitem Magta?”
“Promannikponnan [“Neai-nitin,” NW] bhonv.” “Neai” hea Hebrev utrachea orthant “somazant eka-meka lagim neaian ani sarke ritin vagop mellon asa” mhunn ek pustok sangta. Devachea dorjeam pormonnem jem sarkem ani neai-achem asa, tea ritin ami eka-meka lagim vaglolim taka zai. Ami bhedbhav korinastana dusream sangata nitin ani promannikponnan vagtat zalear ami neaian choltat mhunn dakhoitat. (Lokgonnti 19:15; Izaias 1:17; Hebrevank 13:18) Dusream sangata ami neaian vagtat tednam, tankam-i amchea lagim neaian vagonk urba mellttoli.—Matev 7:12.
“Doiamoia dakhoi.” Ami fokot doia dakhoilear puro nhoi, punn tea gunnacho mog kelʼlo Devak zai. “Doia” (cheʹsedh) hea Hebrev utracho orth “doia-moia” vo “visvaxi mog.” Ek Bible zannkar oso sangta: “Mog, kaklut ani doia hanche modlem khoinchem ek utor uzar korun [cheʹsedh] utracho soglo orth sangonk zaina; [cheʹsedh] hea utrant he tin-ui gunn mellon asat.” Doia hea gunnacho ami mog kortat zalear, ami khuxen to dakhoitat; ani gorjevontank modot korunk amkam khuxi bhogta. Oxem kelolean, diuncheant asa ti khuxalkai amkam onnbhovunk mellttoli.—D.I. 20:35.
“Deva koddem khaltikaien chol.” Bible-ant, “cholop” hea utracho orth “eke ritin kam korchem.” Bible-ant Devan dakhoilʼlea dorjea pormonnem ami choltat tednam, ami tachea sangata choltat. Hea vatter cholonk amkam ‘khaltikaiechi’ goroz asa. Toxem kiteak? Ami khaltim asat zalear, Deva mukhar ami lhan asat ani amkam unneponnam asat mhunn ami vollkhun ghetolim. Tor Deva kodde “khaltikaien chol” hea utrancho orth oso ki Jehova amche thaun kitem magta ani ami taka kitem diunk zata tea vixim sarki dixtt dovrop.
Amchea lagim diunk zaina, tem Dev amche koddem magona. Tachea sevent ami boreantlo boro vavr kortat tem polloun to khuxal zata. (Koloskarank 3:23) Amchim unneponnam to somzota. (Stotr 103:14) Ami-i jednam, bhov khaltikaien, amchim unneponnam manun ghetat tednam amkam Jehova sangata cholon khuxalkai melltta. Tor Deva sangata ami koxem cholchem tem xikum-ia nhoi! Oxem kelear amkam Jehovachim zaitim besanvam mellttolim.—Mhonnʼnneo 10:22.
Bible-ant Motiam Sodhum-ia
(Mika 2:12) “Jakobachea sogllea ghoranneak hanv zoma kortolom, Israelachea urlolea vantteak hanv ektthaitolom, Eke chorvache svater menddram porim hanv tankam ektthaim kortolom. Ani aplea ghotteant aslolea eka hindda porim, tim konnak bhienastana roddtolim [“ani to zago lokanchea avazan bhortolo,” NW].”
w07 11/1 15 ¶6
Obadia, Jonas, ani Mika Pustokantle Mukhel Mudʼde
2:12—‘Urlolea Israelitank ekttaim kortolom’ hi bhasaunni koxi purnn zali? Babilonant koidi aslole urlole Judev lok aplea desant gele tednam, mhunnche 537 K.X.A. hea vorsak hi bhasaunni purnn zali. Aichea kallar hi bhasaunni ‘Devache Israel porje’ sovem purnn zata. (Galasiekarank 6:16) 1919 hea vorsa thaun, obhixikt Kristanvank ‘menddram porim ektthaim keleat.’ 1935 hea vorsa thaun, tanchea sangata ‘her menddranchim’ ‘bhov vhodd urponz’, mellon ailea ani to zago lokanchea avazan bhorla. (Prokasovnni 7:9; Juanv 10:16) Sangatan te khori bhokti fuddem vhortat.
(Mika 7:7) “Hanv mhoje dolle Sorvesporacher lavun dovortam; Dev mhoji soddvonn kortolo, Tacheruch mhozo visvas; mhozo Dev mhojem aikotolo.”
w03 8/15 24 ¶20
Jehova Amchea Thaun Kitem Magta?
20 Jehovachim besanvam onnbhovlolean amkam Mikachi dekh gheunk modot zata. Tannem oxem mhunnttlem: “Hanv mhoje dolle Sorvesporacher lavun dovortam; Dev mhoji soddvonn kortolo.” (Mika 7:7) Hea utram modem ani Deva sangata khaltikaien cholop hanche modem kitem sombond asa? Jehovacher patieun ami sosnikaien ravlear, Jehovacho dis azun porian ieunk na mhunn ami niraxi zaunchim nant. (Mhonnʼnneo 13:12) Ho noxtto sonvsar kabar zalolo amkam sogleank zai. Punn, dor sumanak hozaramnim lok Deva sangata cholonk suru kortat. Hem zannam zaun, sosnikai dakhounk amkam modot zata. Zaitim vorsam, purnn seva kelʼli ek Sakxi hea vixim sangta: “Porgottnnechem kam korun mhaka 55 odik vorsam zalim. Jehovacher patieun ravlolean hanv sangonk xokta ki hanvem kainch sanddunk na, bodlek niraxiponnantlean hanv vattovli.” Heach bhaxen tumchea-i lagim onnbhov asa?
NOVEMBR 27–DEZEMBR 3
DEVACHEA UTRANTLE THEVE | NAHUM 1–HABAKUK 3
“Odheatmik Ritin Zagrut ani Urbebhorit Ravat”
(Habakuk 2:1-4) “Hanv mhojea pahreachea zagear ubo ravtolom ani rakhnne-gopurant pahro kortolom. To mhaka kitem mhonnttolo ani mhojea tokrarink koslo zobab ditolo tem polleunk ravtam. 2 Tedna Sorvesporan mhaka oso zobab dilo; Tannem mhollem: Hem dorxon boroun dovor, konnem-i tem sompeponnim vachche khatir tem folliancher boroun kadd. 3 Kiteak hem dorxon aplea nemlolea kallak: tem xarthi pavtolench ani tem fottounchem na; kallav korun iet zalear, tori tachi vatt polleit rav, kiteak chodd lambai korinastana tem ietolench. 4 Polle, zanchem kalliz promannik nhoi, tim moddon poddtolim, punn promannik monxam aplea visvaxiponna vorvim jivim astolim.”
w07 11/15 10 ¶3-5
Nahum, Habakuk, ani Zefania Pustokantle Mukhel Mudʼde
2:1. Habakuk odheatmik ritin zagrut ani urbebhorit ravlo toxem ami ravonk zai. Amkam solʼlo melltta tednam tea pormonnem amchem chitop bodlunk ami toiar asonk zai.
2:3; 3:16. Jehovachea disak bhavarthan ravtana, vell khub unno asa mhunn ami visorchem nhoi!
2:4. Jehovachea zhoddttechea disak salvar zaunk ami visvaxiponnan thir ravonk zai.—Hebrevank 10:36-38.
Bible-ant Motiam Sodhum-ia
(Nahum 1:8) “Punn hunvarachea lotta bhaxen Aplea virodhiancho To sarkoch nas korta, ani kallokh gheun Aplea dusmananche fattik lagta.”
(Nahum 2:7) “Nodicheo manso ugoddtat; razvaddeant sogllo kampero.”
w07 11/15 9 ¶2
Nahum, Habakuk, ani Zefania Pustokantle Mukhel Mudʼde
2:7—Kosleo “nodicheo manso” ugoddleo? Nodicheo manso mhunnche Tigris nodi udkan Ninevehchea kottam modem zalʼle vattek suchit korta. Babilon ani Media 632 K.X.A. Ninevehcher add aile tednam tankam bhirant disonk na. Tanchim kottam vhodd aslolean tankam distalem ki te surokxit asat. Punn, ghosghosachea pausak lagon, Tigrisachi nodi bhoron aili. Itihaskar Diodorus-achea pormonnem, “xaracho ek bhag udkan bhorlo ani tachea kottancho boroch bhag moddlo” Bhakit kelʼlea pormonnem, Nodicheo manso ugoddleo, sukem tonn lasun voita toxem Nineveh rokddench kabar zaun gelem.—Nahum 1:8-10.
(Habakuk 3:17-19) “Kiteak anjirachem zhadd fulona zait ani dak-velink dako zainant zalear-ui, zoitunanchim zhaddam pik dina zatit ani xetam-mollantlem jevnna-khannak utpon mellona zalear-ui, oddpamnim anink menddram na zatit ani toxench gottheamnim gorvam mellonant zalear-ui, 18 Tori hanv Sorvespora sovem sontostolom, Deva mhojea Taroka sovem murgotttolom. 19 Dhoni Sorvespor mhojem boll! To mhoje pai merva bhaxen suddsuddit kortolo, ani mhojim panvlam porvotancher porian pavoitolo. Songit monddollichea fuddariak; taranchea vazontrancher.”
w07 11/15 10 ¶10
Nahum, Habakuk, ani Zefania Pustokantle Mukhel Mudʼde
3:17-19. Amkam Armagedʼdon-achea vellar vo tachea adim tras asot punn ami khuxalkaien Jehovachi seva korit ravlim zalear to amkam “boll” ditolo mhunn ami khatri dovrunk zata.