4
Dev Abrahama kodde Ek Korar Korta
Abraham bhavartan Devacheo adnia pallta ani Jehovah taka axirvad dita ani tachi sonsot vaddoitolo mhonn bhas dita
NOAHCHE buddte uprant, sumar 350 vorsam soron gelʼlim. Sonsoticho vhoddil Abraham Ur udorgotichea xarant jietalo, aiz tea xarak Iraq mhonnttat. Abraham ek thir bhavartacho monis aslo. Punn atam tachea bhavartachi porikxea zaunchi asli.
Jehovahn Abrahamank tacho zolmacho des soddun pordesant vochonk sanglem, to des zavun aslo Kanaan. Abrahaman fattim-fuddem soronastana manʼnun ghetlem. Tannem aplem ghorannem, mhonnge tachi potinn Sarah, tacho putno Lot ani tache zaite sevokank borobor vhele ani uprant lamb provas korun Kanaan ganvant to tombunim ravunk laglo. Abrahama kodde kellʼlea eka korarant Jehovah bhas dita ki To Abrahamachem ek vhodd raxttr kortolo, prithumechea sogllea kuttumbank tachea thaun axirvad melltolo ani tachi sonsot Kanaan des aplea tabeant gheteli.
Abraham ani Lot, hanchim menddram ani gorvamche hindd vaddle anik te girest zale. Svarthiponn nastana Abrahaman Lot-ak tache khoxe pormonnem taka zai to ganv vinchun kaddunk sanglem. Jordan nodicho pikavollicho ganv Lotan vinchun kaddlo ani Sodom xara lagim tannem vosti keli. Punn Sodomache lok onoitik asle – Jehovah virodh khor patkam kortale.
Uprant Jehovah Devan portean Abrahamank, tachi sonsot sorginchea noketram porim zateli mhonn bhas dili. Abrahaman hea bhasavnnecher bhavart dovorlo. Torui astana, Abrahamachi mogall potinn Sarah vanzddi asli. Abraham 99 vorsancho ani Sarah 90 vorsanchi asli tedna Devan tankam ek put zolmotolo mhonn Abrahamank sanglem. Devachea utra pormonnem, Saran Izak-ak zolm dilo. Abrahamank aninkui bhurgim aslim, punn Eden bhagent bhasailʼlo Soddvonndar Izaka thaun ieuncho aslo.
Tea mhonnosor Lot ani tachem kuttumb Sodomant jietalim, punn nitivont Lot xarachea onoitik loka sarko zavunk naslo. Jedna Jehovahn Sodomacho nas korpak tharailem tedna Tannem adim fuddem ieunchem asa tea nas-a vixim Lotak xiddkaunk devdutank dhaddle. Devdutanim Lotak ani tache kuttumbak Sodoma thaun fattim polloinastona pollun vochonk vinoti keli. Uprant Devan Sodom ani lagxilem noxttem xar Gomorrahcher ujeacho ani gondhokacho pavs ghalun tantlea sogllea lokacho nas kelo. Lot ani tacheo don dhuvo xarantlim bhair sorlim dekhun salvar zalim. Punn Lotachi potinn fattim vollun polloili, ghoddiek fattim soddlelea vostunk lagon. Hi Devachi adnia moddli dekhun, ti meli.
—Utpoti avesvor 11:10–19:38 hacher adarlelem asa.